திருப்புள்ளிருக்குவேளூர்

அருளியவர்: திருநாவுக்கரசர்
பண்: திருத்தாண்டகம்
தலம்: புள்ளிருக்குவேளூர்
நாடு: சோழநாடு காவிரி வடகரை

1

ஆண்டானை அடியேனை ஆளாக் கொண்டு அடியோடு முடியயன்மா லறியா வண்ணம்நீண்டானை நெடுங்களமா நகரான் றன்னை நேமிவான் படையால்நீ ளுரவோ னாகங்கீண்டானைக் கேதாரம் மேவி னானைக் கேடிலியைக் கிளர்பொறிவாள் அரவோ டென்புபூண்டானைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

சொற்பிரிப்பு

ஆண்டானை, அடியேனை ஆளாக் கொண்டு; அடியோடு முடிஅயன்மால் அறியா வண்ணம்நீண்டானை; நெடுங்களமா நகரான் தன்னை; நேமிவான் படையால்நீள் உரவோன் ஆகம்கீண்டானைக்; கேதாரம் மேவி னானைக்; கேடுஇலியைக்; கிளர்பொறிவாள் அரவோடு என்புபூண்டானைப்; புள்ளிருக்கு வேளூ ரானைப்;- போற்றாதே ஆற்றநாள் போக்கி னேனே.

உரை

மூலத்தில் தமிழ் உரை இல்லை.

2

சீர்த்தானைச் சிறந்தடியேன் சிந்தை யுள்ளே திகழ்ந்தானைச் சிவன்றன்னைத் தேவ தேவைக்கூர்த்தானைக் கொடுநெடுவேற் கூற்றந் தன்னைக் குரைகழலாற் குமைத்துமுனி கொண்ட அச்சம்பேர்த்தானைப் பிறப்பிலியை இறப்பொன் றில்லாப் பெம்மானைக் கைம்மாவி னுரிவை பேணிப்போர்த்தானைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

சொற்பிரிப்பு

சீர்த்தானைச், சிறந்துஅடியேன் சிந்தை உள்ளே திகழ்ந்தானைச், சிவன்தன்னைத், தேவ தேவைக்,கூர்த்தானைக், கொடுநெடுவேல் கூற்றம் தன்னைக் குரைகழலால் குமைத்து,முனி கொண்ட அச்சம்பேர்த்தானைப், பிறப்புஇலியை, இறப்புஒன்று இல்லாப் பெம்மானைக், கைம்மாவின் உரிவை பேணிப்போர்த்தானைப், புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

உரை

மூலத்தில் தமிழ் உரை இல்லை.

3

பத்திமையாற் பணிந்தடியேன் றன்னைப் பன்னாட் பாமாலை பாடப் பயில்வித் தானைஎத்தேவு மேத்தும் இறைவன் றன்னை எம்மானை என்னுள்ளத் துள்ளே யூறும்அத்தேனை அமுதத்தை ஆவின் பாலை அண்ணிக்குந் தீங்கரும்பை அரனை ஆதிப்புத்தேளைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

சொற்பிரிப்பு

பத்திமையால் பணிந்துஅடியேன் தன்னைப் பல்-நாள் பாமாலை பாடப் பயில்வித் தானை;எத்தேவும் ஏத்தும் இறைவன் தன்னை; எம்மானை; என்உள்ளத்து உள்ளே ஊறும்அத்தேனை; அமுதத்தை; ஆவின் பாலை; அண்ணிக்கும் தீங்கரும்பை; அரனை; ஆதிப்-புத்தேளைப்; புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

உரை

மூலத்தில் தமிழ் உரை இல்லை.

4

இருளாய உள்ளத்தி னிருளை நீக்கி இடர்பாவங் கெடுத்தேழை யேனை யுய்யத்தெருளாத சிந்தைதனைத் தெருட்டித் தன்போற் சிவலோக நெறியறியச் சிந்தை தந்தஅருளானை ஆதிமா தவத்து ளானை ஆறங்கம் நால்வேதத் தப்பால் நின்றபொருளானைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

சொற்பிரிப்பு

இருள்ஆய உள்ளத்தின் இருளை நீக்கி, இடர்பாவம் கெடுத்து,ஏழை யேனை உய்யத்தெருளாத சிந்தைதனைத் தெருட்டித், தன்போல் சிவலோக நெறிஅறியச் சிந்தை தந்தஅருளானை; ஆதிமா தவத்துஉ ளானை; ஆறுஅங்கம் நால்வேதத்து அப்பால் நின்றபொருளானைப்; புள்ளிருக்கு வேளூ ரானைப்;- போற்றாதே ஆற்றநாள் போக்கி னேனே.

உரை

மூலத்தில் தமிழ் உரை இல்லை.

5

மின்னுருவை விண்ணகத்தி லொன்றாய் மிக்கு வீசுங்கால் தன்னகத்தில் இரண்டாய்ச் செந்தீத்தன்னுருவின் மூன்றாய்த்தாழ் புனலின் நான்காய்த் தரணிதலத் தஞ்சாகி யெஞ்சாத் தஞ்சமன்னுருவை வான்பவளக் கொழுந்தை முத்தை வளரொளியை வயிரத்தை மாசொன் றில்லாப்பொன்னுருவைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

சொற்பிரிப்பு

மின்உருவை; விண்ணகத்தில் ஒன்றாய், மிக்கு வீசும்கால் தன்அகத்தில் இரண்டாய்ச், செந்தீத்-தன்உருவில் மூன்றுஆய்த்,தாழ் புனலில் நான்காய்த், தரணிதலத்து அஞ்சுஆகி எஞ்சாத் தஞ்சமன்உருவை; வான்பவளக் கொழுந்தை; முத்தை; வளர்ஒளியை; வயிரத்தை; மாசுஒன்று இல்லாப்பொன்உருவைப்; புள்ளிருக்கு வேளூ ரானைப்;- போற்றாதே ஆற்றநாள் போக்கி னேனே.

உரை

மூலத்தில் தமிழ் உரை இல்லை.

6

அறையார்பொற் கழலார்ப்ப அணியார் தில்லை அம்பலத்துள் நடமாடும் அழகன் றன்னைக்கறையார்மூ விலைநெடுவேற் கடவுள் தன்னைக் கடல்நாகைக் காரோணங் கருதி னானைஇறையானை என்னுள்ளத் துள்ளே விள்ளா திருந்தானை ஏழ்பொழிலுந் தாங்கி நின்றபொறையானைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

சொற்பிரிப்பு

அறைஆர்பொன் கழல்ஆர்ப்ப அணியார் தில்லை அம்பலத்துள் நடம்ஆடும் அழகன் தன்னைக்கறைஆர்மூ இலைநெடுவேல் கடவுள் தன்னைக் கடல்நாகைக் காரோணம் கருதி னானைஇறையானை என்உள்ளத்து உள்ளே விள்ளாது இருந்தானை ஏழ்பொழிலும் தாங்கி நின்றபொறையானைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

உரை

மூலத்தில் தமிழ் உரை இல்லை.

7

நெருப்பனைய திருமேனி வெண்ணீற் றானை நீங்காதென் னுள்ளத்தி னுள்ளே நின்றவிருப்பவனை வேதியனை வேத வித்தை வெண்காடும் வியன்துருத்தி நகரும் மேவிஇருப்பவனை இடைமருதோ டீங்கோய் நீங்கா இறையவனை எனையாளுங் கயிலை யென்னும்பொருப்பவனைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

சொற்பிரிப்பு

நெருப்புஅனைய திருமேனி வெண்நீற் றானை நீங்காதுஎன் உள்ளத்தின் உள்ளே நின்றவிருப்பவனை வேதியனை வேத வித்தை வெண்காடும் வியன்துருத்தி நகரும் மேவிஇருப்பவனை இடைமருதோடு ஈங்கோய் நீங்கா இறையவனை எனைஆளும் கயிலை என்னும்பொருப்பவனைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

உரை

மூலத்தில் தமிழ் உரை இல்லை.

8

பேரா யிரம்பரவி வானோ ரேத்தும் பெம்மானைப் பிரிவிலா அடியார்க் கென்றும்வாராத செல்வம் வருவிப் பானை மந்திரமுந் தந்திரமும் மருந்து மாகித்தீராநோய் தீர்த்தருள வல்லான் றன்னைத் திரிபுரங்கள் தீயெழத்திண் சிலைகைக் கொண்டபோரானைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

சொற்பிரிப்பு

பேர்ஆ யிரம்பரவி வானோர் ஏத்தும் பெம்மானைப் பிரிவிலா அடியார்க்கு என்றும்வாராத செல்வம் வருவிப் பானை மந்திரமும் தந்திரமும் மருந்தும் ஆகித்தீராநோய் தீர்த்தருள வல்லான் தன்னைத் திரிபுரங்கள் தீயெழத்திண் சிலைகைக் கொண்டபோரானைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

உரை

மூலத்தில் தமிழ் உரை இல்லை.

9

பண்ணியனைப் பைங்கொடியாள் பாகன் றன்னைப் படர்சடைமேற் புனல்கரந்த படிறன் றன்னைநண்ணியனை யென்னாக்கித் தன்னா னானை நான்மறையின் நற்பொருளை நளிர்வெண் டிங்கள்கண்ணியனைக் கடியநடை விடையொன் றேறுங் காரணனை நாரணனைக் கமலத் தோங்கும்புண்ணியனைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

சொற்பிரிப்பு

பண்ணியனைப் பைங்கொடியாள் பாகன் தன்னைப் படர்சடைமேல் புனல்கரந்த படிறன் தன்னைநண்ணியனை என்ஆக்கித் தன்ஆ னானை நான்மறையின் நல்பொருளை நளிர்வெண் திங்கள்கண்ணியனைக் கடியநடை விடைஒன்று ஏறும் காரணனை நாரணனைக் கமலத்து ஓங்கும்புண்ணியனைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

உரை

மூலத்தில் தமிழ் உரை இல்லை.

10

இறுத்தானை இலங்கையர்கோன் சிரங்கள் பத்தும் எழுநரம்பின் இன்னிசைகேட் டின்புற் றானைஅறுத்தானை அடியார்தம் அருநோய் பாவம் அலைகடலில் ஆலால முண்டு கண்டங்கறுத்தானைக் கண்ணழலாற் காம னாகங் காய்ந்தானைக் கனன்மழுவுங் கலையு மங்கைபொறுத்தானைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

சொற்பிரிப்பு

இறுத்தானை இலங்கையர்கோன் சிரங்கள் பத்தும் எழுநரம்பின் இன்இசைகேட்டு இன்புஉற் றானைஅறுத்தானை அடியார்தம் அருநோய் பாவம் அலைகடலில் ஆலாலம் உண்டு கண்டம்கறுத்தானைக் கண்அழலால் காமன் ஆகம் காய்ந்தானைக் கனல்.மழுவும் கலையும் மங்கைபொறுத்தானைப் புள்ளிருக்கு வேளூ ரானைப் போற்றாதே ஆற்றநாள் போக்கி னேனே.

உரை

மூலத்தில் தமிழ் உரை இல்லை.