திருமுறை 2 · 2.066 · 11

திருஆலவாய்

அருளியவர்
திருஞானசம்பந்தர்
பண்
காந்தாரம்
தலம்
ஆலவாய் (மதுரை)
நாடு
பாண்டியநாடு
குறிப்பு
திருநீற்றுப்பதிகம்

இரண்டாம் திருமுறை ›

1

மந்திர மாவது நீறு வானவர் மேலது நீறுசுந்தர மாவது நீறு துதிக்கப் படுவது நீறுதந்திர மாவது நீறு சமயத்தி லுள்ளது நீறுசெந்துவர் வாயுமை பங்கன் திருஆல வாயான் திருநீறே.
சொற்பிரிப்பு
மந்திரம் ஆவது நீறு; வானவர்மேலது நீறு;சுந்தரம் ஆவது நீறு; துதிக்கப்படுவது நீறுதந்திரம் ஆவது நீறு; சமயத்தில் உள்ளது நீறுசெந்துவர்வாய் உமை பங்கன் திரு ஆலவாயான் திருநீறே.
உரை

திருநீறு மந்திரம் போல நினைத்ததைக் கொடுக்கும். நினைத்தவரைக் காக்கும். வானவர்- சிவலோகத்திலுள்ளவர், சிவமானவர். மேலது- திருமேனியில் பூசப்பட்டது. சுந்தரம்-அழகு ,சிவப்பொலிவு. துதிக்கப்படுவது என்பதற்கு இத்திருப்பதிகமே சான்று. தந்திரம்- ஆகமம். சிவாகமத்தில், சிறப்பாகச் சொல்லப்படுவது. சமயத்திலுள்ளது - சிவ சமயத்தில் அழியாத பொருளாவது பதி, பசு, பாசம் என்னும் முப்பொருள். பாசம் - பசுவின் கண் இருந்து பதியால் நீறாக்கப்பட்ட உண்மையை உணர்த்துவது. உள்ளது -சிவம். 'ஓர்த்து உள்ளம் உள்ளது உணரின்' - (திருக்குறள்) திருநீறே சிவம். துவர் - பவளம். பங்கன்- பாகன். திருஆலவாயான்- மதுரைத்தலத்தில் திருவாலவாய்க் கோவிலினுள் எழுந்தருளி இருப்பவன். திருவாலவாயான் திருநீறு என்பது ஆறன்தொகையாதல் அறிவார்க்குத் திருநீறே சிவகதி தரும் என்னும் உண்மை இனிது புலப்படும். 'கங்காளன் பூசும் கவசத்திருநீற்றை... பூசி மகிழ்வாரே யாமாகில்... சாரும் சிவகதி..' (திருமந்திரம்).

2

வேதத்தி லுள்ளது நீறு வெந்துயர் தீர்ப்பது நீறுபோதந் தருவது நீறு புன்மை தவிர்ப்பது நீறுஓதத் தகுவது நீறு உண்மையி லுள்ளது நீறுசீதப் புனல்வயல் சூழ்ந்த திருஆல வாயான் திருநீறே.
சொற்பிரிப்பு
வேதத்தில் உள்ளது நீறு; வெந்துயர் தீர்ப்பது நீறு;போதம் தருவது நீறு; புன்மை தவிர்ப்பது நீறு;ஓதத் தகுவது நீறு; உண்மையில் உள்ளது நீறுசீதப்புனல் வயல் சூழ்ந்த திரு ஆலவாயான் திருநீறே.
உரை

வேதத்தில் சிறப்பாகத் திருநீறு ஓதப்பெற்றுள்ளது. கொடிய பிறவித் துயரைத் தீர்ப்பது திருநீறு. சிவஞானத்தைத் தருவது திருநீறு. அறியாமை முதலிய புன்மைகளை நீக்குவது திருநீறு. நூல்களை ஓதும்போது மனத்தூய்மை பெற அணியத் தகுவது திருநீறு. சிவத்தைப் போல என்றும் உள்ள பொருள் திருநீறு. குளிர்ந்த நீர் பாயும் வயல்கள் சூழ்ந்த திருவாலவாயான் திருநீறே சிவகதி தரும்.

3

முத்தி தருவது நீறு முனிவ ரணிவது நீறுசத்திய மாவது நீறு தக்கோர் புகழ்வது நீறுபத்தி தருவது நீறு பரவ இனியது நீறுசித்தி தருவது நீறு திருஆல வாயான் திருநீறே.
சொற்பிரிப்பு
முத்தி தருவது நீறு; முனிவர் அணிவது நீறு;சத்தியம் ஆவது நீறு; தக்கோர் புகழ்வது நீறு;பத்தி தருவது நீறு; பரவ இனியது நீறுசித்தி தருவது நீறு; திரு ஆலவாயான் திருநீறே.
உரை

மீண்டும் பிறந்து இறந்து உழலாத முத்தியைத் தருவது நீறு. எல்லாச் செல்வங்களையும் வெறுத்தொதுக்கிய முனிவர்கள் விரும்பி அணிவது நீறு. உள்பொருளாவது நீறு. சிவனடியார் அணிவது நீறு. எண்வகைச் சித்தி அளிப்பது நீறு. திருவாலவாயான் திருநீறே சிவகதி ஆகும்.

4

காண இனியது நீறு கவினைத் தருவது நீறுபேணி அணிபவர்க் கெல்லாம் பெருமை கொடுப்பது நீறுமாணந் தகைவது நீறு மதியைத் தருவது நீறுசேணந் தருவது நீறு திருஆல வாயான் திருநீறே.
சொற்பிரிப்பு
காண இனியது நீறு; கவினைத் தருவது நீறு;பேணி அணிபவர்க்கு எல்லாம் பெருமை கொடுப்பது நீறு;மாணம் தகைவது நீறு; மதியைத் தருவது நீறு;சேணம் தருவது நீறு; திரு ஆலவாயான் திருநீறே.
உரை

தன்னை அணிந்தாரை அழகராக்கிக் காண்பவருக்கு இனிமை தருவது நீறு. அணிவோருக்குச் சிவப்பொலிவு தருவது நீறு. விரும்பி அணிபவர்க்கெல்லாம் பெருமையைத் தருவது நீறு. மரணத்தைத் தடுப்பது நீறு. அறிவு நுட்பத்தைத் தருவது திருநீறு. பாசத்தில் உழன்று வருந்தும் சேய்மையில் உள்ளவருக்குத் திருவாலவாயான் திருநீறே சிவகதி தரும்.

5

பூச இனியது நீறு புண்ணிய மாவது நீறுபேச இனியது நீறு பெருந்தவத் தோர்களுக் கெல்லாம்ஆசை கெடுப்பது நீறு வந்தம தாவது நீறுதேசம் புகழ்வது நீறு திருஆல வாயான் திருநீறே.
சொற்பிரிப்பு
பூச இனியது நீறு; புண்ணியம் ஆவது நீறு;பேச இனியது நீறு; பெருந் தவத்தோர்களுக்கு எல்லாம்ஆசை கெடுப்பது நீறு; அந்தம் அது ஆவது நீறு;தேசம் புகழ்வது நீறு திரு ஆலவாயான் திருநீறே.
உரை

பூசப் பூச இனிமையைத் தருவது நீறு. பூசப்பூச சிவபுண்ணியத்தை வளர்ப்பது நீறு. (சிவத்தின் பெருமை பேச இனிதாதல் போல) பெருமையைப் பேசப்பேச இனிமைஉண்டாக்குவது நீறு. பெரிய தவத்தினருக்கெல்லாம் பற்றினை ஒழிப்பது நீறு. அந்தமிலா ஆனந்தத்தை அளிப்பது நீறு. தேசங்கள் எல்லாவற்றாலும் புகழப்படுவது நீறு. திருவாலவாயான் திருநீறே சிவகதி தரும்.

6

அருத்தம தாவது நீறு அவலம் அறுப்பது நீறுவருத்தந் தணிப்பது நீறு வானம் அளிப்பது நீறுபொருத்தம தாவது நீறு புண்ணியர் பூசும்வெண் ணீறுதிருத்தகு மாளிகை சூழ்ந்த திருஆல வாயான் திருநீறே.
சொற்பிரிப்பு
அருத்தம் அது ஆவது நீறு; அவலம் அறுப்பது நீறு;வருத்தம் தணிப்பது நீறு; வானம் அளிப்பது நீறு;பொருத்தம் அது ஆவது நீறு; புண்ணியர் பூசும் வெண்நீறு;திருத் தகு மாளிகை சூழ்ந்த திரு ஆலவாயான் திருநீறே.
உரை

செல்வமாவது நீறு. துன்பத்தைப் போக்குவது நீறு. வருத்தத்தை ஒழிப்பது நீறு. துறக்கத்தைத் தருவது நீறு. பொதுவாக எல்லாச் சமயத்தவருக்கும், சிறப்பாகச் சைவ சமயத்தவருக்கும் பொருத்தமாயிருப்பது திருநீறு. சிவபுண்ணியத்தவரும் பசு புண்ணியத்தவரும் பூசுவது வெண்ணீறு. அழகிய மாளிகைகள் சூழ்ந்த திருவாலவாயான் திருநீறே சிவகதி தரும்.

7

எயிலது வட்டது நீறு விருமைக்கும் உள்ளது நீறுபயிலப் படுவது நீறு பாக்கிய மாவது நீறுதுயிலைத் தடுப்பது நீறு சுத்தம தாவது நீறுஅயிலைப் பொலிதரு சூலத் தாலவா யான் திருநீறே.
சொற்பிரிப்பு
எயில் அது அட்டது நீறு: இருமைக்கும் உள்ளது நீறு;பயிலப்படுவது நீறு; பாக்கியம் ஆவது நீறு:துயிலைத் தடுப்பது நீறு: சுத்தம் அது ஆவது நீறுஅயிலைப் பொலிதரு சூலத்து ஆலவாயான் திருநீறே.
உரை

திரிபுரத்தை எரித்தது நீறு. இம்மை மறுமை இரண்டற்கும் துணையாக உள்ளது நீறு. அணிந்து பழகுவதற்கு உரியது நீறு. செல்வமாவது நீறு. அறியாமையாகிய கேவலத்தையும் மயக்கமாகிய சகலத்தையும் தடுப்பது நீறு. சுத்தாவத்தையாய் விளங்குவது நீறு. கூர்மையால் பொலியும் சூலத்தை ஏந்திய திருவாலவாயான் திருநீறே சிவகதி தரும்.

8

இராவணன் மேலது நீறு எண்ணத் தகுவது நீறுபராவண மாவது நீறு பாவ மறுப்பது நீறுதராவண மாவது நீறு தத்துவ மாவது நீறுஅராவணங் குந்திரு மேனி ஆலவா யான்திரு நீறே.
சொற்பிரிப்பு
இராவணன்மேலது நீறு: எண்ணத் தகுவது நீறுபராவணம் ஆவது நீறு; பாவம் அறுப்பது நீறு;தராவணம் ஆவது நீறு; தத்துவம் ஆவது நீறுஅரா வணங்கும் திருமேனி ஆலவாயான் திருநீறே.
உரை

இராவணன் சிவனருள் பெறப் பூசியது நீறு. திருநீறு பேறளிக்கும் என்னும் உண்மை எண்ணத் தக்கது. பராசத்தியின் சொரூபமாவது நீறு. பாவத்தை ஒழிப்பது திருநீறு. மெய்ப்பொருளாவது நீறு. தத்துவமாவது நீறு. பாம்புகள் தாழ்ந்து அழகு செய்யும் திருமேனியனாகிய திருவாலவாயான் திருநீறே சிவகதி தரும்.

9

மாலொ டயனறி யாத வண்ணமு முள்ளது நீறுமேலுறை தேவர்கள் தங்கள் மெய்யது வெண்பொடி நீறுஏல உடம்பிடர் தீர்க்கும் இன்பந் தருவது நீறுஆலம துண்ட மிடற்றெம் மாலவா யான்திரு நீறே.
சொற்பிரிப்பு
மாலொடு அயன் அறியாத வண்ணமும் உள்ளது நீறு;மேல் உறை தேவர்கள் தங்கள் மெய்யது வெண்பொடி-நீறு;ஏல உடம்பு இடர் தீர்க்கும் இன்பம் தருவது நீறுஆலம் அது உண்ட மிடற்று எம் ஆலவாயான் திருநீறே.
உரை

திருமாலோடு பிரமனுமறிய முடியாத வண்ணம் உள்ளது நீறு. வானுலகத்தவர்களான தேவர்களுடைய உடம்பில் பூசப்படுவது நீறு. உடம்பெடுக்கும் துன்பத்தைப் போக்கி இன்பத்தைத் தருவது நீறு. நஞ்சுண்ட கண்டனாகியதிருவாலவாயான் திருநீறே சிவகதி தரும்.

10

குண்டிகைக் கையர்க ளோடு சாக்கியர் கூட்டமுங்கூடகண்டிகைப் பிப்பது நீறு கருத இனியது நீறுஎண்டிசைப் பட்ட பொருளார் ஏத்துந் தகையது நீறுஅண்டத்த வர்பணிந் தேத்தும் ஆலவா யான்திரு நீறே.
சொற்பிரிப்பு
குண்டிகைக் கையர்களோடு சாக்கியர் கூட்டமும் கூடகண் திகைப்பிப்பது நீறு; கருத இனியது நீறுஎண்திசைப்பட்ட பொருளார் ஏத்தும் தகையது நீறு;அண்டத்தவர் பணிந்து ஏத்தும் ஆலவாயான் திருநீறே.
உரை

கமண்டலத்தை ஏந்திய கையராகிய கீழ்மக்கள் சமணருடன் சாக்கியர் கூட்டத்தினரைத் திகைக்கச் செய்தது நீறு. தியானிக்க இனிமையைத் தருவது நீறு. எட்டுத் திசையிலும் சிவமாகிய மெய்ப்பொருளை அடைந்தவரும் விரும்பினவரும் வழிபடுவோருமாகிய சைவர் ஏத்தும் தகைமை உடையது நீறு. மேலுலகத்தவர் பணிந்து வழிபடும் திருவாலவாயான் திருநீறே சிவகதி தரும்.

11

ஆற்றல் அடல்விடை யேறும் ஆலவா யான்திரு நீற்றைப்போற்றிப் புகலி நிலாவும் பூசுரன் ஞானசம் பந்தன்தேற்றித் தென்னனுடலுற்ற தீப்பிணி யாயின தீரச்சாற்றிய பாடல்கள் பத்தும் வல்லவர் நல்லவர் தாமே.
சொற்பிரிப்பு
ஆற்றல் அடல் விடை ஏறும் ஆலவாயான் திருநீற்றைபோற்றிப் புகலி நிலாவும் பூசுரன் ஞானசம்பந்தன்தேற்றி, தென்னன் உடல் உற்ற தீப்பிணி ஆயின தீரச்சாற்றிய பாடல்கள் பத்தும் வல்லவர் நல்லவர் தாமே.
உரை

ஆற்றலும் கொல்லும் வலிமையும் உடைய விடையை ஊர்தியாக உடையவனாகிய ஆலவாயான் திருநீற்றைப் போற்றி, சீகாழிப் பூசுரன் (பூமியில் வாழும் தேவன்) ஞானசம்பந்தன் சிவத்தின் மாண்பினைத் தெளிவித்துப் பாண்டியனுடைய உடற்பிணி, உயிர்ப்பிணி ஆகிய தீய பிணிகள் தீரச் சாற்றிய பாடல்கள் பத்தும் வல்லவர்கள் நல்லவர்கள்.