திருப்பிரமபுரம்

பிரமபுரம் அமர்ந்த பெருமான் இரத்தக் கறைபடிந்த வேல் இலர் போலும். பிரம கபாலத்தைத் தரித்திலர் போலும்; வேதத்தைக் கூறவில்லை போலும்; பாம்பை அரையில் கட்டிலர் போலும்; உடுக்கையைக் கையில் கொண்டிலர் போலும்; பாசக் கயிற்றினைப் பிடித்திலர் போலும்; பிறையும் சடையில் இலர் போலும்.

பிரமபுரம் அமர்ந்த பெருமான் கூரிய அம்பு இலர் போலும். கொக்கினது இறகு இலர் போலும்; மணிமாலை பூண்டிலர் போலும்; ஆமை ஓட்டை அணிந்திலர் போலும்; கொன்றை மாலை சடையில் இலர் போலும்; சண்டிகேசுரருக்கு அருள் செய்திலர் போலும்; பல பெயர்கள் இவருக்கு இலர் போலும்.

பிரமபுரம் அமர்ந்த பெருமான் சித்துக்களில் வல்லவர் உருவம் இலர் போலும். தேசாந்திரியாகத் திரிந்திலர் போலும்; கூக்குரலிட்டு வேகமாக வரும் காளியின் கோபாவேசத்தை நீக்கிலர் போலும்; எய்த்த நயனம் இடந்த திருமாலுக்குச் சக்கரம் ஈந்திலர் போலும்; பித்தர் வடிவு போலும் வடிவு இலர் போலும்.

பிரமபுரம் அமர்ந்த பெருமான் நஞ்சுடைய பாம்பினை ஆட்டுவது இலர் போலும்; மிடற்றில் நஞ்சிலர் போலும்; அரையில் கச்சு தரித்திலர் போலும்; சடையில் கங்கையைத் தரித்திலர் போலும்; மொய்த்த வலிய பேய்கள் சூழ்ந்திலர் போலும்; திரிபுரங்களை அழித்திலர் போலும்; பிச்சையை யாசித்திலர் போலும்.

பிரமபுரம் அமர்ந்த பெருமான் செவிக்குத் தோடு இலர் போலும் சூலத்தைக் கையிற் பிடித்திலர் போலும்; ஆடுகின்ற பெரிய கையை உடைய வலிய யானையைத் தோல் உரித்திலர் போலும்; கரத்தில் மண்டையோடு இலர் போலும்; ஒளி வீசுகின்ற நெருப்பு கையில் இலர் போலும்.

பெண்டிர் நெருங்கி எழும் செல்வப் பிரமபுரத்து அமர்ந்த பெருமான் விண்ணிடத்திலுள்ள தேவர்கள் இவரைக் கண்டிலர் போலும்; தக்கனின் வேள்வியை அழித்திலர் போலும்; படைத்தற் கடவுளாகிய அயன் தலைவீழ அன்று அறுத்திலர் போலும்; அழகிய எலும்பினொடு உருத்திராக்க வடங்கள் தரித்திலர் போலும்.

புகழும் பெருமையும் பெருகும் பிரமபுரத்தில் அமர்ந்த பெருமான் பன்றியின் கொம்பினை அணிந்திலர் போலும்; அருச்சுனனுக்கு அருள் செய்திலர் போலும், கோபித்து வந்த எமனைக் கொல்ல கால்கொடு பாய்ந்திலர் போலும்; நெருங்கிய பிணங்களைச் சுடும் காட்டில் கூத்தாடி நெருங்கிலர் போலும்.

தேன் மலர்ப்பொழில் சூழ்ந்த பிரமபுரம் அமர்ந்த பெருமான் மழுப்படையைத்தரித்திலர் போலும்; கபால மாலையைப் பூண்டிலர் போலும்; இலங்கை அரசனான இராவணனை அன்று அடர்த்திலர் போலும்; உயர்ந்த புனத்து இளமானும் புலியின் தோலும் இலர் போலும்.

பெண் யானையின் நடை உடைய அழகிய பெண்கள் நிறைந்துள்ள பிரமபுரத்தமர்ந்த பெருமான் அடியையும் முடியையும் மாலும் அயனும் தேட அளப்பிலர் போலும்; மணமுடைய மலரம்புகள் ஐந்து உடைய மன்மதனை தீப்பொறி பறக்க விழித்திலர் போலும்; பூமியிற் பிறந்த பாலனுக்காகப்      பாற்கடல் ஈந்திலர் போலும்.

பிரமபுரம் அமர்ந்த பெருமான் உடலில் ஆடையில்லாச் சமணருக்கு வெளிப்படத் தோன்றிலர் போலும்; பற்றற்றவர், ஆலமர நீழலில் முனிவர்கள் நால்வருக்கும் அறங்கள் உரைத்திலர் போலும்; மண்டையோடு தலையில் முடித்திலர் போலும்; காளையை வாகனமாக ஊர்ந்திலர் போலும்.

பெண்ணுருவமும் ஆண் உருவமும் அல்லாத, பிரமபுரத்து அண்ணல் செய்யாதவை எல்லாம் அறிந்து அவற்றை வகையாக வகுத்து ஞானசம்பந்தன் நவின்றன பத்தும் வல்லவர்களாகிய அவர்கள் தேவர்களோடு இனிதாக வீற்றிருப்பர்.