திருக்குடவாயில்

அருளியவர்: திருஞானசம்பந்தர்
பண்: காந்தாரம்
தலம்: குடவாயில்
நாடு: சோழநாடு காவிரித் தென்கரை

1

கலைவாழும் அங்கையீர் கொங்கையாருங் கருங்கூந்தல்அலைவாழுஞ் செஞ்சடையில் அரவும்பிறையும் அமர்வித்தீர்குலைவாழை கமுகம்பொன் பவளம்பழுக்குங் குடவாயில்நிலைவாழுங் கோயிலே கோயிலாக நின்றீரே

சொற்பிரிப்பு

கலை வாழும் அம்கையீர்! கொங்கை ஆரும் கருங்கூந்தல்அலை வாழும் செஞ்சடையில், அரவும் பிறையும் அமர்வித்தீர்!குலைவாழை கமுகம் பொன் பவளம்பழுக்கும் குடவாயில்,நிலை வாழும் கோயிலே கோயில்ஆக நின்றீரே.

உரை

ஆண்மான் தங்கும் அழகிய கையினை உடையீர்! நறுமணம் வீசும் கரிய, கூந்தலாகிய அலைகளை உடைய கங்கை வாழும் செஞ்சடையில் பாம்பையும் பிறையையும் ஒருங்கே இருக்கச் செய்தீர்! வாழை பொன் போலக் குலையீனும், கமுகம் செம்பவளம் போலப் பழுக்கும் திருக்குடவாயிலாகிய நிலையில் உள்ள திருக்கோயிலையே கோயிலாகக் கொண்டு நின்றீரே!

2

அடியார்ந்த பைங்கழலுஞ் சிலம்பும்ஆர்ப்ப அங்கையில்செடியார்ந்த வெண்டலையொன் றேந்தியுலகம் பலிதேர்வீர்குடியார்ந்த மாமறையோர் குலாவியேத்துங் குடவாயில்படியார்ந்த கோயிலே கோயிலாகப் பயின்றீரே

சொற்பிரிப்பு

அடி ஆர்ந்த பைங்கழலும் சிலம்பும் ஆர்ப்ப, அங்கையில்செடி ஆர்ந்த வெண்தலை ஒன்று ஏந்தி, உலகம் பலி தேர்வீர்!குடி ஆர்ந்த மா மறையோர் குலாவி ஏத்தும் குடவாயில்,படி ஆர்ந்த கோயிலே கோயில்ஆகப் பயின்றீரே.

உரை

திருவடியிற் சேர்ந்த பசிய பொன்னாலான கழலும் சிலம்பும் ஒலிக்க, அகங்கையில் நாற்றமுடைய வெளிறிய மண்டையோட்டை ஏந்தி உலகெங்கும் பிச்சை ஏற்பீர். பெருமையுடைய மறையோர்கள் குடியாக அமர்ந்து மகிழ்ந்து கொண்டாடும் குடவாயில் மண்ணில் அமைந்த திருக்கோவிலையே உம்முடைய கோயிலாகக் கொண்டீரே!

3

கழலார்பூம் பாதத்தீர் ஓதக்கடலில் விடமுண்டன்றழலாருங் கண்டத்தீர் அண்டர்போற்றும் அளவினீர்குழலார வண்டினங்கள் கீதத்தொலிசெய் குடவாயில்நிழலார்ந்த கோயிலே கோயிலாக நிகழ்ந்தீரே

சொற்பிரிப்பு

கழல் ஆர் பூம்பாதத்தீர்! ஓதக்கடலில் விடம் உண்டு, அன்று,அழல் ஆரும் கண்டத்தீர்! அண்டர் போற்றும் அளவினீர்!குழல் ஆர் வண்டுஇனங்கள் கீதத்து ஒலிசெய் குடவாயில்,நிழல் ஆர்ந்த கோயிலே கோயில்ஆக நிகழ்ந்தீரே.

உரை

கழல் கட்டிய அழகிய பாதத்தை உடையீர்! அலை கடலில் தோன்றிய நஞ்சினை உண்டு வெப்பமான கண்டத்தை உடையீர்! தேவர்கள் போற்றி வழிபடும் அளவுக்கு அருள் செய்வீர்! மகளிர் கூந்தலில் மொய்க்கும் வண்டினங்கள் பாட்டொலி செய்யும் குடவாசலில் அருளார்ந்த திருக்கோவிலையே உம்முடைய கோயிலாகக் கொண்டீரே!

4

மறியாருங் கைத்தலத்தீர் மங்கைபாக மாகச்சேர்ந்தெறியாரும் மாமழுவும் எரியுமேந்துங் கொள்கையீர்குறியார வண்டினங்கள் தேன்மிழற்றுங் குடவாயில்நெறியாருங் கோயிலே கோயிலாக நிகழ்ந்தீரே

சொற்பிரிப்பு

மறி ஆரும் கைத்தலத்தீர்! மங்கைபாகம்ஆகச் சேர்ந்து,எறி ஆரும் மா மழுவும் எரியும் ஏந்தும் கொள்கையீர்!குறி ஆர வண்டுஇனங்கள் தேன் மிழற்றும் குடவாயில்,நெறி ஆரும் கோயிலே கோயில்ஆக நிகழ்ந்தீரே

உரை

மான் கன்று தங்கும் கைத்தலம் உடையீர்! உமையம்மையைப் பாகமாகச் சேர்ந்து எறியப்படுகின்ற பெருமையுடைய மழுவும் நெருப்பும் கரங்களில் ஏந்தும் இயல்புடையீர்! போதுகளை மலர்த்தும் குறிப்புடைய வண்டுக் கூட்டங்கள் தேன் போல இனிமையாக மிழற்றும் குடவாயிலில், வேதாகம நெறி பொருந்திய திருக்கோவிலையே உம்முடைய கோவிலாகக் கொண்டீரே!

5

இழையார்ந்த கோவணமுங் கீளும்எழிலார் உடையாகப்பிழையாத சூலம்பெய் தாடல்பாடல் பேணினீர்குழையாரும் பைம்பொழிலும் வயலுஞ்சூழ்ந்த குடவாயில்விழவார்ந்த கோயிலே கோயிலாக மிக்கீரே

சொற்பிரிப்பு

இழை ஆர்ந்த கோவணமும் கீளும் எழில் ஆர் உடைஆக,பிழையாத சூலம் பெய்து ஆடல்பாடல் பேணினீர்!குழை ஆரும் பைம்பொழிலும் வயலும் சூழ்ந்த குடவாயில்,விழவு ஆர்ந்த கோயிலே கோயில்ஆக மிக்கீரே.

உரை

நூலிழையினால் தைக்கப்பட்ட கோவணமும் கீளும் எழில் நிறைந்த உடையாக, குறி பிழையாத சூலம் வீசிப் பாடலுடன் ஆடல் விரும்பினீர்! தளிர்கள் தழைத்த பூஞ்சோலைகளின் நறுவாசம் வீசுங் குடவாயிலில் விழாக்கள் நிறைந்த திருக்கோவிலையே உம்முடைய கோயிலாகக் கொண்டீரே!

6

அரவார்ந்த திருமேனி யானவெண்ணீ றாடினீர்இரவார்ந்த பெய்பலிகொண் டிமையோரேத்த நஞ்சுண்டீர்குரவார்ந்த பூஞ்சோலை வாசம்வீசுங் குடவாயில்திருவார்ந்த கோயிலே கோயிலாகத் திகழ்ந்தீரே

சொற்பிரிப்பு

அரவு ஆர்ந்த திருமேனி ஆன வெண்நீறு ஆடினீர்!இரவு ஆர்ந்த பெய் பலி கொண்டு, இமையோர் ஏத்த நஞ்சு உண்டீர்!குரவு ஆர்ந்த பூஞ்சோலை வாசம் வீசும் குடவாயில்,திரு ஆர்ந்த கோயிலே கோயில்ஆகத் திகழ்ந்தீரே.

உரை

பாம்பினைக் கச்சாகக் கட்டிய திருமேனி திருவெண்ணீற்றில் மூழ்குதலுடையீர் !இரந்து பெய்த பிச்சையைக் கொண்டு பின்னும் தேவர்கள் போற்ற நஞ்சுண்டீர்! குரவ மரங்கள் நிறைந்த பூஞ்சோலையின் வாசம் வீசும் குடவாயிலில் மங்கலமிக்க திருக்கோவிலையே உம்முடைய கோயிலாகக் கொண்டீரே!

7

பாடலார் வாய்மொழியீர் பைங்கண்வெள்ளே றூர்தியீர்ஆடலார் மாநடத்தீர் அரிவைபோற்றும் ஆற்றலீர்கோடலார் தும்பிமுரன் றிசைமிழற்றுங் குடவாயில்நீடலார் கோயிலே கோயிலாக நிகழ்ந்தீரே

சொற்பிரிப்பு

பாடல் ஆர் வாய்மொழியீர்! பைங்கண் வெள்ஏறு ஊர்தியீர்!ஆடல் ஆர் மா நடத்தீர்! அரிவை போற்றும் ஆற்றலீர்!'கோடல் ஆர் தும்பி முரன்று இசை மிழற்றும் குடவாயில்,நீடல் ஆர் கோயிலே கோயில்ஆக நிகழ்ந்தீரே.

உரை

வேதப்பாடல் மிக்க வாயினை உடையீர்! பசிய கண்ணை உடைய வெள்ளேற்றினை ஊர்தியாக உடையீர்! மகா தாண்டவம் ஆடுதலைப் புரிந்தீர்! பெண் (உமை) போற்றும் வலிமை உடையீர்! காந்தளில் மொய்த்த வண்டு இசை மிழற்றும் குடவாயிலில் நீண்ட திருக்கோவிலையே உம்முடைய கோயிலாகக் கொண்டீரே!

8

கொங்கார்ந்த பைங்கமலத் தயனுங்குறளாய் நிமிர்ந்தானும்அங்காந்து தள்ளாட அழலாய்நிமிர்ந்தீர் இலங்கைக்கோன்தங்காதல் மாமுடியுந் தாளும் அடர்த்தீர் குடவாயில்பங்கார்ந்த கோயிலே கோயிலாகப் பரிந்தீரே

சொற்பிரிப்பு

கொங்கு ஆர்ந்த பைங்கமலத்து அயனும், குறள்ஆய் நிமிர்ந்தானும்,அங்காந்து தள்ளாட, அழல்ஆய் நிமிர்ந்தீர்!இலங்கைக் கோன் தம் காதல் மா முடியும் தாளும் அடர்த்தீர்! குடவாயில்,பங்கு ஆர்ந்த கோயிலே கோயில்ஆகப் பரிந்தீரே.

உரை

தேனும் மணமும் உள்ள அழகிய தாமரை மலரின் மேல் இருக்கும் பிரமனும் குறளாகி இருந்து விண்முட்ட நீண்டவனும் வாய் திறந்து தடுமாற தீப்பிழம்பாக நிமிர்ந்தீர் ! இலங்கைக்கு அரசனான இராவணனின் பெருமை கொண்ட பெரிய முடிகளையும் வீரத்தையும் அழித்தீர்! குடவாயிலின் கூறாக அமைந்த திருக்கோவிலையே உம்முடையகோயிலாகக் கொண்டீரே!

9 Unavailable

இந்தப் பாடல் மூலத்தில் கிடைக்கப்பெறவில்லை. பாடல் வரிகள் இங்கே சேர்க்கப்படவில்லை.

இப்பதிகத்தில் 9-ம் பாடல் கிடைக்கப்பெறவில்லை.

சொற்பிரிப்பு

9ஆம் பாடல் கிடைக்கப்பெறவில்லை.

உரை

9ஆம் பாடல் கிடைக்கப்பெறவில்லை.

10

தூசார்ந்த சாக்கியருந் தூய்மையில்லாச் சமணரும்ஏசார்ந்த புன்மொழிநீத் தெழில்கொள்மாடக் குடவாயில்ஆசாரஞ் செய்மறையோர் அளவிற்குன்றா தடிபோற்றத்தேசார்ந்த கோயிலே கோயிலாகச் சேர்ந்தீரே

சொற்பிரிப்பு

தூசு ஆர்ந்த சாக்கியரும், தூய்மை இல்லாச் சமணரும்,ஏசு ஆர்ந்த புன்மொழி நீத்து, எழில் கொள் மாடக் குடவாயில்,ஆசாரம் செய் மறையோர் அளவின் குன்றாது அடி போற்றதேசு ஆர்ந்த கோயிலே கோயில்ஆகச் சேர்ந்தீரே.

உரை

தூசு படிந்த உடையுடுத்த சாக்கியரும், சுத்தமில்லாத சமணரும் கூறும் இகழ்ச்சி நிறைந்த புல்லிய சொற்களை நீத்து, அழகிய மாட மாளிகைகளைக் கொண்ட திருக்குடவாசலில் நல்லொழுக்கம் மிக்க மறையோர்கள் அளவில் குறையாது உம் திருவடியைப் போற்ற, ஒளி நிறைந்த திருக்கோவிலையே உம்முடைய கோயிலாகக் கொண்டீரே!

11

நளிர்பூந் திரைமல்கு காழிஞான சம்பந்தன்குளிர்பூங் குடவாயிற் கோயில்மேய கோமானைஒளிர்பூந் தமிழ்மாலை உரைத்தபாடல் இவைவல்லார்தளர்வான தானொழியத் தகுசீர்வானத் திருப்பாரே.

சொற்பிரிப்பு

நளிர் பூந் திரை மல்கு காழி ஞானசம்பந்தன்,குளிர் பூங் குடவாயில் கோயில் மேய கோமானை,ஒளிர்பூந்தமிழ்மாலை உரைத்த பாடல்இவை வல்லார்,தளர்வுஆனதாம் ஒழிய,தகு சீர் வானத்து இருப்பாரே.

உரை

குளிர்ந்த அலைகள் மிகுதியாக வீசும் சீகாழியில் ஞானசம்பந்தன் குளிர்ச்சியுடைய அழகிய குடவாயிற் கோயிலில் இருக்கும் தலைவனை ஒளிரும் தமிழால் பாடிய சொன்மாலைப் பாடல்கள் இவை வல்லார் தளர்ச்சி தரும் துன்பங்கள் ஒழிய, தகுந்தபெருமையுடன் வானுலகத்தில் இருப்பாரே!