திருநல்லூர்

அருளியவர்: திருஞானசம்பந்தர்
பண்: காந்தாரம்
தலம்: நல்லூர்
நாடு: சோழநாடு காவிரித் தென்கரை

1

பெண்ணமருந் திருமேனி யுடையீர்பிறங்கு சடைதாழப்பண்ணமரும் நான்மறையே பாடியாடல் பயில்கின்றீர்திண்ணமரும் பைம்பொழிலும் வயலுஞ்சூழ்ந்த திருநல்லூர்`மண்ணமருங் கோயிலே கோயிலாக மகிழ்ந்தீரே

சொற்பிரிப்பு

பெண் அமரும் திருமேனி உடையீர்! பிறங்கு சடை தாழப்பண் அமரும் நால்மறையே பாடி ஆடல் பயில்கின்றீர்!திண் அமரும் பைம்பொழிலும் வயலும் சூழ்ந்த திரு நல்லூர்மண் அமரும் கோயிலே கோயில்ஆக மகிழ்ந்தீரே.

உரை

பெண்ணை ஒரு பாகத்தில் கொண்ட திருமேனியை உடையவரே! விளங்குகின்ற சடைமுடி தாழ, நான்கு மறைகளையும் இசையுடன் பாடிக் கொண்டு கூத்தாடுதலை இடைவிடாது செய்கின்றீர்! நெருங்கிய பசிய பொழிலும் வயலும் சூழ்ந்த திருநல்லூரில், மண்ணுலகத்தவர் விரும்பும் திருக்கோயிலையே உம்முடைய கோயிலாக மகிழ்ந்தீரே!

2

அலைமல்கு தண்புனலும் பிறையுஞ்சூடி அங்கையில்கொலைமல்கு வெண்மழுவும் அனலுமேந்துங் கொள்கையீல்சிலைமல்கு வெங்கணையாற் புரமூன்றெரித்தீர் திருநல்லூர்மலைமல்கு கோயிலே கோயிலாக மகிழ்ந்தீரே

சொற்பிரிப்பு

அலை மல்கு தண்புனலும் பிறையும் சூடி, அங்கையில்கொலை மல்கு வெண்மழுவும் அனலும் ஏந்தும் கொள்கையீர்! சிலை மல்கு வெங்கணையால் புரம்மூன்றும் எரித்தீர்! திரு நல்லூர், மலை மல்கு கோயிலே கோயில்ஆக மகிழ்ந்தீரே.

உரை

அலைகள் மிகவீசும் கங்கையாற்றினையும் பிறையையும் சிரசில் சூடி ,அகங்கையில் கொலைத் தொழில் உடைய வெண்மையான ஒளிவீசும் மழுப்படையையும் நெருப்பையும் ஏந்துவீர்! மேரு மலையாகிய வில்லில் எய்தப் பெற்ற திருமாலாகிய கொடிய கணையினால் திரிபுரம் மூன்றையும் எரியச் செய்தீர்! திருநல்லூரில் மலைபோலும் தோற்றம் உடைய திருக்கோயிலையே உம்முடைய கோயிலாகக் கொண்டு மகிழ்ந்தீரே!

3

குறைநிரம்பா வெண்மதியஞ் சூடிக்குளிர்புன் சடைதாழப்பறைநவின்ற பாடலோ டாடல்பேணிப் பயில்கின்றீர்சிறைநவின்ற தண்புனலும் வயலுஞ்சூழ்ந்த திருநல்லூர்மறைநவின்ற கோயிலே கோயிலாக மகிழ்ந்தீரே

சொற்பிரிப்பு

குறை நிரம்பா வெண்மதியம் சூடிக் குளிர்புன்சடை தாழ, பறை நவின்ற பாடலோடு ஆடல் பேணிப் பயில்கின்றீர்! சிறை நவின்ற தண்புனலும் வயலும் சூழ்ந்த திரு நல்லூர், மறை நவின்ற கோயிலே கோயில்ஆக மகிழ்ந்தீரே.

உரை

பிறைமதியைச் சடையிற்சூடி, கங்கையாற்றால் குளிர்ந்த சடை தாழ, பறை ஒலிக்கப் பாடலோடு கூத்தாடலையும் விரும்பிப் பயில்கின்றீர்! அணைகளால் தடை செய்யப்பட்ட குளிர்ந்த புனலும் வயலும் சூழ்ந்த திருநல்லூரில் வேதங்கள் மிக்கொலிக்கும் திருக்கோயிலையே உம்முடைய கோயிலாகக் கொண்டு மகிழ்ந்தீரே!

4

கூனமரும் வெண்பிறையும் புனலுஞ்சூடுங் கொள்கையீர்மானமரும் மென்விழியாள் பாகமாகும் மாண்பினீர்தேனமரும் பைம்பொழிலின் வண்டுபாடுந் திருநல்லூர்வானமருங் கோயிலே கோயிலாக மகிழ்ந்தீரே

சொற்பிரிப்பு

கூன் அமரும் வெண்பிறையும் புனலும் சூடும் கொள்கையீர்:மான் அமரும் மென்விழியாள் பாகம்ஆகும் மாண்பினீர்!தேன் அமரும் பைம்பொழிலின் வண்டு பாடும் திரு நல்லூர்வான் அமரும் கோயிலே கோயில்ஆக மகிழ்ந்தீரே.

உரை

வளைவான வெண்பிறையையும், கங்கையையும் சூடுவீர்! மான் பிணையின் மருண்ட கண் போலும் மருட்சியை உடைய மென்விழியாளாகிய உமையைத் திருமேனியில் பாகமாகக் கொள்ளும் பெருமை உடையீர்! தேன் உடைய பைம்பொழிலில் வண்டுகள் பாடும் திருநல்லூரில் வானளாவிய திருக்கோயிலையே உம்முடைய கோயிலாகக் கொண்டு மகிழ்ந்தீரே!

5

நிணங்கவரும் மூவிலையும் அனலுமேந்தி நெறிகுழலாள்அணங்கமரும் பாடலோ டாடல்மேவும் அழகினீர்திணங்கவரும் ஆடரவும் பிறையுஞ்சூடித் திருநல்லூர்மணங்கமழுங் கோயி லே கோயிலாக மகிழ்ந்தீரே

சொற்பிரிப்பு

நிணம் கவரும் மூவிலையும் அனலும் ஏந்தி, நெறிகுழலாள்அணங்கு அமரும் பாடலோடு ஆடல் மேவும் அழகினீர்:திணம் கவரும் ஆடுஅரவும் பிறையும் சூடி, திரு நல்லூர்,மணம் கமழும் கோயிலே கோயில்ஆக மகிழ்ந்தீரே.

உரை

மூன்று இலைகள் போன்ற வடிவமுடைய கொழுப்புப் பூசிய சூலத்தையும், அனலையும் ஏந்தி, நெறித்த குழலாளாகிய உமாதேவியார் விரும்பும் பாடலொடு ஆடலையும் விரும்பும் அழகினை உடையீர்! (நஞ்சால்) உயிரைக் கவரும் திண்மையுடைய படமெடுத்து ஆடுகின்ற பாம்பையும் பிறையையும் சூடித் திருநல்லூரில் சிவமணங்கமழும் திருக்கோயிலையே உம்முடைய கோயிலாகக் கொண்டு மகிழ்ந்தீரே!

6

கார்மருவு பூங்கொன்றை சூடிக்கமழ்புன் சடைதாழவார்மருவு மென்முலையாள் பாகமாகும் மாண்பினீர்தேர்மருவு நெடுவீதிக் கொடிகளாடுந் திருநல்லூர்ஏர்மருவு கோயிலே கோயிலாக இருந்தீரே

சொற்பிரிப்பு

கார் மருவு பூங்கொன்றை சூடிக் கமழ் புன்சடை தாழ,வார் மருவு மென்முலையாள் பாகம்ஆகும் மாண்பினீர்!தேர் மருவு நெடுவீதிக் கொடிகள் ஆடும் திரு நல்லூர்,ஏர் மருவு கோயிலே கோயில்ஆக இருந்தீரே.

உரை

கார் காலத்தில் மலரும் அழகிய கொன்றைப் பூக்களைச் சூடி, மணம் கமழும் சடை தாழ, கச்சணிந்த மென்முலையாளைப் பாகமாகக் கொண்ட பெருமையினை உடையீர்! தேரோடும் நீண்ட பெரிய வீதிகளையும் கொடிகள் ஆடும் மாளிகைகளையும் உடைய திருநல்லூரில் அழகிய திருக்கோயிலையே உம்முடைய கோயிலாகக் கொண்டு மகிழ்ந்தீரே !

7

ஊன்தோயும் வெண்மழுவும் அனலுமேந்தி உமைகாணமீன்தோயுந் திசைநிறைய வோங்கியாடும் வேடத்தீர்தேன்தோயும் பைம்பொழிலின் வண்டுபாடுந் திருநல்லூர்வான்தோயுங் கோயிலே கோயிலாக மகிழ்ந்தீரே

சொற்பிரிப்பு

ஊன் தோயும் வெண்மழுவும் அனலும் ஏந்தி, உமை காண,மீன் தோயும் திசை நிறைய ஓங்கி ஆடும் வேடத்தீர்!தேன் தோயும் பைம்பொழிலின் வண்டு பாடும் திரு நல்லூர்,வான் தோயும் கோயிலே கோயில்ஆக மகிழ்ந்தீரே.

உரை

தலை தோய்ந்த வெண்ணிற ஒளி வீசும் மழுவாயுதமும், நெருப்பும் ஏந்தி உமையம்மை காண விண்மீன்கள் பொருந்திய வானவெளி நிறையுமாறு விளங்கி ஆடும் திருவேடம் உடையீர்! தேன் நிறைந்த பசிய பொழிலில் வண்டுகள் முரலுகின்ற திருநல்லூரில் விண்முட்டும் திருக்கோயிலையே உம்முடைய கோயிலாகக் கொண்டு மகிழ்ந்தீரே!

8

காதமரும் வெண்குழையீர் கறுத்தஅரக்கன் மலையெடுப்பமாதமரும் மென்மொழியாள் மறுகும்வண்ணங் கண்டுகந்தீர்தீதமரா அந்தணர்கள் பரவியேத்துந் திருநல்லூர்மாதமருங் கோயிலே கோயிலாக மகிழ்ந்தீரே

சொற்பிரிப்பு

காது அமரும் வெண்குழையீர்! கறுத்த அரக்கன் மலை எடுப்ப,மாது அமரும் மென்மொழியாள் மறுகும் வண்ணம் கண்டு உகந்தீர்!தீது அமரா அந்தணர்கள் பரவி ஏத்தும் திரு நல்லூர்,மாது அமரும் கோயிலே கோயில்ஆக மகிழ்ந்தீரே.

உரை

திருச்செவியில் வெண்ணிறத்த குழையை உடையீர்! சினங்கொண்ட அரக்கன் இராவணன் உம்முடைய கயிலைமலையை எடுக்கவே, காதல் நிறைந்த உமையாள் அஞ்ச, அவனை அடரும் விளையாட்டினை விரும்பினீர்! தீவினைகள் வெறுத்த நல் அந்தணர்கள் பரவி வழிபடும் திருநல்லூரில் பெருமை உடைய திருக்கோயிலையே உம்முடைய கோயிலாகக் கொண்டு மகிழ்ந்தீரே!

9

போதின்மேல் அயன்திருமால் போற்றியும்மைக் காணாதுநாதனே இவனென்று நயந்தேத்த மகிழ்ந்தளித்தீர்தீதிலா அந்தணர்கள் தீமூன்றோம்புந் திருநல்லூர்மாதராள் அவளோடு மன்னுகோயில் மகிழ்ந்தீரே

சொற்பிரிப்பு

போதின்மேல் அயன், திருமால், போற்றி உம்மைக் காணாது,“நாதனே இவன்” என்று நயந்து ஏத்த, மகிழ்ந்து அளித்தீர்!தீது இலா அந்தணர்கள் தீமூன்று ஓம்பும் திரு நல்லூர்,மாதராள் அவளோடும் மன்னு கோயில் மகிழ்ந்தீரே

உரை

தாமரை மலர் மேலிருக்கும் பிரமனும் திருமாலும் உம்மைக் காண முயன்று இயலாமல், பின் உம்மைப் போற்றி 'நாதனே இவன்' என்று அன்புடன் வழிபட, மகிழ்ந்து அருள் செய்தீர். குற்றமற்ற அந்தணர்கள் தீ மூட்டும் திருநல்லூரில், அழகுடையளாகிய உமையம்மையோடு நிலையாகவுள்ள திருக்கோயிலையே உம்முடைய கோயிலாகக் கொண்டு மகிழ்ந்தீரே!

10

பொல்லாத சமணரொடு புறங்கூறுஞ் சாக்கியரொன்றல்லாதார் அறவுரைவிட் டடியார்கள் போற்றோவாநல்லார்கள் அந்தணர்கள் நாளுமேத்துந் திருநல்லூர்மல்லார்ந்த கோயிலே கோயிலாக மகிழ்ந்தீரே

சொற்பிரிப்பு

பொல்லாத சமணரொடு புறம்கூறும் சாக்கியர் - ஒன்றுஅல்லாதார் - அறஉரை விட்டு, அடியார்கள் போற்று ஓவாநல்லார்கள், அந்தணர்கள், நாளும் ஏத்தும் திரு நல்லூர்மல் ஆர்ந்த கோயிலே கோயில்ஆக மகிழ்ந்தீரே.

உரை

தீயராகிய சமணருடன் பழிமொழி பேசும் சாக்கியரும் ஆகியரையும் பொருட்படுத்தத் தகாத இவர்கள் அறவுரைகள் போலக் கூறுவனவற்றை விலக்கி அடியவர்கள் போற்றுதலை விட்டு நீங்கா நல்லவர்களாகிய அந்தணர்கள் நாளும் ஏத்தி வழிபடும் திருநல்லூரில் மலைபோன்று திண்ணிய திருக்கோயிலையே உம்முடைய கோயிலாகக் கொண்டு மகிழ்ந்தீரே!

11

கொந்தணவும் பொழில்புடைசூழ் கொச்சைமேவு குலவேந்தன்செந்தமிழின் சம்பந்தன் சிறைவண்புனல்சூழ் திருநல்லூர்ப்பந்தணவு மெல்விரலாள் பங்கன்றன்னைப் பயில்பாடல்சிந்தனையா லுரைசெய்வார் சிவலோகஞ்சேர்ந் திருப்பாரே.

சொற்பிரிப்பு

கொந்து அணவும் பொழில் புடை சூழ் கொச்சை மேவு குலவேந்தன்செந்தமிழின் சம்பந்தன் சிறை வண் புனல் சூழ் திரு நல்லூர்,பந்து அணவும் மெல்விரலாள் பங்கன் தன்னைப் பயில் பாடல்சிந்தனையால் உரைசெய்வார், சிவலோகம் சேர்ந்துஇருப்பாரே.

உரை

பூங்கொத்துக்கள் மலிந்த சோலைகள் பக்கங்களில் சூழ்ந்த சீகாழியிலிருக்கும் மக்களின் தலைவர், செந்தமிழ் வல்ல ஞானசம்பந்தன் அணைகளால் சிறை செய்யப்பட்டிருக்கும் நீர்த்திரள் சூழ்ந்த திருநல்லூரில் பந்தணை மெல்விரலி பங்கனை பாடிய பாடல்களை மனஒருமையோடு பாடுவார் சிவலோகம் சேர்ந்து சிவனுடன் இருப்பரே.