திருத்தலைச்சங்காடு

அருளியவர்: திருஞானசம்பந்தர்
பண்: காந்தாரம்
தலம்: தலைச்சங்காடு
நாடு: சோழநாடு காவிரித் தென்கரை

1

நலச்சங்க வெண்குழையுந் தோடும்பெய்தோர் நால்வேதம்சொலச்சங்கை யில்லாதீர் சுடுகாடல்லாற் கருதாதீர்குலைச்செங்காய்ப் பைங்கமுகின் குளிர்கொள்சோலைக் குயிலாலும்`தலைச்சங்கைக் கோயிலே கோயிலாகத் தாழ்ந்தீரே.

சொற்பிரிப்பு

நலச் சங்கவெண்குழையும் தோடும் பெய்து,ஓர் நால்வேதம்சொலச் சங்கை இல்லாதீர்! சுடுகாடு அல்லால் கருதாதீர்!குலைச் செங்காய்ப் பைங்கமுகின் குளிர் கொள் சோலைக் குயில் ஆலும்தலைச்சங்கைக் கோயிலே கோயில்ஆகத் தாழ்ந்தீரே.

உரை

வெண்சங்கினால் ஆன அழகிய குழையும் தோடும் காதில் பெய்து, ஒப்பற்ற நால்வேதங்களை ஐயமின்றிச் சொன்னவரே. சுடுகாட்டினில் விருப்பம் உடையவரே! குலையாகச் சிவந்த காய்களை உடைய பசிய கமுகஞ்சோலைகளில் குயில்கள் கூவும் தலைச்சங்காட்டில் உள்ள திருக்கோயிலையே உம்முடைய கோயிலாகக் கொண்டு எழுந்தருளியுள்ளீரே.

2

துணிமல்கு கோவணமுந் தோலுங்காட்டித் தொண்டாண்டீர்மணிமல்கு கண்டத்தீர் அண்டர்க்கெல்லாம் மாண்பானீர்பிணிமல்கு நூல்மார்பர் பெரியோர்வாழுந் தலைச்சங்கைஅணிமல்கு கோயிலே கோயிலாக அமர்ந்தீரே

சொற்பிரிப்பு

துணி மல்கு கோவணமும் தோலும் காட்டித் தொண்டு ஆண்டீர்!மணி மல்கு கண்டத்தீர்! அண்டர்க்கு எல்லாம் மாண்பு ஆனீர்!பிணி மல்கு நூல் மார்பர் பெரியோர் வாழும் தலைச்சங்கை,அணி மல்கு கோயிலே கோயில்ஆக அமர்ந்தீரே.

உரை

துணியால் ஆன கோவணமும் உடுத்த தோலுங் காட்டி அன்பர்களைத் தொண்டாண்டு கொண்டீர்! நீலமணி போலும் கண்டத்தை உடையீர்! தேவர்களுக்கு எல்லாம் பெருமை உடையவரானீர்! பூணூல் பிணித்த மார்பினை உடையீர்! பத்தியால் பெரியோர் வாழும் திருத்தலைச்சங்காட்டில் அழகு நிறைந்த திருக்கோயிலையே உம்முடைய கோயிலாகக் கொண்டு அங்கு அமர்ந்தீரே.

3

சீர்கொண்ட பாடலீர் செங்கண்வெள்ளே றூர்தியீர்நீர்கொண்டும் பூக்கொண்டும் நீங்காத்தொண்டர் நின்றேத்தத்தார்கொண்ட நூல்மார்பர் தக்கோர்வாழுந் தலைச்சங்கைஏர்கொண்ட கோயிலே கோயிலாக இருந்தீரே

சொற்பிரிப்பு

சீர் கொண்ட பாடலீர்! செங்கண் வெள்ஏற்று ஊர்தியீர்!நீர் கொண்டும் பூக் கொண்டும் நீங்காத் தொண்டர் நின்று ஏத்த,தார் கொண்ட நூல்மார்பர் தக்கோர் வாழும் தலைச்சங்கை,ஏர் கொண்ட கோயிலே கோயில்ஆக இருந்தீரே.

உரை

பெருமையான பாடல்களை உடையீர்! சிவந்த சினமிக்க கண்களை உடைய வெண்ணிறக் காளையை வாகனமாக உடையீர்! நீர், பூ ஆகியன கொண்டு உன்னை விட்டுப் பிரியாத தொண்டர்கள் நின்னை வழிபட, மாலையும் பூணூலும் அணைந்த மார்பினர்களும் அந்தணர்களும் ஆகிய பெரியோர் வாழும் திருத்தலைச்சங்காட்டில் அழகு வாய்ந்த திருக்கோயிலையே உம்முடைய கோயிலாகக் கொண்டு இருந்தீரே.

4

வேடஞ்சூழ் கொள்கையீர் வேண்டிநீண்ட வெண்டிங்கள்ஓடஞ்சூழ் கங்கையும் உச்சிவைத்தீர் தலைச்சங்கைக்கூடஞ்சூழ் மண்டபமுங் குலாயவாசற் கொடித்தோன்றும்மாடஞ்சூழ் கோயிலே கோயிலாக மகிழ்ந்தீரே

சொற்பிரிப்பு

வேடம் சூழ் கொள்கையீர்! வேண்டி நீண்ட வெண்திங்கள்ஓடம் சூழ் கங்கையும் உச்சி வைத்தீர் தலைச்சங்கை,கூடம் சூழ் மண்டபமும் குலாய வாசல் கொடித் தோன்றும்மாடம் சூழ் கோயிலே கோயில்ஆக மகிழ்ந்தீரே.

உரை

அடியார்கள் உம்மைக் காண விரும்பும் வேடத்தில் தோன்றும் கொள்கையினை உடையீர்! பிறையாகிய ஓடம் தங்கிய கங்கையை உம்சிரசில் வைத்தீர். திருத்தலைச்சங்காட்டில் கூடமும் மண்டபமும் கூடிய வாசலில் கொடி தோன்றும் மாடங்கள் சூழ்ந்த திருக்கோயிலை கோயிலாக மகிழ்ந்தீரே!

5

சூலஞ்சேர் கையினீர் சுண்ணவெண்ணீ றாடலீர்நீலஞ்சேர் கண்டத்தீர் நீண்டசடைமேல் நீரேற்றீர்ஆலஞ்சேர் தண்கானல் அன்னமன்னுந் தலைச்சங்கைக்கோலஞ்சேர் கோயிலே கோயிலாகக் கொண்டீரே

சொற்பிரிப்பு

சூலம் சேர் கையினீர்! சுண்ண வெண்நீறுஆடலீர்!நீலம் சேர் கண்டத்தீர்! நீண்ட சடை மேல் நீர் ஏற்றீர்!ஆலம் சேர் தண்கானல் அன்னம் மன்னும் தலைச்சங்கை,கோலம் சேர் கோயிலே கோயில்ஆகக் கொண்டீரே.

உரை

சூலப்படையை ஏந்திய கையினீர்! திருநீறாகிய பொடியில் மூழ்குவீர்! நீலநிறமான கறை உடைய கண்டத்தீர்! பரந்த சடைமேல் கங்கையாற்றை ஏற்றீர்! நீர் நிறைந்த குளிர்ந்த கானலில் அன்னப்பறவைகள் தங்கும் திருத்தலைச்சங்காட்டில் அழகு சேர்ந்ததிருக்கோயிலையே உம்முடைய கோயிலாக மகிழ்ந்தீரே!

6

நிலநீரொ டாகாசம் அனல்காலாகி நின்றைந்துபுலநீர்மை புறங்கண்டார் பொக்கஞ்செய்யார் போற்றோவார்சலநீத ரல்லாதார் தக்கோர்வாழுந் தலைச்சங்கைநலநீர கோயிலே கோயிலாக நயந்தீரே

சொற்பிரிப்பு

நிலம் நீரொடு ஆகாசம் அனல் கால் ஆகிநின்று ஐந்துபுல நீர்மை புறம் கண்டார் பொக்கம் செய்யார், போற்று ஓவார்சல நீதர் அல்லாதார், தக்கோர், வாழும், - தலைச்சங்கை,நல நீர கோயிலே கோயில்ஆக நயந்தீரே.

உரை

நிலம் நீரோடு ஆகாசம், அனல், காற்றும் எனும் ஐம்பூதங்களுமாக அவற்றுள் நிறைந்திருந்தும் ஐம்புலன்களையும் வென்றவர். அடியவர்களுக்குப் பொய்யார். அவர்களைக் காப்பாற்றுதலில் ஓயுதல் செய்யார். வஞ்சம் முதலிய இழிதகைமை இல்லாதவர்களும் தக்கவர்களுமாகிய பெருந்தகையாளர்கள் வாழும் திருத்தலைச் சங்காட்டில் அழகிய தன்மையுடைய திருக்கோயிலையே உம்முடைய கோயிலாக விரும்பினீரே!

7

அடிபுல்கு பைங்கழல்கள் ஆர்ப்பப்பேர்ந்தோர் அனலேந்திக்கொடிபுல்கு மென்சாயல் உமையோர்பாகங் கூடினீர்பொடிபுல்கு நூல்மார்பர் புரிநூலாளர் தலைச்சங்கைக்கடிபுல்கு கோயிலே கோயிலாகக் கலந்தீரே

சொற்பிரிப்பு

அடி புல்கு பைங்கழல்கள் ஆர்ப்பப் பேர்ந்து ஓர் அனல் ஏந்தி,கொடி புல்கு மென்சாயல் உமை ஓர் பாகம் கூடினீர்!பொடி புல்கு நூல்மார்பர் புரிநூலாளர் தலைச்சங்கைகடி புல்கு கோயிலே கோயில்ஆகக் கலந்தீரே.

உரை

அழகிய பாதத்தில் பொருந்திய கழல்கள் ஒலிக்க அடி பெயர்த்து, அனலேந்தி கொடி போன்ற உருவமும் மென்மையான சாயலும் உடைய உமையம்மையை ஒரு பாகத்தில் கூடினீர்! திருநீறு மிகப்பூசிய பூணூலணிந்தவர், மறையோர் வாழும் திருத்தலைச்சங்காட்டுள் காவல் மிக்க திருக்கோயிலையே உம்முடைய கோயிலாகக் கொண்டீரே.

8

திரையார்ந்த மாகடல்சூழ் தென்இலங்கைக் கோமானைவரையார்ந்த தோளடர விரலாலூன்றும் மாண்பினீர்அரையார்ந்த மேகலையீர் அந்தணாளர் தலைச்சங்கைநிரையார்ந்த கோயிலே கோயிலாக நினைந்தீரே

சொற்பிரிப்பு

திரை ஆர்ந்த மா கடல் சூழ் தென் இலங்கைக் கோமானை,வரை ஆர்ந்த தோள் அடர, விரலால் ஊன்றும் மாண்பினீர்!அரை ஆர்ந்தமேகலையீர்! அந்தணாளர் தலைச்சங்கை,நிரை ஆர்ந்த கோயிலே கோயில்ஆக நினைந்தீரே.

உரை

அலைகள் நிறைந்த கரிய கடல் சூழ்ந்த தென் திசையில் உள்ள இலங்கைக்கு அரசன் இராவணனின் மலை போன்ற தோள்களை, உம்முடைய திருவிரலால் ஊன்றி நசுக்கிய பெருமையுடையீர்! இடையில் கட்டிய மேகலையை உடையீர்! அந்தணாளர்கள் வாழும் திருத்தலைச்சங்காட்டில் வரிசையாக அமைந்த திருக்கோயிலையே உம்முடையகோயிலாக விரும்பினீரே!

9

பாயோங்கு பாம்பணைமே லானும்பைந்தா மரையானும்போயோங்கிக் காண்கிலார் புறம்நின்றோரார் போற்றோவார்தீயோங்கு மறையாளர் திகழுஞ்செல்வத் தலைச்சங்கைச்சேயோங்கு கோயிலே கோயிலாகச் சேர்ந்தீரே

சொற்பிரிப்பு

பாய் ஓங்கு பாம்புஅணை மேலானும், பைந்தாமரையானும்,போய் ஓங்கிக் காண்கிலார்; புறம் நின்று ஓரார், போற்று ஓவார்;தீ ஓங்கு மறையாளர் திகழும் செல்வத் தலைச்சங்கை,சேய் ஓங்கு கோயிலே கோயில்ஆகச் சேர்ந்தீரே.

உரை

விரிந்த பாம்பாகிய படுக்கையின்மேல் இருப்பவனாகிய திருமாலும், பசிய தாமரை மலர்மேல் இருப்பவனாகிய பிரமனும் கீழ் இடந்துபோயும் மேற்பறந்து போயும் காணாதவராயினர். புறச்சமயம் நில்லாது அகச்சமயத்தில் நிற்பார் போற்றுதலை நீங்கார் .வேள்வித்தீ வளர்க்கும் வேதியர்கள் திகழும் ஆன்மீகச் செல்வம் நிறைந்த திருத்தலைச்சங்காட்டில் உயர்ந்தோங்கும் திருக்கோயிலையே உம்முடைய கோயிலாகச் சேர்ந்தீரே!

10

அலையாரும் புனல்துறந்த அமணர்குண்டர் சாக்கியர்தொலையாதங் கலர்தூற்றத் தோற்றங்காட்டி யாட்கொண்டீர்தலையான நால்வேதந் தரித்தார்வாழுந் தலைச்சங்கைநிலையார்ந்த கோயிலே கோயிலாக நின்றீரே

சொற்பிரிப்பு

அலை ஆரும் புனல் துறந்த அமணர், குண்டர்சாக்கீயர்,தொலையாது அங்கு அலர் தூற்ற, தோற்றம் காட்டி ஆட்கொண்டீர்!தலைஆன நால்வேதம் தரித்தார் வாழும் தலைச்சங்கை,நிலை ஆர்ந்த கோயிலே கோயில்ஆக நின்றீரே.

உரை

நீராடுதல் இல்லாத சமணக் குண்டர்களும் சாக்கியர்களும் இடைவிடாது பழிதூற்ற அடியார்களுக்கு உம்முடைய திருக்கோலத்தைக் காட்டி ஆட்கொண்டீர்! மேலான நான்கு வேதங்களையும் மேற்கொண்டாராகிய மறையாளர் வாழும் திருத்தலைச்சங்காட்டில் நிலையுள்ள திருக்கோயிலையே உம்முடைய கோயிலாகக் கொண்டு அங்கு நிலையாக நின்றீரே!

11

நளிரும் புனற்காழி நல்லஞான சம்பந்தன்குளிருந் தலைச்சங்கை ஓங்குகோயில் மேயானைஒளிரும் பிறையானை உரைத்தபாடல் இவைவல்லார்மிளிருந் திரைசூழ்ந்த வையத்தார்க்கு மேலாரே.

சொற்பிரிப்பு

நளிரும் புனல் காழி நல்ல ஞானசம்பந்தன்,குளிரும் தலைச்சங்கை ஓங்கு கோயில் மேயானை,ஒளிரும் பிறையானை உரைத்த பாடல்இவை வல்லார்மிளிரும் திரை சூழ்ந்த வையத்தார்க்கு மேலாரே.

உரை

குளிர்ந்த நீர்வளம் உள்ள சீகாழியில் அன்புடைத் திருஞானசம்பந்தன் அருளுடைய திருத்தலைச்சங்காட்டில், ஓங்கு கோயிலில் மேவியவனை, ஒளிவீசும் பிறை சூடியவனைப் போற்றி உரைத்த பாடல்களாகிய இவற்றை ஓத வல்லார், புரளும் அலைகளை வீசும் கடலால் சூழப்பட்ட நிலவுலகத்தில் வாழ்பவருக்கு மேல் நிலையை உறுதியாக அடைவர்; அஃதாவது, வானுலகோராவர் என்க.