திருக்களர்

நீர் மிகுந்ததும், கயல்மீன்கள் பெருகி வாழ்வதுமாகிய வாவிகள் பொழில்கள்சூழ்ந்ததும், நீண்ட பெரிய வயல்கள் நெருங்கியதும், மதிற்சுற்றுகளை உடைய தேரோடும்வீதிகளில் விழாக்கள் நிறைந்ததுமாகிய திருக்களர் என்னும் இத்திருத்தலத்தில், ஊர் மக்கள்இடுகின்ற பிச்சையை விரும்பும் ஒருவனே! செஞ்சடையில் பிறை பொருந்த நின்றவனே! நின்னை அடைந்த அன்பர்களுக்கு அருள் புரிவாய்.

தோளின் மீது ஒளி வீசும் திருநீறு அணிந்த தொண்டர்கள் வந்து அடி வணங்க, வலிமையுடைய தாளினார் தங்கும் தவமுடைய திருக்களர் ஊரில், மன்மதனுக்குச் சமமானஅழகுடைய அருச்சுனனுக்கு அருள்புரிந்த வித்தகனே! உன்னை விரும்பும் அடியவர்களைஅடிமையாக விரும்புபவனே! நின்னை அடைந்த அன்பர்களுக்கு அருள் புரிவாய்.

இசையுடன் பாடும் ஆற்றல் வல்ல நல்ல மக்களுடன், குளிர்ந்த மலர்களைக் கொண்டு நின்னை போற்றி வழிபாடு செய்யும் பெரியோர்கள் வாழ்வதும், மலர்ப்பொழில்கள் சூழ்ந்த அழகுடையதுமாய திருக்களர் என்னும் திருத்தலத்தில், நிலையாக இருந்து மலத்தை நீக்குவோனே! வரிசையாக கழலும் சிலம்பும் ஒலிக்க நடம் புரிய வல்லவனே! நின்னைஅடைந்த அன்பர்களுக்கு அருள்புரிவாய்.

அம்பினுக்கு நேரான கூர்மையுடையதும், விசாலமானதுமான கண்களை உடையமகளிருடன் ஆடவர்கள் வாழ்கின்ற மாடமாளிகைகளைக் கொண்டதும் செம்மையானதும் அழகுடையதுமான மலர்ச்சோலைகள் சூழ்ந்து அழகியதாகிய திருக்களர் என்னும் திருத்தலத்தில், எலும்பு மாலையைப் பூண்ட ஒப்பற்ற எம்முடைய இறைவனே! நின் இணையடியைப் போற்றி நின்று வணங்கியவர்க்கு அன்பு செய்தவனே! நின்னை அடைந்த அன்பர்களுக்கு அருள்புரிவாய்.

மணம் வீசும் மலர்ச்சோலைகளில் வண்டுகள் கூட்டம் குடைந்து மிக்க தேனினை உண்டு இசைபாடும், தெங்கும் பைங்கமுகும் பக்கங்களில் சூழ்ந்த திருக்களருள் உமையுடன் கூடிய மணவாளனே, மான் பிணையை ஒரு கையிலும் மழுவினை ஓர் கையிலும் தாங்கியவனே! நின்னை அடைந்த அன்பர்களுக்கு அருள்புரிவாய்.

அழகிய நீலமயில்கள் தோகையை விரித்து ஆட, கரிய மேகங்கள் அடைகின்ற பொழில்களுடன், நெருங்கிய வயல்களிடையே சேல் மீன்களும் கயல்மீன்களும் நிறைந்த நீர்நிலைகள் சூழ்ந்த திருக்களர் என்னும் திருத்தலத்தில், நீலகண்டனே! நிமிர்புன்சடைப் பெருமான் எனப் பொலிகின்ற ஆலமரத்தின் நீழலில் உள்ளாய்! நின்னை அடைந்த அன்பர்களுக்கு அருள்புரிவாய்.

தங்கள் வலிமையின் அளவினை அறியாத அசுரர்களின் கோட்டையைத் தாக்கும் மேருமலை வரை நெருப்பு எழச்செய்து, அவர்களுடைய திண்ணிய வலிமையைக் கெடுத்தவனே! விளங்குகின்ற திருக்களருள் அப்பொழுது மலர்ந்த மலர்களைத் தூவி நின்னுடைய திருவடிகளைத் தேவர்கள் தொழ, பேரம்பலத்தில் கூத்தாடுதலை விரும்பியவனே! நின்னை அடைந்த அன்பர்களுக்கு அருள்புரிவாய்.

"குன்றுபோல் உயர்ந்த நல்ல மாளிகைகளின்மேல் கொடிகள் பறக்கும் மாடங்கள்,  வானில் செல்லும் மதி தோயும் நீண்டு உயர்ந்த கோபுரங்கள், அத்தகைய செல்வவளமிக்க திருக்களர் என்னும் திருத்தலத்தில், உயர்ந்த கயிலை மலையைத் தன்னுடைய திரண்ட  தோள்களினால் எடுத்தவனாகிய இராவணனின் உயர்ந்த முடிகளை அன்று நசுக்கியவனே!  நின்னை அடைந்த அன்பர்களுக்கு அருள்புரிவாய்."

பண்ணுடன் யாழ் பயில்கின்ற மங்கையரின் பாடலொடு ஆடலும் நிறைய அமைந்த பதியும் தெளிந்த நிலவொளி பரப்பும் மதி தங்கும் பொழில்களும் சேர்ந்த திருக்களர் என்னும் திருத்தலத்தில், திருக்கோயிலின் உள் நிலாவும் ஒப்பற்றவனே! உன் அடியும் முடியும் தேடிய இருவர்க்கு அழலாகக் காட்சியளித்த அண்ணலாய எம்மானே! நின்னை அடைந்தஅன்பர்களுக்கு அருள்புரிவாய். 

சிவபுண்ணியமுடைய பத்தர்களின் பாட்டுக்களுடன், திருப்பணிகள் செய்ய விரும்பும் அக்கினி காரியம் செய்வதில் சிறந்தவர்களும் வாழும் திருக்களர் என்னும் திருத்தலத்தில், சொற்களால் வேதத்தை ஓதி அருளியவனே! அமணர்களும் தேரர்களும் மெய்யென்று சொல்லியசொற்களைப் பொய்யாக்கி நின்றவனே! நின்னை அடைந்த அன்பர்களுக்கு அருள்வாய்.

இனிய மொழி பேசும் பண்புடைய மங்கையர் சேரும் திருக்களருள் அந்தி வானம்போன்ற சிவந்த மேனியுடைய சிவபெருமானை, தேவர்கள் தம் பெருமானை, சந்திரன் வந்து மேல் எழும் மாட மாளிகைகளை உடைய வீதிகளால் எழில் கொள்ளும் சீகாழி நகர்க் கவுணியன் ஞானசம்பந்தன் பாடிய பாடல்கள் பத்தான இவற்றைப் பாட அது தவம் ஆகும்.