திருமயிலாப்பூர்

தேன் நிறைந்த புன்னை மலர்ச்சோலைகள் நிறைந்த பதியே மயிலையம்பதியாம். அப்பதியினை விரும்பி கோயில் கொண்டு அமர்ந்தவனே சிவபெருமான். அவன் தன்னுடைய சிவகணத்தார்க்கு உணவளித்துப் புரக்கும் சிறப்பினைக் காணாது பூம்பாவையே நீ போவாயோ? மாட்டாய். எழுந்து வருவாயாக!

மை திகழும் அழகிய கண்களைக் கொண்ட பெண்டிர் வாழும் மயிலைப் பதியில் திருநீறு அணிந்து சிவபெருமான் கோயில் கொண்டுள்ளான். அங்கு நடைபெறும் திருவோண விழாவையும் அடியவர்கள் மகிழ்ந்து போற்றுவதையும் பூம்பாவையே! நீ காணாமல் செல்வாயோ? மாட்டாய்

வளையல் அணிந்த கற்புடைய பெண்டிர் வாழும் மயிலை கபாலீச்சரத்தில் சிவபெருமான் கோயில் கொண்டுள்ளான். அத்திருக்கோயிலில் கார்த்திகைத் திருநாள் அன்று சிறுமிகளும் மாதர்களும் விளக்குகளை வரிசையாக ஏந்திநின்று வழிபாடு செய்வார்கள். அந்த விளக்கீடு விழாவைக் காணாமல் பூம்பாவையே நீ செல்வாயோ? மாட்டாய்.

கடலலைகள் நிறைந்து உலவும் மயிலையில் வாழும் நெய்தல் நிலமக்கள் கூர்மையான வேலால் மீன்களைக் குத்திப் பிடித்து வாழ்வார்கள். சோலைகள் நிறைந்த மயிலைக் கபாலீச்சரத்தில் சிவபெருமான் கோயில் கொண்டுள்ளான். அங்கு நடைபெறும் ஆதிரைத் திருநாள் விழாவினைப் பூம்பாவையே நீ காணாது செல்வாயோ? மாட்டாய் என்க.

மை பூசிய கண்களைக் கொண்ட கற்புடைய மகளிர் நிறைந்த தலமே மயிலாப்பூர். இங்குள்ள கபாலீசுரத்துள் சிவபெருமான் திருநீறு அணிந்த மேனியனாய்க் கோயில் கொண்டுள்ளான். தைப்பூச விழாவன்று நெய் கலந்த சோற்றினை சிவனுக்குப்   படைத்து மகளிர் வழிபடுவர். அவ்விழாவினைக் காணாது பூம்பாவையே நீ செல்வாயோ? மாட்டாய்.

அகன்ற மடல்கள் கொண்ட தென்னை மரங்கள் நிறைந்த மயிலையில் உள்ள கபாலீச்சரத்துள் சிவபெருமான் கோயில் கொண்டுள்ளான். அங்கு மாசித் திங்களில்கடலாடுவிழா சிறப்பாகக் கொண்டாடப்பெறும். சிவனும் ஆனேற்றின்மேல் வீற்றிருந்துகாட்சி அருளுவார். பெண்கள் அதனைக் கண்டு ஆடிப்பரவி ஏத்துவர். அவ்விழாவினைக்காணாமல் பூம்பாவையே நீ செல்வாயோ? மாட்டாய்.

மயிலை வீதிகளில் நாள்தோறும் விழாக்கள் நடைபெறும். பெண்டிர் விழாவினைச் சிறப்பாக சிவனது கபாலீச்சுரக் கோயிலில் கொண்டாடி மகிழ்வர். அங்கு பங்குனி உத்திர நாளில் ஆடல் பாடல்கள் மிகுந்து விளங்கும் அத்திருவிழாவைக் காணாது பூம்பாவையே நீ செல்வாயோ? மாட்டாய்.

பணிவற்ற அரக்கன் இராவணனின் தோள்களை நெரித்த தாளினை உடையவன் சிவன். அவன் மயிலை கபாலீச்சுரத்தில் கோயில் கொண்டுள்ளான். சிவனை, அட்டமி நாள் விழாவில் பதினெண்கணங்களும் கூடி, ஆடிப்பாடி மகிழ்ந்து போற்றுவர். அவ்விழாவினைக் காணாது பூம்பாவையே நீ செல்வாயோ? மாட்டாய்.

தாமரை மலர்மேல் வீற்றிருக்கும் பிரம்மனாலும் அவனை ஈன்ற நாராயணனாலும் தேடிக் காணமுடியாத சிவபெருமான் மயிலைக் கபாலீச்சுரத்துள் கோயில் கொண்டுள்ளான். அந்தணர்கள் சிவனது திருவடிகளைப் போற்றி வணங்குவர். அப்பெருமானுக்கு நடைபெறும் பொன்னூஞ்சல் திருவிழாவினைக் காணாமல் பூம்பாவையே நீ செல்வாயோ? மாட்டாய்.

சமணர்கள் உடை உடுத்தாத வாழ்க்கையர். சாக்கியர் உடை உடுத்தும் வாழ்க்கையர். இருவரும் தத்தம் வாய்க்கு வந்தவாறு பிதற்றித்திரிவர். அவர்கள் திரியும் மண்ணிலேயே மயிலாப்பூரில் உள்ள கபாலீச்சுரத்துள் சிவன் கோயில் கொண்டுள்ளான். அங்கு நிகழும் பெருஞ்சாந்தி விழாவைக் காணாது பூம்பாவையே நீ செல்வது முறையோ? காண வருவாயாக.

சோலைகள் சூழ்ந்த மயிலைக் கபாலீச்சுரத்துள் சிவன் கோயில் கொண்டுள்ளான். அவனிடம் இனிய பூம்பாவையின் நலம் வேண்டி ஞானசம்பந்தப் பெருமான் பத்துப்பாடல்களைப் பாடி அருளியுள்ளார். அப்பத்துப் பாடல்களையும் ஓதவல்லவர், வீடுபெற்ற பக்தர்கணத்தோடு கூடி வாழும் பேற்றினைப் பெற்றவர் ஆவர்.