திருநாலூர்மயானம்

ஈசன், ஊர்ந்து செல்லும் மலைப்பாம்பையும், குளிர்ந்த சந்திரனையும் ஊமத்த மலரையும் தன் தலையில் கொண்டவன்! முப்புரிநூல் அணிந்த மார்பினன், நாலூர் மயானத்துள் கோயில் கொண்டவன்; அவனது திருவடிகளையே நினைந்து உருகும் அடியவர்களுக்கு மறுபிறப்பு வந்து பொருந்தாது.

ஈசன், இளம்பிறையைத் தலையில் சூடியவன்; சுடுகாட்டினை இடமாகக் கொண்டவன்; பறை, சங்கு போன்ற இன்னிசைக் கருவிகள் ஒலிக்க ஆடுபவன்; சிறப்புக்கள் பொருந்திய நாலூர் மயானத்தைப் போற்றிப் புகழும் சிறப்புடையவர்களைப் பாவங்கள் சென்று சேராவாம்.

கல்லால மரத்தின்கீழ் வீற்றிருந்து, தன்னை வணங்கிய சனகாதி முனிவர்களுக்கு எல்லா அறங்களையும் தெரிய உரைத்தவன் சிவபெருமான்! நல்லவர்களால் தொழுது போற்றப்பெறும் நாலூர் மயானத்தைப் புகழ்ந்து சொல்லாதவர்கள் தொன்மையான நன்னெறியில் நில்லாதவர்களே ஆவார்கள்.

ஈசன், கொன்றைமலர் மாலைகளை அணிந்தவன். புலித்தோல் ஆடையை உடுத்தியவன்; கரிய கண்டத்தை உடையவன்; நெற்றிக் கண்ணை உடையவன்; உலகத்தார் புகழ்ந்து போற்றும் நாலூர் மயானத்தில் கோயில் கொண்டவன். சூலப்படை உடைய அவனைப் போற்றுபவர்களுக்குத் தொல்வினைகள் சூழாவாம்.

ஈசன், கறை தோய்ந்த மிடற்றினைக் கொண்டவன். பிரமகபாலத்தை ஏந்தியவன்;இளம்பிறையைச் சடையில் கொண்டவன்; உமாதேவியை உடம்பில் ஒருபாகமாகக் கொண்டவன். மலர்கள் பொருந்திய சோலைகளால் சூழப்பெற்ற நாலூர் மயானத்தில் பொருந்தி இருப்பவன். அவனைத் தொழுபவர்க்கு இன்பமே ஏற்படும்.

ஈசன், நெற்றிக் கண்ணை உடையவன்; நெருப்பைக் கையில் ஏந்தி      ஆடுபவன்; மறைகளால் பாடப் பெறுபவன்; ஆடும் பரஞ்சோதி ஆவான். பொருந்தா அரக்கர்களின் முப்புரங்களை எரித்தவன். அவன் பொருந்தியிருக்கும் நாலூர்மயானத்தை விரும்பிப் போற்றாதவர்கள் நன்னெறியை அடையமாட்டார்கள்.

சிவன், நெற்றிக் கண்ணைத் திறந்து அதிலிருந்து வெளிப்பட்ட நெருப்புப் பொறியின் வேகத்தால் மன்மதனை எரித்தவன். உமாதேவியை உடம்பின் பாகத்தில் கொண்டவன். யானையின் தோலை அணிந்தவன். நற்பண்புகளை உடையோர் விளங்கும் நாலூர் மயானத்தில் பொருந்தியவன். அவனை எண்ணும் மனமுடையவர்களுக்குத் துன்பமே வாரா என்க.

பத்துத் தலைகளைக் கொண்ட இராவணனின் தோளைத் தன் கால்விரலால் அடர்த்து இறுதியில் அவனுக்கு சந்திரகாசம் என்ற வாளைக் கொடுத்து   அருளியவன் சிவபெருமான். அவன், சங்கின் ஒலி எப்பொழுதும் நிறைந்திருக்கும், நாலூர் மயானத்தில் பொருந்தியிருப்பான். அவனது திருவடிகளை எப்போதும் நினைப்பவர்களுக்கு அல்லலே அடையாவாம்.

திருமாலும் பிரமனும் தேட, அவர்கள் அடிமுடி காணமுடியாதவாறுநெருப்புருவாய் விளங்கியவன் சிவபெருமான். வேதங்கள் நான்காகவும் அதன் அங்கங்கள்ஆறாகவும் விளங்குபவன் சிவபெருமான். அவன் நாலூர் மயானத்துள் கோயில் கொண்டுள்ளான். அவனைப் பாலும் நெய்யும் கொண்டு வழிபாடு செய்து மகிழ்வோமாக

மாசு உடையவராய் புன்மையான சொற்களையே கூறுபவர்கள் சமண் சாக்கியர் ஆவார்கள். அவர்களது சொற்களை ஏற்க வேண்டாம். புண்ணியமாக விளங்கும் ஈசனையே வணங்கி மகிழுங்கள். ஒன்றிய மனத்தோடு சிவாயநம என்று மொழியுங்கள். நாலூர் மயானத்தில் இன்ப வடிவினனாய் விளங்கும் ஈசனை ஏத்திப்பாடி இன்புறுங்கள்.

ஞாலம் போற்றும் சீகாழிப்பதியில் அவதரித்தவர் ஞானசம்பந்தர். அவர் நான்கு வேதங்களும் போற்றும் நாலூர் மயான இறைவனைப் புகழ்ந்து பாடல்கள் பாடி அருளியுள்ளார். அதனைப் பக்தியுடன் பாடிட வல்லவர்கள் வானுலகில் இன்புற்றுவாழ்வார்கள் என்க.