திருஆக்கூர்

எலும்பு மாலையும், ஆடுகின்ற பாம்பும், ஆமைஓடும் பொருந்திய மார்பினை உடையவன் ஈசனே! யானைத்தோலையும் புலித்தோலையும் ஆடையாகக் கொண்டவன் ஈசன். திருநீற்றைப் பூசிய அப்பெருமான் பொய்யற்ற மெய்ந்நெறியாளர் பொருந்தியிருக்கும் ஆக்கூர் தான் தோன்றி மாடத்தில் விளங்குகின்றான்.

ஈசன், கங்கையைத் தலையில் தரித்துள்ளான். திருநீற்றைப் பூசியுள்ளான். இடப வாகனத்தில் அமர்ந்துள்ளான். கொன்றை மலர் மாலையினை அணிந்துள்ளான். அப்பெருமான் விரும்பிய தொன்மையான கோயில் ஆக்கூர் தான்தோன்றி மாடம் ஆகும். அங்கு மீன்களை மிகுதியாக அலகில் எடுத்துக் கொண்ட நாரைகள் பறக்கும் ஆக்கூரில் விளங்கும் தான் தோன்றி மாடம் ஆகும்.

ஒளிமிக்க கண்களையும், பவளம் போன்ற சிவந்த வாயினையும் உடையவளே மலையரசனின் மகளாகிய உமாதேவி. அவளைத்தன் உடம்பின் ஒருபாகமாகக் கொண்டவரே உமாதேவன். அப்பெருமான் வள்ளன்மை மிக்க வேளாளர்கள் நிறைந்து விளங்கும் ஆக்கூர் தான் தோன்றி மாடத்தில் விரும்பிக் கோயில் கொண்டுள்ளான்.

ஈசன், தேன் நிறைந்த குளிர்ந்த கொன்றை மலர்களால் ஆகிய மாலையை அணிந்துள்ளான். அவன் எமனையும் வருத்தச் சினத்தவனும் ஆவான். அவன் திருநீற்றைப் பூசியுள்ளான். அவன் வேதத்தின் ஆறு அங்கங்களும் அருமறைகள்நான்கும் வேள்விகள் ஐந்தும் நிறைந்து விளங்கும் ஆக்கூர் தான்தோன்றி மாடத்தின்கண் விரும்பிப் பொருந்தியுள்ளான்.

ஈசன், ஆடுகின்ற பாம்பினை அரையில் கச்சையாகக் கட்டியுள்ளான். இறந்தவர்களின் எலும்பையும் தலையோட்டினையும் மாலையாகக் கொண்டுள்ளான். உமாதேவியை உடம்பின் ஒருபாகமாகக் கொண்டுள்ளான். அவன் ஆம்பல் போன்ற அழகிய மலர்கள் நிறைந்து விளங்கும் பொய்கைகளால் சூழப்பெற்ற ஆக்கூர் தான்தோன்றிமாடத்தில் கோயில் கொண்டுள்ளான்.

ஈசன், பண் நிறைந்த நான்மறைப் பாடல்களுக்கு ஏற்ப ஆடும் திறத்தினன். நெற்றிக் கண்ணை உடையவன். அவன் விண்ணில் தவழும் நிலவின் ஒளியால் சிறந்து விளங்கும் மாடங்கள் நிறைந்த ஆக்கூர் தான்தோன்றி மாடத்தின்கண் விரும்பிப் பொருந்தி உள்ளான்.

ஈசன், ஆணவ மலத்தால் செருக்குற்ற திரிபுரத்தவர்களின் முப்புரங்களைமேருமலையை வில்லாகக் கொண்டு எரித்துச் சாம்பலாக்கியவர். வானவர்களால் என்றும் தொழப் பெறுபவர். அவர், நான்மறைகளும் ஆறு அங்கங்களும் பலகலைகளும் நிறைந்து விளங்கும் ஆக்கூர் தான்தோன்றி மாடத்தில் விரும்பி அமர்ந்துள்ளார்.

மிக உயர்ந்த வலிய கயிலாய மலையைத் தூக்கிட முயன்றவன் இராவணன். அவனது தோள் நெரியுமாறு திருப்பாதம் ஊன்றி இறுதியில் அருளால் ஆட்கொண்டவர் எம்பெருமான். அவர், நாள்தோறும் பூவும் நீரும் கொண்டு வழிபாடு செய்யும் அடியவர்கள் நிறைந்த ஆக்கூர் தான்தோன்றி மாடத்தில் விரும்பிப் பொருந்தியுள்ளார்.

காத்தல் தொழில் புரியும் திருமாலும், படைத்தல் தொழில் புரியும் பிரமனும் காணமுடியாத பழைமையான வடிவுடையவனே ஈசன். தோற்றம் கேடு இல்லாதவனே ஈசன். அவன், நாடி வந்து இரந்தவர்க்கு இல்லை என்று கூறாமல் கொடுக்கும் வள்ளல்கள் நிறைந்தஆக்கூர் தான்தோன்றி மாடத்தின்கண் பொருந்தியுள்ளான்.

புல்லிய சொற்களையே நாவினால் எப்பொழுதும் கூறி வருபவரே சமணரும்தேரரும் ஆவர். (அவர் சொற்களைக் கேட்க வேண்டாம்). கொன்றை மலர்மாலைகளை அணிந்த சிவபெருமான் ஆக்கூர் தான்தோன்றி மாடத்தின்கண் விரும்பி அமர்ந்துள்ளான். அங்கு பொய்கைகள் நிறைந்திருக்கும் . அதில் மீன்களும், செங்கழுநீர் மலர்களும் குவளைமலர்களும் நிறைந்து விளங்கும்.

மாடங்கள் நிறைந்த சீர்காழிப் பதியில் அவதரித்தவரே ஞானசம்பந்தர் பெருமான் ஆவார். அவர் திருநடனம் புரியும் ஆக்கூர் தான்தோன்றி மாடத்தில் உறையும் ஈசனைப் புகழ்ந்து பத்துப்பாடல்கள் பாடியுள்ளார். அதை விரும்பிப் பாடும் அடியவர்களுக்குப் பாவமே பற்றாதாம்.