திருக்ஷேத்திரக்கோவை

திருவாரூர், தில்லையம்பலம், வல்லம், நல்லம், திருக்கச்சி, அச்சிறுபாக்கம், கூரூர்,குடவாயில், குடந்தை, வெண்ணியூர், திருக்கழிப்பாலை, திருநின்றியூர், குன்றியூர், குருகாவூர், நாரையூர், திருக்கானப் பேரூர், திருநெய்த்தானம் ஆகிய தலங்களில் கோயில் கொண்டுள்ள பிறைசூடிய பெம்மானாகிய சிவனைத் தொழுவாயாக.

திருவண்ணாமலை, ஈங்கோய்மலை, திருமுதுகுன்றம், கொடுங்குன்றம், திருக்கண்ணார்கோயில், திருக்கழுக்குன்றம், திருக்கயிலை, திரிகோணமலை, திருக்கற்குடி, திருக்காளத்தி, திருவாட்போக்கி, திருப்பரங்குன்றம், திருப்பருப்பதம் ஆகிய தலங்களில் எம்பெருமான் தேவியோடு கோயில் கொண்டுள்ளான்.  அவனை வணங்கி நீ துன்பக் கடலிலிருந்து கரை ஏறுவாயாக.

அட்டானம் என்று ஓதிய நாலிரண்டும் - எட்டு வீரட்டங்களும். அட்டானம் - அஷ்டஸ்தாநம் என்பதன் திரிபு. கா, துறை, காடு, குளம், களம், பாடி, பாழி என முடியும் தலங்களையும் அவற்றுள் கா அல்லாதவற்றின் தொகையையும் குறித்தமை காண்க. சிட்டன்- சிஷ்டன். காடொன்பது- திருமறைக்காடு, தலைச்சங்காடு, தலையாலங்காடு, சாய்க்காடு, கொள்ளிக்காடு, ஆலங்காடு, பனங்காடு, வெண்காடு, வேற்காடு, கோட்டுக்காடு, நிறைக்காடு, மிறைக்காடு, இறைக்காடு என்பவும் உள. (சுந்தரர் ஊர்த்தொகை.3) குளமூன்றும் களம் அஞ்சும் - திருக்குளம், இடைக்குளம், பாற்குளம், வளைகுளம். கடிக்குளம், தஞ்சைத் தளிக்குளம் என்பவற்றுள் எம்மூன்றோ? 'வளைகுளமும் தளிக்குளமும் நல்லிடைக் குளமும் திருக்குளத்தோடு அஞ்சைக்களம் விள்ளாத நெடுங்களம் வேட்களம்' (அப்பர், அடைவு திருத்.), வேறு இரண்டு களம் யாவையோ? பாடி நான்கு - எதிர்கொள்பாடி, மழபாடி; பிற எவையோ? வலிதாயம் (பாடி) சேரின் மூன்றாம். பாழி மூன்று - திருவரதைப் பெரும்பாழி, களப்பாழி பிறிதொன்று யாதோ?

ஈசன், அறப்பள்ளித் தலத்தில் திருநீறு அணிந்து தோன்றுவான். திருக்காட்டுப் பள்ளியில் கங்கையைத் தலையில் தாங்கி நின்று அருளுவான். அவன் சிறப்புடன் சிராப்பள்ளி, செம்பொன்பள்ளி, திருநனிபள்ளி, மயேந்திரப்பள்ளியிலும் தோன்றுவான். பிறப்பு இறப்பு இல்லாத அவன், கங்கையைத் தலையில் தாங்கியபடியே பிற தலங்களிலும் காட்சி கொடுப்பான். அவன் கோயில் கொண்டுள்ள தலங்களுக்கெல்லாம் சென்று அவனைப் போற்றுவீராக. நலன்களைப் பெறுவீராக.

வஞ்சமனம் உடையோர் அஞ்சி ஓடிடவும், நன்மாதர்கள் பொருந்தி வணங்கவும் ஈசன் கூடல்மாநகரில் ஆலவாய்த் திருக்கோயிலில் கோயில் கொண்டுள்ளான். கொடுஞ்சொல் போந்த அடியவர் நிறைந்த இடைமருதூரிலும் நிறைந்துள்ளான். திருக்கருகாவூர், நல்லூர்,பெரும்புலியூரிலும் உள்ளான். எங்கும் நிறைந்த அவனையே தஞ்சம் எனக் கொண்டு வழிபாடு செய்யுமின். உங்களது வினைகள் எல்லாம் நீங்கப் பெறும்.

நெற்குன்றம், திருவோத்தூர், திருமருகல், நெடுவாயில், திருக்குற்றாலம், வலம்புரம், திருநாகேச்சுரம், மாகாளம், திருவாய்மூர் என்ற தலங்களில் கோயில் கொண்டுள்ளான் ஈசன். மலையை ஏந்தி மழையைத் தடுத்த திருமாலும், மாமறையோனாகிய பிரமனும் அறிய முடியா நிலையில் விளங்கிய ஈசனே அடியார்களுக்காக குடமூக்கு என்னும் தலத்தில்      கோயில் கொண்டுள்ளான். அவனைப் புகழ்ந்து பாடித் தொழுவோமாக.

ஈசன், குத்தங்குடி. வேதிகுடி, குருந்தங்குடி, தேவன்குடி, அத்தன்குடி, வண்குடி போன்ற தலங்களில் கோயில் கொண்டுள்ளான். அவன் தன் தலையில் கங்கையை அணிந்துள்ளான். நித்தன் நிமலன் என்று போற்றப்பெறும் அவனே உமாதேவியாருடன் எல்லாத் தலங்களிலும் கோயில் கொண்டுள்ளான். அதனை அறியாமல் புத்தர்களும் சமணர்களும் பொய்யுரை கூறித் திரிவர். அவர் உரைகளை விட்டுவிட்டு நீங்கள் ஈசனையே வழிபட்டு உய்வு பெறுவீர்களாக.

ஈசன் அன்பு வடிவானவன். அருந்தவமானவன். அமரர் தலைவன். அவன் மலர்நிறைந்த சோலைகள் சூழ்ந்த கொச்சைவயம் பதியில் கோயில் கொண்டுள்ளான். அத்தலத்தில் அவதரித்த ஞானசம்பந்தப் பெருமான் இறைவனைப் புகழ்ந்து பத்துப் பாடல்கள் பாடி அருளியுள்ளார். அப்பாடல்களை இரவும் பகலும் இடைவிடாமல் நினைந்து ஏத்தி விம்மாமல் வெருவாமல் விரும்பிப் பாடும் அடியவர்கள் சிவன் சேவடியைச் சேர்ந்து பேரின்பம் பெறுவர்.