திருத்தென்குரங்காடுதுறை

பூதகணங்கள் சூழ, இரவில் மயானத்தில் நெருப்பைக் கையில் ஏந்தித் திருநடனம் புரிபவரே சிவபெருமான். தலையில் அரவத்தை அணிந்தவரே சிவபெருமான். அவரே குரவ மலர்கள் நிறைந்து விளங்கும் குரங்காடுதுறை தலத்துள் கோயில் கொண்டுள்ளார். அவரைப் பரவித் தொழும் அடியவர்களின் வல்வினைகள் கெட்டு அழியும்.

பகைமை கொண்ட அசுரர்களின் முப்புரத்தை எரித்த விமலனாரே எம்பெருமான். இண்டுச் செடிகள் நிறைந்த புறங்காட்டில் நெருப்பைக் கையில் ஏந்தி ஆடுபவரே எம்பெருமான். வண்டுகள் மொய்க்கும் மணமிக்க கூந்தலைக் கொண்ட மங்கையைத் தன் இடபாகத்தில் கொண்டவரே எம்பெருமான். அவர் கோயில் கொண்டிருக்கும் தலமே தென்குரங்காடுதுறை என்க.

என்றும் நிறைவற்ற இடமே சுடுகாடு என்க. அக்காட்டில் உமையாளோடு நெருப்பைக் கையில் ஏந்தி ஆடுபவனே சிவபெருமான். கையில் மழு என்ற ஆயுதத்தை ஏந்தி நிற்பவனே சிவபெருமான். குரங்காடுதுறையில் பொருந்தி இருப்பவனே சிவபெருமான். அத்தலத்தில் மறைஒலி முழங்கிக் கொண்டே இருக்கும். வானவர்களும் தானவர்களும் இறைவனை வழிபாடு செய்து கொண்டே இருப்பர். குறைவற்ற இறைவன் அவனே ஆவான்.

நெற்றிக் கண்ணை உடையவனே எம்பெருமான். தலையில் வெண்பிறையைச்சூடியவனே எம்பெருமான். புறங்காட்டில் நெருப்பைக் கையில் ஏந்தி ஆடுபவனே எம்பெருமான். பிறர் அறியாமல் பழித்துக் கூறும் நிலையில் பிச்சை ஏற்றுத் திரிபவனே எம்பெருமான். பொற்றுகளைச் சுமந்து வரும் பொன்னி ஆற்றங்கரையில் உள்ள குரங்காடுதுறை தலத்துள் கோயில் கொண்டவனே எம்பெருமான் என்க.

ஈசன், திருநீற்றை மேனியில் பூசி உள்ளான். நெற்றிக் கண்ணைக் கொண்டு அருள்புரிவான். இடபக் கொடியை ஏந்தி நிற்பான். நெருப்பைக் கையில் ஏந்தி ஆடுவான்.கங்கை ஆற்றைத் தலையில் அணிந்துள்ளான். உமாதேவியைத் தன்உடம்பின் பாகமாகக் கொண்டிருப்பான். அவன் கோயில் கொண்டுள்ள தலமே தென்குரங்காடு துறையாம் என்க.

எம்பெருமான் கொன்றை மலர்மாலையை அணிந்திருப்பான். மணமிக்க திருநீற்றையும் பூசியிருப்பான். நெருப்பைக் கையில் ஏந்திச் சுடுகாட்டில் ஆடுவான். ஒளிமிக்க பாம்பை ஆபரணமாக அணிந்திருப்பான். அவன் குளிர்ந்த புனல் சூழ்ந்த குரங்காடுதுறை தலத்தில் கோயில் கொண்டிருப்பான்.

உயிரைத் தொடர்ந்துபற்றித் துன்பம் தரும் வினைகளைத் தீர்ப்பவனே எம்பெருமான். பார்வதிதேவியோடு பொருந்தி இருப்பவனே சிவபெருமான். முழவம், குழல், மொந்தை போன்ற இசைக்கருவிகள் முழங்க, நெருப்பைக் கையில் ஏந்தி ஆடுபவனே சிவபெருமான். மூவிலைச் சூலத்தை ஏந்தியிருப்பவனே சிவபெருமான். அவனே குரங்காடுதுறை தலத்துள் கோயில் கொண்டுள்ளான்.

கயிலாய மலையை எடுக்க முயன்ற அரக்கன் இராவணனின் வலிமையைத் தன் கால்விரலை ஊன்றி அழித்தவனே சிவபெருமான். அவன் விரைந்து வரும் காவிரி நதியின் கரையில் ஒலி பொருந்திய பொழில் சூழ்ந்துள்ள குரங்காடு துறை தலத்துள் கோயில் கொண்டுள்ளான்.

திருமாலும் நான்முகனும் அடிமுடி காணாதவாறு நெருப்புருவாய் ஓங்கி நின்றவன் சிவபெருமான். கையில் நெருப்பை ஏந்தி ஆடுபவன் சிவபெருமான். பிரம கபாலத்தைக் கையில் ஏந்திப் பலிதேர்பவன் சிவபெருமான். சிவந்த கண்களைக் கொண்ட இடபத்தைக் கொடியாகக் கொண்டவன் சிவபெருமான். அவனே குரங்காடுதுறை தலத்துள் கோயில் கொண்டுள்ளான் என்க.

துவராடை அணிந்த பௌத்தர் மற்றும் சமணர் எப்பொழுதும் முரண்பட்ட மொழிகளையே பேசித் திரிவார்கள். அம்மொழிகளை விரும்பாதவனே சிவபெருமான். நவமணிகளையும் பொன்னையும் சந்தனத்தையும் உருட்டிவரும் பொன்னி ஆற்றங்கரையில் உள்ள குரங்காடுதுறை தலத்தில் நம் சிவபெருமான் கோயில் கொண்டுள்ளார்.

நல்ல பண்பாளர்கள் நிறைந்த சீர்காழிப் பதியில் அவதரித்தவர் ஞானசம்பந்தப்பெருமான். அவர் இடப வாகனத்தில் அமர்ந்து அருளும் குரங்காடுதுறை இறைவனைப் போற்றி தமிழ்ப்பாடல்கள் பாடியுள்ளார். அத்தமிழ்ப்பாடல்களைப் பாடிப் பரவ வல்லவர்கள் வானுலக வாழ்வை அடைந்து அடியார்களுடன் கூடி மகிழ்ந்திருக்கப் பெறுவார்கள்.