திருப்புறம்பயம்

திருப்புறம்பயம் திருத்தலத்தில் கோயில் கொண்டவர் சிவபெருமான்! உயிர்களைத் துன்புறுத்தும் அரக்கர்களின் முப்புரங்களை எரித்துச் சாம்பலாக்கியவர் சிவபெருமான்! பசுமையும் செம்மையும் கலந்தது போல் உமாதேவியுடன் கலந்து காட்சி அளிப்பவர் சிவபெருமான்! அறங்களை சனகாதி முனிவர்களுக்கு உபதேசித்தவரும் அவரே ஆவார்!

விரிந்த சடாமுடியினை உடையவனே! விரைந்து வரும் கங்கை வெள்ளத்தைத் தன் தலையில் தரித்தவனே! காலனின் வலிமை கெடுமாறு அவன் கழுத்தில் உதைத்தவனே! உமையவளை ஒரு பாகத்தில் கொண்டவனே! திருப்புறம்பயத் தலத்தில் கோயில் கொண்ட நாதனே! உன்னை வணங்குகின்றேன்.

எல்லாமாக விரிந்தவனே! எல்லாவற்றையும் தனக்குள் அடக்கிக் கொண்டவனே! உயிர்களின் வினைகளை - வினைப்பயன்களை அவ்வுயிர்களோடு பொருத்தி செம்மை செய்பவனே! குருந்த மரத்தை ஒடித்த திருமால் பெண்ணாக விளங்க உடன் திரிந்த அன்பனே! மயானத்தில் நடனம் புரிபவனே! திருப்புறம்பயத்துள் கோயில் கொண்டவனே! உன்னை வணங்குகின்றேன்.

பெருகி வரும் கங்கையைத் தன் தலையில் ஒடுங்குமாறு செய்தவனே! அச்சடையில் பிறை நிலவை உலவச் செய்தவனே! இறந்தவர்களின் உடலைச் சுடுகின்ற மயானத்தில் உள்ள சுடலை நீற்றைப் பூசி உள்ளவனே! திருப்புறம்பயத் தலத்தில் கோயில் கொண்டவனே! உன்னை வணங்குகின்றேன்.

வினைத் தொடர்பும், பிறப்பும் இறப்பும் இல்லாத பெருமானே! கரும்பினும் இனிய சொல்லினை உடைய உமையவளை ஒரு பாகத்தில் கொண்டவனே! வண்டுகளின்      ரீங்காரம் கேட்டு   மலரும் கொன்றை மலர்களை மாலையாக அணிந்தவனே! திருப்புறம்பயத்துள் கோயில் கொண்டவனே! உன்னை வணங்குகின்றேன்.

தீ வளர்க்கும் நீண்ட கையை உடைய அந்தணர்கள் உன்னையே என்றும் நினைப்பவர்கள் ஆவார்கள். அவர் எத்தொழிலை மேற்கொண்டவர் ஆயினும் அவர்தம் தீவினைகட்குப் பகையாய் இருந்து தீர்ப்பன் நீயே. தீக்கொழுந்து போன்ற ஒலி பொருந்திய சடையில் தனித்த பிறைச் சந்திரனோடு பொருந்தக் கங்கையை கிடக்குமாறு செய்துள்ளவர் சிவபெருமான். திருப்புறம்பயத்தலத்துள் உறைபவரும் அவரே ஆவார்

சத்துவ குணம் நிறைந்த அடியவர் உள்ளத்துள் பொருந்தியவன் சிவபெருமான்! அருளைத் தவிர அறப்பயன்களும் வேண்டாவாம் என வாழும் உரிமை பெற்றோர் உள்ளத்துள் பொருந்தியவனும் நீயே. சிவஞானியர்களின் திறத்திற்குத் தக்கபடி பொருந்தியும் வேறாகியும் விளங்குபவனும் நீயே. திருப்புறம்பயம் தலத்தில் உறைபவனும் அவனே ஆவான்.

இலங்கை வேந்தனாகிய இராவணன் கயிலை மலையை எடுத்தபோது கதறச்செய்தவர் சிவபெருமான். அவனது வலிமை மிக்க கைகளை நெரித்தவர் சிவபெருமான்.அஞ்சா உளங்கொண்ட அவனையும் அஞ்சுமாறு செய்தவர் சிவபெருமான். இறுதியில் அவனது ஆணவத்தை அடக்கி வழிபடச் செய்தவர் சிவபெருமான். திருப்புறம்பயத்துள் கோயில் கொண்டு இருப்பவரும் அவரே.

ஆலிலையில் கிடந்த திருமாலும் தாமரை மலரில் இருந்த பிரமனும் ஆணவத்தால்   அடிமுடி தேடிய பொழுது இருவரும் அறிய முடியாநிலையில் ஒளிவுருவாய் நின்றவர் சிவபெருமான். இருவரும் ஆணவம் அடங்கப் பெற்று வணங்கியபோது அருள்புரிந்தவர் சிவபெருமான். திருப்புறம்பயத்துள் கோயில் கொண்டு இருப்பவரும் அவரே ஆவார்.

சமணரும் சாக்கியரும் தமக்குள்ளேயே மாறுபாடு கொண்டு ஊன் நல்லது எனவும் தீயது எனவும் கூறிக் கொள்வர். உடம்பினை மறைக்கும் உடையும் வேண்டா எனத் திரியும் திகம்பரர்கள். அவர்களின் தீமொழிகளை ஏற்றுக் கொள்ளாதீர். உமையவளை உடம்பின் ஒரு பாகமாகக் கொண்டு திருப்புறம்பயத்துள் அமர்ந்த இறைவனையே வணங்குங்கள்.

உப்பங்கழிகள் நிறைந்ததும் பேரலைகளால் முத்துக்கள் ஒதுங்கப் பெறுவதுமாகிய தலமே கழுமலமாம். அங்கு அவதாரம் செய்தவரே தமிழுக்கு உரிமை பூண்ட ஞானசம்பந்தப் பெருமான் ஆவார். அவர் திருப்புறம்பயத்திறைவனைப் போற்றி, பத்துப் பாடல்கள் பாடியுள்ளார். அந்தப் பாடல்களைஅன்புடன் பாடுபவர்கள் பிணிநீங்கப் பெறுவர். பிறவா நிலையும் உறுவர்