திருத்தொண்டர்கள் மலர் தூவி சிவபெருமானை வழிபடுவர். அவர் நஞ்சுண்டு கருத்த கண்டத்தினைக் கொண்டவராய் கருவூரானிலை திருத்தலத்தில் கோயில் கொண்டுள்ளார். அண்டங்களுக்கெல்லாம் தலைவராகிய அவரை நாமும் அன்புடன் வழிபடுவோம். அவர் உறுதியாக அருள்புரிவார்.
ஆகம முறைப்படி நினைந்து வேதங்களை ஓதும் அடியார்களோடு எம்பெருமான் எப்போதும் கூடியிருப்பான். குழை என்னும் ஆபரணத்தை அணிந்த எம்பெருமான் கருவூரானிலைத் தலத்தில் பொருந்தியுள்ளார். அவர் சிவனடியார்களைத் தம் அன்பர்களாகக் கொண்டு அருள்புரிவார்.
சிவபெருமான், விண்ணில் உலாவும் சந்திரனைத் தன் தலையில் சூடி இருப்பார். வேதம் ஓதும் அந்தணர்கள் நிறைந்த இடங்களில் பொருந்தியிருப்பார். திருக்கருவூரானிலைத் தலத்தில் கோயில் கொண்டுள்ளார். அவர் என்றும் அடியார்களுக்கு நல்லவராய் அருள்புரிவார்.
சிவபெருமான், மதங்கொண்ட யானையின் தோலை உரித்து ஆடையாக அணிந்தவர். திருநீறு பூசியவர். மலரம்புகளைக் கொண்ட மன்மதனை எரித்து அழித்தவர். மணமிக்க மலர்கள் பொருந்திய சோலைகள் நிறைந்த கருவூரானிலைத் தலத்தில் பொருந்தி இருப்பவர். எல்லாவற்றையும் தமதாகக் கொள்ளும் அவரே எமது ஈசர் ஆவார்.
ஈசனார், தாமரை மலர் போன்ற மென்மையான பாதங்களைக் கொண்டவர். உமையவளைத் தன் உடம்பில் இடபாகத்தில் கொண்டவர். நீலமணி போன்ற கண்டத்தினைக் கொண்டவர். கங்கை நதியைத் தலையில் தாங்கியவர். கருவூரானிலைத் தலத்துள் இருப்பவர். அங்கையில் ஆடும் அரவத்துடன் காட்சி அளிக்கும் அண்ணல் அவரே ஆவார்.
ஈசனார், தேவர்கள் போற்றுமாறு சந்திரனையும் பாம்பையும் தலையில்கொண்டவர். முப்புரங்களை அழிக்க அம்பினைக் கையில் கொண்டவர். கருவூரானிலைத்தலத்துள் கோயில் கொண்டு அன்பர்களுக்கு அருள்புரிபவர். மும்மூர்த்திகளுள்ஒருவராகவும் விளங்கும் ஆற்றலைக் கொண்டவர் அவரே ஆவார்.
ஈசனார், பண்ணின் இசையாக விளங்குபவர். இடப வாகனத்தின் மீதேறி இருப்பவர். உமையவளைப் பாகமாகக் கொண்டவர். பிறைநிலவைத் தலையில் தாங்கி இருப்பவர். நெற்றிக்கண்கொண்டவர். கருவூரானிலைத் தலத்தில் கோயில் கொண்டிருப்பவர். வழிபடும் அடியார்களுக்கு என்றும் அருள்புரிபவர் அவரே.
இராவணன் கயிலாய மலையைத் தூக்க முயன்றபோது, ஈசனார் சினம் கொண்டு அவனது தலைகளையும் தோள்களையும் நெரித்து அவனது ஆற்றலை அடக்கியவர். கருவூரானிலைத் தலத்துள் கோயில் கொண்டுள்ளவர். அடியவர்களுக்கு என்றும் அருள்புரியும் கூத்தன் அவரே ஆவார்.
பன்றி வடிவில் பூமியைத் தோண்டிச் சென்ற திருமாலும், அன்னத்தின்மீது பறந்து சென்ற பிரமனும் காணமுடியாத சிறப்புக் கொண்டவரே சிவபெருமான் ஆவார். பேய்க்கூட்டத்தோடு ஆடல் புரியும் அவரே, கருவூரானிலைத் தலத்துள் கோயில் கொண்டுள்ளார். அவரது திருவடிகளே எங்கும் நிறைந்த முழுமை நிலையாம் என்க.
புத்தர்களும், சமணர்களும் கூறுகின்ற வார்த்தைகள் பொய்மை நிறைந்தவை. அப்பித்தர்கள் கூறுகின்ற சொற்களை ஏற்க வேண்டாம். மெய்ப்பக்தர்கள் என்றும் வழிபாடு செய்யும் கருவூரானிலை ஈசனையே அடைந்து வழிபட்டு உய்வு பெறுவீர்களாக.
மணம் நிறைந்த சோலைகள் பொருந்திய சீர்காழிப் பதியில் அவதரித்தவரே ஞானசம்பந்தப் பெருமான் ஆவார். அவர் கருவூரானிலையில் கோயில் கொண்டுள்ள எந்தையாகிய ஈசனைப் புகழ்ந்து பத்துப் பாடல்கள் பாடியுள்ளார். அதனைச் சிந்தையில் கொண்டு பாடியவர்களின் துயரமெல்லாம் நீங்கும் என்க.