திருஇந்திரநீலப்பருப்பதம்

 பூதகணங்கள் மகிழ்ந்து போற்ற வீற்றிருப்பவர் எம்பெருமான்! மானையும் சூலப்படையையும் ஏந்துபவர் எம்பெருமான்! கரிய நீலநிறம் பொருந்திய மலை மேல்வீற்றிருப்பவர் எம்பெருமான்! அவருடைய திருவடிகளை விரும்பித் துதிக்கும் அடியவர்கள் எண்ணியவை எல்லாவற்றையும் எய்துவர்.

குறைதல் இன்றி என்றும் ஒரு கலையாய் நிறைவு பெறும் பிறையைச் சென்னியில் வைத்துள்ளார். வண்டுகள் மொய்க்கும் கொன்றைமலர் மாலையைச் சூடியுள்ளார். இறைவனாகிய அவர் இந்திர நீல மலையில் கோயில் கொண்டுள்ளார். அப்பெருமானைப் போற்றி நற்கதி அடைவீராக.

அடியவர்களால் என் பொன்னே, என் மணியே என்று போற்றப் பெறுபவன்எம்பெருமான் ஆவார். அவர் எப்போதும் நான்கு மறைகளைப் பாடிக் கொண்டே இருப்பார். இந்திரநீலப் பருப்பதத்தில் குடியிருக்கும் இறைவனும் அவனே ஆவார். அவரது திருவடிகளையே சரணாகதி அடைந்து வாழ்வீராக.

ஈசன், நம்முடைய வினைகளை நாசம் செய்வார். நமக்கு நன்மைகளை அருளுபவர். செம்மை நிறமும் புகழும் பொருந்திய அவர் இந்திரநீல மலையில் உறைபவர். அவரைப் பணிந்து வாழ்த்தும் அடியவர்கள் நற்குணம் ஓங்கப் பெறுவார்கள்.

எம்பெருமான் மானைக் கையில் ஏந்தியவர். உமையவளை இடபாகத்தில் கொண்டுஅருள்செய்பவர். வணங்கும் அடியார்கள் வினைகளை தீர்க்கும் உயர்பண்பு நிறைந்தவர். இந்திரநீல மலையில் பொருந்தி இருப்பவர். பலி தேர்ந்து வருபவர். கங்கையைத் தலையில் அணிந்தவர். இவையே அவரது வண்ணமாம் என்க.

எம்பெருமான் வெண்ணிலவைத் தன்தலையில் சூடி மகிழ்பவர். பகையைக் கொண்ட அரக்கர்களின் முப்புரங்களை அழிக்க மேருமலையை வில்லாகக் கொண்டவர். இந்திரநீல மலையில் வீற்றிருக்கும் அண்ணல் அவரே. நம் மனத்தில் பொருந்தி இருக்கக் கூடிய நல்லவர் அவரே ஆவார்

எம்பெருமான் இடபக் கொடியைக் கையில் ஏந்தியவர். எமனைக் காலால் உதைத்தவர். திருநீறு பூசிய மேனியர். பாம்பினை அணிகலனாகப் பூண்டவர். இந்திர நீல மலையில் கோயில் கொண்டவர். அவரையே விரும்பி வழிபடுவோமாக.

கயிலாய மலையை எடுத்த அரக்கன் இராவணனின் கைகளையும் தோள்களையும் தன் கால் கட்டைவிரலால் அடர்த்தவர் எம்பெருமான். பிறகு இராவணனுக்கு அருள் செய்தவரும் அவரே ஆவார். இந்திர நீல மலையில் அவரை அன்புடன் மனத்தால் அடைந்து வழிபாடு செய்திட நமக்கு பேரின்பம் கையுறும்.

திருமாலும் நான்முகனும் போற்றி வணங்கும் தலைவனே எம்பெருமான். அவர் இந்திரநீல மலையில் கோயில் கொண்டுள்ளார். அவரை உணராமல் வாழுபவர்கள் வினைகள் நீங்காமல் பற்றிக் கொள்ளும். மேலும் அத்தகையோரை எமனும் சினந்துதுன்புறுத்துவான் என்க.

சமணர்களும் பௌத்தர்களும் நற்பண்பு இல்லாதவர்கள் ஆவார்கள்.எம்பெருமான் கோயில் கொண்டிருக்கும் இந்திரநீல மலையின் சிறப்பை எள் அளவும் நினையாது வாழ்வார்கள். அவர்களுக்கு எந்தச் சிறப்பும் இவ்வுலகில் வந்து பொருந்தாது என்க.

மணமிக்க சோலைகள் நிறைந்த சீர்காழிப் பதியில் அவதரித்தவரே திருஞான சம்பந்தர் ஆவார். அவர் இந்திரன் வணங்கும் இந்திரநீல மலையில் விளங்கும் சிவபெருமானைப் புகழ்ந்து பத்துப் பாடல்கள் பாடியுள்ளார். அப்பாடல்களை அடியவர்கள் ஓதி வழிபட்டு நன்நிலையில் வாழ்வார்களாக.