திருநெல்வாயில்

நெல்லி மரங்களுக்கு மத்தியில் கோவில் கொண்டவர் ஈசன். அவர் சிறு பறவைகள் பொருந்தி வாழும் மடைகள் சூழ்ந்த நெல்வாயில் என்னும் தலத்தில் கோயில் கொண்டுள்ளார். உயர் பண்புகள் அனைத்தும் நிறைந்த அவர், மறைநான்கையும் நால்விரற் கோவண ஆடையாகக் கொண்டுள்ளார். உச்சியார் என்னும் திருப்பெயர் கொண்ட அவரே எனது தலைஉச்சியிலும்      பொருந்திய மாண்பினர்.

மதில்மேல் - திரிபுரத்து மதிலின்மீது. கணை - பாணம். வாங்கினார் – (வில்லை) வளைத் (துஎய்) தார். வெள்ளம்- கங்கைப் பெருக்கு. தலையாயதன்மையர்- முன்னைப் பழம்பொருட்கும்முன்னைப் பழம் பொருளாந் தன்மை முதலிய ஆறும் உடையவர். ஷாட்குண்யர், எண்குணமுமாம். நீங்கும் நீர - ஓடும் நீர்ப் பெருக்காகிய வளமுடைய நீள்கு என்பதன் மரூஉவே நீங்கு என்பது. நீங்கிற்றெறூஉம்குறுகுங்கால் தண் என்னுந் தீ (குறள் 1104) என்னுங் குறளுக்குப் பரிமேலழகர் எழுதிய உரையை நுணுகி நோக்கின் இது விளங்கும்.

தினமும் அடியவர்கள் அன்புடன் தொழுது வணங்கிட அருள்புரியும் இச்சையுடன் உறைவார் எம்பெருமான். அவர் பாம்பினைத் தனது அரைக்கச்சையாக அணிந்து காட்சி தருவார். திருநெல்வாயிலில் கோயில் கொண்டுள்ள அவரே எமது தலைமேலும் பொருந்தி உள்ளார்.

நான்கு வேதங்களாக விளங்குபவர் எம்பெருமான். மழுப்படையை உடையவர் எம்பெருமான். பிறைச்சந்திரனைத் தலையில் தாங்கியவர் எம்பெருமான். அவர் நெஞ்ச நிறைவுடன்வழிபடும் அடியவர்களுக்கு அருள நெல்வாயிலில் கோயில் கொண்டுள்ளார். அவரே எமது தலைமேலும்பொருந்தியுள்ளார்.

வயது முதிர்ந்தவர் போலத் தோற்றத்துடன் திருவெண்ணீறு பூசிக் கொண்டு காட்சி கொடுப்பவர் எம்பெருமான். நெருப்பைக் கையில் ஏந்தி விளங்குபவர் எம்பெருமான். எப்பொழுதும் திருநடனம் புரிதலை விரும்பியவர் எம்பெருமான். அன்பர்களுக்காகத் திருநெல்வாயில் தலத்துள் பொருந்திய அவரே எனது உச்சிமேலும் பொருந்தியுள்ளார்.

கார்காலத்தில் மலரும் கொன்றை மலர்களைத் தலையில் சூடுபவர் எம்பெருமான். பல (நாமங்களை) திருப்பெயர்களைக் கொண்டவர் எம்பெருமான். பிறைநிலவையும் கங்கை நதியையும் தலையில் அணிந்தவர் எம்பெருமான். அடியார்கள் வழிபாடு செய்ய திருநெல்வாயில் தலத்துள் பொருந்தி இருப்பவர் எம்பெருமான். அவரே எமது உச்சித் தலையிலும் பொருந்தியுள்ளார்.

முன்னைப் பழம் பொருட்கும் முன்னைப் பழம்பொருள் எம்பெருமான். பின்னைப் புதுமைக்கும் புதுமை எம்பெருமான். தீவினை மிக்க அசுரர்களின் முப்புரங்களை அழித்தவர் எம்பெருமான். ஆசார ஒழுக்கம் நிறைந்த அடியவர்கள் வாழும் நெல்வாயில் உறைபவர் எம்பெருமான். அவரே எமது தலைமேலும் உறைகின்றார்.

அரக்கனாகிய இராவணன் கயிலாய மலையினைப் பெயர்த்து எடுக்க முயன்றபோது, தன்கால் விரலினை ஊன்றி அவனது செருக்கை அடக்கியவர் சிவபெருமான். அவரே அடியவர்கள் அடி பணிந்து வணங்கும் வகையில் திருநெல்வாயிலில் குடிகொண்டுள்ளார். அவரே எமது தலைமேலும் பொருந்தி உள்ளார்.

கருநிறமுடைய திருமாலும் பிரமனும் கூடி எம்பெருமானின் அடிமுடி தேட முயன்றனர். அவர்கள் கண்டு கொள்ள முடியாத நிலையில் விளங்கியவரே எம்பெருமான்.நெல்வாயில் தலத்தில் கோயில் கொண்டுள்ளவரும் அவரே. பிரமகபாலத்தை ஏந்தி பலிதேர்ந்து வருபவரும் அவரே. அவரே எமது தலைமேலும் பொருந்தியுள்ளார் என்க .

குண்டர்களாகிய சமணர்களும் துவராடை அணிந்த மூடர்களாகிய புத்தர்களும்அறியாமை உடையவர்கள். நற்சொற்களைப் பேசாதவர்கள். அவர்களது பண்பற்ற சொற்களை ஏற்க வேண்டாம். நீடு உயர்ந்த நெல்வயல்கள் நிறைந்த திருநெல்வாயில் தலத்தில் கோயில் கொண்டுள்ள நீலகண்டரின் திருவடிகளையே தலைமேல் கொண்டு போற்றி வாழுங்கள்.

அன்புடன், அடியவர்கள் போற்றி வணங்கிட எம்பெருமான் திருநெல்வாயில் தலத்துள் கோயில் கொண்டுள்ளார். அந்த ஈசனைப் போற்றி சீகாழிப்பதியில் அவதரித்த ஞானசம்பந்தப் பெருமான் பத்துப் பாடல்களைப் பாடி அருளியுள்ளார். அப்பாடல்களை விரும்பிப் பாடும் அடியவர்களின் நல்விருப்பங்கள் அனைத்தும் ஈடேறும்.