திருநாகேச்சரம்

பொன் போன்ற அழகிய மேனியை உடையவன் என்றும், மின்னல் போன்ற ஒளியுடைச் சடையன் என்றும், காவிரி பாயும் நன்னிலமாகிய திருநாகேச்சுர நகரில் கோயில் கொண்டவன் என்றும், என்றும் நிலையானவன் என்றும் எம்பெருமானைப் போற்றி வணங்குபவர்களின் வினைகள் நீங்கப்பெறும் என்க.

முப்புரங்களை ஆண்ட அசுரர்களை அழிக்க, மேருமலையை வில்லாகவும் ,திருமாலை நீண்ட அம்பாகவும் கொண்டு செலுத்தியவனே, தேன்பொழியும் உயர்ந்த மரங்கள் நிறைந்த சோலைகளால் சூழப்பெற்ற திருநாகேச்சுர நகருள் கோயில் கொண்டவனை, தருமசொரூபியானவனைத் துதிப்பவர்களின் வினைகள் நீங்கும் என்க.

கல்லால மரத்தின் அடியில் எழுந்தருளியவன் என்றும், கரும்பு வில்லைக் கொண்ட மன்மதனை எரித்தவன் என்றும், நன்னெறியாகிய சிவஞானத்தையும் நற்பண்புகளையும் உடைய நல்லவர்கள் தொழுகின்ற திருநாகேச்சுர நகரில் கோயில் கொண்டருள்பவன் என்றும்,எல்லாச் செல்வங்களும் பொருந்தப் பெற்றவன் என்றும், ஈசனைத் தொழுபவர்களின் வினைகள் தேய்ந்து நீங்கிவிடும் என்க.

ஒளிமிக்க சந்திரனையும், சீறும் பாம்பையும், வேகமாக ஓடிவரும் கங்கை நதியையும் தன்சடையில் பொருந்துமாறு இருக்கச் செய்தவனே! செம்முல்லை மலர்கள் நிறைந்து விளங்கும் திருநாகேச்சுரத் தலத்துள் கோயில் கொண்ட இறைவனே! என உன்னை அன்புடன் தொழுபவர்களின் வினையினால் வரும் பற்றுக்கள் நீங்கப்பெறும் என்க.

துள்ளிக் குதித்தோடும் மான்மறியையும், நெருப்பையும், மழுவாயுதத்தையும், நிலையாகக் கையில் ஏந்தியவனே! நலம் நிறைந்த திருநாகேச்சுர தலத்துள் விளங்கும் தலைவனே! என அன்புடன் வணங்குபவர்களின் வல்வினைகள் தாமே நீங்கப் பெறும்.

மலையரசன் மகளாகிய பார்வதிதேவி கண்டு மகிழ ஒலிக்கின்ற வீரக்கழல்கள் அணிந்து, நடனம் ஆடி மகிழ்ந்தவனே! வெண்மை நிறம் கொண்ட இடப வாகனத்தில் ஏறி இருந்து அருள்பவனே! திருநாகேச்சுர நகரத்தில் கோயில் கொண்ட அரசே! என்றெல்லாம் போற்றி வணங்கும் தொண்டர்களின் அருந்துயரங்கள் நீங்கும் என்க.

பிரமகபாலத்தைக் கையில் ஏந்தி, தாருகாவனத்து முனிவர்களின் வீட்டு வாசல்களின்முன் பலி தேர்ந்து நிற்பவனே! எல்லாவற்றுக்கும் காரணகர்த்தாவாக விளங்கும் ஈசனே! ஒழுக்கம் நிறைந்தவர்கள் வாழும் திருநாகேச்சுர தலத்துள் கோயில் கொண்டிருப்பவனே! என்றெல்லாம் உன்னைப் போற்றி வணங்குபவர்களின் வினைப் பயன்கள் தாமே நீங்கப் பெறும்.

ஆணவ மலம் மிகப் பெற்ற அரக்கனாகிய இராவணனை ஆற்றல் இழந்து அலறச் செய்தவனே! உன்னை அன்புடன் விளங்கும் அடியார்களுக்கு அருள்புரிபவனே! நாகேச்சுர நகருள் கோயில் கொண்ட தாயானவனே! என உன்னை வணங்குபவர்களின் வினைகள் தாமே நீங்கும் என்க.

திருமாலும், நான்முகனும் அடிமுடி தேடிட பெருநெருப்பாய் நிமிர்ந்து ஓங்கிய சிவபெருமானே! வயல் வளம் நிறைந்த திருநாகேச்சுரத் தலத்துள் கோயில் கொண்டு அருள்பவனே! என்றெல்லாம் உன்னைப் புகழ்ந்து கூறிடும் அடியவர்கள் என்றும் இன்புறுவார்கள்.

சமணர்கள் குற்றம் நிறைந்தவர்கள். மனிதர்களின் மண்டை ஓட்டில் ஊன் ஏற்று உண்டு வாழ்பவர்கள். அவர்கள் கூறும் தப்பான உரைகளை அடியவர்கள் ஏற்றுக் கொள்ள வேண்டாம். நலம் நிறைந்த நாகேச்சுர நகரத்துள் கோயில் கொண்டுள்ள சிலம்பணிந்த சிவபெருமானே எனப் போற்றி வணங்குவோரின் தீவினைகள் எல்லாம் நீங்கப் பெறும்.

மரக்கலன்கள் நிறைந்த கடல் சூழ்ந்த சீர்காழிப் பதியில் அவதரித்த செந்தமிழ்விரகராகிய ஞானசம்பந்தப் பெருமான், நாகேச்சுர நகரில் கோயில் கொண்ட சிவபெருமானைப் புகழ்ந்து போற்றி பத்துப் பாடல்கள் அருளி உள்ளார். அப்பாடல்களை உணர்ந்து அன்புடன் பாட வல்லவர்களின் வினைகள் தாமே நீங்கும் என்க.