1
வம்பார் குன்றம் நீடுயர்சாரல் வளர்வேங்கைக்கொம்பார் சோலைக் கோலவண் டியாழ்செய் குற்றாலம்அம்பால் நெய்யோ டாட லமர்ந்தான் அலர்கொன்றைநம்பான் மேய நன்னகர்போலுந் நமரங்காள்.
சொற்பிரிப்பு
வம்பு ஆர் குன்றம், நீடு உயர் சாரல், வளர் வேங்கைக்கொம்பு ஆர் சோலைக் கோல வண்டு யாழ்செய் குற்றாலம்அம் பால் நெய்யோடு ஆடல் அமர்ந்தான், அலர்கொன்றைநம்பான், மேய நன்நகர்போலும்; நமரங்காள்!
உரை
நம்மவர்களே! திருக்குற்றாலமானது பலமுறை கண்டார்க்கும் காணுந்தோறும் புதுமையைப் பயக்கும் குன்றுகளையும், காலத்தாலும், இடத்தாலும் நீண்டு உயர்ந்த மலைச் சாரலையும், உயர்ந்த வேங்கை மரங்களின் கிளைகள் நிறைந்த சோலைகளையும் உடைய நன்னகரமாகும். இங்கு அழகிய வண்டுகள் யாழ்போல் ஒலிக்கின்றன. இந்நகரத்தில், இனிய பால் நெய் ஆகியவற்றோடு நீராடுவதை விரும்புகின்றவராய், விரிந்த கொன்றை மலர்களைச் சூடி, யாவராலும் விரும்பப்படுகின்ற சிவபெருமானார் எழுந்தருளி உள்ளார்.