திருப்பரங்குன்றம்

அருளியவர்: திருஞானசம்பந்தர்
பண்: குறிஞ்சி
தலம்: பரங்குன்றம்
நாடு: பாண்டியநாடு

1

நீடலர்சோதி வெண்பிறையோடு நிரைகொன்றைசூடலன்அந்திச் சுடரெரியேந்திச் சுடுகானில்ஆடலன்அஞ்சொல் அணியிழையாளை யொருபாகம்பாடலன்மேய நன்னகர்போலும் பரங்குன்றே.

சொற்பிரிப்பு

நீடு அலர் சோதி வெண்பிறையோடு நிரை கொன்றைசூடலன், அந்திச் சுடர் எரி ஏந்திச் சுடுகானில்ஆடலன், அம் சொல் அணியிழையாளை ஒருபாகம்பாடலன், மேய நன்நகர்போலும் பரங்குன்றே.

உரை

சிவபெருமான்‌, நீண்டு விரிந்த ஒளிக்‌ கதிர்களை உடைய வெண்பிறையையும்‌, வரிசையாகத்‌ தொடுத்த கொன்றை மாலையையும்‌ தன்‌ முடியில்‌ சூடியிருப்பவர்‌. அந்திப்‌ பொழுதில்‌ ஒளியோடு கூடிய எரியை ஏந்திச்‌ சுடுகாட்டில்‌ ஆடுபவர்‌. அழகிய உயர்ந்த சொற்களைப்‌ பேசுபவளும்‌, சிறந்த அணிகலன்களைப்‌ பூண்டுள்ளவளும்‌ ஆகிய உமையம்மையை ஒருபாகமாகக்‌ கொண்டு பாடுபவர்‌. அத்தகைய பெருமான்‌ எழுந்தருளிய நன்னகரம்‌ திருப்பரங்குன்றம்‌ ஆகும்‌.

2

அங்கமொராறும் அருமறைநான்கும் அருள்செய்துபொங்குவெண்ணூலும் பொடியணிமார்பிற் பொலிவித்துத்திங்களும்பாம்புந் திகழ்சடைவைத்தோர் தேன்மொழிபங்கினன்மேய நன்னகர்போலும் பரங்குன்றே.

சொற்பிரிப்பு

அங்கம் ஓர் ஆறும் அருமறை நான்கும் அருள் செய்து,பொங்கு வெண் நூலும் பொடி அணி மார்பில் பொலிவித்து,திங்களும் பாம்பும் திகழ்சடை வைத்து ஓர் தேன்மொழிபங்கினன் மேய நன்நகர்போலும் பரங்குன்றே.

உரை

சிவபெருமான், நாங்கு வேதங்களையும், ஆறு அங்கங்களையும் அருளிச்செய்தவர். திருநீறு ஆணிந்த மார்பில் அழகுமிக்க வெண்ணூலை பொலிவுற அணிந்திருப்பவர். பிறை பாம்பு அகியவற்றை விளங்கும் சடை மீது சூடியிருப்பவர். உமையம்மையை ஒருபாகமாகக்‌ கொண்டவர்‌. இப்பெருமான் எழுந்தருளிய நன்னகரம் திருப்பரங்குன்றம்‌ ஆகும்‌.

3

நீரிடங்கொண்ட நிமிர்சடைதன்மேல் நிரைகொன்றைசீரிடங்கொண்ட எம்மிறைபோலுஞ் சேய்தாயஓருடம்புள்ளே உமையொருபாகம் உடனாகிப்பாரிடம்பாட இனிதுறைகோயில் பரங்குன்றே.

சொற்பிரிப்பு

நீர் இடம் கொண்ட நிமிர் சடை தன்மேல் நிரை கொன்றைசீர் இடம் கொண்ட எம் இறைபோலும், சேய்து ஆயஓர் உடம்புள்ளே உமை ஒருபாகம் உடன் ஆகி,பாரிடம் பாட, இனிது உறை கோயில் பரங்குன்றே.

உரை

சிவபெருமான்‌ கங்கை சூடிய நிமர்ந்த சடைமுடி மேல்‌ வரிசையாகத்‌ தொடுத்த கொன்றை மாலையைச்‌ சிறப்புற அணிந்துள்ள எம்‌ இறைவர்‌ ஆவார்‌. மிக உயர்ந்துள்ள தமது திருமேனியின்‌ ஒருபாகமாக உமையம்மையைக்‌ கொண்டுள்ளவர்‌. இப்பெருமான்‌ பூத கணங்கள்‌ பாட, இனிதாக உறையும்‌ கோயில்‌ திருப்பரங்குன்றம்‌ ஆகும்‌.

4

வளர்பூங்கோங்கம் மாதவியோடு மல்லிகைக்குளிர்பூஞ்சாரல் வண்டறைசோலைப் பரங்குன்றம்தளிர்போல்மேனித் தையல்நல்லாளோ டொருபாகம்நளிர்பூங்கொன்றை சூடினன்மேய நகர்தானே.

சொற்பிரிப்பு

வளர் பூங்கோங்கம் மாதவியோடு மல்லிகைக்குளிர்பூஞ்சாரல் வண்டு அறை சோலைப் பரங்குன்றம்,தளிர் போல் மேனித் தையல் நல்லாளோடு ஒரு பாகம்,நளிர் பூங்கொன்றை சூடினன் மேய நகர்தானே.

உரை

திருப்பரங்குன்றத்தில்‌ வளர்ந்துள்ள கோங்கு மரங்களும்‌, மணம்‌ தரும்‌ மாதவி போன்ற செடிகளும்‌, மல்லிகை முதலிய கொடிகளும்‌ நிறைந்துள்ளன. வண்டுகள்‌ முரலும்‌ சோலைகள்‌ சூழ்ந்த சாரலை உடையது. தளிர்‌ போன்ற மேனியளாகிய தையல்‌ நல்லாளை ஒரு பாகமாகவும்‌, கொன்றை மலர்‌ மாலையை அணிந்தவனாகவும்‌ விளங்கும்‌ சிவபெருமானது நகர்‌ திருப்பரங்குன்றம்‌ ஆகும்‌.

5

பொன்னியல்கொன்றை பொறிகிளர்நாகம் புரிசடைத்துன்னியசோதி யாகியஈசன் தொன்மறைபன்னியபாடல் ஆடலன்மேய பரங்குன்றைஉன்னியசிந்தை உடையவர்க்கில்லை உறுநோயே.

சொற்பிரிப்பு

பொன் இயல் கொன்றை பொறி கிளர் நாகம் புரிசடைத்துன்னிய சோதி ஆகிய ஈசன், தொல்மறைபன்னிய பாடல் ஆடலன், மேய பரங்குன்றைஉன்னிய சிந்தை உடையவர்க்கு இல்லை, உறு நோயே.

உரை

கோங்கம்‌ மாதவி மல்லிகை இவைகள்‌ செறிந்த சாரலை உடைய பரங்குன்றம்‌. பெண்ணொரு பாகன்‌ பேணிய நகரம்‌ என்கின்றது. இவன்‌ போகியாதற்கேற்பக்‌ குன்றமும்‌ மல்லிகை முதலிய மணந்தரும்‌ பூக்கள்‌ மலிந்துள்ளமையும்‌, புணர்ச்சி நலமிகும்‌ சாரலோடு கூடியமையும்‌ குறிக்கப்‌ பெற்றன.

6

கடைநெடுமாடக் கடியரண்மூன்றுங் கனல்மூழ்கத்தொடைநவில்கின்ற வில்லினன்அந்திச் சுடுகானில்புடைநவில்பூதம் பாடநின்றாடும் பொருசூலப்படைநவில்வான்றன் நன்னகர்போலும் பரங்குன்றே.

சொற்பிரிப்பு

கடை நெடு மாடக் கடி அரண் மூன்றும் கனல் மூழ்கத்தொடை நவில்கின்ற வில்லினன், அந்திச் சுடுகானில்புடை நவில் பூதம் பாட, நின்று ஆடும் பொரு சூலப்-படை நவில்வான்தன் நன்நகர்போலும் பரங்குன்றே.

உரை

வாயிலில்‌ காவலை உடைய அசுரர்களின்‌ மூன்று கோட்டைகளும்‌ நெருப்பில்‌ எரிந்து மூழ்குமாறு அம்பினை எய்த வில்லை உடையவர்‌ சிவபெருமான்‌. இவர்‌ அந்திக்‌ காலத்தில்‌ தன்னோடு பழகிய பூதகணங்கள்‌ பாட சுடுகாட்டில்‌ ஆடுபவர்‌. போர்க்‌ கருவியாகிய சூலப்படையை ஏந்தியவர்‌. இப்பெருமானின்‌ நன்னகர்‌ திருப்பரங்குன்றம்‌ ஆகும்‌.

7

அயிலுடைவேலோர் அனல்புல்குகையின் அம்பொன்றால்எயில்படஎய்த எம்மிறைமேய இடம்போலும்மயில்பெடைபுல்கி மாநடமாடும் வளர்சோலைப்பயில்பெடைவண்டு பாடலறாத பரங்குன்றே.

சொற்பிரிப்பு

அயில் உடை வேல் ஓர் அனல் புல்கு கையின் அம்பு ஒன்றால்எயில் பட எய்த எம் இறை மேய இடம்போலும்மயில் பெடை புல்கி மா நடம் ஆடும் வளர் சோலை,பயில் பெடைவண்டு பாடல் அறாத பரங்குன்றே.

உரை

சிவபெருமான்‌ கூரிய வேற்படையை உடையவர்‌. அனல்‌ தழுவிய கை அம்பு ஒன்றால்‌ முப்புரத்தை எய்து அழித்தவர்‌. இப்பெருமான்‌ அமர்ந்திருக்கும்‌ இடம்‌ திருப்பரங்குன்றம்‌ ஆகும்‌. இங்கு ஆண்‌ மயில்கள்‌ பெண்‌ மயில்களைத்‌ தழுவிச்‌ சிறந்த வகையில்‌ நடனம்‌ ஆடுகின்றன. வளர்ந்த சோலைகளில்‌ பெண்‌ வண்டுகளோடு கூடிய ஆண்‌ வண்டுகள்‌ இடையறாது இசை பாடுகின்றன.

8

மைத்தகுமேனி வாளரக்கன்றன் மகுடங்கள்பத்தினதிண்தோள் இருபதுஞ்செற்றான் பரங்குன்றைச்சித்தமதொன்றிச் செய்கழலுன்னிச் சிவனென்றுநித்தலுமேத்தத் தொல்வினை நம்மேல் நில்லாவே.

சொற்பிரிப்பு

மைத் தகு மேனி வாள் அரக்கன் தன் மகுடங்கள்-பத்தின, திண்தோள் இருபதும், செற்றான் பரங்குன்றைச்சித்தம் அது ஒன்றிச் செய் கழல் உன்னிச் “சிவன்” என்றுநித்தலும் ஏத்த, தொல்வினை நம்மேல் நில்லாவே.

உரை

இராவணன்‌ மை போன்ற கரிய மேனியன்‌. வான்‌ போரில்‌ வல்லவன்‌. இவனது மகுடம்‌ பொருந்திய பத்துத்‌ தலைகளையும்‌ இருபது தோள்களையும்‌ அடர்த்து நெரித்தவர்‌ சிவபெருமான்‌. இப்பெருமான்‌ எழுந்தருளிய திருப்பரங்குன்றத்தை ஒன்றிய மனத்துடன்‌ சிந்தித்து, அப்பெருமானின்‌ சேவடிகளை ‘சிவனே’ என்று நாள்தோறும்‌ ஏத்தித்‌ துதிக்க, வினைகள்‌ நம்மேல்‌ நில்லாமல்‌ அகன்றுவிடும்‌.

9

முந்தியிவ்வையந் தாவியமாலும் மொய்யொளிஉந்தியில்வந்திங் கருமறையீந்த உரவோனும்சிந்தையினாலுந் தெரிவரிதாகித் திகழ்சோதிபந்தியல்அங்கை மங்கையொர்பங்கன் பரங்குன்றே.

சொற்பிரிப்பு

முந்தி இவ் வையம் தாவிய மாலும், மொய் ஒளிஉந்தியில் வந்து இங்கு அருமறை ஈந்த உரவோனும்,சிந்தையினாலும் தெரிவு அரிது ஆகித் திகழ்சோதி,பந்து இயல் அம் கை மங்கை ஒர்பங்கன், பரங்குன்றே!

உரை

திருமால்‌, மாவலி மன்னனிடம்‌ மூன்றடி மண்கேட்டு, அவன்‌ தந்த அளவில்‌ முந்திக்‌ கொண்டு இவ்வுலகை ஓரடியாலும்‌, வானுலகை ஓரடியாலும்‌ அளந்தவன்‌. நான்முகன்‌ அத்திருமாலின்‌ உந்திக்‌ கமலத்தில்‌ தோன்றியவன்‌. அரிய மறைகளை ஓதுபவன்‌. சிவபெருமான்‌ இவர்கள்‌ இருவரின்‌ மனத்தினாலும்‌ அறிய முடியாதவாறு பேரொளிப்‌ பிளம்பாய்‌ ஜோதி வடிவினனாக விளங்கியவர்‌. இப்பெருமான்‌, பந்து தங்கிய அழகிய கையை உடைய மங்கையை ஒரு பாகமாகக்‌ கொண்டு எழுந்தருளி இருக்கும்‌ தலம்‌ திருப்பரங்குன்றம்‌ ஆகும்‌.

10

குண்டாய்முற்றுந் திரிவார்கூறை மெய்போர்த்துமிண்டாய்மிண்டர் பேசியபேச்சு மெய்யல்லபண்டால்நீழல் மேவியஈசன் பரங்குன்றைத்தொண்டாலேத்தத் தொல்வினைநம்மேல் நில்லாவே.

சொற்பிரிப்பு

குண்டாய் முற்றும் திரிவார், கூறை மெய் போர்த்து,மிண்டாய் மிண்டர் பேசிய பேச்சு மெய் அல்ல;பண்டு ஆல் நீழல் மேவிய ஈசன் பரங்குன்றைத்தொண்டால் ஏத்த, தொல்வினை நம்மேல் நில்லாவே.

உரை

சமணர்கள்‌ பருத்த உடம்பினராக எங்கும்‌ திரிபவர்கள்‌. புத்தர்கள்‌ உடலில்‌ ஆடையை போர்த்துத்‌ திரிபவர்கள்‌. இவர்கள்‌ தருக்க வாதத்துடன்‌ மிடுக்காய்ப்‌ பேசும்‌ பேச்சுக்களில்‌ உண்மை எதுவும்‌ இல்லை. பழமையான காலத்தில்‌ கல்லால மர நிழலில்‌ வீற்றிருந்து நால்வர்க்கு அறம்‌, பொருள்‌, இன்பம்‌, வீடு ஆகிய நான்கு உறுதிப்பொருளின்‌ விளக்கத்தைத்‌ தெளிவு படுத்திய ஈசனான சிவபெருமான்‌ திருப்பரங்குன்றத்தில்‌ எழுந்தருளி உள்ளார்‌. அவருக்குத்‌ தொண்டு செய்து போற்றினால்‌ நம்‌ தொல்வினைகள்‌ நம்மேல்‌ நில்லாது கழிந்து விடும்‌.

11

தடமலிபொய்கைச் சண்பைமன்ஞான சம்பந்தன்படமலிநாகம் அரைக்கசைத்தான்றன் பரங்குன்றைத்தொடைமலிபாடல் பத்தும்வல்லார்தந் துயர்போகிவிடமலிகண்டன் அருள்பெறுந்தன்மை மிக்கோரே.

சொற்பிரிப்பு

தட மலி பொய்கைச் சண்பை மன் ஞானசம்பந்தன்,படம் மலி நாகம் அரைக்கு அசைத்தான் தன் பரங்குன்றைத்தொடை மலி பாடல் பத்தும் வல்லார், தம் துயர் போகி,விடம் மலி கண்டன் அருள் பெறும் தன்மை மிக்கோரே.

உரை

ஞான சம்பந்தன்‌, பரப்பளவு மிகுந்த பொய்கையை உடைய சண்பை என்னும்‌ சீகாழிப்‌ பதியின்‌ மன்னர்‌. இவர்‌, படத்தோடு கூடிய பாம்பை இடையில்‌ கட்டியிருக்கும்‌ திருப்பரங்குன்றத்தில்‌ இறைவரான சிவபெருமான்மீது, தொடை நயம்‌ மிகுந்த பாடல்களைப்‌ பாடினார்‌. இப்பாடல்கள்‌ பத்தையும்‌ ஓதி வழிபட வல்லவர்களின்‌ துன்பங்கள்‌ நீங்கிவிடும்‌. இவர்கள்‌ விடமுண்ட கண்டனாகிய சிவபெருமானின்‌ அருளைப்‌ பெரும்‌ தகுதி உடையவர்கள்‌ ஆவர்‌.