1
அரனை உள்குவீர், பிரம னூருளெம்பரனை யேமனம், பரவி உய்ம்மினே.
சொற்பிரிப்பு
அரனை உள்குவீர்! பிரமன் ஊருள் எம்பரனையே மனம் பரவி, உய்ம்மினே!
உரை
சிவபெருமானையே நினையுங்கள். பிரமனூரில் விளங்கும் எம் பெருமானையே மனத்தால் போற்றித் துதித்து உய்வீர்களாக.
திருப்பிரமபுரம்
2
காண உள்குவீர், வேணு நற்புரத்தாணு வின்கழல், பேணி உய்ம்மினே.
சொற்பிரிப்பு
காண உள்குவீர்! வேணுநல்புரத்தாணுவின் கழல் பேணி, உய்ம்மினே!
உரை
சிவபெருமானைத் தரிசிக்க எண்ணும் அன்பர்களே! நல்ல வேணுபுரத்தில் விளங்கும் தாணுவின் திருவடிகளைப் பேணி உய்வீர்களாக.
3
நாதன் என்பிர்காள், காதல் ஒண்புகல்ஆதி பாதமே, ஓதி உய்ம்மினே.
சொற்பிரிப்பு
நாதன் என்பிர்காள்! காதல் ஒண் புகல்ஆதிபாதமே ஓதி, உய்ம்மினே!
உரை
சிவபெருமானை எம் தலைவன் எனக்கூறும் அன்பர்களே! அன்போடு ஒளி விளங்கும் புகலிப் பதியில் விளங்கும் ஆதியின் திருவடிப் பெருமைகளை ஓதி உய்வீர்களாக.
4
அங்கம் மாதுசேர், பங்கம் ஆயவன்வெங்குரு மன்னும், எங்க ளீசனே.
சொற்பிரிப்பு
அங்கம் மாது சேர் பங்கம் ஆயவன்,வெங்குரு மன்னும் எங்கள் ஈசனே.
உரை
அருள் வழங்கும் குறிப்போடு உமையம்மையைத் தனது திருமேனியின் ஒரு பாகமாகக் கொண்டுள்ளவன், 'வெங்குருவில்’ நிலையாக உள்ள எங்கள் ஈசன் ஆவான்.
5
வாணி லாச்சடைத், தோணி வண்புரத்தாணி நற்பொனைக், காணு மின்களே.
சொற்பிரிப்பு
வாள் நிலாச் சடைத் தோணிவண்புரத்துஆணி நன்பொனைக் காணுமின்களே!
உரை
ஒளி பொருந்திய. பிறைமதி பொருந்திய சடைமுடி உடையவனாய்த் தோணிபுரத்தில் விளங்கும் ஆணிப் பொன் போன்ற இறைவனைக் கண்டு தொழுவீர்களாக.
6
பாந்த ளார்சடைப், பூந்த ராய்மன்னும்ஏந்து கொங்கையாள், வேந்த னென்பரே.
சொற்பிரிப்பு
“பாந்தள் ஆர் சடைப் பூந்தராய் மன்னும்,ஏந்து கொங்கையாள் வேந்தன்” என்பரே.
உரை
பாம்பு பொருந்திய சடைமுடியோடு பூந்தராயில் விளங்கும் பெருமானை. ஏந்திய தனபாரங்களை உடைய உமையம்மையின் கணவன் என்று கூறுவார்கள்.
7
கரிய கண்டனைச், சிரபு ரத்துளெம்அரசை நாடொறும், பரவி உய்ம்மினே.
சொற்பிரிப்பு
கரிய கண்டனை, சிரபுரத்துள் எம்அரசை, நாள்தொறும் பரவி, உய்ம்மினே!
உரை
கருமை பொருந்திய கண்டத்தை உடையவனாய்ச் சிரபுரத்துள் எழுந்தருளிய அரசனை நாள்தோறும் பரவி உய்வீர்களாக.
8
நறவம் ஆர்பொழிற், புறவ நற்பதிஇறைவன் நாமமே, மறவல் நெஞ்சமே.
சொற்பிரிப்பு
நறவம் ஆர் பொழில் புறவம் நல் பதிஇறைவன் நாமமே மறவல், நெஞ்சமே!
உரை
தேன் பொருந்திய சோலைகளை உடைய புறவமாகிய நல்ல ஊரில் எழுந்தருளிய இறைவன் திருநாமங்களை, நெஞ்சமே! நீ மறவாதே.
9
தென்றில் அரக்கனைக், குன்றிற் சண்பைமன்அன்று நெரித்தவா, நின்றுநினைமினே.
சொற்பிரிப்பு
தென்றில் அரக்கனைக் குன்றில் சண்பை மன்அன்று நெரித்தவா, நின்று நினைமினே!
உரை
தென் திசையில் உள்ள இலங்கை மன்னனாம் இராவணனாகிய அரக்கனைச் சண்பை மன்னனாகிய சிவபிரான் கயிலை மலையிடைப் படுத்து அன்று நெரித்த வரலாற்றை நின்று நினைத்துப் போற்றுவீர்களாக.
10
அயனும் மாலுமாய், முயலுங் காழியான்பெயல்வை யெய்திநின், றியலும் உள்ளமே.
சொற்பிரிப்பு
அயனும் மாலும் ஆய் முயலும் காழியான்பெயல்வை எய்தி நின்று இயலும், உள்ளமே.
உரை
பிரமனும் திருமாலும் அடிமுடி தேடி முயலும் பரம்பொருளாகிய சீகாழிப் பதியில் விளங்கும் இறைவனது கருணைப் பொழிவைச் சார்ந்து காத்தலும் நினைத்துக் கொண்டே இருக்கிறது என் உள்ளம்.
11
தேரர் அமணரைச், சேர்வில் கொச்சைமன்நேரில் கழல்நினைந், தோரும் உள்ளமே.
சொற்பிரிப்பு
தேரர் அமணரைச் சேர்வு இல் கொச்சை மன்நேர் இல் கழல் நினைந்து ஓரும், உள்ளமே.
உரை
புத்தர் சமணர் ஆகியோரை அணுகாத, ‘கொச்சைவயத்து’ மன்னனாகிய சிவபிரானின் ஒப்பற்ற திருவடிகளை நினைந்து தியானிக்கும் என் உள்ளம்.
12
தொழும னத்தவர், கழும லத்துறைபழுதில் சம்பந்தன், மொழிகள் பத்துமே.
சொற்பிரிப்பு
தொழு மனத்தவர், கழுமலத்து உறைபழுது இல் சம்பந்தன் மொழிகள் பத்துமே.
உரை
‘கழுமலத்தில்’ உறையும் குற்றமற்ற. ஞானசம்பந்தன் அருளிய மொழிகளாகிய இத்திருப்பதிகப் பாடல்களை ஓதிப் பெருமானைத் தொழும் மனத்தவர் ஆகுக.