திருஎருக்கத்தம்புலியூர்

சிவபெருமான்‌, பூதகணங்களைத்‌ தமது படையாகக்‌ கொண்டவன்‌. யானையின்‌ தோலைப்‌ போர்வையாகக்‌ கொண்டவன்‌. உமையம்மையோடு உடனாய்‌ விளங்குபவன்‌. வந்து பொருந்திய கங்கையை ஏற்ற சடையை உடையவன்‌. எருக்கத்தம்புலியூரில்‌ விளங்கும்‌ தகுதி வாய்ந்த கோயிலில்‌ எழுந்தருளி இருப்பவன்‌. விடை ஏற்றை உடைய இப்பெருமான்‌ திருவடிகளைத்‌ துதிப்பவர்களை வினைகளின்‌ வலிமை வந்து சேராது.

சிவபெருமானார்‌, இலை வடிவமாக அமைந்த சூலப்படையை உடையவர்‌. நிலைபெற்ற முப்புரங்களும்‌ நீறாய்ப்‌ பொடிபடுமாறு கணையை எய்த வில்லை உடையவர்‌. எருக்கத்தம்புலியூரில்‌ விளங்கும்‌ கோயிலில்‌ எம்பெருமானார்‌ எழுந்தருளியுள்ளார்‌. சகல கலைகளின்‌ வடிவான இப்பெருமானாருடைய திருவடிகளைத்‌ துதித்து வாழ்த்துபவர்களை எண்ணங்களால்‌ வருத்தும்‌ வினைகள்‌ வந்து சேரா.

சிவபெருமானாரே! விண்ணவர்களின்‌ தலைவரே! வேறுபட்ட வடிவும்‌ பண்பும்‌ உடையவரே! விடைமீது ஏறி வருபவரே! பெண்‌, ஆண்‌, அலி என்னும்‌ பாகுபாடுகளைக்‌ கடந்தவரே! பேரின்பமானவரே! பித்தரே பிறைசூடியிருப்பவரே! எல்லாராலும்‌ எண்ணப்படுபவரே! எருக்கத்தம்புலியூரில்‌ உறைகின்ற தலைவரே! என்று உரைத்துப்‌ போற்ற வல்லவரை வினைகள்‌ வந்து அடையா.

சிவபெருமானார்‌, பாம்பை இடையில்‌ பொருந்துமாறு அணிந்துள்ளவர்‌ மணம் கமழும்‌ கொன்றை மலர்‌ மாலையை அணிந்துள்ளவர்‌. விடைமீது ஏறிவருபவர்‌. கயிலை மலையைத்‌ தனக்குரிய இடமாகக்‌ கொண்டவர்‌.அலைகள்‌ வீசும்‌ கங்கைநதியை சடைமிசைத்‌ தரித்திருப்பவர்‌. எருக்கத்தம்புலியூரில்‌ மகிழ்ந்திருப்பவராக எழுந்தருளி- யிருக்கும்‌ இப்பெருமானாரைச்‌ சேர்வோர்க்கு செல்வங்கள்‌ வந்து சேரும்‌.

சிவபெருமானார்‌, அழகிய தனங்களை உடைய உமையம்மையை, இடப்பாகத்தில்‌ சிறப்புடன்‌ வைத்திருப்பவர்‌. சீறிவந்த காலனின்‌ சினத்தை அடக்கி அழித்தவர்‌. இடப ஊர்தியை உடையவர்‌. எருக்கத்தம்புலியூரில்‌ எழுந்தருளியுள்ள இப்பெருமானாராகிய சிவபெருமானை தனித்திருந்து தியானிப்பவர்களை வினைகள்‌ விரும்பாது.

சிரிப்பது போல விளங்கும்‌ வெண்மையான தலையோட்டைச்‌ சிவபெருமானார்‌ கையில்‌ ஏந்தி இருப்பவர்‌. பலவிதமாகப்‌ பாடிக்கொண்டு மகளிர்‌ இடும்‌ பிச்சையை ஏற்கப்‌ புகுபவர்‌.புலித்தோலைப்‌ பிடரியில்‌ இட்டுக்‌ கொண்டு இருப்பவர்‌. தகுதி வாய்ந்தவராக எருக்கத்தம்புலியூரில்‌ தங்கி அங்கேயே நிலைத்திருப்பவர்‌. இப்பெருமானார்‌ திருவடிகளைத்‌ துதிக்க வினைகள்‌ நம்மைத்‌ தொடராது.

சிவபெருமானார்‌, இராவணன்‌ ‘ஆ, ஆ’ என்று அலறுமாறு அவனை அடர்த்தவர்‌. அதன்பின்‌ அவன்‌ ‘தேவா’ என வேண்டுதல்‌ செய்ய, அருள்நிறைந்த செல்வங்கள்‌ பலவற்றை வழங்கியருளிய தலைவரும்‌ இவரே ஆவார்‌. எருக்கத்தம்புலியூரில்‌ விளங்கும்‌ சிறப்புமிக்க கோயிலில்‌ எழுந்தருளியுள்ள இப்பெருமானாரைத்‌ ‘தேவனே’ என்று போற்றும்போது நம்‌ அல்லல்கள்‌ தீர்வது உறுதியாகும்‌.

சிவபெருமானார்‌, வேதங்கள்‌ ஓதும்‌ நான்முகனாலும்‌, நெடுமாலாலும்‌ காண முடியாத அரியவர்‌. மழுவைக்‌ கையில்‌ ஏந்தியிருப்பவர்‌. கலை நிறையாத பிறைமததியைச்‌ சூடியிருப்பவர்‌. ‘முத்துக்களின்‌ கொத்துப்‌ போன்ற இறையோனே!’ எனப்‌ போற்றுங்கள்‌. எருக்கத்தம்புலியூரை இடமாகக்‌ கொண்ட கறை மிடற்றுப்‌ பெருமானை நினைத்தாலே நம்‌ வினைகள்‌ கெடும்‌.

புத்தர்களும்‌ சமணர்களும்‌ கூறும்‌ பொய்யுரைகளை விலக்கி விடுங்கள்‌. சிவபெருமானார்‌ பரிசுத்தமாக விளங்கும்‌ ஒளிவடி வினராய்‌ உமையம்மையாருடன்‌ நித்தமும்‌ மணாளனாக விளங்குபவர்‌. எருக்கத்தம்புலியூரில்‌ எழுந்தருளியிருக்கும்‌ அறவடி வினராகிய இப்பெருமானாரின்‌ அடிகளை நாம்‌ அடைவோம்‌.

அழகிய எருக்கத்தம்புலியூரில்‌ எழுந்தருளியிருக்கும்‌ சிவபெருமானாரைச்‌ சீர்மிகு காழிப்பதியில்‌ தோன்றிய திருஞான சம்பந்தன்‌ போற்றிப்‌ பாடினார்‌. கலை குன்றாத அருந்தமிழ்‌ மாலையாகிய இத்திருப்பதிகப்‌ பாடல்களை ஓதுபவர்கள்‌, உலகத்தவர்‌ போற்ற வானகம்‌ எய்துவர்‌.