திருஆப்பனூர்

சிவபெருமான்‌ தமது முடியைச்‌ சூழ்ந்துள்ள சடைமுடியின்மேல்‌ வளர்ச்சி பெறாத இளம்‌ பிறையைச்‌ சூடியிருப்பவர்‌. ஒரு தலைப்‌ படத்தோடு கூடிய பாம்பை இடையில்‌ கட்டியிருப்பவர்‌. சிறிதும்‌ வெறுத்தற்கு இயலாத புகழானவர்‌. திருஆப்பனூரில்‌ எழுந்தருளியுள்ள இப்பெருமானை விரும்பிப்‌ பற்றுகின்ற உள்ளம்‌ உடையவர்கள்‌, தங்களின்‌ வினைத்‌ தொடர்ச்சி நீங்கப்‌ பெறுவார்கள்‌.

குராமலர்‌ கமழும்‌ கூந்தலை உடைய உமையம்மை விளங்கும்‌ திருமேனியோடு இருக்கும்‌ சிவபெருமானைத்‌ தேவர்கள்‌ கூடி வணங்குகின்றார்கள்‌. தமது திருமேனியில்‌ விளங்கும்‌ வளைந்த பன்றியின்‌ பல்‌, பாம்பு ஆகியவற்றை அணிந்திருப்பவர்‌. அழகிய திருஆப்பனூரில்‌ எழுந்தருளியுள்ள இப்பெருமானைப்‌ போற்றுகின்ற உள்ளம்‌ உடையவர்கள்‌. தங்களின்‌ வினைத்‌ தொடர்ச்சி நீங்கப்‌ பெறுவர்‌.

சிவபெருமான்‌, மணம்‌ கமழும்‌ கூந்தலை உடைய மகளிரால்‌ நினைக்கப்‌ பெறும்‌ காமனை, முற்காலத்தில்‌ பெரிதும்‌ சினந்து எரித்தவர்‌. பின்பு அவனுக்கு வாழ்வு தந்த பெருமானும்‌ இவரே. பெரிய காட்டகத்தே வாழும்‌ அரவத்தை அணிந்தவர்‌. அழகிய திருஆப்பனூரில்‌ எழுந்தருளியுள்ள இப்பெருமானைப்‌ போற்றும்‌ உள்ளம்‌ உடையவர்கள்‌ தங்களின்‌ வினைத்‌ தொடர்ச்சி நீங்கப்‌ பெறுவர்‌.

சிவபெருமான்‌, உடலைப்‌ பற்றிய நோய்களையும்‌ உயிரைப்‌ பற்றிய பிறவி நோயையும்‌ அறுத்தருள்பவர்‌. சுடுகாட்டகத்தே கோவண ஆடையோடு அழலேந்தி ஆடுபவர்‌. கங்கையை முடியில்‌ அணிந்திருப்பவர்‌. அழகிய திருஆப்பனூரில்‌ எழுந்தருளியுள்ள இப்பெருமானைப்‌ பணிந்து போற்றும்‌ உள்ளம்‌ உடையவர்கள்‌ தங்களின்‌ வினைத்‌ தொடர்ச்சி நீங்கப்‌ பெறுவர்‌.

சிவபெருமான்‌, தகரம்‌ எனப்படும்‌ மணமுள்ள பொருளும்‌, மணிகளும்‌ கலந்து வரும்‌ அருவிகளை உடைய மிகப்பெரிய மேரு மலையை வில்லாக வளைத்தவர்‌. வில்லாக வளைத்து அசுரர்களின்‌ நகரங்களான முப்புரங்களும்‌ பொடிபடச்‌ செய்து மகிழ்ந்தவர்‌. எல்லா எழுத்துக்களிலும்‌ கலந்து நிற்கும்‌ ‘அ’கரம்‌ போல பொருட்களிலும்‌ கலந்து இருப்பவர்‌. அழகிய திருஆப்பனூரில்‌ எழுந்தருளியுள்ள இப்பெருமானாகிய சிவபெருமான்‌ புகழைக்‌ கூறுகின்ற உள்ளம்‌ உடையவர்கள்‌, தங்களின்‌ வினை மாசுகளினின்று நீங்கப்‌ பெறுவர்‌.

சிவபெருமான்‌, பறந்து திரியும்‌ முப்புரங்களை ஒரு நொடியில்‌ அழிவுறச்‌ செய்தவர்‌. சுடுகாட்டைத்‌ தனது இருப்பிடமாகக்‌ கொண்டு கனல்‌ ஏந்தி நின்று இரவில்‌ திருநடனம்‌ புரிவதைத்‌ தொழிலாகக்‌ கொண்டவர்‌. அழகிய திருஆப்பனூரில்‌ எழுந்தருளியுள்ள இப்பெருமானின்‌ புகழைப்‌ பாடும்‌ உள்ளம்‌ உடையவர்கள்‌ தங்களின்‌ வினைத்‌ தொடர்ச்சி நீங்கப்‌ பெறுவர்‌.

சிவபெருமான்‌, மனம்‌ போல்‌ இயங்கும்‌ விடைமிசை ஏறிவருபவர்‌. எரிதலைக்‌ கொண்ட மழுவைச்‌ சுழற்றிக்‌ கொண்டு இருப்பவர்‌. கயல்‌ போன்ற இரு விழிகளை உடைய உமையம்மையைத்‌ தனது திருமேனியில்‌ ஒருபாகமாகக்‌ கலந்தும்‌, ஆடியும்‌, கூடி இருந்தும்‌, பொருந்தியும்‌, மகிழ்ந்தும்‌ இருப்பவர்‌. அழகிய திரு ஆப்பனூரில்‌ எழுந்தருளி உள்ள இப்பெருமானைப்‌ பாடுவதைத்‌ தம்‌ இயல்பாகக்‌ கொண்ட மனம்‌ உடையவர்கள்‌ வினைமாசு தீர்வார்கள்‌.

சிவபெருமான்‌, கருமையான நீலமணி போன்ற கண்டத்தை உடையவர்‌. சினம்‌ பொருந்திய பாம்பைக்‌ கச்சையாக அணிந்திருப்பவர்‌. அடியவர்களை மனம்‌ உருகச்‌ செய்பவர்‌. ஒளி பொருந்திய வெண்பிறையைச்‌ சூடியவர்‌. இராவணனின்‌ வலிமையை அழித்தவர்‌. அழகிய திருஆப்பனூரில்‌ எழுந்தருளியுள்ள இப்பெருமானை உணர்வுப்‌ பூர்வமாக சுவைக்கும்‌ உள்ளம்‌ உள்ளவர்கள்‌ தங்களின்‌ மாசு நீங்கப்‌ பெறுவார்கள்‌.

திருமாலாலும்‌, மணம்‌ பொருந்திய தாமரை மலர்மேல்‌ இனிதுறையும்‌ பிரமனாலும்‌ அளப்பதற்கு அரியவனாக நின்றவர்‌ சிவபெருமான்‌. அடியவர்கள்‌ மேல்‌ வரும்‌ எண்ணற்ற வினைகள்‌ பலவற்றையும்‌ களைந்து அருளுபவர்‌. - அழகிய திருஆப்பனூரில்‌ எழுந்தருளியுள்ள இப்பெருமானைப்‌ பண்‌ பொருந்த இசையோடு உருகிப்‌ பாடிப்‌ போற்றுபவர்கள்‌, தங்களின்‌ வினை மாசு நீங்கப்‌ பெறுவார்கள்‌.

புத்தர்கள்‌ சிவந்த காவி ஆடை உடுத்தியிருப்பவர்கள்‌. சமணர்கள்‌ சிறு தடுக்கை ஆடையாக உடுத்திக்‌ கொண்டு திரிபவர்கள்‌. இவர்கள்‌ பொய்‌ பேசுவார்கள்‌. புறங்கூறித்‌ திரிபவர்கள்‌. சிவபெருமான்‌, தன்னை விரும்பிய அடியவர்களின்‌ சந்தேக ஞானத்தை விலக்கித்‌ தெளிவுறச்‌ செய்பவர்‌. அழகிய திருஆப்பனூரில்‌ எழுந்தருளிய இப்பெருமானை நுண்ணுணர்வாக நினைந்து எழும்‌ அடியவர்களின்‌ வினை மாசுகள்‌ நீங்கும்‌.

சிவபெருமான்‌, அழகிய கொன்றை மாலையைச்‌ சடையின்மேல்‌ அணிந்து கொண்டு குளிர்ந்த நீர்‌ நிறைந்துள்ள வைகை ஆற்றின்‌ கரையில்‌ விளங்கும்‌ திருஆப்பனூரில்‌ எழுந்தருளியுள்ளார்‌. சிவன்‌ திருவடிகளையே பரவும்‌ நல்ல ஞானசம்பந்தன்‌, இப்பதிகத்தால்‌ இப்பெருமானைப்‌ போற்றிப்‌ பாடினார்‌. சந்த இசையோடு கூடிய இப்பதிகப்‌ பாடல்களைப்‌ பொருள்‌ உணர்ந்து ஓதவல்லவர்கள்‌, இவ்வுலகில்‌ தடுமாற்றத்தைத்‌ தருகின்ற அறிவை அறுத்து, நிலையான மெய்யறிவைப்‌ பெறுவார்கள்‌.