திருவடுகூர்

சிவபெருமானார்‌ சுடுகின்ற தன்மையுள்ள தீபமாலையை அணிந்திருப்பவர்‌. ஒளி பொருந்திய சூலத்தை வைத்திருப்பவர்‌. கொடியதும்‌ கூர்மையானதுமான மழுவாயுதம்‌ ஒன்றை கையில்‌ உடையவர்‌. விடைமேல்‌ ஊர்ந்து வருபவர்‌. மிக்க பசி, காமம்‌, கவலை, பிணி இவைகள்‌ இல்லாதவர்‌. இப்பெருமானார்‌ நீர்வளம்‌ மிக்க வடுகூரில்‌ எழுந்தருளியிருக்கும்‌ இறைவர்‌ ஆவார்‌.

சிவபெருமானார்‌ பாலையும்‌, நறுமணமுள்ள நெய்யையும்‌, தயிரையும்‌ விரும்பி ஆடுபவர்‌. பொருந்துவதான திருவெண்ணீறு, என்புமாலை ஆகியவற்றை ஒளி மல்க தன்‌ மார்பில்‌ அணிந்துள்ளவர்‌. இப்பெருமானார்‌ அழகிய பொழில்களிலும்‌ சோலைகளிலும்‌ கூடியிருக்கும்‌ பெண்‌ அன்னங்கள்‌ ஒலித்து ஆர்ப்பரிக்கின்ற வடுகூரில்‌ மகிழ்வோடு திருநடனம்‌ ஆடுகின்றார்‌.

சிவபெருமானார்‌, ஓளி பொருந்திய பொன்‌ போன்ற இளந்திங்களைச்‌ சூடியிருப்பவர்‌. மதம்‌ கொண்டு தன்னிடம்‌ ஓடி வந்த யானையைக்‌ கண்டு, உமையம்மை அஞ்ச, அதனைக்‌ கொன்று, அதன்‌ தோலைப்‌ போர்த்தியிருப்பவர்‌. அழகு பொருந்திய வரிவண்டுகள்‌ இதழ்களோடு கூடிய மலர்களை முகர்ந்து தேனுண்டு பாடுகின்ற வடுகூரில்‌ இப்பெருமானார்‌ திருநடனம்‌ ஆடுகின்றார்‌.

செந்நிறமுடைய மதில்கள்‌ நிறைந்த அழகிய மாடங்களைக்‌ கொண்டதும்‌ காவலோடு கூடியதுமான முப்புரங்கள்‌ அழியுமாறு, தீயுடன்‌ சேர்ந்த அம்பை எய்தவர்‌ சிவபெருமானார்‌. திருவடுகூரில்‌ மிக அழகான பெண்கள்‌ தங்கள்‌ தனங்களை நன்றாக மூடிக்‌ கொண்டு கூட்டம்‌ கூட்டமாக முல்லைக்‌ காட்டுப்பக்கம்‌ சென்று நவரத்தினங்களை பொறுக்கி எடுத்து வந்து மகிழ்வெய்தி வாழ்கிறார்கள்‌. இந்தத்‌ திருவடுகூரில்‌ சிவபெருமானார்‌ நடனம்‌ புரிகின்றார்‌.

சிவபெருமானார்‌, கிழிக்கப்‌ பெற்ற கோவண ஆடையைத் தரித்திருப்பவர்‌.‌ அதன்மேல்‌ தீப்போன்ற, கோபத்தோடு கூடிய நாகத்தை அழகாகத்‌ தரித்திருப்பவர்‌. இப்பெருமானார்‌, அடியவர்‌ பலரும்‌ பணிந்து துதிக்க, அழகிய வடுகூரில்‌ திருநடனம்‌ ஆடி அருள்புரிகின்றார்‌.

சிவபெருமானார்‌, சுமை பொறுக்காது தன்ளாடும்‌ கொடியை ஒத்த உமையம்மையோடு கூடியிருப்பவர்‌. விளங்கும்‌ பாம்பை இடையில்‌ கட்டிக்‌ கொண்டிருப்பவர்‌. விளங்கும்‌ முடிமேல்‌ வளரும்‌ பிறைமதியைச்‌ சூடியிருப்பவர்‌. அடிகளாகிய வரிகள்‌ பொருந்திய வண்டுகள்‌ இசை பாடப்‌ பலராலும்‌ நன்கறியப்பெற்ற வடுகூரில்‌ இப்பெருமானார்‌ திருநடனம்‌ ஆடி அருள்புரிகின்றார்‌.

சிவபெருமானார்‌ பேருருவம்‌ கொள்பவர்‌. சிறிதான கலை நிரம்பாத பிறைமதியைச்‌ சூடும்‌ முடியை உடையவர்‌. விடைமேல்‌ ஊர்ந்து வருபவர்‌. கொடியவர்‌ மொழிகளை ஏற்றுக்‌ கொள்ளாதவர்‌. கொல்லுந்‌ தொழில்‌ புரியும்‌ எமன்‌ மடியுமாறு உதைத்தருளிய திருவடியினர்‌. இப்பெருமானார்‌ வடுகூரில்‌ திருநடனம்‌ ஆடி அருள்புரிகின்றார்‌.

சிவபெருமானார்‌ இளம்‌ பிறையையும்‌ பெருகி வரும்‌ கங்கை நீரையும்‌ பிரியாத திருமுடியை உடையவர்‌. வேதங்களில்‌ உள்ள சந்தங்கள்‌ பலவற்றையும்‌ பாடிக்‌ கொண்டு மயானத்தில்‌ உறைபவர்‌. இப்பெருமானார்‌, அதிர்கின்ற பறையும்‌, வேய்ங்குழலும்‌ போலப்‌ பல வண்டுகள்‌ ஒலிக்கும்‌ சோலைகளை உடைய வடுகூரில்‌ திருநடனம்‌ ஆடி அருள்புரிகின்றார்‌.

கண்ணைக்‌ கவரும்‌ மலர்கள்‌ வேய்ந்த சடையை உடைய சிவபெருமானார்‌, அதன்கண்‌ பொங்கி எழும்‌ மணம்‌ மிகுந்த பிறைமதி கரணங்களை வெளியிடும்‌ மாலை நேரத்தில்‌. அழகும்‌ குளிர்ச்சியும்‌ பொருந்திய வடுகூரில்‌ திருநடனம்‌ புரிகின்றார்‌. அந்நேரத்தில்‌ இப்பெருமானார்‌ இனியவை பலகூறி விரும்பி வந்து எமக்கு நன்றாக அருள்புரிவார்‌.

திருமால்‌ சிவபெருமானாருடைய அடிகளைத்‌ தேடிப்‌ பூமியைத்‌ தோண்டிச்‌ சென்றும்‌ தோற்றவர்‌. இசைக்கு ஒரு முகமாக நான்கு திருமுடிகளைக்‌ கொண்ட நான்முகனும்‌ சிவனது முடியினை காணாது திகைத்தவர்‌. போர்‌ செய்யத்‌ தக்க விடைமீது எழுந்தருளி வரும்‌ சிவந்த நிறத்தினர்‌. எல்லாத்‌ திசைகளிலும்‌ ஒளியை வீசுகின்ற அரிய பெரிய வடுகூரில்‌ இப்பெருமானார்‌ திருநடனம்‌ ஆடி அருள்புரிகின்றார்‌.

சிவபெருமானார்‌, இவ்வுலகில்‌ கூறப்படும்‌ பற்பல நோன்புகளுக்கு உரியவர்‌. குற்றமற்ற புகழோடும்‌, மணம்‌ கமழும்‌ சோலைகளால்‌ மணம்‌ பெறும்‌ வடுகூரில்‌ எழுந்தருளி இருப்பவர்‌. இப்பெருமானாரை அமைதியான மனமுடைய ஞானசம்பந்தன்‌ போற்றிப்‌ பாடினார்‌. இப்பதிகத்தை ஓதும்‌ சிவஞானம்‌ உடைய சான்றோர்கள்‌ முத்தியாகிய சாயுச்சிய முத்தியை அடைவார்கள்‌.