திருநல்லூர்

சிவபெருமான்‌ திருநல்லூரில்‌ எழுந்தருளி உள்ளார்‌. இவர்‌ நாதப்பறை கொட்டும்‌ தாளத்திற்கு ஏற்பவும்‌, பூத கணங்கள்‌ சூழவும்‌, திருக்கையில்‌ அனலேந்தியும்‌ விருப்பத்தோடு நடனம்‌ ஆடுபவர்‌. இப்பெருமானைக்‌ காலையிலும்‌ மாலையிலும்‌ மனதில்‌ விருப்பத்தோடு உதித்து எழுகின்ற அன்பினால்‌, தொடர்ந்து வணங்குபவர்களைப்‌ பாவம்‌ அணுகாது.

சிவபெருமான்‌, மணம்‌ கமழும்‌ மலர்ப்‌ பொய்கை சூழ்ந்த திருநல்லூரில்‌ எழுந்தருளி உள்ளார்‌. இப்பெருமான்‌, ஊர்தியாக எருது ஒன்றில்‌ மட்டுமே ஏறும்‌ விகிர்தர்‌. அழகிய உமையம்மையோடு ஒன்றாகவும்‌, வேறாகவும்‌ விளங்கும்‌ தன்மை உடையவர்‌. இவ்விதமாக அவரது புகழைக்‌ கூறும்‌ அடியவர்களைக்‌ குற்றங்கள்‌ அணுகாது.

சிவபெருமான் இளம்பிறையைத்‌ தம்‌ திருமுடியிற்‌ சூடியுள்ளார்‌. ஒளிவிடுகின்ற பொன்போன்ற திருச்சடைகள்‌ தாழ, தலையோட்டையே உண்கலனாகக் கொண்டுள்ளார்‌ ஒவ்வோர் ஊரிலும்‌ மகளிர்‌ இடும்‌ பிச்சையை நாடிச்‌ செல்லும்‌ அறநெறியாளர். இந்தத் திருநல்லூர்ப்‌ பெருமானைப்‌ போற்றிப்‌ பாடும்‌ அடியவர்களைப்‌ பாவங்கள்‌ அ டையாது.

சிவபெருமான்‌ உலகியல்‌ நெறிமுறைகளைத்‌ தான்‌ பின்பற்றாது நீத்தவர்‌. நீங்காத தவத்தை உடையவர்‌. கட்டுப்பாடுகளுடைய நெறிகளை வகுத்து அளித்தவர். அந்நெறி நிற்பாரைக் காத்து அருளுபவர். கட்டுப்பாடுகளுடைய நெறிகளை வகுத்து அளித்தவர்‌. அந்நெறி நிற்பாரைக்‌ காத்து அருளுபவர்‌. இந்தத்‌ திருநல்லூர்ப்‌ பெருமானைக்‌ கைகுவித்து தொழுதேத்தும்‌ அடியவர்களுக்கு இடர்‌ இல்லை.

சிவபெருமான், தனது திருமேனியில் கூறாகக் கொண்டுள்ள உமையம்மையின் கணவர் ஆவார். பாம்பணிந்த சடைகள் தாழ்ந்து தொங்க, தனது இடையில் பாம்பை கச்சாகக் கட்டியவர். இந்த திருநல்லூர்ப் பெருமானை வேட்கை மிகுந்தவராய் அணுகி அவரது திருவடிகளைத் தொழும் தொண்டர்கள் இன்பம் பொருந்திய மனத்தவராய் உலகம்‌ புகழத்‌ திரிவார்கள்‌.

தன்னைக்‌ கொல்ல வந்த மதம்‌ பொருந்திய யானையைக்‌ கண்டு உமையம்மை அஞ்சினார்‌. சிவபெருமான்‌ அதனைக்‌ கொன்று, அதன்‌ தோலைப்‌ போர்த்த நல்ல நெறியாளர்‌ ஆவார்‌. இவர்‌ திருநல்லூர்ப்‌ பெருமானாக எல்லோரும்‌ அடையத்தக்க முத்தி நெறியாளராக விளங்குகின்றார்‌. இப்பெருமானை அடைந்து, தங்களின்‌ துன்பங்கள்‌ தீருமாறு புகழ்ந்து போற்றும்‌ அடியவர்கள்‌, துக்கம்‌ அறியார்‌.

சிவபெருமான்‌, எங்கள்‌ தலைவனும்‌, தேவர்களால்‌ தொழுது போற்றப்படும்‌ நம்‌ பெருமானும்‌ ஆவார்‌. இப்பெருமான்‌ திருநல்லூரில்‌ பிரிவின்றி எழுந்தருளி உள்ள தலைவர் ஆவார்‌. அவரை அடைந்து தம்‌ கைகளை தலையின்மேல்‌ குவித்து, நாங்கள்‌ உமக்கு அடிமை என்று கூறி, அவரது திருவடி நிழலில்‌ ஒன்றி வாழும்‌ மனத்தவர்கள்‌ தடுமாற்றம்‌ இல்லாதவர்கள்‌ ஆவர்‌.

சிவபெருமான்‌ மன்மதனது உருவ அழகை அழித்தவர்‌. கடல்‌ சூழ்ந்த இலங்கை மன்னனாகிய இராவணனது புகழை நீக்கியவர்‌. இப்பெருமான்‌ திருநல்லூரில்‌ எழுந்தருளி இருப்பவர்‌. இப்பெருமானை இகழாது பாதுகாப்புக்‌ கொண்ட மனத்தவர்களாய்‌ அவரைக்‌ காண எழும்‌ தொண்டர்கள்‌, தீபம்‌ போன்ற ஞான ஒளி நிலைத்த மனம்‌ உடையவர்கள்‌ ஆவர்‌. அவர்கள்‌ தீயனவற்றை அறியமாட்டார்கள்‌.

திருநல்லூரில்‌ விளங்கும்‌ சிவபெருமானை செந்தாமரையில்‌ விளங்கும்‌ பிரமனும்‌, உலகை அளந்த திருமாலும்‌ நண்ணுதலுக்கு அரியவர்‌. இப்பெருமானை குளிர்ந்த மலர்களைத்‌ தூவி, அவரது திருவடிகளைத்‌ தொழுது ஏத்த எண்ணுகின்ற அடியவர்களுக்குத்‌ துன்பம்‌ இல்லை.

சமணர்கள்‌ மயில்‌ இறகுகளால்‌ ஆன குடை நிழலில்‌ திரிபவர்கள்‌. புத்தர்களால்‌ நாள்தோறும்‌ பழி தூற்றுமாறு நின்ற பெருமான்‌ இவர்‌. நஞ்சு பொருந்திய கண்டத்தை உடைய திருநல்லூர்‌ சிவபெருமானைப்‌ புகழும்‌ அடியவர்களுக்கு இடரில்லை.

குளிர்ந்த நீரால்‌ சூழப்பட்ட சீகாழிப்‌ பதியில்‌ தோன்றியவர்‌ ஞானசம்பந்தன்‌ ஆவார்‌. இவர்‌, பொருந்திய நீரை வேலியாக உடைய திருநல்லூரில்‌ விளங்கும்‌ சிவபெருமானின்‌ இயல்புகளைப்‌ புனைந்து மாலையாகப்‌ பாடினார்‌. இத்திருப்பதிகத்தை நாள்தோறும்‌ ஏத்தித்‌ துதிப்பவர்‌, விண்ணும்‌ மண்ணும்‌ விளங்கும்‌ புகழாளர்‌ ஆவர்‌.