திருக்கடனாகைக்காரோணம்

சிவபெருமான்‌, தேவ கங்கை பாய்வதால்‌ சடையின்மேல்‌ அழகு செய்யும்‌ விரிந்த கொன்றை மலர்‌ மாலையையும்‌ சிரிப்பது போல்‌ தோன்றும்‌ வெள்ளிய தலை மாலையையும்‌ சூடியுள்ளார்‌. இங்குள்ள சிவபெருமான்‌, விதிப்படி வழிபடும்‌ வினை நீங்கப்‌ பெற்ற அடியார்கள்‌ நிறைந்து விளங்கும்‌ கடலை அடுத்துள்ள நாகைக்‌ காரோணத்தில்‌ எழுந்தருளி உள்ளார்‌.

சிவபெருமான்‌, பெண்ணும்‌ ஆணுமாய்‌ ஓர்‌ உருவாய்‌ விளங்கும்‌ பெருமானார்‌. இவர்‌ பிறை சூடிய சென்னியனாய்‌, அண்ணாமலை ஆரூர்‌ ஆகிய தலங்களிலும்‌ எழுந்தருளியுள்ள தலைவர்‌. இப்பெருமான்‌, மார்ச்சனை பொருந்திய முழவின்‌ ஒலி இடைவிடாது கேட்கும்‌ மாடவீடுகளுடன்‌ கூடிய நீண்ட வீதிகளையும்‌, அகன்ற இடப்பரப்பையும்‌ உடைய கடலை அடுத்துள்ள நாகைக்‌ காரோணத்தில்‌ எழுந்தருளியுள்ளார்‌.

சிவபெருமான்‌, மண்ணில்‌ வாழும்‌ மக்கள்‌ தொழவும்‌, விண்ணில்‌ வாழும்‌ தேவர்கள்‌ பணியவும்‌, அழலைச்‌ செலுத்தி, பகைவர்களின்‌ முப்புரங்களை எரித்து, அடியார்களுக்கு அருள்‌ செய்தவன்‌. இப்பெருமான்‌ அலைகள்‌ நிரம்பிய கரிய கடலை அடுத்துள்ள நாகைக்‌ காரோணத்தில்‌ எழுந்தருளி அங்கு இடைவிடாது நிகழும்‌ தேர்த்திருவிழாவினை ஏற்றருளும்‌ செல்வனாக விளங்குகிறார்‌.

சிவபெருமான்‌, பொருள்‌ பொதிந்த மந்திரச்‌ சொற்கள்‌ நிரம்பிய வேதத்தைப்‌ பாடிக்‌ கொண்டு இருப்பவர்‌. உலகை அழிக்க எண்ணி வந்த கங்கையைத்‌ தன்‌ சடைமுடி மேல்‌ ஏற்றருளிய தலைவன்‌ ஆவார்‌. இப்பெருமான்‌ பழி பாவங்களை மனதிலும்‌ எண்ணாத பக்தர்கள்‌ கூட்டம்‌ பணிந்து போற்ற, உப்பங்கழிகள்‌ சூழ்ந்த கடலை அடுத்துள்ள நாகைக்‌ காரோணத்தில்‌ எழுந்தருளி உள்ளார்‌.

சிவபெருமான்‌ ஆணும்‌ பெண்ணுமான வடிவோடு காட்சி‌ தருபவர்‌ அடியார்களுக்கு அருள்‌ வழங்குபவர்‌. வானுலகில்‌ வாழும்‌ தேவர்கட்கு மேலும்‌ அருள்புரியும்‌ மனத்தை உடையவர்‌. இப்பெருமான்‌, அன்புடன்‌ வழிபாடு செய்து பிரியாது வாழும்‌ தொண்டர்கள்‌ எப்பொழுதும்‌ தரிசனம்‌ செய்யும்‌ வண்ணமாகக்‌ கடலை அடுத்துள்ள நாகைக்‌ காரோணத்தில்‌ எழுந்தருளி உள்ளார்‌.

சிவபெருமான்‌, பன்றியின்‌ கொம்பையும்‌, பாம்பையும்‌ மெய்யில்‌ பூண்டிருப்பவர்‌. வானகத்தே இயங்கும்‌ இளம்பிறை தங்கும்‌ சடைமுடியை உடைய தலைவர்‌. இத்தலத்தில்‌ வாழும்‌ சான்றோர்கள்‌ சிவஞானத்தை உணர்ந்து, நாள்தோறும்‌ இறைவன்‌ புகழைப்‌ பணிந்து, போற்றி, வழிபாடு செய்து வருகிறார்கள்‌. இவ்வூரில்‌ உள்ள கடலை அடுத்துள்ள சோலைகள்‌ செழிப்புற்று விளங்குகின்றன. இந்த அழகிய நாகைக்காரோணத்தில்‌ சிவபெருமான்‌ எழுந்தருளி அடியார்களுக்கு அருள்‌ புரிந்து வருகிறார்‌.

சிவபெருமான்‌, இடையில்‌ அழல்‌ போலும்‌ கொடிய நாகத்தை சங்கு மணிகளோடு இணைத்துக்‌ கட்டிக்‌ கொண்டுள்ளார்‌. மணம்‌ கமழும்‌ மலை போன்ற மார்பில்‌ திருவெண்ணீறு அணிந்துள்ள தலைவன்‌ ஆவார்‌. இப்பெருமான்‌, மலைகள்‌ மிதந்து வருவன போன்று தோன்றும்‌ மரக்கலங்கள்‌ வந்தடையும்‌ கடற்கரையை அடுத்துள்ள நாகைக்‌ காரோணத்தில்‌ எழுந்தருளி உள்ளார்‌.

சிவபெருமான்‌, மென்மேலும்‌ பெற்ற வெற்றிகளால்‌ செருக்குற்ற, மலைபோல்‌ உயர்ந்த திண்ணிய தோள்களை உடைய இலங்கை அரசனான இராவணன்‌ வாடுமாறு அவனை அடர்த்தவன்‌. பின்பு அவனுக்கு அருள்‌ செய்தவனும்‌ இவரே ஆவார்‌. இப்பெருமான்‌, வாழ்க்கையின்‌ குறிக்கோளை அடைந்த பலத்தால்‌ வந்த புகழை உடையவர்களாகிய அடியார்கள்‌ மண்ணுலகில்‌ தன்னைப்‌ பணிந்து போற்றுமாறு, மரக்கலங்கள்‌ வந்து அடையும்‌ கடலை அடுத்துள்ள நாகைக்‌ காரோணத்தில்‌ எழுந்தருளி உள்ளார்‌.

சிவபெருமான்‌, தன்‌ திருவடியில்‌ திருமால்‌ விழுந்து வணங்கவும்‌, நான்முகன்‌ போற்றவும்‌, தாமே முழுமுதல்‌ பரம்பொருள்‌ என அவர்கள்‌ உணரும்படி அழல்‌ உருவாய்‌ ஓங்கி நின்றவர்‌. பிறைமதியைச்‌ சென்னியில்‌ சூடியவர்‌. பகைவரை எதிர்க்க வல்ல விடையேறி ஊர்ந்து வரும்‌ செல்வர்‌ ஆவார்‌. இப்பெருமான்‌, அலைகளால்‌ சூழப்பட்ட கரிய பெரிய கடலை அடுத்துள்ள நாகைக்‌ காரோணத்தில்‌ எழுந்தருளி உள்ளார்‌.

நல்லவர்கள்‌ அறநெறியைப்‌ போதிக்கின்றனர்‌. ஆனால்‌, பொல்லாதவர்களாகிய சமணர்கள்‌ புறங்கூறுகின்றனர்‌. நல்லவர்கள்‌ அல்லாத புத்தர்கள்‌ பழி தூற்றுகின்றனர்‌. எம்பெருமானான சிவபெருமான்‌ அடியார்க்கு அருள்புரியும்‌ இயல்பினர்‌. இப்பெருமான்‌ பல்லோடு கூடிய தலையோடுகளை மாலையாக அணிந்து, பலரும்‌ பணிந்து போற்றக்‌ ‘கல்‌’ என்னும்‌ ஒலியோடு கூடிய கடலை அடுத்துள்ள நாகைக்‌ காரோணத்தில்‌ எழுந்தருளி உள்ளார்‌.

இடைவிடாது ஒலிக்கும்‌ கடலை அடுத்துள்ள நாகைக்‌ காரோணத்தில்‌ வெண்மை நிறம்‌ பொருந்திய விடை ஊர்தியோடு சிவபெருமான்‌ எழுந்தருளி உள்ளார்‌. இப்பெருமானை புகழ்‌ பொருந்திய தமிழ்‌ மாலையால்‌ ஞானசம்பந்தன்‌ போற்றிப்‌ பாடினார்‌. இத்தமிழ்‌ மாலையைப்‌ பாடும்‌ சான்றோர்கள்‌ அனைவரும்‌ அழியாத வடிவத்தோடு ஆரவாரம்‌ மிக்க, வானுலகை அடைவார்கள்‌.