திருஅம்பர்மாகாளம்

சிவபெருமான்‌ பகைவர்களாகிய அசுரர்களின்‌ மூன்று கோட்டைகளும்‌ தீயில்‌ எரிந்து அழியுமாறு அம்பை எய்தவர்‌. இப்பெருமான்‌, நீரைத்‌ தேக்கும்‌ மடைகளை உடைய நீர்வளம்‌ மிக்க அம்பர்‌ மாகாளத்தில்‌ எழுந்தருளி உள்ளார்‌. விடை எழுதிய கொடியை உடையவரும்‌, வெண்மையான பிறை மதியை அணிந்தவரும்‌, எம்‌ தந்தையுமாகிய இப்பெருமானின்‌ திருவடிகளைப்‌ போற்றித்‌ துதிப்பவர்களை வினைகள்‌ சேருவதில்லை.

சிவபெருமான்‌ தேன்‌ பொருந்திய செழுமையான ஊமத்தம்பூ, பிறைமதி, கங்கை ஆகியவற்றைச்‌ சூடியிருப்பவர்‌. இப்பெருமான்‌ வானளாவிய பொழில்‌ சூழ்ந்த அம்பர்மாகாளத்தில்‌ எழுந்தருளி உள்ளார்‌. ஊன்‌ பொருந்திய தலையோட்டில்‌ பலியேற்றுத்‌ திரியும்‌ வாழ்க்கையை மேற்கொண்ட இப்பெருமானின்‌ திருவடிகளைப்‌ போற்றத்‌ துன்பங்கள்‌ நம்மை வந்தடையாது.

சிவபெருமான்‌ அலைகளுடன்‌ கூடிய கங்கை நதியோடு கண்டாரை மகிழ்விக்கும்‌ சிறப்பு வாய்ந்த பிறைமதியையும்‌ சூடியிருப்பவர்‌. இப்பெருமான்‌ மணம்‌ கமழும்‌ பொழில்‌ சூழ்ந்த அம்பர்மாகாளத்தில்‌ எழுந்தருளி உள்ளார்‌. இவர்‌, வெண்மையான விடைமீது ஊர்ந்து வருபவர்‌. இப்பெருமானின்‌ திருவடிப்புகழை நாள்தோறும்‌ உரைக்காவிட்டால்‌ அவர்களின்‌ பழிபாவங்கள்‌ நீங்கமாட்டாது.

சிவபெருமான்‌ பூங்கொத்துக்கள்‌ நிறைந்த பொழில்களிலும்‌ சோலைகளில்‌ தென்றல்‌ காற்றைப்‌ போன்று அழகிய வரிவண்டுகள்‌ இசைபாடும்‌ மந்தச்‌ சுருதி இசை நிறைந்து விளங்கும்‌ இயற்கை எழில்‌ வாய்ந்த அம்பர்மாகாளத்தில்‌ எழுந்தருளி உள்ளார்‌. மணம்‌ கமழும்‌ கொன்றை மலர்களைத்‌ தமது மணம்‌ வீசுகின்ற சடையின்‌ மேல்‌ வைத்துள்ள எம்‌ தந்தையாகிய இப்பெருமானின்‌ திருவடிகளைப்‌ போற்றினால்‌ இடர்கள்‌ நம்மை வந்து அடைய மாட்டாது.

சிவபெருமான்‌ அழகு பொருந்திய மலைமங்கையாகிய பார்வதி தேவியைத்‌ தமது உடலின்‌ இடப்பாகமாகக்‌ கொண்டவர்‌. இப்பெருமான்‌, முத்துக்களோடு கூடிய நீர்வளம்‌ உடைய அம்பர்மாகாளத்தில்‌ எழுந்தருளி உள்ளார்‌. இவர்‌ துணிக்கப்பட்ட கோவண ஆடையினர்‌. இப்பெருமானின்‌ பொன்னிறம்‌ போன்ற திருவடிகளை, நாள்தோறும்‌ பணிந்து வணங்காதவர்களின்‌ பாவங்கள்‌ குறையமாட்டாது.

அணி - அழகு. ஆகம்‌ - உடல்‌. மணியார்‌ புனல்‌ - முத்துக்களோடு கூடிய தண்ணீர்‌. துணி ஆர்‌ உடை - துணிக்கப்பெற்ற கோவண ஆடை. பணியாதவர்மேல்‌ பாவம்‌ பறையா என இதுவும்‌ எதிர்மறை முகத்தான்‌ விளக்கியது.

சிவபெருமான்‌, விளங்குகின்ற பாம்போடு வெள்ளை நிறமுடைய பிறையைச்‌ சூடியிருப்பவர்‌. இப்பெருமான்‌, வளர்கின்ற பொழில்கள்‌ சூழ்ந்த அம்பர்மாகாளத்தில்‌ எழுந்தருளி உள்ளார்‌. விளங்குகின்ற சடைமுடியை உடைய தலைமையாளர்‌ இவர்‌. இப்பெருமானின்‌ குற்றமற்ற திருவடிகளைத்‌ துதிக்க, மிக்க நோய்கள்‌ தளர்வுறும்‌. தவம்‌ நம்மை வந்து அடையும்‌.

சிவபெருமான்‌, நமது பாவங்களைக்‌ கொல்லும்‌ மழுவாயுதத்தோடு அழகிய வில்லையும்‌ கையில்‌ ஏந்தியிருப்பவர்‌. இப்பெருமான்‌, கரையோடு மோதுகின்ற நீர்வளம்‌ மிக்க அம்பர்மாகாளத்தில்‌ எழுந்தருளி உள்ளார்‌. இலை வடிவமான முத்தலைச்‌ சூலத்தைப்‌ படையாகக்‌ கொண்டவர்‌. இப்பெருமானின்‌ திருவடிகளை நாள்தோறும்‌ உறுதியாக நினைப்பவர்கள்மீது வினைகள்‌ சேருவதில்லை.

சிவபெருமான்‌, சிறகுகளை உடைய வரிவண்டுகள்‌ தேனை உண்டு இசை பாடுகின்றதும்‌, வேதங்களை ஓதும்‌ சான்றோர்கள்‌ நிறைந்ததுமான அம்பர்மாகாளத்தில்‌ எழுந்தருளி உள்ளார்‌. திருமாலாலும்‌ தேன்‌ நிறைந்த தாமரை மலரில்‌ வீற்றிருக்கும்‌ நான்முகனாலும்‌ காண முடியாத இறைவர்‌ இவர்‌. இப்பெருமானின்‌ திருவடிகளைத்‌ துதிக்க இன்பம்‌ மேலோங்கும்‌.

சமணர்கள்‌ அழுக்கடைந்த மேனியர்‌. துன்ப வடிவினர்‌. புத்தர்கள்‌ மண்டை என்னும்‌ வாய்‌ அகன்ற பாத்திரத்தில்‌ உணவு கொள்பவர்கள்‌. இவர்கள்‌ வாய்‌ கூசாது கூறும்‌ பொய்யுரைகள்‌ நன்மை தருவன அல்ல. மணம்‌ கமழும்‌ பொழில்‌ சூழ்ந்த அம்பர்மாகாளத்தில்‌ சிவபெருமான்‌ எழுந்தருளி உள்ளார்‌. இப்பெருமானை ‘ஈசனே’ என்று உள்ளம்‌ கனிந்து கூறுபவர்களுக்கு இடர்‌ வாராது:

அஞ்சத்தக்க ஊழி வெள்ளம்‌ உலகத்தை மூட அவ்வெள்ளத்தின்‌ ஓங்கி மிதந்தது வேணுபுரம்‌ என்னும்‌ சீகாழிப்‌ பதி. இங்கு தேன்‌ போன்ற நீர்‌ மிகுந்து விளங்குகின்றது. இப்பதியில்‌ தோன்றியவர்‌ ஞானசம்பந்தன்‌. இவர்‌ அழகியதும்‌ சிறந்ததுமான வேதங்களில்‌ வல்லவர்‌. இவர்‌, விண்ணோர்‌ தலைவனாகிய சிவபெருமான்‌ எழுந்தருளியுள்ள அம்பர்மாகாளத்தைப்‌ போற்றிப்‌ பாடினார்‌. இப்பதிகப்‌ பாடல்களை விரும்பி, உருகி, சொற்பொருள்‌ உணர்ந்து சொல்பவர்கள்‌ உயர்ந்த வான்‌ உலகத்தை அடைவார்கள்‌.