திருவீழிமிழலை

சிவபெருமான்‌ பெரிய பொன்மயமான‌ மேரு மலையை வில்லாக வளைத்து, அனலை அம்பாக அந்த வில்லின்‌ நாணில்‌ பூட்டி, வானில்‌ திரிந்து கொண்டிருந்த முப்புரங்களையும்‌ எரித்தவர்‌. இப்பெருமான்‌ உறையும்‌ கோயில்‌ திருவீழிமிழலை ஆகும்‌. இங்கு, கலைகள்‌ பலவற்றைக்‌ கற்று உணர்ந்த அடியவர்கள்‌ செல்லும்‌ திசைகளில்‌ எல்லாம்‌ அவர்களை விரும்பி எதிர்கொண்டு அழைக்கும்‌ மக்கள்‌ வாழ்கின்றனர்‌.

சிவபெருமான்‌, துயரப்படுகின்ற தேவர்களின்‌ துன்பம்‌ நீங்குமாறு வெண்மையான நீரோடு கூடிய கடலில்‌ இருந்து எழுந்த நஞ்சினை தொண்டையில்‌ நிறுத்தியவர்‌. இப்பெருமான்‌ உறையும்‌ கோயில்‌ திருவீழிமிழலை ஆகும்‌. இங்கு இசையமைப்போடு கூடியதும்‌ சுருதிக்கு ஏற்ப, ஒருவர்‌ ஓதக்‌ கேட்டு ஓதப்பட்டு வருவதுமாகிய வேத பாராயணத்தை ஓதும்‌ வேத ஒலி நீங்காமல்‌ ஒலிக்கின்றது.

சிவபெருமான்‌, வேதங்களை ஓதும்‌ பிரமனின்‌ தலையோட்டில்‌ பலி ஏற்பவர்‌. அனைவரும்‌ துயிலும்‌ நள்ளிரவில்‌ நட்டமாடும்‌ ஒளி வடிவினர்‌. இப்பெருமான்‌ உறையும்‌ கோயில்‌ திருவீழிமிழலை ஆகும்‌. மயிலைப்‌ போன்ற சாயலும்‌, மருளுகின்ற மான்‌ போன்ற கண்களும்‌, மதி போன்ற முகமும்‌, இள மூங்கில்‌ போன்ற தோள்களும்‌ இளங்கதிர்‌ போன்ற அழகொளி மிக்க மகளிர்‌ பலர்‌ இங்கு வாழ்கின்றனர்‌.

சிவபெருமான்‌, தக்கன்‌ செய்த யாகத்தில்‌ சூரியன்‌ சந்திரன்‌ முதலான தேவர்களைத்‌ தண்டம்‌ செய்து அருள்‌ செய்த நிமலன்‌ ஆவார்‌. இப்பெருமான்‌ உறையும்‌ கோயில்‌ திருவீழிமிழலை ஆகும்‌. இங்கு, குரா, சுரபுன்னை, குளிர்ச்சி தரும்‌ கோங்கு, இளவேங்கை ஆகிய மரங்கள்‌ கலந்துள்ள குளிர்ந்த பொழில்கள்‌ பல உள்ளன.

சிவபெருமான்‌, தனது நெற்றிக்‌ கண்ணில்‌ தோன்ற கனலால்‌ மன்மதனைப்‌ பொடி செய்தவர்‌. பின்னர்‌ அவனது மனைவியான இரதி தேவி வேண்டுதல்‌ செய்த போது, அவளுடைய கண்களுக்கு மட்டும்‌ புலனாகுமாறு அருள்செய்த நிமலன்‌ இவர்‌. இப்பெருமான்‌ உறையும்‌ கோயில்‌ திருவீழிமிழலை ஆகும்‌. இங்கு, நாள்தோறும்‌ மண்ணில்‌ செய்யும்‌ பெரிய வேள்விகளில்‌ வளரும்‌ தீப்புகையானது வானத்தில்‌ மழை மேகங்களை உருவாக்குகின்றது.

ஆயிரம்‌ தாமரைப்‌ பூக்களைக்‌ கொண்டு திருமால்‌ அருச்சனை செய்தபோது, ஒன்று குறைந்ததைக்‌ கண்டு, தனது மலர்‌ போன்ற கண்களில்‌ ஒன்றைப்‌ பெயர்த்து சாத்திய அளவில்‌ அவனுக்கு பிறர்‌ சுமக்க முடியாத சக்கராயுதத்தை ஈந்தவர்‌ சிவபெருமான்‌. இப்பெருமான்‌ உறையும்‌ கோயில்‌ திருவீழிமிழலை ஆகும்‌. இங்கு, சேல்‌ மீன்கள்‌ வாழ்கின்ற செழிப்பான பொய்கைகளில்‌ முளைத்த தாமரை மலர்கள்‌ தீப்பிழம்பு போல்‌ காணப்படுகின்றன.

சிவபெருமான்‌ தன்னை மெய்யறிவால்‌ வழிபட்ட மார்க்கண்டேயனின்‌ உயிரை எடுத்துச்‌ செல்லச்‌ சினந்து வந்த கூற்றுவனை அழித்தவர்‌. இப்பெருமான்‌ உறையும்‌ கோயில்‌ திருவிழிமிழலை ஆகும்‌. இங்கு நிதியாலும்‌, தியானத்தாலும்‌ மிக்க செல்வர்கள்‌ நாள்தோறும்‌ செய்யும்‌ நியமங்களை விதிப்படி செய்து வாழ்கின்றனர்‌.

சிவபெருமான்‌, கயிலைமலையை பெயர்த்து எடுத்த இராவணனின்‌ செருக்கினை தன்கால்‌ விரலை ஊன்றி அழித்தவர்‌. பின்பு, அவன்‌ தன்‌ பிழையை உணர்ந்து வேண்ட, வாள்‌ கொடுத்து அவனை ஆளாகக்‌ கொண்டவர்‌. இப்பெருமான்‌ உறையும்‌ கோயில்‌ திருவீழிமிழலை ஆகும்‌. இங்கு, வேதத்தைப்‌ படித்து, உணர்ந்தவர்களும்‌, வேள்விகளை இடைவிடாது செய்து, பாவத்தினின்று விடுபட்ட அந்தணர்களும்‌ மிகுதியாக வாழ்கின்றனர்‌.

பாம்பணையில்‌ துயிலும்‌ திருமாலாலும்‌, தாமரை மலரில்‌ உறையும்‌ நான்முகனாலும்‌ சிவபெருமானின்‌ அடிமுடிகளைக்‌ காண முடியவில்லை. அவர்கள்‌ திரும்பித்‌ தொடர்ந்து போற்றியபோது, அழலுருவாய்‌ நின்றவர்‌ இப்பெருமான்‌. இவர்‌ உறையும்‌ கோயில்‌ திருவீழிமிழலை ஆகும்‌. இங்கு அரவின்‌ படம்‌ போன்ற அல்குலையும்‌, பவளம்‌ போன்ற வாயினையும்‌, விடம்‌ பொருந்திய கண்களையும்‌ உடைய மகளிர்‌ மிகுதியாக வாழ்கின்றனர்‌.

சிக்குப்‌ பிடித்த காவி உடையையும்‌ சிறிய ஓலைத்‌ தடுக்குகளையும்‌ உடைய புத்தரும்‌ சமணர்களும்‌ சிவபெருமானை ஏளனம்‌ செய்து சிரிக்கின்றனர்‌. இப்பெருமான்‌ உறையும்‌ கோயில்‌ திருவீழிமிழலை ஆகும்‌. மெச்சத்‌ தக்கவராகவும்‌, வேத வேள்விகள்‌ செய்வதில்‌ தலையாயவராகவும்‌, உலகிற்கே மிகவும்‌ மேம்பட்டவராகவும்‌ உள்ள மறையவர்கள்‌ இங்கு பலர்‌ வாழ்கின்றனர்‌.

விண்ணிலிருந்து இழிந்து வந்துள்ள வீழிமிழலைக்‌ கோயிலில்‌, பன்றிப்பல்‌ சூடியவனாய்‌ எழுந்தருளி விளங்கும்‌ சிவபிரானை அழகிய பொழில்கள்‌ சூழ்ந்த காழிப்பதியில்‌ தோன்றிய ஞானத்தால்‌ மேம்பட்ட அழகிய ஞானசம்பந்தன்‌, உண்மையை உடையவனாய்‌ ஓதிய இப்பதிகத்தைச்‌ சொல்ல வல்லவர்‌ நல்லவர்‌ ஆவர்‌.