கோயில்

வேத நூல்களைக்‌ கற்றுணர்ந்து, அவற்றில்‌ கூறப்பட்ட நெறியிலே நின்று, வேள்விகளைச்‌ செய்து, இவ்வுலகில்‌ பாவங்கள்‌ (வறுமையை) வாராது தடுக்கும்‌ சான்றோர்கள்‌ வாழும்‌ தலம்‌ தில்லையாகும்‌. இத்தலத்தில்‌ உள்ள சிற்றம்பலத்தில்‌ எழுந்தருளி இருக்கும்‌ இறைவர்‌ ஆனந்த நடராசர்‌ ஆவார்‌. இவர்‌ இளமையான வெள்ளிய பிறைமதியைச்‌ சூடி உள்ளார்‌. இவர்‌ தேவர்களுக்குத்‌ தலைமையான முதல்வர்‌ ஆவார்‌. இப்பெருமானின்‌ திருவடிகளைப்‌ பற்றுக்‌ கோடாகக்‌ கொண்டு வாழ்பவர்களைப்‌ பாவம்‌ பற்றாது.

பல இடங்களிலும்‌ வேள்விச்‌ சாலைகளை அமைத்து ஆன்ம போதத்தை அழித்து, சிவாக்கினியை வளர்க்கும்‌ சிறப்பினை உடைய சான்றோர்கள்‌ வாழும்‌ தலம்‌ தில்லை ஆகும்‌. இத்தலத்தில்‌ உள்ள சிற்றம்பலத்தில்‌ எழுந்தருளி இருக்கும்‌ இறைவர்‌ ஆனந்த நடராசர்‌ ஆவார்‌. இவர்‌ தாயின்‌ வயிற்றில்‌ தங்கிப்‌ பிறத்தல்‌ இல்லாதவர்‌. பின்புறம்‌ தாழ்ந்து தொங்கும்‌ சடாபாரம்‌ உடையவர்‌. இப்பெருமானை மறவாதவர்கள்‌ தங்கள்‌ மயக்க உணர்வு நீங்கப்‌ பெறுபவர்கள்‌ ஆவார்கள்‌.

மை தீட்டப்‌ பெற்ற ஒளி பொருந்திய கண்களை உடைய பெண்கள்‌, நீண்ட வீதிகளில்‌ உள்ள மாடவீதிகளில்‌ தம்‌ கைகளால்‌ பந்து எய்து விளையாடும்‌ அழகுடையதும்‌, உப்பங்கழிகள்‌ சூழ்ந்ததுமான தலம்‌ தில்லையாகும்‌. இத்தலத்தில்‌ உள்ன சிற்றம்பலத்தில்‌ சிவபெருமான்‌ சிவந்த மேனியை உடையவராக எழுந்தருளி உள்ளார்‌. இவர்‌ என்றும்‌ பொய்யாத வேதப்‌ பாடல்களை விரும்பியும்‌ உலக மக்கள்‌ தன்னைத்‌ தோத்தரிக்கவும்‌ இங்கு வீற்றிருக்கின்றார்‌.

மாடவீடுகளில்‌ வெண்மையான கொடிகள்‌: நிறைந்துள்ளன. இக்கொடிகள்‌ வானத்தில்‌ உள்ள பிறையின்‌ நெற்றியை நேரே தீண்டுவது போலும்‌, சிறிதே தாக்குவது போலும்‌ உள்ளன. இந்தத்‌ தில்லைப்‌ பதியில்‌ சிறகுகளை உடைய வண்டுகளின்‌ ஒலி எப்போதும்‌ ஒலித்துக்‌ கொண்டிருக்கின்றது. பேரம்பலத்தை அடுத்துள்ள சிற்றம்பலத்தில்‌ சிவபெருமானார்‌ எழுந்தருளியிருக்கின்றார்‌. இந்த இறைவரின்‌ திருவடிகளைப்‌ போற்றிப்‌ புகழ்வதே இன்பமாகும்‌.

செல்வ வளம்‌ மிக்க பெரிய மாடவீதிகள்‌ வானளாவ ஓங்கி உயர்ந்து அழகிய மதியினைத்‌ தோய்கின்றன. இத்தகைய அழகிய நலன்கள்‌ உயர்ந்து விளங்குகின்றதும்‌ ஞானச்‌ செல்வர்கள்‌ பலர்‌ வாழ்கின்றதுமான தலம்‌ தில்லைப்‌ பதியாகும்‌. இத்தலத்தில்‌ உள்ள சிற்றம்பலத்தில்‌ சிவபெருமானார்‌ எழுந்தருளியுள்ளார்‌. இவர்‌ வீடுபேறாகிய செல்வத்துக்கு உரிய பெருமான்‌ ஆவார்‌. இப்பெருமானின்‌ திருவடிகளை வாழ்த்துதலே ஒருவருக்குச்‌ செல்வம்‌ ஆகும்‌.

சிவபெருமானார்‌, மாமரத்தில்‌ இருந்து புதிதாக வெளிவரும்‌ மாந்தளிர்‌ போன்ற மேனியை உடைய உமையம்மையை ஒரு பாகமாகக்‌ கொண்டு இருப்பவர்‌. யானைத்‌ தோலை உரித்து ஆடையாகப்‌ போர்த்தவர்‌. நீலமணி போன்ற கண்டத்தை உடையவர்‌. இப்பெருமான்‌, திருமகள்‌ விளங்கும்‌ தில்லைப்‌ பதியினுள்‌ உள்ள சிற்றம்பலத்தில்‌ எழுந்தருளியுள்ளார்‌. இப்பெருமானின்‌ திருவடிகளைத்‌ தவிர வேறொன்றையும்‌ என்‌ உள்ளம்‌ விரும்பாது.

சிவபெருமான்‌ அலைகள்‌ வீசும்‌ கங்கை நதியை தன்‌ திருமுடியில்‌ சூடியிருப்பவர்‌. தன்‌ திருமேனியில்‌ ஒருபாகமாக மலை அரசன்‌ மகளாகிய பார்வதி தேவியோடு மகழ்ந்திருப்பவர்‌. உலகம்‌ போற்றும்‌ மேரு மலையை வில்லாக வளைத்து முப்புரங்களை நோக்கி அம்பை எய்து அழித்தவர்‌. தில்லைச்‌ சிற்றம்பலத்தில்‌ எழுந்தருளியுள்ள இப்பெருமானைத்‌ தலைதாழ்த்தி வணங்குபவர்கள்‌ இந்த உலகத்தில்‌ தலையானவர்களாக விளங்குபவர்கள்‌ ஆவார்கள்‌.

சிவபெருமான்‌, கூரிய வாளை உடைய அரக்கனாகிய இராவணனின்‌ வலிமையை அழித்தவர்‌. சிறந்த புகழ்பெற்ற தில்லைச்‌ சிற்றம்பலத்தில்‌ எழுந்தருளி இருப்பவர்‌. கங்கையைத்‌ தரித்த சடையினை உடையவர்‌. இப்பெருமானை நாள்தோறும்‌ துதிப்பவருக்குத்‌ தீராத நோய்கள்‌ எல்லாம்‌ திண்ணமாகத்‌ தீர்ந்துவிடும்‌.

வளைந்து சுற்றிய நாகத்தை அணையாகக்‌ கொண்ட திருமாலும்‌, குளிர்ந்த தாமரை மேல்‌ விளங்கும்‌ நான்முகனும்‌ சிவபெருமானின்‌ அடிமுடிகளைக்‌ காண இயலாதவர்கள்‌. தனது திருவடிகளைப்‌ பரவ, அழல்வடிவில்‌ ஓங்கி நின்றவர்‌. இவர்‌ தேவர்களும்‌ உயர்ந்தோர்களும்‌ வாழும்‌ தில்லைப்‌ பதியினுள்‌ உள்ள சிற்றம்பலத்தில்‌ எழுந்தருளி உள்ளார்‌. இப்பெருமானைத்‌ துதிக்க கடுமையான பெரிய நோய்கள்‌ யாவும்‌ துன்பத்தைத்‌ தராமல்‌ மாய்ந்து விடும்‌.

புத்தர்கள்‌ மரப்பட்டையில்‌ சாயம்‌ ஏற்றிய ஆடையை அணிபவர்கள்‌. சமணர்கள்‌ நோன்புகளை மேற்கொண்டு திரிபவர்கள்‌. அறியாமையோடு கூடிய இவர்களின்‌ சொற்களைக்‌ கேளாத ஒழுக்கமுடைய தவச்சீலர்கள்‌ தில்லைப்‌ பதியில்‌ வாழ்கின்றனர்‌. இப்பதியினுள்‌ உன்ள சிற்றம்பலத்தில்‌ நடராசப்‌ பெருமான்‌ எழுந்தருளி உள்ளார்‌. இப்பெருமானை நாள்தோறும்‌ நாம்‌ தொழுவோமாக.

ஞானசம்பந்தன்‌, உலகில்‌ உயர்ந்து விளங்கும்‌ சீகாழிப்‌ பதியில்‌ தோன்றியவர்‌. ஒழுக்கம்‌ உடைய தவச்சீலர்களால்‌ போற்றப்படுவது தில்லைத்‌ தலம்‌ ஆகும்‌. இத்தலத்தினுள்‌ உள்ள சிற்றம்பலத்தில்‌, சூலப்படையுடன்‌ எழுந்தருளி உள்ள சிவபெருமானை, இவர்‌ போற்றிப்‌ பாடினார்‌. இத்தமிழ்‌ மாலையாகிய பதிகத்தை அழகுறப்‌ பாட வல்லவர்‌ நல்லவர்‌ ஆவர்‌.