திருஇடைச்சுரம்

மரங்கள்‌ வளர்ந்த விரிந்த பரப்புடைய பொழில்களில்‌ இளமயில்கள்‌ ஆடுகின்றன. வெண்மையான நிறத்துடன்‌, அருவிகள்‌ திண்ணென்ற ஒலியுடன்‌ விழுகின்றன. எரி போன்று ஒளிருகின்ற, ஓரினமான மணிகள்‌ காடுகளில்‌ அழகுற விளங்குவமாய்‌. மலைச்சாரலை உடைய தலம்‌ திருஇடைச்சுரமாகும்‌. சிவபெருமான்‌ வரிகளையும்‌ ஒளியையும்‌ உடைய பாம்பை இடையிலே கட்டியிருக்கின்றார்‌. நீண்ட சடைமுடிமீது வளரும்‌ பிறைமதியைச்‌ சூடியுள்ளார்‌. அத்தியாளியின்‌ உருவம்‌ பொறித்த வீரக்கழலைக்‌ காலின்கண்‌ வெற்றி பெறச்‌ சூடியுள்ளார்‌. கனலை ஏந்தி சுடுகாட்டைத்‌ தனது அரங்காகக்‌ கொண்டு ஆடுகின்றார்‌. இத்தகைய இறைவரது இயல்புதான்‌ என்னே?

வயல்களில்‌ உள்ள சேற்றில்‌ வாழும்‌ கயல்மீன்களும்‌ இளவாளை மீன்களும்‌ ஒன்றோடு ஒன்று சண்டையிடுகின்றன. இதைக்‌ கூர்ந்து நோக்கும்‌ பெண்‌ குரங்கோடு, ஆண்‌ குரங்கு கூடித்‌ திரிகின்றன. இத்தகைய அழகிய மலைச்‌ சாரலை உடைய தலம்‌ திரு இடைச்சுரம்‌ ஆகும்‌. இத்தலத்தில்‌, சிவபெருமான்‌ கங்கை நதியைத்‌ தனது விரிந்த சடையில்‌ ஏற்றருளியிருக்கின்றார்‌. அழகும்‌, இளமையும்‌ மாறாதவராய்‌ இருக்கின்றார்‌. இவர்‌ கூற்றுவன்‌ உயிரை மாய்க்கும்‌ கொடுமையை உடையார்‌. நடு இரவில்‌ திருநடனம்‌ புரிபவராக இருக்கின்றார்‌. கொன்றை மலர்‌ மாலையைச்‌ சூடியுள்ளார்‌. இத்தகைய இறைவரது இயல்புதான்‌ என்னே?

மணமுள்ள கஸ்தூரி, சந்தனம்‌, அகில்‌ முதலியவை எரிவதால்‌ அவற்றின்‌ புகையும்‌ ஒளியும்‌ மிளிர்கன்றன. மணம்‌ கமழும்‌ பொழில்களிடையே இளமயில்கள்‌ நிறைந்து வாழ்கின்றன. இவற்றின்‌ அருகில்‌ பன்றிகளும்‌ பெண்‌ மான்களும்‌ வாழ்கின்றன. இத்தகைய அழகிய மலைச்சாரலை அடுத்துள்ள தலம்‌ திருஇடைச்சுரம்‌ ஆகும்‌. இத்தலத்தில்‌ சிவபெருமான்‌, காட்டையும்‌, சுடலையையும்‌, கற்கள்‌ நிரம்பிய மலையிடங்களையும்‌ விரும்பியவராக வீற்றிருக்கின்றார்‌. இவர்‌ தீமை இல்லாதவர்‌. அழல்‌ போன்ற வெம்மையான மழுவாயுதத்தை ஏந்தியிருப்பவர்‌. இம்மை, மறுமை ஆகிய இருமை இன்பங்களையும்‌ தருபவர்‌. வணங்கப்படுபவர்‌. இணங்கப்படுபவர்‌. வாழ்த்தப்படுபவர்‌. இத்தகைய இறைவரின்‌ இயல்புதான்‌ என்னே?

ஓங்கி வளர்ந்துள்ள பல மரங்களை உடைய அடர்த்தியான அழகிய மலைச்சாரலை உடைய தலம்‌ திருஇடைச்‌ சுரம்‌ ஆகும்‌. இங்குள்ள மலைச்சாரலில்‌ பெரிய ஆலமரங்கள்‌ காற்றினால்‌ அசைந்து ஆடிக்கொண்டிருக்கின்றன. அதன்‌ அருகே கரிய குருந்த மரங்கள்‌ ஓங்கி வளர்ந்து விளங்குகின்றன. இந்த மரங்களை ஒட்டினாற்போல வாழைத்தோட்டங்கள்‌ உள்ளன. அவைகள்‌ மிகச்‌ செழிப்புடன்‌ வளர்ந்துள்ளன. அவைகளில்‌ மிகப்பெரிய தார்கள்‌ தொங்கிக்‌ கொண்டும்‌, குருந்தமரத்தின்‌ மீது சாய்ந்தும்‌, அமர்ந்தும்‌ மிக நன்றாகப்‌ படுத்துக்‌ கொண்டும்‌ விளங்குகின்றன. மலைச்சாரலில்‌ வாழ்ந்து தோட்டங்களைக்‌ காத்து வரும்‌ பெண்கள்‌ மிகுந்த ஆரோக்கியமாகவும்‌, செழிப்பான, பருத்த தனங்களை உடையவர்களாகவும்‌ உள்ளனர்‌. அவர்கள்‌ குருந்தமரத்தில்‌ உள்ள தேன்‌ அடைகளை எடுத்து வாழைக்கனிகளின்‌ மீது பிழிந்து, பழத்தை உண்டு களித்து இன்பம்‌ பெருக வாழ்ந்து வருகிறார்கள்‌. இத்தலத்தில்‌ உன்ள மலைச்சாரலில்‌ விளைந்த மணிகள்‌ சிவனது மார்பில்‌ அணியப்பட்டுள்ளன. அவர்‌ கடலில்‌ உறைபவராக இருக்கின்றார்‌. அன்புடையவராகத்‌ திகழ்கின்றார்‌. தீமையற்றவராக இருக்கின்றார்‌. கனலும்‌ மழுவும்‌ ஏந்தியிருக்கின்றார்‌. ஆலகால விடத்தை தொண்டைக்குள்‌ அடக்கியதால்‌ நீலமணியின்‌ நிறத்தைப்‌ போன்ற கழுத்தை உடையவர்‌. பாம்பை அணிகலனாகப்‌ பூண்டவர்‌. வேறு வேறான ஒழுக்க நெறிகளை உடையவராய்‌ உள்ளார்‌. பல்வேறு தோற்றங்களை உடைய வேடத்தவர்‌. இத்தகைய இறைவரின்‌ இயல்புதான்‌ என்னே?

சிறப்பு மிக்க மெல்லிய இறகுகளை உடைய வண்டுகள்‌ பண்ணோடு இசை பாடுகின்றன. செழிப்பான நீர்நிலைகளுள்ள நிலத்தில்‌ செவ்வாழைக்‌ குலைகளும்‌ அழகுமிக்க பலாக்கனிகளோடு விளங்குகின்றன. இத்தகைய அழகுமிக்க மலைச்சாரலை உடைய தலம்‌ திருஇடைச்சுரம்‌ ஆகும்‌. இத்தலத்தில்‌, சிவபெருமான்‌, கார்காலத்தில்‌ வளர்ந்த மணம்‌ கமழும்‌ விரிந்த கொன்றை மலர்‌ மாலையை அணிந்துள்ளார்‌. வளரும்‌ பிறை மதி ஒளி வீசவும் கங்கை நீர்‌ கொண்ட சடையினருமாக விளங்குகின்றார்‌. விடை எழுதிய உயர்ந்த கொடியை உடையவர்‌. ஒளி விளங்கும்‌ மழுப்படையை ஏந்தியிருக்கின்றார்‌. அழல்‌ போன்ற சிவந்த நிறத்தினர்‌. இத்தகைய இறைவரது இயல்புதான்‌ என்னே?

செங்காந்தள்‌ பூக்கள்‌ தேனைச்‌ சொரிகின்றன. அந்தத்‌ தேனில்‌ வண்டுகள்‌ முழுகுகின்றன. குரவ மரம்‌, கடம்ப மரம்‌ ஆகியன சோலைகளில்‌ நிறைந்துள்ளன. இந்தச்‌ சோலைகளில்‌ பூத்த புது மலர்களின்‌ மணம்‌ வீசுகின்ற சாரலை உடைய தலம்‌ திருஇடைச்சுரம்‌ ஆகும்‌. இத்தலத்தில்‌ சிவபெருமான்‌, தோடணிந்த காதுடையவராகவும்‌, திருவெண்ணீறாகிய சுண்ணப்‌ பொடி பூசியவராகவும்‌ விளங்குகின்றார்‌. யானையின்‌ தோலை ஆடையாகப்‌ போர்த்திருக்கின்றார்‌. சுடுகாட்டில்‌ நடனம்‌ ஆடுபவராக இருக்கின்றார்‌. பீடு என்ற சொல்‌ பெருமை பெறுமாறு மிக்க பெருமையை உடையவர்‌. பேய்க்‌ கணங்களோடு ஆடுபவர்‌. பெரியவர்‌ எனப்‌ போற்றத்‌ தக்கவர்க்கு தலைவன்‌ ஆனவர்‌. இத்தகைய இறைவரது இயல்புதான்‌ என்னே?

திருஇடைச்சுரம்‌ ஊரைச்‌ சுற்றிலும்‌ இயற்கையாகவே வளர்ந்த காடுகளும்‌ (பொழில்களும்‌) செயற்கையாக வைத்து வளர்க்கப்பட்ட பூங்காக்களும்‌ (சோலைகளும்‌) மிகுதியாக உள்ளன. இவைகளில்‌ மிக உயரமான மராமரங்களும்‌ (ஆச்சா மரமும்‌, அரச மரமும்‌) பிற பூக்கள்‌ நிறைந்த மரங்களும்‌ செழிப்பாக வளர்ந்து உள்ளன. இம்மரங்களின்‌ நெருக்கமான கிளைகளில்‌ ஆண்‌ பெண்‌ குயில்கள்‌ இணைந்து பாடுகின்றன. அழகிய சோலைகளில்‌ வண்டுகள்‌ இசைபாடுகின்றன. இத்தகைய அழகிய மலைச்சாரலை உடைய திருஇடைச்சுரத்தில்‌ சிவபெருமான்‌ வீரக்கழல்‌ அணிந்த திருவடியினராகவும்‌, கையில்‌ வேலை ஏந்தியவராகவும்‌ முப்புரிநூலை அணிந்தவராகவும்‌ விளங்குகின்றார்‌. ஐந்தாகப்‌ பிரிந்த தலைகளை உடைய பாம்போடு உருத்திராக்க மாலையையும்‌ அணிந்துள்ளார்‌. ஒரு கையில்‌ சுவாலையோடு கூடிய தீயையும்‌, மற்றுமொரு கையில்‌ அழகிய மழுவையும்‌ ஏந்தியுள்ளார்‌. ஆடுபவராகவும்‌, பாடுபவராகவும்‌, பிறரால்‌ வசீகரிக்கப்படும்‌ அழகுடையவராகவும்‌ திகழ்கின்றார்‌. இத்தகைய இறைவரது இயல்புதான்‌ என்னே?

சந்தனம்‌, அகில்‌ ஆகியவற்றின்‌ .மணம்‌ கலந்து மேகங்களில்‌ இருந்து, இடிமுழங்கி மழை பொழிகின்றது. அந்த மழை வெள்ளத்தில்‌ பெரிய மணிகளும்‌, பளிங்குகளும்‌ அடித்து உருண்டு வருகின்றன. அவைகள்‌ வெண்மையான உயர்ந்த அருவிகளின்‌ வழியே கீழே விழுகின்றன. இத்தகைய அழகிய மலைச்சாரலை உடைய தலம்‌ திருஇடைச்சுரம்‌ ஆகும்‌. இத்தலத்தில்‌ சிவபெருமான்‌, தேன்‌ மணம்‌ கமழும்‌ அழகிய கொன்றை மலர்‌ மாலையைச்‌ சூடியுள்ளார்‌. விளங்கும்‌ சடைமுடியில்‌ பிறை மதியைச்‌ சூடியிருக்கின்றார்‌. இறந்தவர்களை எரிக்கும்‌ சுடுகாட்டுச்‌ சாம்பலைத்‌ தம்‌ திருமேனியில்‌ பூசியுள்ளார்‌. வேறுபடும்‌ பல புராண வரலாறுகளை உடையவராக இருக்கின்றார்‌. அவ்வாறே வேறுபடும்‌ பலப்பல வேடங்களுடன்‌ காட்சி தருபவருமாய்‌ இருக்கின்றார்‌. இத்தகைய இறைவரது இயல்புதான்‌ என்னே?

மலையிலிருந்து அருவிகள்‌ திருமண வாத்தியம்‌ போன்று அதிருமாறு ஒலிக்கின்றன. இங்குள்ள இளமயில்கள்‌ மேகத்தின்‌ இனிமை கண்டு தோகை விரித்து ஆடுகின்றன. இலைகள்‌ நிறைந்த இலவங்க மரங்களும்‌ ஏலக்காய்களின்‌ மணமும்‌ எங்கும்‌ நிறைந்துள்ளது. இத்தகைய அழகிய மலைச்சாரலை உடைய தலம்‌ திருஇடைச்சுரம்‌ ஆகும்‌. இத்தலத்தில்‌ எழுந்தருளியிருக்கும்‌ சிவபெருமான்‌ பலர்‌ இல்லங்களுக்கும்‌ சென்று மகளிர்‌ இடும்‌ பலியை ஒரு கையில்‌ ஏற்பவராக இருக்கின்றார்‌. பலவகைப்பட்ட புகழே அல்லாது எவ்வகையான பழியும்‌ இல்லாதவராக இருக்கின்றார்‌. தலையில்‌ ஒளியோடு விளங்கும்‌ நீண்ட மகுடங்களைத்‌ தரித்த இராவணனின்‌ பத்து தலைகளையும்‌ நீண்ட கைகளையும்‌ நெரித்த வலிமையைச்‌ செய்த தன்மை உடையவராக இருக்கின்றார்‌. இத்தகைய இறைவரது இயல்புதான்‌ என்னே?

நீலவண்ணக்‌ குவளை மலர்கள்‌ நீர்ச்‌ சுனைகளில்‌ வளர்ந்திருக்கின்றன. வயல்களில்‌ வாளை மீன்களும்‌ கயல்மீன்களும்‌ அஞ்சுமாறு எருமைகள்‌ இறங்குகின்றன. அதனைக்‌ கண்டு இளைய அன்னங்கள்‌ ஆரவாரிக்கின்றன. இத்தகைய காட்சிகளைக்‌ கொண்ட தலம்‌ திருஇடைச்சுரம்‌ ஆகும்‌. இத்தலத்தில்‌ சிவபெருமான்‌ எழுந்தருளியுள்ளார்‌. தன்‌ பெருமைகளை நினைத்துத்‌ தருக்கப்‌ பேசி மயக்கத்தில்‌ ஆழ்ந்த கடல்நிற வண்ணனாகிய திருமாலும்‌, பிரமனும்‌ ஓர்ந்து காண முடியாத அருமையை உடையவர்‌. ஆனால்‌, தம்‌ திருவடி நிழலில்‌ நின்று போற்றித்‌ துதிக்கும்‌ அன்புடைய அடியவர்க்கு சமீபமாய்‌ இருப்பவர்‌. இத்தகைய இறைவரது இயல்புதான்‌ என்னே?

வயல்களில்‌ இருந்து வரும்‌ நீர்மடைகளில்‌ வாளை மீன்களும்‌ கயல்மீன்களும்‌ துள்ளுகின்றன. இத்தகைய நீர்வளம்‌ மிக்கது காழிநகராகும்‌. இங்கு, ஞானசம்பந்தன்‌, தனது விரிந்த சடையில்‌ உறையும்‌ பிறை மதியை உடைய சிவபிரானின்‌ வரலாறுகளை மனம்‌ கரைந்து போற்றிப்‌ பாடுகின்றார்‌. பூக்களின்‌ மணம்‌ கமழும்‌ சாரலை உடைய மலையில்‌ அருகருகே வெற்றிடங்கள்‌ உள்ளன. இங்கு அழகிய மட நடையினை உடைய மகளிர்‌ பல இடங்களில்‌ தங்குகின்றனர்‌. அவர்கள்‌ தங்கி அழகு செய்யும்‌ திருஇடைச்சுரத்தை இப்பதிகத்தில்‌ போற்றிப்‌ பாடினார்‌. இப்பதிகப்‌ பாடலை இசையோடு பாட வல்லவர்கள்‌ பிணிகள்‌ இன்றி வாழ்வார்கள்‌.