திருஅச்சிறுபாக்கம்

சிவபெருமானார்‌ அச்சிறுபாக்கத்தைத்‌ தாம்‌ ஆட்சிபுரியும்‌ இடமாகக்‌ கொண்டுள்ள இறைவராவார்‌. தமது முறுக்கேறிய பொன்‌ திரண்டாற்போன்ற சடையானது, பெருங்கடலின்‌ அலைகளைப்‌ போலவும்‌, பவளக்‌ கொடியையும்‌, தீ வண்ணத்தையும்‌ ஒத்திருந்தாற்‌ போன்று புரளுகிறது. குன்றுகள்‌ போன்ற இரண்டு தோள்களோடு கூடிய மார்பில்‌ வெண்மையான முப்புரிநூல்‌ விளங்குகின்றது. வளமையான திருநீற்றையும்‌ அணிந்துள்ளார்‌. மின்னல்‌ போன்ற நுண்ணிய இடையினை உடைய மென்மைத்‌ தன்மை வாய்ந்த உமையம்மையை ஒருபாகமாக விரும்பி ஏற்றிருப்பவர்‌. ஓருருவில்‌ ஈருருவாய்த்‌ தோன்றும்‌ அடிகள்‌ ஆவார்‌.

அச்சிறுபாக்கத்தை, தான்‌ ஆட்சி புரியும்‌ இடமாகக்‌ கொண்டுள்ள இறைவர்‌, தேனினும்‌ இனியவர்‌. பால்போன்ற நீறணிந்தவர்‌. இனிய கரும்பு போன்றவர்‌. தம்‌ திருவடிகளை மெய்யுருகி வணங்கும்‌ அன்பர்கட்கு உவகைகள்‌ தருபவர்‌. அவர்களின்‌ தலைமேல்‌ விளங்குபவர்‌. இடப வாகனமாகிய ஓர்‌ ஊர்தியிலேயே வருபவர்‌. வானுலகைக்‌ கடந்து மண்ணுலகை அடைந்து, அங்கு தம்மை வழிபடும்‌ அன்பர்கள்‌ நினைக்கும்‌ செயலை வெற்றி பெறச்‌ செய்து நிற்கும்‌ வடிவினை உடையவர்‌. யானையின்‌ தோலைப்‌ போர்த்தியவர்‌. அவர்‌ எம்‌ தலைவர்‌ ஆவார்‌.

அச்சிறுபாக்கத்தைத்‌ தாம்‌ ஆட்சிபுரியும்‌ இடமாகக்‌ கொண்டுள்ள இறைவர்‌, உமையம்மை பெண்‌ யானை வடிவு கொள்ளத்‌ தாம்‌ காரிருளும்‌, பெரிய மலையும்‌ போன்ற ஆண்‌ யானை வடிவம்‌ தாங்கி அவள்‌ பின்னால்‌ ஓடியவர்‌. நீர்‌ வடிவமான கங்கையை மேல்நோக்கிய சடைமிசைத்‌ தாங்கியவர்‌. நீறு பூசி, விடையேற்றில்‌ மகிழ்ந்து ஏறிவரும்‌ புனிதர்‌. பேரருளாளர்‌. பிறப்பிறப்பிற்‌ சேராதவர்‌. பிணி, கேடு இல்லாதவர்‌. பேய்க்கணங்கள்‌ சூழச்‌ சுடுகாட்டில்‌, இருண்ட மாலை யாமத்தில்‌, எம்‌ அடிகள்‌ நடனம்‌ புரிபவர்‌ ஆவார்‌.

அச்சிறுபாக்கத்தில்‌ ஆட்சி கொண்டுள்ள இறைவரான சிவபெருமான்‌, குவளை மலர்களால்‌ தொடுக்கப்பட்ட மாலையை மார்பில்‌ சூடியவர்‌. அழகிய கொன்றை மலர்‌ மாலையை அணிந்தவர்‌. மலைமகளாகிய பார்வதி தேவியை இடப்பாகமாகக்‌ கொண்டுள்ளவர்‌. சிவந்த மலர்‌ போன்ற பிறையையும்‌, தேங்கியுள்ள கங்கை நீரையும்‌ தம்‌ சடைமுடிமேல்‌ உடையவர்‌. எம்‌ தலை உச்சியில்‌ உறைபவர்‌. மலர்‌ போன்ற மென்மையான தம்‌ திருவடிகளை, மனம்‌ ஒன்றி, அடியவர்கள்‌, தமிழ்ச்‌ சொற்களாலும்‌, வடமொழிச்‌ சொற்களாலும்‌ துதிக்கும்‌ தோத்திரங்கள்‌, அவரது திருவடிகளையே சேருகின்றன.

அச்சிறுபாக்கத்தில்‌ ஆட்சி கொண்டுள்ள இறைவரான சிவபெருமான்‌, வானிலே உலவும்‌ திங்களைச்‌ சூடியவர்‌. அவரது விரிந்த சடைமுடியில்‌ கங்கை நீரின்‌ வெள்ளம்‌ தங்கியுள்ளது. இசை அமைதியோடு கூடிய நான்மறைகளைத்‌ தோற்றுவித்தவர்‌. பலவகையான புகழையே உடையவர்‌. பழியே இல்லாதவர்‌. எண்ணற்ற தேவர்களால்‌ நாள்தோறும்‌ தோத்திரிக்கப்படுபவர்‌. அரவு ஆபரணங்களோடு மிக்க அழகுபெற இருப்பவர்‌. எல்லாருக்கும்‌ தலைமையானவர்‌. இடபத்தை வாகனமாகக்‌ கொண்டு அதன்‌ மீது ஏறி வருபவரும்‌ இவரே எம்‌ அடிகள்‌ ஆவார்‌.

அச்சிறுபாக்கத்தில்‌ ஆட்சி கொண்டுள்ள இறைவரான சிவபெருமானின்‌ நீண்ட பெரிய சடைமேல்‌ இளம்பிறை விளங்குகின்றது. ஒளி பொருந்திய மழுவோடும்‌, திருநீற்‌றை மேனியில்‌ பூசியும்‌, ஒருகாதில்‌ தோடணிந்தும்‌, கொடிய சுடலைக்‌ காட்டில்‌ ஆடுபவர்‌ இவர்‌. புலித்தோலை உடையாக அணிந்தவர்‌. இரவும்‌, பகலும்‌ பேய்க்கணங்களும்‌, பூதகணங்களும்‌ தங்களது கைகளால்‌ தொழுதேத்தப்படுபவர்‌. படமெடுத்தாடும்‌ பாம்புகள்‌ தம்மேனிமேல்‌ பொருந்தி ஆடச்‌ சுடுகாட்டைத்‌ தமது அரங்கமாகக்‌ கொண்டு ஆடும்‌ அடிகள்‌ இவர்‌ ஆவர்‌.

அச்சிறுபாக்கத்தில்‌ ஆட்சி கொண்டுள்ள இறைவரான சிவபெருமான்‌ இடபம்‌ ஒன்றில்‌ ஏறி வருபவர்‌. தம்‌ திருமேனியில்‌ நீறுபூசியவர்‌. இளைய கிளி போன்ற அழகிய பார்வதி தேவியாருக்குத்‌ தம்‌ உடலில்‌ ஒருகூறு அருளியவர்‌. இருவரும்‌ ஒருவராய்‌ இணைந்து இருப்பவர்‌. தம்‌ திருமுடிமேல்‌ கொன்றை மாலையையும்‌ இளமதியையும்‌ அணிந்தவர்‌. வில்வப்பூ, மணங்கமழும்‌ மல்லிகை, எருக்கு, முருக்கு, மகிழம்பூ, இள வன்னி இலை ஆயன திருமுடியில்‌ மணம்‌ பரப்புகின்றன. கங்கையாற்றைச்‌ சடைமேல்‌ அணிந்துள்ள எம்‌ அடிகளும்‌ இவரே ஆவார்‌.

அச்சிறுபாக்கத்தில்‌ ஆட்சி கொண்டுள்ள இறைவர்‌ ஒளி பொருந்திய வாளைக்‌ கச்சிலே பொருத்தி இடையில்‌ ஆடையாகக்‌ கட்டியுள்ளவர்‌. ஒளி பொருந்திய முடி சுடர்விடக்கவரி, குடை, பீலிக்குஞ்சம்‌ முதலியவற்றோடு பெண்களைக்‌ கவரும்‌ பிறைமதியை முடியிற்‌ சூடி விளங்குபவர்‌. பெருமை உடைய அடியவர்‌ தம்மை விரும்பி வழிபடுமாறு, தம்‌ அன்பு, வலிமை ஆகியவற்றைக்‌ கருதித்‌ தன்னைப்‌ பெரியவனாக எண்ணிப்‌ பெரிய கயிலை மலையைப்‌ பெயர்த்தெடுத்த இராவணனின்‌ தோள்களை அடர்த்து அவனுக்குத்‌ தம்பால்‌ அன்பையும்‌ அருளையும்‌ கொடுத்த எம்‌ அடிகள்‌ ஆவார்‌.

தவம்‌ செய்யாதவர்களாலும்‌ அன்பு செய்யாதவர்களாலும்‌, நுகரத்தக்க நெய்வேத்தியம்‌, சந்தனம்‌ கையில்‌ ஏந்திய மாலை இவற்றின்‌ கூறுகளோடு வழிபாடு செய்யாதவர்களாலும்‌, அடைய முடியாதவராய்‌ அச்சிறுபாக்கத்தில்‌ ஆட்சி கொண்டுள்ள . இறைவரான சிவபெருமான்‌ வீற்றிருக்கின்றார்‌. இத்தகையவர்‌ என்று அறியமுடியாத தன்மையும்‌, அடையமுடியாத அருமையும்‌ உடைய இயல்பினர்‌ என்பதறிந்தும்‌ திருமாலும்‌ நான்முகனும்‌ பன்றியும்‌ அன்னமுமாய்‌ மாறி அடியையும்‌ முடியையும்‌ காண முயற்சித்துத்‌ தோற்றனர்‌. அவர்களால்‌ காண இயலாதவராக உயர்ந்து நின்ற எம்‌ அடிகள்‌ இவர்‌ ஆவார்‌. எனவே, தவம்‌ செய்பவர்களுக்கும்‌, அன்பு செய்பவர்களுக்கும்‌ வழிபடுவோர்களுக்கும்‌ எளியவராய்‌ இருப்பவர்‌ சிவபெருமான்‌.

அச்சிறுபாக்கத்தில்‌ எம்‌ அடிகளான சிவபெருமான்‌ ஆட்சி கொண்டுள்ளார்‌. சமணர்களும்‌, சாக்கியப்‌ பேய்களும்‌, நல்வினை செய்யாது வல்வினைகள்‌ புரிபவர்கள்‌. ஓதியும்‌, கேட்டும்‌, திருந்தாத உணர்வு உடையவர்கள்‌. வீணாகத்‌ தர்க்க வாதம்‌ புரிபவர்கள்‌. அவர்கள்‌ நினைத்தும்‌ அறிய முடியாத இயல்பினை உடையவர்‌ சிவபெருமான்‌. வேதமும்‌, வேதநெறிகளும்‌ ஆகியவர்‌ தம்மை வழிபடுவார்‌ மலங்களை நீக்கும்‌ வேடம்‌ உடையவர்‌. தாமரை மலரும்‌, திங்களும்‌ போன்ற அழகும்‌, தன்மையும்‌ உடையவர்‌. பிரபஞ்சத்தின்‌ ஆதியும்‌, அந்தமுமாய்‌ இருப்பவர்‌.

அவர்‌ புறச்சமயிகளுடைய நல்வினையைப்‌ போக்கியவர்‌, படித்துங்‌ கேட்டும்‌ உணர்ச்சியற்றவர்களால்‌ தியானிக்கப்படாதவர்‌. வேதமும்‌ அவைகூறும்‌ நெறிகளுமாகி, பரிசுத்த வேடத்தோடு, ஆதியும்‌ ஈறுமாய அடிகள்‌ இவர்‌ என்கின்றது. வாதுசெய்‌ சமண்‌ - விதண்டாவாதமே செய்து பொழுதுபோக்கும்‌ சமணர்‌. அவர்களுக்குத்‌ துணை இருப்பது உலக போகத்திற்குரிய நல்வினை யாதலின்‌ உண்மை உணராது வாதமே செய்து காலம்‌ கழிக்கின்றனர்‌ என்பதாம்‌. ஆதலால்‌ அவர்களுடைய நல்வினையை நீக்க வேண்டியது இவர்‌ அருளித்‌ திறமாயிற்று.