திருப்புறவம்

தேன்‌ நிறைந்த வண்டுகள்‌ ஒலிக்கும்‌ கொன்றை மாலையை விரும்பி அணிந்தவராகச்‌ சிவபெருமான்‌ வீற்றிருக்கின்றார்‌. இவர்‌, தன்னை மதியாத அசுரர்களின்‌ முப்புரங்களை எரித்து அழித்தவர்‌. சுறாமீன்‌ எழுதப்பட்ட கொடியை உடைய மன்மதனின்‌ உடல்‌ பொடியாகும்படி தன்‌ நெற்றிக்‌ கண்ணால்‌ விழித்து அழித்தவர்‌. இந்த இறைவர்‌, சான்றோர்களும்‌, வானோர்களும்‌ போற்றித்‌ துதிக்க உமையம்மையாரோடு புறவம்‌ என்னும்‌ சீகாழிப்‌ பதியில்‌ வீற்றிருந்து அருள்‌ புரிகின்றார்‌.

புறவம்‌ என்னும்‌ சீகாழிப்‌ பதியைச்‌ சிவபெருமான்‌ தன்‌ பதியாகக்‌ கொண்டுள்ளார்‌. இவர்‌ மிகுந்த வலிமை உடையவர்‌. புலித்தோல்‌ ஆடையின்‌ மேல்‌, படம்‌ பொருந்திய நாகத்தைக்‌ கச்சாகக்‌ கட்டிய விகிர்தர்‌. போர்‌ செய்யும்‌ யானை பிளிற, அதன்‌ தோலைத்‌ தன்‌ கைவிரல்‌ நகத்தால்‌ உரித்துப்‌ போர்த்தியவர்‌. இப்பதியில்‌ இரவும்‌ பகலும்‌ தேவர்கள்‌ போற்றித்‌ துதிக்க உமையம்மையாரோடு எழுந்தருளி அருள்‌ புரிந்து வருகின்றார்‌.

புறவம்‌ என்னும்‌ சீகாழிப்பதி, அழகிய குளிர்ந்த கடலால்‌ சூழப்பட்ட எழில்‌ மிகுந்த பதியாகும்‌. இப்பதியைச்‌ சிவபெருமான்‌ தனது இருப்பிடமாகக்‌ கொண்டுள்ளார்‌. இவர்‌, உதரபந்தம்‌ என்னும்‌ அணியை அணிந்துள்ள பூதங்கள்‌ பாட, பாதங்களில்‌ சிலம்பு ஒலிக்க, மணம்‌ நிறைந்த கூந்தலை உடைய உமையம்மை காண, சுடுகாட்டில்‌ எரியேந்தி ஆடுபவர்‌. எம்முடைய தலைவரான இவர்‌; வானோர்கள்‌ போற்றித்‌ துதிக்க உமையம்மையாரோடு இப்பதியில்‌ வீற்றிருந்து அருள்புரிகின்றார்‌.

புறவம்‌ என்னும்‌ சீகாழிப்‌ பதி, கடலால்‌ சூழப்பட்டுள்ள பதியாகும்‌. இப்பதியைச்‌ சிவபெருமான்‌ தனது இருப்பிடமாகக்‌ கொண்டுள்ளார்‌. தினந்தோறும்‌ குளிர்ந்த மலர்களைத்‌ தூவித்‌ தன்னை நினைக்கும்‌ அடியவர்களின்‌ நினைப்பிற்கு இவர்‌ இனியவராக இருப்பவர்‌. கனைக்கும்‌ விடை ஒன்றை ஊர்தியாகக்‌ கொண்டவர்‌. கங்கை, திங்கள்‌, மணம்‌ கமழும்‌ கொன்றை ஆகியவற்றை அணிந்தவர்‌. அழகிய‌ நீண்ட சடை முடியை உடையவர்‌. என்னை ஆளுபவரான இவ்விறைவர்‌, வானோர்கள்‌ போற்றித்‌ துதிக்க உமையம்மையாரோடு இத்தலத்தில்‌ வீற்றிருந்து அருள்புரிகின்றார்‌.

சிவபிரானுடைய சடை முடியில்‌, சிவந்த கண்களை உடைய பாம்பும்‌, சிரிப்பது போல வாய்விண்டு தோன்றும்‌ வெள்ளிய தலையோடும்‌, இளைய வெண்பிறையும்‌ தங்கியுள்ளன. விடையை ஊர்தியாகக்‌ கொண்டவன்‌. கோவண ஆடையை அணிந்தவன்‌. அப்பெருமான்‌ பொங்கி எழும்‌ அலைகளை உடைய வளம்‌ பொருந்திய கடலால்‌ சூழப்பட்ட அழகிய புறவம்‌ என்னும்‌ சீகாழியைத்‌ தனக்குரிய பதியாகக்‌ கொண்டு இமையோர்‌ எங்கும்‌ பரவி நின்று ஏத்த உமையம்மையோடு வீற்றிருந்து அருன்‌ பாலிக்கின்றான்‌.

புறவம்‌ என்னும்‌ சீகாழிப்‌ பதியானது, புன்னை தாமரை முதலியன நிறைந்த பொழில்களால்‌ சூழப்பட்ட அழகிய நகராகும்‌. சிவபெருமான்‌, இப்பதியைத்‌ தனது இருப்பிடமாகக்‌ கொண்டிருக்கின்றார்‌. இவரது முறுக்கி விடப்பட்ட சடைகள்‌ தாழ்ந்து தொங்குகின்றன. மாலையாகக்‌ கோத்தணிந்த பன்றியின்‌ பற்கள்‌ இவரது மார்பில்‌ விளங்குகின்றது, அன்னம்‌ போன்ற நடையினை உடைய மகளிரின்‌ இல்லங்கள்‌ தோறும்‌ இவர்‌ சென்று மன நிறைவோடு அவர்கள்‌ தரும்‌ பலியை ஏற்கின்றார்‌. என்னை அடிமையாக உடைய இப்பெருமான்‌, வானோர்கள்‌ துதிக்க இத்தலத்தில்‌ உமையம்மையோடு வீற்றிருந்து அருள்புரிகின்றார்‌.

புறவம்‌ என்னும்‌ சீகாழிப்பதியில்‌, சிறகுகளை உடைய வண்டுகள்‌ பண்ணோடு ஒலிக்கும்‌ பூஞ்சோலைகள்‌ மிகுதியாக உள்ளன. இப்பதியைச்‌ சிவபெருமான்‌ தன்‌ இருப்பிடமாகக்‌ கொண்டுள்ளார்‌. இவர்‌, யாராலும்‌ உண்ண முடியாத நஞ்சைத்‌ தானே உண்டவர்‌. ஒரு தோழம்‌ என்ற எண்ணில்‌ அடங்காத தேவர்கள்‌, விண்ணில்‌ மகிழ்வுடன்‌ வாழ, அவர்களுக்கு அமுதை அளித்தவர்‌. விடை எழுதிய கொடியை உடைய தலைவர்‌. எண்ணிக்கையில்‌ மிகுந்த வானோர்கள்‌ துதிக்க உமையம்மையாரோடு இப்பதியில்‌ வீற்றிருந்து அருள்புரிகின்றார்‌.

எட்டுத்‌ தோள்களை உடைய சிவபெருமான்‌, புறவம்‌ என்னும்‌ சீகாழிப்‌ பதியைத்‌ தனக்குரிய பதியாகக்‌ கொண்டுள்ளார்‌. விண்ணுலகம்‌ அதிரும்படி இராவணன்‌ கயிலை மலையை அடியோடு பெயர்த்து எடுக்க முயற்சித்தான்‌. அவனுடைய வலிமையான தோள்களும்‌, உடலும்‌ தலையும்‌ நெரியுமாறு, தன்‌ கால்விரலால்‌ சிறிதே ஊன்றினார்‌. பின்னர்‌, அவன்‌ தன்‌ செயலுக்கு வருந்தி மன்னித்து அருள வேண்டியதும்‌ அவன்‌ உடலில்‌ தோன்றிய புண்கள்‌ நீங்க அவனுக்கு அருள்‌ செய்து வரங்கள்‌ பலவற்றைக்‌ கொடுத்த பெருமானாவார்‌. அந்த இறைவர்‌ வானோர்கள்‌ போற்றித்‌ துதிக்க உமையம்மையாரோடு வீற்றிருந்து அருள்‌ புரிகின்றார்‌.

புறவம்‌ என்னும்‌ சீகாழிப்‌ பதி, கடல்நீரால்‌ சூழப்பட்டு உள்ளது. இப்பதியில்‌ இடியபோன்ற முழக்கத்தை உடைய முழா என்னும்‌ இசைக்‌ கருவி தொடர்ந்து ஒலித்துக்‌ கொண்டே இருக்கின்றது. இப்பதியைச்‌ சிவபெருமான்‌ தனது இடமாகக்‌ கொண்டுள்ளார்‌. இவர்‌, திருமாலும்‌, நீண்டு வளர்ந்த தாமரை மலர்மேல்‌ உறையும்‌ நான்முகனும்‌ இவரைத்‌ தேடிக்‌ காண இயலாத தன்மை உடைய திருமேனியர்‌. பவள மலை போன்ற திருமார்பின்கண்‌ திருநீறு அணிந்த அழகினை உடையவர்‌. இவர்‌ வானோர்‌ போற்றித்‌ துதிக்க உமையம்மையோடு இத்தலத்தில்‌ வீற்றிருந்து அருள்புரிகன்றார்‌.

புறவம்‌ என்னும்‌ சீகாழிப்பதி கடல்‌ நீரால்‌ சூழப்பட்டது. இப்பதியைச்‌ செவ்வண்ணம்‌ உடைய சிவபெருமான்‌ தனது இருப்பிடமாகக்‌ கொண்டுள்ளார்‌. சமணர்கள்‌ ஆடுகின்ற மயிலின்‌ தோகையைத்‌ தங்கள்‌ கையில்‌ ஏந்தி இருக்கின்றார்கள்‌. புத்தர்கள்‌ அறிவில்‌ குறைந்தவர்கள்‌. சிவபெருமான்‌, இவர்கள்‌ புனைந்து பேசும்‌ மொழிகளைத்‌ தாழ்ந்து போகுமாறு செய்கின்றார்‌. இவர்‌, கூடி எரியும்‌ தீயையும்‌, அழகிய வானமும்‌ போன்ற வடிவுடையவர்‌. வானோர்கள்‌ பொருந்தும்‌ வகையால்‌ போற்றித்‌ துதிக்க உமையம்மையோடு இத்தலத்தில்‌ வீற்றிருந்து அருள்புரிகன்றார்‌.

புறவம்‌ என்னும்‌ சீகாழிப்‌ பதி, பொன்‌ போன்ற அழகுடைய உயர்ந்த மாடவீடுகளைக்‌ கொண்டுள்ளது. செல்வச்‌ செழுமையும்‌ வாய்ந்தது. இங்கு குற்றமற்ற இறைவரான சிவபெருமான்‌, மின்னல்‌ போன்ற இடையினை உடைய உமையம்மையாரோடு எழுந்தருளி உள்ளார்‌. இந்த இறைவனைத்‌ தன்‌ அன்பால்‌ தமிழ்‌ விரகனாகிய ஞானசம்பந்தன்‌ போற்றிப்‌ பாடினார்‌. இத்தமிழ்‌ மாலையைப்‌ பலநாள்களும்‌ பாடி ஆடுவோர்‌, மேலுலகத்தில்‌ பிரியாது உறைவார்கள்‌.