திருக்கானூர்

திருக்கானூரில்‌ அமர்ந்திருக்கும்‌ சிவபெருமான்‌ நெற்றிக்‌ கண்ணை உடையவர்‌. இடபத்தில்‌ ஊர்ந்து வரும்‌ செல்வர்‌. வானில்‌ ஒளியோடு விளங்கும்‌ சூரிய சந்திரர்‌ போன்ற ஒளி பொருந்திய திருமுடியை உடையவர்‌. திருமுடியில்‌ வன்னிக்‌ காடுகளில்‌ பூத்த தேன்‌ நிரம்பிய கொன்றை மலர்‌, தானே வந்து தங்கிய கங்கை, பிறைச்‌ சந்திரன்‌ ஆகியவற்றைச்‌ சூடி இருப்பவர்‌. மான்‌ போன்ற மருண்ட கண்களை உடைய உமையம்மை கண்டு மகிழ, மாலைக்‌ காலத்தில்‌ நடனம்‌ புரிபவர்‌ ஆவார்‌.

திருக்கானூரில்‌ காந்தன்‌ செடிகள்‌ செழிப்பாக நிறைந்து வளர்ந்தும்‌, பூத்தும்‌, மணம்‌ பரப்பியும்‌ உள்ளன. இங்கு சிவபெருமான்‌ சந்தனமும்‌, திருநீறும்‌ பூசிய இறைவராக உறைகின்றார்‌. தடுக்க முடியாதபடி வேகத்தோடு வந்த கங்கையின்‌ வெள்ளம்‌ மூழ்கி மறைந்து போன சடைமுடியை உடையவர்‌. தனது சடைமுடிமேல்‌ ஒரு வளைந்த பிறைச்சந்திரனை பொருந்தியிருப்பவர்‌. அத்துடன்‌, பாம்பு, கொன்றை மலர்‌ ஆகியன சூடி அழகு தர வீதியுலா வருபவர்‌. தன்‌ வாயினின்று வந்த அழகிய மெல்லிய சொற்களால்‌ இன்பம்‌ தரும்‌ மைந்தரும்‌ இவரே ஆவார்‌.

கானூர்‌ மேவிய செல்வர்‌, கங்கையினை உடைய சடையின்‌ மேல்‌ பிறையும்‌ கொன்றையும்‌ பொருந்த, இன்சொல்லால்‌ இன்பம்‌ பயக்கும்‌ இறைவர்‌ போலாம்‌ என்கின்றது. நீந்தலாகா வெள்ளம்‌ மூழ்கும்‌ நீள்‌ சடை - நீந்தமுடியாத அளவு வேகத்தோடு வந்த கங்கை வெள்ளம்‌ மூழ்கி மறைந்து போன சடை, ஏய்ந்த - பொருந்திய. போந்த - தன்வாயினின்றும்‌ வந்த. மென்சொல்‌ - மெல்லிய சொற்களால்‌; என்றது நயந்து பின்னிற்றலால்‌ இன்பந்தந்த தலைவர்‌ என்றவாறு. இது வழிநாட்‌ புணர்ச்சிக்கண்‌ பிரிந்த தலைமகன்‌ காலம்‌ நீட்டிக்க. கவன்ற தலைவி தலைநாளில்‌ மென்சொல்லால்‌ இன்பம்‌ பயந்தமை எண்ணி நைகின்ற நிலையை அறிவிக்கின்றது.

கானூர்‌ மேவிய பிறையார்‌, சடையார்‌, விடைமேல்‌ வருவாராய்‌ என்‌ வீட்டில்‌ புகுந்து என்‌ நலத்தைக்‌ கொண்டார்‌ என்று தலைவி அறத்தொடு நிற்பதாக எழுந்தது. சிறை - சிறகு. மறை ஆர்‌ பாடல்‌ - வேதப்‌ பாடல்‌. மால்விடை - பெரிய இடபம்‌. இறையார்‌ - சிவன்‌. எழில்நலம்‌ என்பது எழிலும்‌ நலமும்‌ என உம்மைத்‌ தொகை. கறை யார்‌ சோலை - இருள்‌ சூழ்ந்த சோலை.

கறைக்‌ கண்டரான சிவபெருமான்‌, இருள்‌ அடர்ந்த சோலைகள்‌ சூழ்ந்த திருக்கானூரில்‌ எழுந்தருளி உள்ளார்‌. கொன்றை மலர்களால்‌ ஆன மாலையைத்‌ தலையிலும்‌ மார்பிலும்‌ அணிந்து உள்ளார்‌. தலையில்‌ குளிர்ந்த பிறைமதியைச்‌ சூடியுள்ளார்‌. சிறப்பு மிக்க ஆடல்‌ பாடல்களோடு பெருமைக்கு உரியவராய்‌ வந்து, ஊர்கள்‌ தோறும்‌ சென்று பலியேற்கிறார்‌. என்‌ மனத்தகத்தே கொடிய விரக வேதனையைத்‌ தந்து சென்றார்‌ இவர்‌.

தேன்‌ நிறைந்த மலர்களில்‌ வண்டுகள்‌ தேனை உண்டு மகிழ்ந்து, யாழ்போல்‌ திருக்கானூரில்‌ ஓலி எழுப்புகின்றன. இங்கு ஒளி பொருந்திய வெண்‌ பிறையை முடியிற்சூடிய இறைவராக சிவபெருமான்‌ விளங்குகின்றார்‌. காய்ந்த வெண்மையான எலும்பும்‌, திருநீறும்‌, முப்புரிநூலும்‌ பொருந்திய மார்பினராய்‌ எளிமையாக வருபவர்போல வருகிறார்‌. வந்து, 'ஐயம்‌ இடுக’ என்று கூறிக்‌ கொண்டே என்‌ இல்லத்தில்‌ புகுந்து, எனது உள்ளத்‌ தெளிவையும்‌ நாணத்தையும்‌ கவர்ந்து சென்ற கள்வர்‌ இவர்‌ ஆவார்‌.

தேன்‌ நிறைந்த சோலைகளால்‌ சூழப்பெற்ற திருக்கானூரில்‌ தேவ தேவரான சிவபிரானார்‌ எழுந்தருளி உள்ளார்‌. இவர்‌, மூப்பு அடையாத அழகினர்‌. ஒரு கலையோடு முளைத்த வெண்பிறையை அணிந்தவர்‌. கொன்றை மாலையைச்‌ சூடியவர்‌. காமக்‌ குறிப்புத்‌ தோன்றும்‌ புன்சிரிப்புடன்‌ என்‌ இல்லம்‌ நோக்கி வந்தார்‌. பொய்‌ கலந்த வார்த்தைகளைப்‌ பேசிக்‌ கொண்டிருந்து, திரும்பிப்‌ போவார்போல்‌ ஆசை காட்டி என்னை மயக்கினார்‌. என்‌ உள்ளத்தில்‌ புகுந்து கொண்ட இவர்‌ முப்புரிநூல்‌ அணிந்தவர்‌ ஆவார்‌.

பவளம்‌ போன்ற நிறத்தினை உடைய சிவபெருமானார்‌ மணம்‌ கமழும்‌ சோலைகள்‌ சூழ்ந்த திருக்கானூரில்‌ எழுந்தருளி உள்ளார்‌.இனிமையான வார்த்தைகளைப்‌ பேசி, தாளத்தோடு வீணையை மீட்டி, முழவம்‌, மொந்தை போன்ற வாத்தியங்களோடு பாடல்களைப்‌ பாடி என்‌ இல்லத்தை அடைந்தார்‌. என்‌ இல்லத்தை விட்டு நீங்காதவராக எனக்குக்‌ குமிழம்பூப்‌ போன்ற பசலை நிறத்தைத்‌ தந்து, என்‌ அழகைக்‌ கவர்ந்து சென்றார்‌.

மணம்‌ நிறைந்த திருக்கானூரில்‌ எழுந்தருளிய எந்தையராகிய பெருமானார்‌, அந்தத்தைச்‌ செய்பவரும்‌, யாவர்க்கும்‌ ஆதியாய்‌ இருப்பவரும்‌ ஆவார்‌. அயன்‌, மால்‌ முதலிய அனைவராலும்‌ அறிதற்கரியவர்‌. என்‌ சிந்தையிலும்‌ சென்னியிலும்‌ நாவிலும்‌ நிலை பெற்று இருப்பவர்‌. அத்தகையோர்‌ யான்‌ காண வெளிப்பட்டு வந்து என்‌ உள்ளம்‌ புகுந்து மாலையிலும்‌ காலையிலும்‌ நடனம்‌ புரிந்து அருளுகின்றார்‌.

திருக்கானூரில்‌ எழுந்தருளிய கடவுள்‌ சிவபெருமான்‌ ஆவார்‌. இவரை, வேதங்களை ஒதும்‌ நான்முகனும்‌, வளைந்த பாம்பைப்‌ படுக்கையாகக்‌ கொண்ட திருமாலும்‌ தங்களைப்‌ பாதுகாத்து அருளும்‌ செல்வராகக்‌ கருதுகின்றனர்‌. இவர்‌, ஆமை, அரவு, பன்றியின்‌ வெண்மையான கொம்பு, எலும்பு மாலை ஆகியவற்றை அணிந்தவர்‌. ஒரு கள்வராய்‌, வெள்ளை உள்ளம்‌ படைத்தவர்‌ போல வந்து எனக்கு மன வேதனையைத்‌ தந்தவர்‌.

திருக்கானூரில்‌ எழுந்தருளியுள்ள சிவபெருமான்‌ பேய்களும்‌ தூங்கும்‌ நள்ளிரவில்‌ நடனம்‌ ஆடுபவர்‌. இப்பெருமானைக்‌ குற்றமற்ற ஞானசம்பந்தன்‌ சொல்‌ மாலையான இப்பதிகத்தால்‌ போற்றிப்‌ பாடினார்‌. இப்பதிகப்‌ பாடல்கள்‌ பத்தையும்‌ முப்பொழுதும்‌ பாடித்‌ தொழுங்கள்‌. இந்தத்‌ தோத்திரங்களைச்‌ சொல்லித்‌ துதித்து நின்று அழுதும்‌ சிரித்தும்‌ அன்பு செய்யுங்கள்‌. அப்படிச்‌ செய்பவர்களின்‌ துன்பங்கள்‌ அறுந்துவிடும்‌.