1
வாரார் கொங்கை மாதோர் பாக மாக வார்சடைநீரார் கங்கை திங்கள் சூடி நெற்றி யொற்றைக்கண்கூரார் மழுவொன் றேந்தி யந்தண் குழகன் குடமூக்கில்காரார் கண்டத் தெண்டோள் எந்தை காரோ ணத்தாரே.
சொற்பிரிப்பு
வார் ஆர் கொங்கை மாது ஓர் பாகம் ஆக, வார்சடை,நீர் ஆர் கங்கை திங்கள் சூடி, நெற்றி ஒற்றைக்கண்,கூர் ஆர் மழு ஒன்று ஏந்தி, அம் தண் குழகன் குடமூக்கில்,கார் ஆர் கண்டத்து எண்தோள் எந்தை, காரோணத்தாரே.
உரை
திருக்குடமூக்குக் காரோணத்தில் எழுந்தருளியுள்ள எந்தையராகிய சிவபெருமான். கார் மேகம் போன்ற கருமை பொருந்திய கண்டத்தினராய், எட்டுத் தோள்களோடு விளங்குகின்றார். இவர் அருள் செய்யும் இளமைக் கோலத்தில் விளங்குகின்றார். கச்சணிந்த கொங்கைகளையுடைய பார்வதி தேவியை ஒருபாகமாகக் கொண்டுள்ளார். நீண்ட சடைமுடியில் நீர் மயமான கங்கையையும் பிறையையும் சூடியுள்ளார். இயல்பான இருவிழிகளோடு நெற்றியில் மூன்றாவது கண்ணுடையவர். கூரிய மழு என்னும் ஓர் ஆயுதத்தை ஏந்தியுள்ளார்.