திருநறையூர்ச்சித்தீச்சரம்

திருநறையூரில்‌ பெருமை உடைய மறையவர்கள்‌ தங்கள்‌ இல்லங்களில்‌ வேதப்‌ பொருட்களை உள்ளடக்கிய இசைப்பாடல்களைப்‌ பாடுகின்றனர்‌. அதனைக்‌ கேட்டுச்‌ சிறகுகளைக்‌ கொண்ட வண்டுகள்‌ மகிழ்வெய்திப்‌ பாடித்‌ தேனை உண்ணுகின்றன. இவ்வூரில்‌ சித்தீச்சரத்து இறைவராக விளங்கும்‌ சிவபெருமான்‌ பிறைசூடிய சடையர்‌; புலித்தோலை உடுத்தியவர்‌; பிளந்த வாயினை உடைய பாம்பை அணிந்தவர்‌; விடக்கறை பொருந்திய கழுத்தினை உடையவர்‌; பிரமனது தலையோட்டை ஏந்திய கையினை உடையவர்‌; எலும்புகளால்‌ கோர்க்கப்பட்ட மாலையினை அணிந்த கங்காளர்‌ ஆவார்‌.

குளிர்ந்த பொய்கைகளில்‌ சிவந்த கால்களை உடைய அன்னம்‌ தன்‌ பெடையுடன்‌ சேர்ந்து விளங்கும்‌ சித்தீச்சரத்தில்‌ சிவபெருமான்‌ எழுந்தருளி உள்ளார் ‌. இவர்‌, நீண்டு வளர்ந்த சடையினர்‌. கங்கையை அணிந்தவர்‌. அனல்‌ ஏந்தியவர்‌. பூதகணங்கள்‌ பாடத்‌ தம்‌ காதலியாகிய உமையம்மையும்‌ தாமும்‌ உடனாய்‌, ஒப்பற்ற விடைமீது ஏறிவருபவர்‌. இவர்‌ தேன்‌ நிறைந்த கொன்றைமலர்‌, வன்னிஇலை, ஊமத்தை மலர்‌ ஆகியவற்றைச்‌ சூடிக்‌ கொண்டிருப்பவர்‌ ஆவார்‌.

மணம்‌ கமழும்‌ சோலைகளும்‌ வயல்களும்‌ சூழ்ந்து விளங்கும்‌ திருநறையூரில்‌ உள்ள நீர்நிலைகளில்‌ கயல்மீன்கள்‌ பாய்ந்து விளையாடுகின்றன. இங்கு கொடிகள்‌ கட்டிய மாடவீடுகள்‌ நிறைந்து இருக்கின்றன. இத்திருத்தலத்தில்‌ உள்ள சித்தீச்சரம்‌ என்ற கோவிலில்‌ சிவபெருமான்‌ எழுந்தருளியுள்ளார்‌. இவர்‌ சடையினை உடைய முடியினர்‌. ஒரு கலையோடு தோன்றும்‌ வெண்மையான மதியை அணிந்துள்ளார்‌. மூப்படையாத தம்‌ திருமேனியில்‌ திருநீற்றையும்‌ முப்புரி நூலையும்‌ அணிந்துள்ளார்‌. புலித்தோலை உடுத்தி உள்ளார்‌. இவரது முறுக்கப்பட்ட சடைகள்‌ தாழ்ந்து தொங்கும்படியாக இவர்‌ விளங்குகின்றார்‌.

பூசைக்கு உகந்த பொன்போன்ற கொன்றை, செருந்தி, புன்னை வளமான செண்பகம்‌ ஆகியன வானுற வளரும்‌ செல்வச்‌ செழிப்புள்ள தலம்‌ நறையூர்‌ ஆகும்‌. இங்கு சித்தீச்சரம்‌ கோவிலில்‌ சிவபெருமான்‌ விளங்குகின்றார்‌. இவர்‌, தனது பின்புறமாக தாழ்ந்து தொங்கும்‌ சடைமுடிமேல்‌ பிரகாசத்தை உடைய வெண்ணிறமுள்ள தலை மாலையை அணிந்தவர்‌. பிரமனது தலையோட்டைக்‌ கையில்‌ ஏந்தி இருப்பவர்‌. மின்னலையும்‌ மங்கச்‌ செய்யும்‌ ஒளி உருவினர்‌. அவர்‌ தனது வலது காதில்‌ சங்கினால்‌ ஆன குழை அணிந்தவர்‌.

திருநறையூரில்‌, உலகம்‌ முழுவதும்‌ பரவிய சிவபெருமானது புகழ்‌ மொழிகளைப்‌ பக்தர்களும்‌ சித்தர்களும்‌ பாடிக்‌ கொண்டும்‌ ஆடிக்‌ கொண்டும்‌ இருக்கின்றனர்‌. தேர்‌ ஓடுகின்ற வீதிகளில்‌ முழவின்‌ ஒலி, விழாக்களின்‌ ஒலியோடு பெருகி எண்திசையும்‌ பரவுகின்றது. இந்தப்‌ புகழ்‌ பொருந்திய அழகோடு கூடிய நறையூர்ச்‌ சித்தீச்சரத்தில்‌ சிவபெருமான்‌ உறைகின்றார்‌. இவர்‌, கங்கையை அணிந்த சடைமுடியினர்‌. கருநீலம்‌ கொண்ட கண்டத்தை உடையவர்‌. வேதங்கள்‌ உற்பவிக்கும்‌ நாவினர்‌.

ஒன்றோடு ஒன்று நெருங்கி நிற்கும்‌ மாடவீடுகளையும்‌, அழகிய சோலைகளையும்‌, மதியைத்‌ தொடுகின்றவாறு உயர்ந்து விளங்கும்‌ கோபுரங்களையும்‌ உடைய தலம்‌ திருநறையூர்‌. இங்குள்ள சித்தீச்சரத்தில்‌ எழுந்தருளியுள்ள சிவபெருமான்‌ நீண்ட சடைமுடியை உடையவராக விளங்குகின்றார்‌. சரமாகப்‌ பூத்த மணம்‌ நிறைந்த கொன்றை மலரால்‌ தொடுத்த மாலையை அணிந்துள்ளார்‌. பொன்‌ போன்று ஒளிரும்‌ திருமேனியைக்‌ கொண்டவர்‌. சிவந்த பவளம்‌ போன்ற எழில்‌ மிக்கவர்‌.

நறையூர்ச்‌ சித்தீச்சரத்து இறைவரான சிவபெருமான்‌ அழகு பொருந்திய நாகத்தைப்‌ புலித்தோல்‌ ஆடைமேல்‌ பொருந்தக்‌ கட்டி உள்ளார்‌. விடைமீது ஏறி, கழலும்‌, சிலம்பும்‌ கால்களில்‌ ஒலிக்க வருபவர்‌. மாதொரு பாகராதலின்‌ கூந்தலும்‌, சடையும்‌ உடைய திருமுடியினர்‌. கொக்கின்‌ இறகை அணிந்தவர்‌. அழகிய நிறம்‌ அமைந்த ஊமத்தம்‌ மலரைச்‌ சூடியவர்‌. தழல்‌ போலச்‌ சிவந்த திருமேனியில்‌ வெண்ணிறமான திருநீற்றை அணிந்தவர்‌. கோவண ஆடை அணிந்தவர்‌.

அலைகளோடு கூடிய நீர்‌ நிலைகளால்‌ சூழப்பட்ட செல்வ வளம்‌ மிக்க திருத்தலம்‌ நறையூர்‌ ஆகும்‌. இங்குள்ள சித்தீச்சரத்தில்‌ சிவபெருமான்‌ எழுந்தருளி உள்ளார்‌. கரைகளை வந்து பொருந்தும்‌ கடலால்‌ நாற்புரமும்‌ சூழ்ந்துள்ள இலங்கையின்‌ மன்னன்‌ இராவணன்‌. இவன்‌ கயிலை மலையை மலை போன்ற தன்‌ தோள்களால்‌ நகர்த்த முற்பட்டான்‌. சிவபெருமான்‌, அவனது தலைகளைத்‌ தன்‌ கால்விரலால்‌ நெரிக்க, தன்‌ பிழையை உணர்ந்தான்‌. அதன்பின்‌ மனம்‌ ஒன்றி சாமகானம்‌ இசைத்துப்‌ போற்றினான்‌. இறைவர்‌ அவனுக்கு இரங்கி அளவிட முடியாத நல்‌ அருளை வழங்கினார்‌.

திருமாலும்‌ பிரமனும்‌ தேடிக்‌ காண இயலாதவராக விளங்கிய சிவபெருமான்‌, தம்மை நினைப்பவர்‌ மனத்தில்‌ எளிதில்‌ விளங்கித்‌ தோன்றுகிறார்‌. அடியவரும்‌, அரிய புகழ்மிக்க வேதங்களும்‌, மேலுலகில்‌ வாழும்‌ தேவர்களும்‌, தம்‌ முடியால்‌ அவரை வணங்குகின்றனர்‌. அவரது குணங்களைப்‌ போற்றுகின்றனர்‌. ‘முதல்வா! அருள்‌’ என்று கூறி வழிபடுகின்றனர்‌. இவ்வாறு போற்றப்படும்‌ சிவபெருமான்‌, செந்நெல்‌ பயிர்கள்‌ புதர்களாகச்‌ செழித்துத்‌ திகழும்‌, திருநறையூர்ச்‌ சித்தீச்சரத்தில்‌ எழுந்தருளி உள்ளார்‌.

சமணர்கள்‌ நின்று கொண்டே உண்ணுகின்றனர்‌. நீண்ட போர்வையைப்‌ போர்த்த புத்தர்கள்‌ இருந்துகொண்டு உண்ணுகின்றனர்‌. அவர்கள்‌ ஒன்றும்‌ அறியாத ஊமர்கள்‌. அவர்கள்‌ கூறும்‌ சொற்களைக்‌ கேட்டு உழல்பவர்களே! பசுவின்‌ கன்று விரும்பிப்‌ பால்‌ குடிக்க, பசுவின்‌ ஏனைய முலைக்‌ காம்பில்‌ சுரந்த பால்‌ பாத்‌திரம்‌ நிரம்பி வெளியிலும்‌ பொழிகின்றது. மீண்டும்‌ அக்கன்று தன்‌ தாயிடம்‌ சென்று பாலுண்டு மகிழும்‌ வளமுடைய திருநறையூர்‌ சித்தீச்சரத்தில்‌ எழுந்தருளியுள்ள சிவபெருமானைத்‌ தொழுவீர்களாக.

குயில்கள்‌ அழகிய குருக்கத்தி மரங்களில்‌ வாழுகின்றன. குளிர்ச்சியான அழகிய சுரபுன்னைகளும்‌, வயல்களில்‌ நீரைச்‌ செலுத்தும்‌ பொய்கைகளும்‌ நிறைந்துள்ள திருத்தலம்‌ திருநறையூர்‌. இங்குள்ள சித்தீச்சரத்து இறைவரான சிவபெருமானை, மயில்கள்‌ வாழும்‌ சோலைகள்‌ சூழ்ந்த சீகாழிப்‌ பதியில்‌ தோன்றிய, ஞானசம்பந்தன்‌ போற்றிப்‌ பாடிய, பயில்வார்க்கு இனிமையாக இருக்கின்ற, இப்பதிகப்‌ பாடல்களைப்‌ பொருள்‌ உணர்ந்து ஓத வல்லவர்களின்‌ பாவங்கள்‌ அழிந்து போகுமே!