திருப்பழனம்

திருப்பழனத்து இறைவரான சிவபெருமான்‌ வேதங்களை உண்டாக்கியவர்‌. மார்பில்‌ வெண்மையான பூணூலை அணிந்து இருப்பவர்‌. வெண்மையான எருதின்மீது ஏறிப்‌ பூதகணங்கள்‌ புடைசூழப்‌ புலியின்‌ தோலை அணிந்து பொலிவு பெற வருபவர்‌. இப்பெருமானை முழுமுதற்பொருள்‌ (நாதனே) எனவும்‌, இரவலனே (நக்கனே) எனவும்‌, நம்பப்படத்தக்கவனே (நம்பனே) எனவும்‌, போற்றி நின்று திருவடிகளைத்‌ தொழுகின்ற அடியவர்களின்‌ பாவங்களைத்‌ தீர்த்து அருளுவார்‌.

தேனை உண்ட வண்டுகள்‌ பண்ணின்‌ இசைபோன்று ஒலி செய்யும்‌ அழகிய சோலைகள்‌ சூழ்ந்த தலம்‌ திருப்பழன நகராகும்‌. இந்நகரில்‌ இமவான்‌ மகளான பார்வதி தேவியோடு சிவபெருமான்‌ எழுந்தருளியுள்ளார்‌. இவர்‌ இயல்பாக உள்ள இரண்டு கண்களுக்கு மேலாக நெற்றியில்‌ மூன்றாவது ஒரு கண்ணையும்‌ உடையவர்‌. சடைமுடியின்மேல்‌ பிறையையும்‌ உடையவர்‌. காலனை உதைத்து, அவன்‌ உடலில்‌ தோன்றிய புண்களில்‌ இருந்து இரத்த வெள்ளம்‌ ஆறாக ஓடும்படி செய்தவர்‌. அவனை ஒரு பொருளாக மதியாது தோல்வி அடைந்து அழிய உதைத்த எந்தை பெருமானார்‌ இவர்‌ ஆவார்‌.

திருப்பழன நகர்‌ இறைவர்‌ சிவபெருமான்‌ ஆவார்‌. இவரை, அடியவர்கள்‌ உயர்ந்த நறுமண மலர்களால்‌ அருச்சித்துத்‌ துதிக்கின்றனர்‌. ஆடல்‌ பாடல்களைச்‌ செய்தும்‌, பறையும்‌ சங்கும்‌ ஆகிய வாத்தியங்களை முழக்கியும்‌, பணிந்தும்‌, இடைவிடாது வழிபடுகின்றனர்‌. இவ்விறைவர்‌ தன்‌ சடைமேல்‌ பிறையையும்‌, கங்கையையும்‌ சூடியிருக்கிறார்‌. பறையின்‌ வாய்‌ போன்ற வட்டமான விழிகளை உடைய, பேய்கள்‌ வாழும்‌ மயானத்தைத்‌ தமக்கு இடமாகக்‌ கொண்டிருக்கிறார்‌. இவர்‌ அனைத்து மக்கட்கும்‌ தலைவர்‌ ஆவார்‌.

திருப்பழன நகர்‌ இறைவர்‌ சிவபெருமான்‌ ஆவார்‌. இவர்‌, நள்ளிரவில்‌ வலிமையான உயர்ந்த வற்றிய மரக்கிளைகளில்‌ அமர்ந்து, ஆந்தை அலறும்‌ மயானத்தில்‌, பூதகணங்கள்‌ பாட நடனம்‌ ஆடுகின்றார்‌. அழகிய தாமரை மலர்மேல்‌ உறையும்‌ பிரமனது தலையோட்டில்‌ பலியேற்பதுமான திருவிளையாடல்களைப்‌ புரிகின்றார்‌. இப்பெருமான்‌ எம்மை ஆளும்‌ பரமர்‌ ஆவார்‌. அவர்‌ பகவன்‌, பரமேச்சுவரன்‌ போன்ற பெயர்களையும்‌ உடையவர்‌.

திருப்பழன நகரில்‌ தோகைகளை உடைய மயில்களும்‌ குயில்களும்‌ வாழுகின்றன. காவிரி ஆறு கடல்போல்‌ பரந்தும்‌ விரிந்தும்‌ இருக்கின்றது. இந்த ஆற்றின்‌ அலைகள்‌ மாங்கனிகளையும்‌, பலாவின்‌ கனிகளையும்‌ ஏந்திக்‌ குதித்து உந்தி வந்து கரையில்‌ சேர்க்கின்றன. இத்தகைய வளமான திருப்பழன நகரின்‌ இறைவர்‌ சிவபெருமான்‌ ஆவார்‌. இவர்‌, உயர்ந்த மலைவில்லால்‌ அசுரர்களின்‌ முப்புரங்களையும்‌ எரித்தவர்‌. பகைவரைக்‌ கொல்லும்‌ இடபத்தை வாகனமாக உடைய அண்ணலும்‌ இவரே ஆவார்‌.

ஈரத்‌ தன்மை உடைய ஆற்றுப்‌ படுகைகளில்‌, பசுமையான மட்டைகளோடுகூடிய தென்னை மரங்களின்‌ குலைகளில்‌ தேங்காய்கள்‌ விளைந்துள்ளன. வாழை மரத்தில்‌ பழுத்த வாழைப்‌ பழங்கள்‌ உள்ளன. பாளைகளை உடைய கமுகு மரங்களில்‌ இருந்து பழுத்த பாக்குப்‌ பழங்கள்‌ கீழே விழுகின்றன. இத்தகைய செழிப்பான சோலைகளால்‌ சூழப்பட்ட திருப்பழன நகரின்‌ இறைவர்‌ சிவபெருமான்‌ ஆவார்‌. இவர்‌, அழைக்கும்‌ சீழ்க்கை ஒலியும்‌, சங்கொலியும்‌, விளையாட்டின்‌ ஆரவாரங்களும்‌ ஓயாத ஊரகத்தே சென்று, மூளை பொருந்திய தலையோட்டில்‌ பலியேற்பவர்‌ ஆவார்‌. அடியவர்கள்‌ போற்றி வாழ்த்த முப்புரங்களையும்‌ அழித்தவர்‌ ஆவார்‌.

திருப்பழனத்து இறைவரான சிவபெருமானை பொய்‌ கூறாத உண்மை அடியவர்கள்‌ முறைப்படித்‌ துதித்துப்‌ புகழ்வார்கள்‌. இவர்‌ சிவந்த திருமேனி உடையவர்‌. கரிய கண்டத்தை உடையவர்‌. முப்புரிநூல்‌ அணிந்த மார்பை உடையவர்‌. கைகளைவீசி ஆடல்‌ புரிபவர்‌. கங்கை கூடிய சடைமுடிமீது பிறையையும்‌, படப்‌ பாம்பையும்‌ ஒரு சேர வைத்தவர்‌.

மணம்‌ கமழும்‌ புதிய தாமரை மலர்களையுடைய வயல்களால்‌ சூழப்பட்ட திருப்பழன நகரின்‌ இறைவர்‌ சிவபெருமான்‌ ஆவார்‌. ஆகாயம்‌ அளவு உயர்ந்த தோற்றம்‌ உடைய இராவணன்‌, தனது பயணத்திற்கு இடையூறாக இருந்த கயிலை மலையைப்‌ பெயர்த்த போது, இவர்‌ அவனுடைய இருபது தோள்களும்‌ நெரியுமாறு தனது கால்விரலை ஊன்றியவர்‌ ஆவார்‌. சுடலையில்‌ எரிந்த நச்சுத்‌ தன்மை பொருந்திய சாம்பலை அணிந்த சிவபெருமான்‌ இவரே ஆவார்‌.

திருப்பழன நகர்‌ இறைவர்‌ சிவபெருமான்‌ ஆவார்‌. இவர்‌ மணம்‌ கமழ்வதும்‌, வண்டுகள்‌ மொய்ப்பதுமான கொன்றை மாலையை மணம்‌ கமழும்‌ சிவந்த சடைமுடியில்‌ அணிந்திருக்கின்றார்‌. விண்ணை முடிவாகக்‌ கொண்ட இவ்வுலகம்‌ முழுவதையும்‌ மூவடியில்‌ அளந்த திருமாலும்‌, நீண்ட தண்டின்‌ மேல்‌ வளர்ந்த தாமரை மலர்‌ மேல்‌ விளங்கும்‌ நான்முகனும்‌ தேடிக்‌ காண முடியாத தன்மையை உடையவர்‌ சிவபெருமான்‌ ஆவார்‌. திருநீற்றுப்பொடி அணிந்த மார்பினை உடையவர்‌.

வளமையான தாமரை மலர்மேல்‌ சொரியும்‌ தேனை வண்டுகள்‌ வாயால்‌ மிகுதியாக உண்ணுகின்றன. அவை பண்பொருந்த யாழ்‌ஒலி போன்று ஓசை எழுப்புகின்றன.. இத்தகைய வளமான கழனிகளை உடைய திருப்பழன நகரில்‌ சிவபெருமான்‌ எழுந்தருளி உள்ளார்‌. சமணர்கள்‌, தங்களின்‌ கண்களைக்கூடக்‌ கழுவாமல்‌, முந்திச்‌ சென்று, கலவைக்‌ கஞ்சியை உண்பவர்கள்‌. இவர்கள்‌ உரைக்கும்‌ சிறுசொல்லைக்‌ கேட்காத சான்றோர்கள்‌ இங்குள்ள சிவபெருமானைப்‌ பாராட்டிப்‌ போற்றி வழிபடுகின்றனர்‌.

வேணுபுர நகரில்‌ மூங்கில்‌ மரங்கள்‌ ஓங்கி வளர்ந்து முத்துக்களை ஈன்று மணம்‌ பரப்புகின்றன. இந்நகரில்‌ உள்ளவர்‌ ஞானசம்பந்தன்‌. வல்ல திறன்மிக்க நாவினர்‌. இவர்‌ தன்‌ வாயால்‌, பேசுவதற்கு இனிமையான பாடல்களால்‌, திருப்பழனப்‌ பெருமான்மீது இப்பதிகத்தைப்‌ பாடினார்‌. பாமாலையாகிய இப்பதிகப்‌ பத்துப்பாட்டையும்‌ இசையுடன்‌ பாடவல்லவர்கள்‌ நல்லவர்‌ ஆவார்கள்‌.