1
பங்கமேறு மதிசேர்சடையார் விடையார் பலவேதம்அங்கமாறும் மறைநான்கவையு மானார் மீனாரும்வங்கமேவு கடல்வாழ்பரதர் மனைக்கே நுனைமூக்கின்சங்கமேறி முத்தமீனுஞ் சண்பை நகராரே.
சொற்பிரிப்பு
பங்கம் ஏறு மதி சேர் சடையார், விடையார், பலவேதம்அங்கம் ஆறும் மறை நான்கு அவையும் ஆனார் மீன் ஆரும்வங்கம் மேவு கடல் வாழ் பரதர் மனைக்கே நுனை மூக்கின்சங்கம் ஏறி முத்தம் ஈனும் சண்பை நகராரே.
உரை
கடற்கரை ஊராகிய சண்பை நகரில் சிவபெருமான் எழுந்தருளியுள்ளார். இவர் கலைகுறைந்த பிறைமதி சேர்ந்த சடையையும், விடை ஊர்தியை உடையவராகவும் விளங்குகின்றார். அவரே பலவாக விரிந்த நான்கு வேதங்களாகவும் ஆறு அங்கங்களாகவும் விளங்குபவர். இங்கு, மீன்களும் தோணிகளும் நிறைந்த கடலருகே பரதவர்கள் வாழுகின்றனர். அவர்களின் வீட்டு முற்றங்களில் கூரிய மூக்கினை உடைய சங்குகள் முத்துக்களை ஈனும்.