காவிரிப்பூம்பட்டினத்துப்பல்லவனீச்சரம்

காவிரிப்‌ பூம்பட்டினத்தைச்‌ சேர்ந்த திருப்பல்லவனீச்சரம்‌ என்னும்‌ தலம்‌, வானவெளியைத்‌ தொடும்‌ மதில்களால்‌ சூழப்பட்டுள்ளது. இங்கு, வாயில்களோடு கூடிய உயர்ந்த மாடவீடுகள்‌ எங்கும்‌ உள்ளன. இத்தலத்தில்‌ சிவபெருமான்‌ எழுந்தருளியுள்ளார்‌. இப்பெருமான்‌, பகைவர்களாகிய அசுரர்களின்‌ மூன்று நகரங்களையும்‌ பெருந்தீயில்‌ அழுந்தி அழிக்க இடப வாகனத்தில்‌ ஏறிவரும்‌ திருமேனியராய்ச்‌ சென்று சினந்த வித்தகர்‌ ஆவார்‌.

எம்‌ தந்தையாகிய சிவபெருமான்‌, பகைவர்களாகிய அசுரர்களின்‌ திரிபுரங்களையும்‌ சினந்து அழித்தவர்‌ ஆவார்‌. இவர்‌ தேவர்களுக்குக்‌ கண்களாக விளங்குபவர்‌. இவ்வுலகைக்‌ காக்கின்ற சிவபெருமான்‌, விரும்பி அமர்ந்திருக்கின்ற தலம்‌ காவிரிப்‌ பூம்பட்டினத்துப்‌ பல்லவனீச்சரம்‌ ஆகும்‌. இத்தலத்தில்‌ நன்கு அமைக்கப்பட்ட சோலைகள்‌ உண்டு. இந்தச்‌ சோலைகளில்‌ நாள்தோறும்‌ அழகிய வண்டுகள்‌ தேனை உண்டு இசைபாடுகின்றன.

பள்ளங்கள்‌ நிறைந்த ஆழமான கடலின்‌ வெள்ள நீரால்‌, அண்மையில்‌ உள்ள நீர்நிலைகளில்‌ உள்ள தண்ணீர்‌ மட்டம்‌ உயர்ந்துள்ளன. அந்த நீர்‌ நிலைகளில்‌ தாமரை மலர்கள்‌ பூத்துக்‌ குலுங்குகின்றன. இத்தகைய செழிப்பான தலம்‌ காவிரிப்‌ பூம்பட்டினத்துப்‌ பல்லவனீச்சரம்‌ ஆகும்‌. இந்தத்‌ தலத்தில்‌ எழுந்தருளியுள்ள சிவபெருமான்‌ உமையம்மையை ஒருபாகமாகக்‌ கொண்டுள்ளார்‌. ஒளிபொருந்திய பிறையைத்‌ தன்‌ சடையில்‌ சூடியிருக்கின்றார்‌. கங்கை நதி என்ற நங்கையையும்‌ தன்‌ சடையின்மேல்‌ வாழ வைத்துள்ள கள்வர்‌ இவர்‌.

மாலையாகவே பூக்கும்‌ கொன்றை மலர்கள்‌ பொன்‌ போல்‌ விளங்குமாறு சிவபெருமான்‌ தன்‌ திருமார்பில்‌ சூடியுள்ளார்‌. திருமார்பின்‌ பரப்பில்‌ நீரில்‌ குழைத்த சாம்பலை சந்தனத்தைப்‌ போல பூசியுள்ளார்‌. இந்தக்‌ குற்றமற்ற சிவபெருமான்‌ எழுந்தருளிய இடம்‌ காவிரிப்‌ பூம்பட்டினத்துப்‌ பல்லவனீச்சரம்‌. இங்கு போரில்‌ பொருந்திய கூரிய வேல்‌ போன்ற கண்களை உடைய மாதர்களும்‌ இளைஞர்களும்‌ சேர்ந்து இசை பாடுகின்றனர்‌. அதனைக்‌ கேட்க மக்கள்‌ வெள்ளம்‌ போல்‌ திரண்டுள்ள தலமாகும்‌.

கருமை நிறம்‌ பொருந்திய கண்டத்தை உடையவர்‌. மண்ணின்‌ மக்களும்‌ விண்ணின்‌ தேவர்களும்‌ துதிக்கத்‌ தக்கவர்‌. மேனிமிசைத்‌ திருநீறு பூசிய நிமலன்‌. அடியார்கள்‌ புகழ விரும்பி எழுந்தருளிய இடம்‌ காவிரிப்‌ பூம்பட்டினத்துப்‌ பல்லவனீச்சரம்‌ ஆகும்‌. பாம்பின்‌ படம்போன்ற அல்குலை உடைய இளமகளிர்‌ கைகளில்‌ நிறைய வளையல்களை அணிந்து ஆசையோடும்‌ காதலோடும்‌ சிவபெருமானின்‌ திருவடிகளைச்‌ சேர இங்கு வந்து கூடுகிறார்கள்‌.

குழலோசைக்கு ஏற்ப வீணை ஒலிக்கின்றது. மொந்தை கொட்டுகிறது. முழவு ஒலிக்கிறது. காலில்‌ அணிந்துள்ள வீரக்கழல்‌, நடனத்துக்கு ஏற்பச்‌ சதங்கை போல்‌ இசைக்கிறது. இத்தகைய இசை ஒலிகளோடு ஆடும்‌ கடவுளாகிய சிவபெருமான்‌ எழுந்தருளிய இடம்‌ புகார்‌ நகரில்‌ உள்ள பல்லவனீச்சரம்‌ ஆகும்‌. இங்கு சுழிகள்‌ நிறைந்த கடலில்‌, காவிரி ஆற்றின்‌ வெள்ள நீர்‌ தெளிந்த நீரை முகர்ந்து எறிகின்றது. இந்நகரில்‌ பழியற்ற நன்மக்கள்‌ வாழ்கின்றனர்‌.

தகுதியில்லாத கூட்டத்தை உடைய தக்கன்‌ என்னும்‌ வேந்தன்‌ செய்த வேள்வியை அழித்தவர்‌. அதன்பின்‌ தேவர்கள்‌ எல்லோரும்‌ தன்னை விரும்பி வழிபட நின்ற பெருவீரனாகிய சிவபெருமானது இடம்‌ காவிரிப்‌ பூம்பட்டினத்துப்‌ பல்லவனீச்சரம்‌ ஆகும்‌. இங்கு மென்மையான மல்லிகைக்‌ கொடி, வளர்ந்து பரவியுள்ள புன்னை, குராமரம்‌ ஆகியவற்றின்மீது படர்ந்துள்ளது.

பொருள்‌: சிறந்த தேரை உடைய இராவணன்‌ பெருமை மிக்க கயிலை மலையைக்‌ கைகளைப்‌ பின்னி அகழ்ந்து எடுக்க முயன்றான்‌. அவனது மாலைகள்‌ அழுத்தும்‌ வலிமையான பத்துத்‌ தலைகளையும்‌ தனது கால்‌ விரலால்‌ ஊன்றி நெரித்தவர்‌ சங்கரன்‌ என்று சொல்லப்படும்‌ சிவபெருமான்‌. இவரது ஊர்‌ புகார்‌ நகரைச்‌ சேர்ந்த பல்லவனீச்சரம்‌ ஆகும்‌. இங்கு மேகங்கள்‌ வந்து அழுந்துவதால்‌, மேலெழுந்து வரும்‌ கடல்நீரால்‌ எக்காலத்திலும்‌ அழியாது உணரப்படும்‌ சிறப்புடையது இந்தத்தலம். மக்கள்‌ அக்கு மணி மாலை பூண்டு போற்றி வாழும்‌ பெருமையை உடையது இந்தத்தலம்.

ஆறு அங்கங்களையும்‌, நான்கு வேதங்களையும்‌ முறையே ஓதும்‌ பிரமனும்‌ திருமாலும்‌ தம்‌ கண்களால்‌ தேடுமாறு உயர்ந்து நின்றவர்‌ சங்கரன்‌ என்று சொல்லப்படும்‌ சிவபெருமான்‌. இவர்‌ தங்கும்‌ இடம்‌ புகாரில்‌ அமைந்துள்ள பல்லவனீச்சரம்‌ ஆகும்‌. இங்கு மரக்கலங்கள்‌ வந்து போய்க்‌ கொண்டிருக்கும்‌ கடலானது முத்துக்களையும்‌ சங்குகளையும்‌ அலைகளால்‌ அலைத்துத்‌ தருகின்றது. இங்கு குற்றமற்ற சான்றோர்கள்‌ வாழ்கின்றனர்‌.

சமணர்கள்‌ அளவுக்குமீறி உண்டு ஆடையின்றி ஊரார்‌ சிரிக்கத்‌ திரிகின்றனர்‌. புத்தர்கள்‌ அவர்களைக்‌ கண்டு தாமும்‌ அவ்வாறு திரியாது ஆடையை உடலில்‌ போர்த்துக்‌ கொண்டு உழலுகின்றனர்‌. இவர்கள்‌ கண்டு அறியாத இடம்‌ பல்லவனீச்சரம்‌ ஆகும்‌. இங்கு தண்டு, உடுக்கை, தாளம்‌, தக்கை போன்ற வாத்தியங்கள்‌ முழங்க நடனம்‌ புரிபவர்‌ சிவபெருமான்‌. இவர்‌ அடியவர்களின்‌ துன்பங்களைப்‌ பண்டு முதல்‌ தீர்த்து அருளுபவர்‌.

பக்தர்கள்‌ போற்றும்‌ காவிரிப்‌ பூம்பட்டினத்துப்‌ பல்லவனீச்சரத்தில்‌ எம்‌ தலைவனாகிய சிவபெருமான்‌ விளங்குகின்றார்‌. இப்பெருமானை, அழகிய சீகாழிப்‌ பதியில்‌ தோன்றிய ஞானசம்பந்தன்‌ போற்றி இப்பதிகத்தைப்‌ பாடினார்‌. இப்பதிகத்தை மனம்‌ ஒன்றிச்‌ சொல்லும்‌ மக்கள்‌, தீவினையும்‌, நோயும்‌ இல்லாதவராய்‌, அமைந்த ஒப்புடையவர்கள்‌ ஆவார்கள்‌. இவர்கள்‌ தேவர்‌ உலகில்‌ உயர்வோடு ஓங்கி வாழ்வர்‌.