திருப்பூவணம்

அருளியவர்: திருஞானசம்பந்தர்
பண்: தக்கேசி
தலம்: பூவணம்
நாடு: பாண்டியநாடு

1

அறையார்புனலு மாமலரும் ஆடர வார்சடைமேல்குறையார்மதியஞ் சூடிமாதோர் கூறுடை யானிடமாம்முறையால்1 முடிசேர் தென்னர்சேரர் சோழர்கள் தாம்வணங்கும்திறையாரொளிசேர் செம்மையோங்குந் தென்திருப் பூவணமே.பாடம் : 1முறையார்

சொற்பிரிப்பு

அறை ஆர் புனலும் மா மலரும் ஆடு அரவு ஆர் சடைமேல்குறை ஆர் மதியும் சூடி, மாது ஓர் கூறு உடையான் இடம் ஆம்முறையால் முடி சேர் தென்னர் சேரர் சோழர்கள் தாம் வணங்கும்,திறை ஆர் ஒளி சேர், செம்மை ஓங்கும், தென் திருப்பூவணமே.

உரை

சிவபெருமான்‌ தன்‌ சடைமீது, ஆரவாரித்து வரும்‌ கங்கை, ஆத்திமலர்‌, ஆடும்‌ பாம்பு, ஒருகலையாகக் குறைந்த பிறைமதி ஆகியவைகளைச்‌ சூடியிருக்கிறார்‌. உமையம்மையை ஒரு பாகமாகக்‌ கொண்டிருக்கிறார்‌. இவர்‌ எழுந்தருளிய தலம்‌ திருப்பூவணம்‌ ஆகும்‌. இது வைகை ஆற்றின்‌ அலைகளும்‌, வயல்‌ வளமும்‌, புகழும்‌ உடைய தலமாகும்‌. திருப்பூவணமானது, நீதி தவறாமல்‌ முடிசூடி ஆ ளுகின்ற வேந்தர்களான பாண்டியர்‌, சேரர்‌, சோழர்‌ ஆகிய மூவேந்தர்களும்‌ வணங்கும் தலமாகும்‌. சூடிய உமையொரு பாகன்‌ இடம்‌ பூவணம்‌ என்கின்றது.

2

மருவார்மதில்மூன் றொன்றஎய்து மாமலை யான்மடந்தைஒருபால்பாக மாகச்செய்த வும்பர் பிரானவனூர்கருவார்சாலி யாலைமல்கிக் கழல்மன்னர் காத்தளித்ததிருவால்மலிந்த சேடர்வாழுந் தென்திருப் பூவணமே.

சொற்பிரிப்பு

மருவார் மதில் மூன்று ஒன்ற எய்து, மாமலையான் மடந்தைஒருபால் பாகம் ஆகச் செய்த உம்பர்பிரான் அவன் ஊர்கரு ஆர் சாலி ஆலை மல்கி, கழல் மன்னர் காத்து அளித்ததிருவால் மலிந்த சேடர் வாழும் தென்திருப்பூவணமே.

உரை

சிவபெருமான்‌, பகைவர்களாகிய திரிபுர அசுரர்களின்‌ மூன்று மதில்களையும்‌, ஒருசேர எய்து அழித்தவர்‌. மலையரசன்‌ மகளாகிய பார்வதி தேவியை தனது உடம்பின்‌ ஒரு பக்கத்தில்‌ பாகமாகக்‌ கொண்டுள்ளவர்‌. தேவர்களின்‌ தலைவராக விளங்குபவர்‌. இவரது ஊர்‌ . திருப்பூவணம்‌. இப்பூவண நகரில்‌ கதிர்கள்‌ நிறைந்த நெல்‌ பயிர்களும்‌, கரும்புச்‌ சோலைகளும்‌ நிறைந்திருக்கின்றன. வீரக்கழல்‌ அணிந்த மன்னர்கள்‌ காப்பாற்றிக்‌ கொடுத்த செல்வ வளத்தால்‌, இத்தலத்தில்‌ சிறந்த மேலோர்கள்‌ வாழ்கின்றனர்‌.

3

போரார்மதமா உரிவைபோர்த்துப் பொடியணி மேனியனாய்க்காரார் கடலின் நஞ்சமுண்ட கண்ணுதல் விண்ணவனூர்பாரார் வைகைப் புனல்வாய்பரப்பிப் பன்மணி பொன்கொழித்துச்சீரார்வாரி சேரநின்ற தென்திருப் பூவணமே.

சொற்பிரிப்பு

போர் ஆர் மதமா உரிவை போர்த்து, பொடி அணி மேனியனாய்,கார் ஆர் கடலில் நஞ்சம் உண்ட கண்ணுதல், விண்ணவன், ஊர்பார் ஆர் வைகைப் புனல் வாய் பரப்பி, பல்மணி பொன் கொழித்து,சீர் ஆர் வாரி சேர நின்ற தென்திருப்பூவணமே.

உரை

போர்‌ பயிற்சியுடைய மதம்‌ பொருந்திய யானையைக்‌ கொன்று அதன்‌ தோலைப்‌ போர்த்து இருப்பவர்‌ சிவபெருமான்‌. திருநீற்றுப்‌ பொடி அணிந்த மேனியை உடையவர்‌. கருநிறம்‌ பொருந்திய கடலில்‌ தோன்றிய நஞ்சினை உண்டவர்‌. நெற்றிக்கண்ணை உடையவர்‌. இவரது ஊர்‌ திருப்பூவணமாகும்‌. இத்தலத்தில்‌ நிலவுலகை வளம்‌ செய்வதற்கு வந்த வைகை ஆறு வாய்க்கால்‌ வழியே பரவுகிறது. இந்த வைகை நதியின்‌ நீரோடு வந்த பலவகை மணிகளும்‌, பொன்னும்‌ பூவணத்தின்‌ செல்வ வளத்தை அதிகரிக்கச்‌ செய்கின்றன.

4

கடியாரலங்கற் கொன்றைசூடிக் காதிலொர் வார்குழையன்கொடியார்வெள்ளை யேறுகந்த கோவண வன்னிடமாம்படியார்கூடி நீடியோங்கும் பல்புக ழாற்பரவச்செடியார்வைகை சூழநின்ற தென்திருப் பூவணமே.

சொற்பிரிப்பு

கடி ஆர் அலங்கல் கொன்றை சூடி, காதில் ஓர் வார்குழையன்,கொடி ஆர் வெள்ளை ஏறு உகந்த கோவணவன், இடம் ஆம்படியார் கூடி, நீடி ஓங்கும் பல்புகழால் பரவ,செடி ஆர் வைகை சூழ நின்ற தென்திருப்பூவணமே.

உரை

சிவபெருமான்‌ மணம்‌ பொருந்திய கொன்றை மலர்‌ மாலையைச்‌ சூடியிருக்கின்றார்‌. ஒரு காதில்‌ நீண்ட குழையை அணிந்திருக்கிறார்‌. வெண்மையான இடபக்‌ கொடியை ஏந்தியிருக்கிறார்‌. கோவணத்தை அணிந்துள்ளார்‌. இவர்‌ எழுந்தருளிய இடம்‌ திருப்பூவணமாகும்‌. இது புதர்கள்‌ நிறைந்த வைகை ஆறு சூழ்ந்துள்ள தலம்‌. இத்தலத்தில்‌ நிலவுலக மக்கள்‌ ஒன்றுகூடி, நீண்டு விரிந்த சிவபெருமானின்‌ புகழைப்‌ போற்றி வணங்குகின்றனர்‌.

5

கூரார்வாளி சிலையிற்கோத்துக் கொடிமதில் கூட்டழித்தபோரார்வில்லி மெல்லியலாளோர் பால்மகிழ்ந் தானிடமாம்ஆராவன்பில் தென்னர்சேரர் சோழர்கள் போற்றிசைப்பத்தேரார்வீதி மாடநீடுந் தென்திருப் பூவணமே.

சொற்பிரிப்பு

கூர் ஆர் வாளி சிலையில் கோத்துக் கொடி மதில் கூட்டு அழித்தபார் ஆர் வில்லி, மெல்லியலாள் ஓர் பால் மகிழ்ந்தான், இடம் ஆம்ஆரா அன்பில் தென்னர் சேரர் சோழர்கள் போற்று இசைப்ப,தேர் ஆர் வீதி மாடம் நீடும் தென் திருப்பூவணமே.

உரை

சிவபெருமான்‌, கூர்மை பொருந்திய அம்பை வில்லில்‌ பூட்டி கொடிகள்‌ கட்டிப்‌ பறந்த மும்மதில்களின்‌ கூட்டுக்களையும்‌ ஒருசேர அழித்தார்‌. அவர்‌ போரில்‌ வல்ல வில்‌ வீரர்‌. உமையம்மையை ஒரு பாகமாகக்‌ கொண்டு மகிழ்பவர்‌. இவர்‌ எழுந்தருளிய இடம்‌ திருப்பூவணமாகும்‌. இது தேர்‌ ஓடும்‌ வீதியையும்‌, மாடவீடுகளையும்‌ கொண்ட தலம்‌. இந்த அழகிய திருப்பூவணத்‌ தலத்தை பாண்டியர்‌, சேரர்‌, சோழர்‌ ஆகிய மூவேந்தர்கள்‌ குன்றாத அன்போடு போற்றுகின்றனர்‌.

6

நன்றுதீதென் றொன்றிலாத நான்மறை யோன்கழலேசென்றுபேணி யேத்தநின்ற தேவர் பிரானிடமாம்குன்றிலொன்றி ஓங்கமல்கு குளிர்பொழில் சூழ்மலர்மேல்தென்றலொன்றி முன்றிலாருந் தென்திருப் பூவணமே.

சொற்பிரிப்பு

நன்று தீது என்று ஒன்று இலாத நால்மறையோன், கழலேசென்று பேணி ஏத்த நின்ற தேவர்பிரான், இடம் ஆம்குன்றில் ஒன்றி ஓங்க மல்கு குளிர் பொழில் சூழ் மலர்மேல்தென்றல் ஒன்றி முன்றில் ஆரும் தென் திருப்பூவணமே.

உரை

சிவபெருமான்‌ நன்மை தீமை என்பவற்றுள்‌ ஒன்றும்‌ இல்லாதவன்‌. நான்கு வேதங்களையும்‌ அருளியவன்‌. தேவர்களின்‌ தலைவன்‌. இப்பிரான்‌, தன்‌ திருவடிகளை அடைந்த அன்பர்கள்‌ போற்றி அருள்பெறுமாறு நின்ற இடம்‌ திருப்பூவணமாகும்‌. பொதிகை மலையில்‌ உற்பத்தியான தென்றல்‌ காற்று, அங்குள்ள மலைகளில்‌ பொருந்தி பூக்கள்‌ நிறைந்த குளிர்ச்சியான ஓங்கிய மரங்களில்‌ படர்ந்து, அதன்‌ மணத்தையும்‌ தன்னகத்தே கொண்டு, கீழ்த்திசையை நோக்கி வந்து, மிக்க அழகு வாய்க்கப்‌ பெற்ற திருப்பூவணத்தில்‌ உள்ள மாளிகைகளில்‌ முன்வாசலில்‌ அடிக்கப்பட்டு அங்குள்ளோரை மகிழ்விக்கின்றது.

7

பைவாயரவம் அரையிற்சாத்திப் பாரிடம் போற்றிசைப்பமெய்வாய்மேனி நீறுபூசி ஏறுகந் தானிடமாம்கைவாழ்வளையார்2 மைந்தரோடுங் கலவியி னால்நெருங்கிச்செய்வார்தொழிலின் பாடலோவாத் தென்திருப் பூவணமே.பாடம் : 2கைவாழ்வினையார்

சொற்பிரிப்பு

பைவாய் அரவம் அரையில் சாத்தி, பாரிடம் போற்று இசைப்ப,மெய் வாய் மேனி நீறு பூசி, ஏறு உகந்தான் இடம் ஆம்கை வாழ் வளையார் மைந்தரோடும் கலவியினால் நெருங்கிச்செய்வார் தொழிலின் பாடல் ஓவாத் தென் திருப்பூவணமே.

உரை

சிவபெருமான்‌ படம்‌ பொருந்திய வாயினை உடைய பாம்பை இடையில்‌ கட்டியிருப்பவர்‌. பூதகணங்கள்‌ போற்றிப்‌ பாட ஆடுபவர்‌. மேனிமுழுவதும்‌ மெய்மை வடிவான திருநீற்றைப்‌ பூசியிருப்பவர்‌. விடையேற்றில்‌ ஊர்ந்து வருபவர்‌. .இவரது இடம்‌ திருப்பூவணமாகும்‌. இந்த அழகிய திருப்பூவணத்‌ தலத்தில்‌ கைகளில்‌ வளையல்களை அணிந்துள்ள இளமகளிர்‌ தம்‌ காதலர்களோடு புணர்ச்சி விருப்பமுடையவராய்‌ நெருங்கிச்‌ செய்யப்படும்‌ கலவி பற்றிய பாடல்கள்‌ நீங்காது ஒலித்துக்‌ கொண்டு இருக்கும்‌.

8

மாடவீதி மன்னிலங்கை மன்னனை மாண்பழித்துக்கூடவென்றி வாள்கொடுத்தாள் கொள்கையி னார்க்கிடமாம்பாடலோடும் ஆடலோங்கிப் பன்மணி பொன்கொழித்துஓடநீரால் வைகைசூழும் உயர்திருப் பூவணமே.

சொற்பிரிப்பு

மாட வீதி மன் இலங்கை மன்னனை மாண்பு அழித்து,கூட வென்றிவாள் கொடுத்து ஆள் கொள்கையினார்க்கு இடம் ஆம்பாடலோடும் ஆடல் ஓங்கி, பல்மணி பொன் கொழித்து,ஓடி நீரால் வைகை சூழும் உயர் திருப்பூவணமே.

உரை

இராவணன்‌ மாடவீதிகள்‌ நிலைபெற்ற இலங்கையின்‌ மன்னன்‌. அவன்‌ பெருவீரன்‌ என்ற புகழை சிவபெருமான்‌ அழித்தார்‌. அவன்‌, தன்‌ பிழையை உணர்ந்து பாடியபோது, வெற்றி நல்கும்‌ வாளைக்‌ கொடுத்து ஆண்டு கொண்டார்‌. இத்தகைய அருட்கொள்கையாளன்‌ சிவபெருமானாவார்‌. இவரது இடம்‌ திருப்பூவணமாகும்‌. ஆடல்‌ பாடல்களால்‌ மிக்க சிறப்புடைய தலம்‌ இது. பல்வகை மணிகளையும்‌, பொன்னையும்‌ செழிப்பாகக்‌ கொடுத்து, ஓடிவரும்‌ வைகை ஆற்று நீரால்‌ சூழப்பெற்ற உயர்ந்த தலம்‌ திருப்பூவணமாகும்‌.

9

பொய்யாவேத நாவினானும் பூமகள் காதலனும்கையால்தொழுது கழல்கள்போற்றக் கனலெரி யானவனூர்மையார்பொழிலின் வண்டுபாட வைகை மணிகொழித்துச்செய்யார்கமலம் தேன்அரும்புந் தென்திருப் பூவணமே.

சொற்பிரிப்பு

பொய்யா வேத நாவினானும், பூமகள் காதலனும்,கையால் தொழுது கழல்கள் போற்ற, கனல் எரி ஆனவன் ஊர்மை ஆர் பொழிலின் வண்டு பாட, வைகை மணி கொழித்து,செய் ஆர் கமலம் தேன் அரும்பும் தென்திருப்பூவணமே.

உரை

என்றும்‌ பொய்யாகாத வேதங்களை ஓதும்‌ நாவினன்‌ நான்முகன்‌ ஆவான்‌. திருமால்‌ மலர்மகளின்‌ கணவன்‌. இவ்விருவரும்‌ தங்கள்‌ கைகளினால்‌ இவன்‌ திருவடிகளைத்‌ தொழுது போற்ற, சிவந்த எரி உருவாகத்‌ தோன்றிய அவனது ஊர்‌ திருப்பூவணமாகும்‌. இந்த அழகிய திருப்பூவணத்‌ தலத்தில்‌ இருள்‌ செறிந்த சோலைகளில்‌ வண்டுகள்‌ பாடுகின்றன. அதன்‌ பயனாய்‌ சிவந்த தாமரை மலர்களில்‌ தேன்‌ துளிர்கின்றது. வைகை. ஆறு மணி கொழித்து வளம்‌ சேர்க்கிறது.

10

அலையார்புனலை நீத்தவருந் தேரரும் அன்புசெய்யாநிலையாவண்ணம் மாயம்வைத்த நின்மலன் தன்னிடமாம்மலைபோல்துன்னி வென்றியோங்கும் மாளிகை சூழ்ந்தயலேசிலையார்புரிசை பரிசுபண்ணுந் தென்திருப் பூவணமே.

சொற்பிரிப்பு

அலை ஆர் புனலை நீத்தவரும், தேரரும், அன்பு செய்யாநிலையா வண்ணம் மாயம் வைத்த நின்மலன் தன் இடம் ஆம்மலை போல் துன்னி வென்றி ஓங்கும் மாளிகை சூழ்ந்து, அயலேசிலை ஆர் புரிசை பரிசு பண்ணும் தென்திருப்பூவணமே.

உரை

அலைகள்‌ வீசும்‌ நீரில்‌ நீராடாது, சமணர்கள்‌ அதனைத்‌ துறந்தனர்‌. இந்தச்‌ சமணரும்‌, புத்தரும்‌ புண்ணியப்‌ பேறு இல்லாதவர்கள்‌. ஆதலால்‌ அன்பு செய்து வழிபாட்டில்‌ நிலைத்திராது இருக்கின்றனர்‌. அவர்களுக்கு அப்படிப்பட்ட மாயத்தை வைத்தவர்‌ சிவபெருமான்‌. இந்தக்‌ குற்றமற்ற சிவபெருமான்‌ எழுந்தருளிய இடம்‌ திருப்பூவணம்‌. இந்த அழகிய திருப்பூவணத்தில்‌ வெற்றிமிக்க மாளிகைகள்‌ மலைபோல்‌ நெருங்கி அமைந்திருக்கின்றன. அவற்றைச்‌ சுற்றி கருங்கல்லால்‌ அமைந்த மதில்கள்‌ அழகு செய்கின்றன.

11

திண்ணார்புரிசை மாடமோங்குந் தென்திருப் பூவணத்துப்பெண்ணார்மேனி யெம்மிறையைப் பேரியல் இன்தமிழால்நண்ணாருட்கக் காழிமல்கு ஞானசம் பந்தன்சொன்னபண்ணார்பாடல் பத்தும்வல்லார் பயில்வது வானிடையே.

சொற்பிரிப்பு

திண் ஆர் புரிசை மாடம் ஓங்கும் தென்திருப்பூவணத்துப்பெண் ஆர் மேனி எம் இறையை, பேர் இயல் இன்தமிழால்,நண்ணார் உட்கக் காழி மல்கும் ஞானசம்பந்தன் சொன்னபண் ஆர் பாடல் பத்தும் வல்லார் பயில்வது வான் இடையே.

உரை

வலிமை பொருந்திய மதில்களும்‌ மாடவீடுகளும்‌ நிறைந்த அழகிய தலம்‌ திருப்பூவணம்‌. இங்கு, எம்‌ இறைவனான சிவபெருமான்‌ பெண்ணொரு பாகனாக விளங்குகின்றார்‌. இந்தச்‌ சிவபெருமானைப்‌ பெருமை பொருந்திய இனிய தமிழால்‌, புறச்சமயத்தார்‌ அஞ்சுமாறு விளங்கும்‌ சீகாழிப்பதியில்‌ தோன்றிய ' ஞானசம்பந்தன்‌ பாடினார்‌. இந்த இசைத்தமிழ்ப்‌ பாடல்கள்‌ பத்தையும்‌ பண்ணோடு ஓதவல்லவர்கள்‌ வானுலகில்‌ வாழ்வர்‌.