திருப்பிரமபுரம்

பெரியவனாகிய பிரமன்‌ நான்கு திருமுகத்தை உடையவன்‌. வேதகீதங்களை உச்சரிப்புத்‌ தவறாதவாறு பாடுபவன்‌. தாமரை மலர்‌ மேல்‌ விளங்குபவன்‌. இந்தப்‌ பிரமன்‌ விரும்பி, வழிபட்டு ஆட்சிபுரிந்த பிரமபுரத்தில்‌ விளங்கும்‌ சிவபெருமானே! எரியும்‌ மழு ஆயுதத்தைக்‌ கையில்‌ ஏந்தியிருக்கின்றீர்‌. அழகிய மற்றொரு கையில்‌ பிரமனது ஐந்து தலைகளில்‌ ஒன்றைக்‌ கொய்து அந்த மண்டை ஓட்டையே உண்கலனாகக்‌ கொண்டு வீதிகள்தோறும்‌ பலிஏற்பதுபோல்‌ வந்து வரிகளை உடைய வளையல்களை அணிந்த (முனி பத்தினி) மகளிரிடம்‌ பிச்சை வாங்காது, அவர்களின்‌ அழகைக்‌ கவர்ந்து செல்கின்றீரே! இது ஏன்‌?

வேணுபுரமானது, இந்திரன்‌ மண்ணுலகம்‌ வந்து மூங்கிலாய்‌ மறைந்திருந்த இடம்‌. முறைப்படி ஆட்சி நடத்திய இடம்‌. மகழ்வெய்தி வழிபட்டு வாழ்ந்த தலம்‌. இங்கு அகலமான முரசு ஒலிக்கும்‌. நீதி நிலைபெற்று இருக்கும்‌. இந்தத்‌ தலத்தில்‌ எழுந்தருளிய சிவபெருமானே! கங்கை தங்கிய சடைமுடியில்‌ பிறையைச்‌ சூடி உள்ளீர்‌. மகளிர்‌ இடும்‌ "பலியை ஏற்பதற்காக வீதிகளில்‌ வந்தீர்‌. ஆனால்‌, அதற்கு மாறாகக்‌ கயல்‌ மீனை ஒத்ததும்‌, நீர்‌ நிறைந்த கண்களை உடைய (முனி பத்தினி) இளம்‌ பெண்கள்‌ (விரக நோயால்‌) துயில்‌ கொள்வதைக்‌ கவர்ந்தீர்‌. இது நீதியோ?

இந்த உலகத்தில்‌ அடைக்கலம்‌ புகும்‌ 'இடம்‌ வேறு இல்லை. ஆதலால்‌, தேவர்களின்‌ புகலிடமாகவும்‌ அவர்கள்‌ என்றும்‌ நீங்காது உறைவதுமாகிய அழகிய புகலி என்னும்‌ தலம்‌. இந்தப்‌ புகலித்‌ தலத்தில்‌ எழுந்தருளிய புண்ணியனான சிவபெருமானே! சிரிக்கும்‌ தலையோட்டையும்‌, வெண்மையான பிறை மதியையும்‌, குளிர்ந்த சடையில்‌ அணிந்து இருக்கின்றீர்‌. பகற்பொழுதில்‌ பலி ஏற்பதுபோல்‌ வருகின்றீர்‌. ஆனால்‌, மகளிர்‌ தரும்‌ பிச்சையை ஏற்றுக்‌ கொள்ளாமல்‌ அவர்களுக்கு விரக தாபத்தை உண்டு பண்ணுகின்றீர்‌. அந்த விரக தாபத்தால்‌ அவர்கள்‌ அணிந்துள்ள பரந்த ஆடை முதலியன நெகிழும்படி செய்து போதல்‌ நீதியோ?

எமதரும ராசன்‌ கொடிய அரசன்‌ எனப்படுபவன்‌. இவன்‌ வெங்குரு என்ற தலத்தில்‌ செங்கோல்‌ ஆட்சி நடத்தினான்‌. தான்‌ செய்யும்‌ செயல்கள்‌ நீதிநெறிக்கு உட்பட்டவை என்ற உண்மை எல்லா உயிர்களுக்கும்‌ தெரியுமாறு ஆண்டான்‌. இந்த வெங்குரு என்ற தலத்தில்‌ எழுந்தருளிய சிவபெருமானே! கடல்‌ சங்கினால்‌ ஆகிய குண்டலம்‌ என்று சொல்லப்படும்‌ தோட்டை ஒரு காதில்‌ அணிந்திருக்கின்றீர்‌. மற்றொரு காதில்‌ குழையை அணிந்தருக்கின்றீர்‌. பலி ஏற்பதற்காக வந்திருக்கின்றீர்‌. ஆனால்‌ அதை ஏற்காது, அழகிய திரண்ட வளையல்கள்‌ அணிந்த இளம்‌ பெண்களின்‌ அழகைக்‌ கவர்ந்து செல்லுகின்றீர்‌. இது நீதியோ?

ஊழிக்காலத்தில்‌ மண்ணுலகம்‌ அழகிய நீருலகம்‌ ஆகி, அனைத்து இடங்களும்‌ ஆழமான கடலால்‌ மூழ்கி வருந்தியது. அந்த வேளையில்‌ அச்சம்‌ தரும்‌ அந்தத்‌ துணிவு கொண்ட தண்ணீர்‌ பணிந்து போகவும்‌ தான்‌ மட்டும்‌, அந்த ஊழி வெள்ளத்தில்‌ அழியாது, தோணிபுரத்தில்‌ எழுந்தருளிய இறைவனான சிவபெருமானே! தன்னை வந்து பணிந்த பிறைமதியைச்‌ சூடியிருக்கிறீர்‌. நீண்டு தாழ்ந்து தொங்கும்‌ சடைமுடியை உடையவராக இருக்கின்றீர்‌. ஏற்கனவே பருவமடைந்து காமநோயால்‌ வருந்தும்‌ இளம்‌ மகளிரிடம்‌ பிச்சை ஏற்கச்‌ செல்கின்றீர்‌. ஆனால்‌ அவர்கள்‌ தரும்‌ பிச்சையை ஏற்காது, உம்முடைய தெய்வீகப்‌ பார்வையால்‌, அவர்கள்‌ விரக நோயடையப்‌ பெற்று, அவர்களது ஆடைகள்‌ நிலை குலைகின்றன. இவ்வாறு செய்தல்‌ நீதியாகுமா?

வலிமை மிக்க காக்கும்‌ தெய்வமாகிய திருமால்‌, அணிகலன்களை அணிந்த எல்லா மக்களையும்‌ காத்து வருகின்ற அரசர்கள்‌ அனைவருக்கும்‌ தலைவன்‌ ஆவான்‌. அவன்‌ தனது வராக அவதாரத்தில்‌ இரண்யகசிபுவைக்‌ கொன்றான்‌. அதனால்‌ வந்த பழியைப்‌ போக்க, இம்மண்ணுலகத்தில்‌ பூந்தராய்‌ என்னும்‌ தலத்திற்கு வந்து பூக்களைக்‌ கொண்டு அங்கு எழுந்தருளியுள்ள சிவபெருமானைப்‌ பூசித்தான்‌. இந்தத்‌ தலம்‌, தவமுனிவர்கள்‌ எல்லா இடங்களிலும்‌ தங்கும்‌ சிறப்புப்‌ பெற்றது. இந்தப்‌ பூந்தராயில்‌ எழுந்தருளிய சிவபெருமானே! இந்த மண்ணுலகைக்‌ கவர வந்த அழகிய கங்கையையும்‌, குளிர்ச்சியான பிறைமதியையும்‌, மணம்‌ கமழும்‌ சடைமுடியையும்‌ சூடி இருக்கின்றீர்‌. நீர்‌ பலிகேட்டு வீதிகளில்‌ செல்லும்‌ காலத்து மகளிர்‌ ஆங்காங்கே இடும்‌ சுவைமிக்க பலியாகிய உணவை ஏற்றுக்‌ கொள்ளாமல்‌, அவர்களது அழகைக்‌ கவர்ந்து கொள்ளுகின்றீர்‌. இது நீதியோ?

வில்‌ வீரனான சிலம்பன்‌ என்ற இராகு தேவர்களுடன்‌ கலந்து வஞ்சனையாக திருப்பாற்கடலில்‌ இருந்து வந்த அமுதை உண்டான்‌. அதனால்‌ திருமாலால்‌ வெட்டப்பட்டு தலைமாத்திரமாய்‌ நின்றான்‌. இந்த இராகு வையகம்‌ முழுவதையும்‌ தனது ஆணை வழி நடத்தி ஆட்சிபுரிந்த நகரம்‌ சிரபுரம்‌ என்ற தலம்‌. இந்தச்‌ சிரபுரம்‌ என்ற தலத்தில்‌ எழுந்தருளியுள்ள இறைவனான சிவபெருமானே! முல்லை யாழ்‌, சுரம்‌ ஒத்து ஒலிக்கவும்‌, மொந்தை என்னும்‌ பறை ஒலிக்கவும்‌, வீடு வீடாகச்‌ சென்று வீட்டின்முன்‌ கடையின்‌ அயலே நின்று உண்பதற்காக அன்றி பொய்யாகப்‌ பிச்சை கேட்கிறீர்‌. மகளிர்‌ தரும்‌ உணவைக்‌ கொள்ளாது நீர்‌ அவர்தம்‌ அழகினைக்‌ கவர்வது நீதியோ?

புறவம்‌ என்ற சீகாழியை சிபிச்‌ சக்கரவர்த்தி அரசாண்டான்‌. அவன்‌ தனது ஒரு தேரைச்‌ செலுத்தி பத்துத்‌ தேர்கள்‌ அழியுமாறு போர்புரிவதில்‌ வல்லவன்‌. அவன்‌ புறாவிற்கு அடைக்கலம்‌ கொடுத்து தன்‌ தசையையும்‌, தன்னையும்‌ தியாகம்‌ செய்த காரணத்தால்‌ புறவம்‌ என்ற பெயர்‌ கொண்ட சீகாழிப்‌ பதியில்‌ விளங்கும்‌ இறைவனே! தனது எருது ஊர்தியைக்‌ கொணர்க என ஆணையிட்டு அதன்மீது ஏறித்‌ தனது அழகிய கையில்‌ ஏந்திய பிரம கபாலத்தையே உண்கலனாகக்‌ கொண்டு பலிஏற்கச்‌ சென்றாய்‌. வீடுகளில்‌ உள்ள மகளிர்‌ கொடுக்கும்‌ பலியைக்‌ . கொள்ளாது, அவர்கள்‌ உறக்கம்‌ கெடுமாறு விரகதாபத்தை உண்டு பண்ணினாய்‌. இது உனக்கு நீதியாகுமா?

உடலைத்‌ துளைக்கின்ற நீண்ட வேலை இயமன்‌ ஏந்தியிருக்கின்றான்‌. அவனை அடக்கி ஆண்ட சண்பை என்னும்‌ தலத்தில்‌ எழுந்தருளிய சிவபெருமானே! புத்த சமயத்தினர்‌ கலிங்க நாட்டில்‌ நெய்த காவி நிறத்தை உடைய போர்வையைப்‌ போர்த்து இருக்கின்றனர்‌. சமணர்கள்‌ தூய்மை இல்லாதவர்கள்‌. இந்த இரு சமயத்தினரும்‌ மனம்‌ திரிந்து உழலுகின்றனர்‌. நீர்‌, நீண்ட கூந்தலை உடைய மகளிர்‌ வாழும்‌ இல்லங்களுக்குச்‌ செல்கிறீர்‌. அம்மகளிர்‌ உம்மைக்‌ கண்ட அளவில்‌ மனம்‌ திரிந்து நிற்கின்றனர்‌. அவர்கள்‌ கொடுக்கும்‌ இனிய உணவாகிய பிச்சையை ஏற்காது, அவர்களின்‌ அழகினைக்‌ கவர்ந்து செல்கின்றீரே? இது நீதியோ?

ஊழிக்காலத்தில்‌ உலகம்‌ வெப்பத்தால்‌ வெதும்பி வருந்தித்‌ துன்புற்றது. ஐந்து தலைகளையும்‌ வீரக்கழலையும்‌ நீண்ட முடியையும்‌ அணிந்த நாகங்களின்‌ தலைவனான “காளிதன்‌” என்ற பாம்பு காழிப்பதியை காவல்‌ புரிந்தது. அந்தக்‌ காழிப்பதியில்‌ அமர்ந்திருக்கும்‌ தலைவனான சிவபெருமானே! நீர்‌, ஒளிநிறைந்த கொன்றை மலர்‌ மாலையைச்‌ சூடியிருக்கிறீர்‌. திருமேனியில்‌ நீற்றினைப்‌ பூசியிருக்கிறீர்‌. பிச்சையேற்பவர்‌ போல மகளிர்‌ வாழும்‌ வீதிகளில்‌செல்கிறீர். அந்த அழகிய கூந்தலை உடைய மகளிரின்‌ பிச்சையை ஏற்காது, அவர்களை விரக தாபத்தால்‌ மெலியச்‌ செய்கின்றீர்‌. அவர்களின் திரண்ட வளையல்களைக்‌ கவ்வுகின்றீர்‌. இது நீதியோ? அவர்களின்‌

பராசர முனிவன்‌ ஆற்றின்‌ நடுவே மச்சகந்தியோடு கூடினான்‌. அந்தப்‌ பழி நீங்குவதற்கு அம்முனிவன்‌ பூசை செய்தான்‌. அவன்‌ செய்த பூசையால்‌ அப்பெண்ணுக்கு உயர்ந்த மயிர்ச்சாந்து போன்ற மணத்தையும்‌ நல்ல ஒழுக்கத்தையும்‌ கொடுத்தீர்‌. அந்தச்‌ சிறப்பினை உடையதும்‌, குளிர்ந்த வயல்களால்‌ சூழப்பட்டதுமாகிய தலம்‌ கொச்சைவயம்‌. இந்தத்‌ தலத்தில்‌ எழுந்தருளிய இறைவனான சிவபெருமானே! நீவிர்‌, கட்டப்பட்ட துளசி மாலையை அணிந்த திருமாலும்‌, நான்முகனும்‌ காணமுடியாத மேன்மையை உடையவராக இருக்கின்றீர்‌. ஆனால்‌, நீர்‌, பிச்சை ஏற்கச்‌ சென்று, மகளிர்‌ தரும்‌ பலியை ஏற்காது, அவர்களின்‌ அழகிய ஆடைகளைக்‌ கவர்கின்றீர்‌. இது நீதியோ?

கழுமலம்‌ என்ற பெயர்‌ பெற்ற தலம்‌ சீகாழிப்பதி. இப்பதியில்‌ வாசல்களில்‌ கொடிகள்‌ கட்டப்பட்ட மாடவீடுகளை உடைய வீதிகள்‌ உள்ளன. இந்தக்‌ கழுமலம்‌ என்ற சீகாழிப்பதியில்‌ கவுணியர்‌ குலத்தில்‌ தோன்றியவர்‌ ஞானசம்பந்தன்‌. இவர்‌, மழுப்படையைக்‌ கையில்‌ ஏந்திய சீகாழி இறைவர்மீது, “பல்பெயர்‌ பத்து” என்னும்‌ இத்திருப்பதிகத்தை பத்தின்மேலும்‌ பலவாகிய பெயர்களைக்‌ (12 பெயர்களையும்‌ குறிப்பிட்டு) குறிப்பிட்டு இலக்கிய மாலையாகப்‌ பாடினார்‌. இத்திருப்பதிகத்தை ஓதி வழிபடும்‌ வல்லவர்களை, இவ்வுலகில்‌ துன்புறுத்தும்‌ வினைகள்‌ ஒருபோதும்‌ வந்து அடையாது. இவர்கள்‌ மறுமையில்‌ அமரர்‌ உலகத்தை ஆளுவார்கள்‌.