திருக்கோளிலி

அருளியவர்: திருஞானசம்பந்தர்
பண்: பழந்தக்கராகம்
தலம்: கோளிலி
நாடு: சோழநாடு காவிரித் தென்கரை

1

நாளாய போகாமே நஞ்சணியுங் கண்டனுக்கேஆளாய அன்புசெய்வோம் மடநெஞ்சே அரன்நாமம்கேளாய்நங் கிளைகிளைக்குங் கேடுபடாத் திறம்அருளிக்கோளாய நீக்குமவன் கோளிலியெம் பெருமானே.

சொற்பிரிப்பு

நாள் ஆய போகாமே, நஞ்சு அணியும் கண்டனுக்கேஆள் ஆய அன்பு செய்வோம்; மட நெஞ்சே! அரன் நாமம்கேளாய்! நம் கிளை கிளைக்கும் கேடு படாத் திறம் அருளிக்கோள் ஆய நீக்குமவன் கோளிலி எம்பெருமானே.

உரை

அறியாமையை உடைய மனமே! உலகில்‌ உயிர்‌ வாழும்‌ நாட்கள்‌ வீணாகிப்‌ போவதற்கு முன்பே, நீலகண்டனான சிவபெருமானுக்கு அடியவராக விளங்கி, அவரிடத்தில்‌ அன்பு செய்வாயாக. அப்பெருமானின்‌ திருநாமங்களை எப்பொழுதும்‌ கேட்பாயாக. அவ்வாறு கேட்டால்‌ நம்‌ சுற்றத்தினரும்‌ செழித்து இனிது வாழ்வர்‌. துன்பங்கள்‌ நம்மைத்‌ தாக்காதவாறு அருள்புரிவான்‌. நம்‌ மனத்தின்‌ மாறுபாடுகளையும்‌ அவன்‌ தீர்த்து அருளுவான்‌. அவ்விறைவன்‌, திருக்கோளிலி என்னும்‌ தலத்தில்‌ எழுந்தருளி உள்ளான்‌.

2

ஆடரவத் தழகாமை அணிகேழற் கொம்பார்த்ததோடரவத் தொருகாதன் துணைமலர்நற் சேவடிக்கேபாடரவத் திசைபயின்று பணிந்தெழுவார் தம்மனத்தில்கோடரவம் தீர்க்குமவன் கோளிலியெம் பெருமானே.

சொற்பிரிப்பு

ஆடு அரவத்து, அழகு ஆமை, அணி கேழல் கொம்பு, ஆர்த்ததோடு அரவத்து ஒரு காதன், துணை மலர் நல் சேவடிக்கேபாடு அரவத்து இசை பயின்று, பணிந்து எழுவார் தம் மனத்தில்கோடரவம் தீர்க்குமவன் கோளிலி எம்பெருமானே.

உரை

சிவபெருமான்‌, படம்‌ எடுத்து ஆடும்‌ இயல்புடைய பாம்பை நாணாகக்‌ கொண்டவர்‌. அதில்‌ அழுகிய ஆமை ஓட்டையும்‌, பன்றிக்‌ கொம்பையும்‌ கோர்த்து அணிந்திருப்பவர்‌. தோடாகப்‌ பாம்பையே கொண்டவர்‌. திருக்கோளிலியில்‌ எழுந்தருளி உள்ள எம்பிரானின்‌ இரண்டு மலர்‌ போன்ற நல்ல சிவந்த திருவடியில்‌ துதிப்‌ பாடல்களை இசையோடு பாடிப்‌ பணிந்து வணங்குபவர்களின்‌ மனக்‌ கோணலைத்‌தீர்த்து அருளுவான்‌.

3

நன்றுநகு நாண்மலரால் நல்லிருக்கு மந்திரங்கொண்டொன்றிவழி பாடுசெய லுற்றவன்தன் ஓங்குயிர்மேல்கன்றிவரு காலனுயிர் கண்டவனுக் கன்றளித்தான்கொன்றைமலர் பொன்திகழுங் கோளிலியெம் பெருமானே.

சொற்பிரிப்பு

நன்று நகு நாள்மலரால், நல் இருக்கு மந்திரம் கொண்டு,ஒன்றி வழிபாடு செயல் உற்றவன் தன் ஓங்கு உயிர்மேல்கன்றி வரு காலன் உயிர் கண்டு, அவனுக்கு அன்று அளித்தான்-கொன்றைமலர் பொன் திகழும் கோளிலி எம்பெருமானே.

உரை

திருக்கோளிலியில்‌ எழுந்தருளியுள்ள எம்பெருமானாகிய சிவபெருமான்‌ பொன்‌ போன்று விளங்கும்‌ கொன்றை மலரைச்‌ சூடியிருக்கின்றார்‌. இப்பெருமானை, மார்க்கண்டேயன்‌ மலர்ந்த புதிய பூக்களைக்‌ கொண்டும்‌, இருக்கு வேத மந்திரங்களைக்‌ கூறியும்‌, மன ஒருமைப்பாட்டுடன்‌ வழிபாடு செய்தான்‌. இவனின்‌ உயர்ந்த உயிரைக்‌ கவர இயமன்‌ சினந்து வந்தான்‌. சிவபெருமான்‌ இயமனது உயிரைப்‌ போக்கியும்‌, மார்க்கண்டேயனுக்கு என்றும்‌ பதினாறாண்டாக இருக்கும்‌ வரத்தையும்‌ அருளினார்‌.

4

வந்தமண லால்இலிங்கம் மண்ணியின்கட் பாலாட்டும்சிந்தைசெய்வோன் தன்கருமந் தேர்ந்துசிதைப் பான்வருமத்தந்தைதனைச் சாடுதலுஞ் சண்டீச னென்றருளிக்கொந்தணவு மலர்கொடுத்தான் கோளிலியெம் பெருமானே.

சொற்பிரிப்பு

வந்த மணலால் இலிங்கம் மண்ணியின் கண் பால் ஆட்டும்சிந்தை செய்வோன் தன் கருமம் தேர்ந்து சிதைப்பான் வரும் அத்தந்தைதனைச் சாடுதலும், “சண்டீசன்” என்று அருளி,கொந்து அணவும் மலர் கொடுத்தான் கோளிலி எம்பெருமானே.

உரை

விசார சருமர்‌, மண்ணியாற்றங்கரையில்‌ மணலால்‌ இலிங்கம்‌ அமைத்து, மேய்ச்சலுக்குக்‌ கொண்டு வந்த பசுவின்‌ பாலை அபிடேகித்து வழிபட்டார்‌. இவரது செயலைக்‌ கண்டு அச்சிவபூசையைச்‌ சிதைக்க முற்பட்ட அவன்‌ தந்தையான எச்ச தத்தனின்‌ காலை விசாரசருமர்‌ வெட்டினார்‌. திருக்கோளிலியில்‌ விளங்கும்‌ எம்பெருமானான சிவபெருமான்‌, அதனைக்‌ கண்டு, விசாரசருமருக்குச்‌ சண்டீசப்பதவி அருளித்‌, தான்‌ உண்ட கலத்தோடு சூடிய மலர்‌ மாலைகளைச்‌ சூடிக்கொள்ளும்‌ சிறப்பையும்‌ அளித்தார்‌.

5

வஞ்சமனத் தஞ்சொடுக்கி வைகலும்நற் பூசனையால்நஞ்சமுது செய்தருளும் நம்பியென வேநினையும்பஞ்சவரிற் பார்த்தனுக்குப் பாசுபதம் ஈந்துகந்தான்கொஞ்சுகிளி மஞ்சணவுங் கோளிலியெம் பெருமானே.

சொற்பிரிப்பு

வஞ்ச மனத்து அஞ்சு ஒடுக்கி, வைகலும் நல் பூசனையால்,“நஞ்சு அமுது செய்து அருளும் நம்பி” எனவே நினையும்பஞ்சவரில் பார்த்தனுக்குப் பாசுபதம் ஈந்து உகந்தான்கொஞ்சுகிளி மஞ்சு அணவும் கோளிலி எம்பெருமானே.

உரை

பாண்டவர்‌ ஐவரில்‌ ஒருவன்‌ அருச்சுனன்‌. அவன்‌ தன்‌ வஞ்சகமான மனத்தைத்‌ இருத்தி, ஐம்பொறிகளை ஒடுக்கி, நாள்தோறும்‌ நல்ல சிவபூசையைச்‌ செய்தவன்‌. “நஞ்சினை அமுதாக உண்ட நம்பியே அடைக்கலம்‌” என நினைந்த சிவபக்தன்‌. இந்த அருச்சுனனுக்கு பாசுபதம்‌ என்னும்‌ அஸ்திரம்‌ வழங்கி மகிழ்ந்தவர்‌ சிவபெருமான்‌. இப்பெருமான்‌, கொஞ்சும்‌ கிளிகள்‌ வானவெளியில்‌ பறக்கும்‌ திருக்கோளிலியில்‌ எழுந்தருளி இருக்கும்‌ எம்பெருமான்‌ ஆவார்‌.

6

தாவியவ1 னுடனிருந்துங் காணாத தற்பரனைஆவிதனி லஞ்சொடுக்கி அங்கணனென் றாதரிக்கும்நாவியல்சீர் நமிநந்தி யடிகளுக்கு நல்குமவன்கோவியலும் பூவெழுகோற் கோளிலியெம் பெருமானே.பாடம் : 1காவியவன்

சொற்பிரிப்பு

தாவியவன் உடன் இருந்தும் காணாத தற்பரனை,ஆவிதனில் அஞ்சு ஒடுக்கி, “அங்கணன்” என்று ஆதரிக்கும்நா இயல் சீர் நமி நந்தி யடிகளுக்கு நல்குமவன்கோ இயலும் பூ எழு கோல் கோளிலி எம்பெருமானே.

உரை

தலைமை சான்ற மலர்‌ மரங்களை உடைய திருக்கோளிலியில்‌ எம்பெருமானான சிவபெருமான்‌ எழுந்தருளியுள்ளார்‌. மூவுலகங்களையும்‌ தனது ஒரு காலால்‌ அளந்த திருமால்‌ தன்னோடு உடனிருந்தும்‌, தன்‌ திருவடிகளை அவனால்‌ காண இயலவில்லை. சிவபெருமான்‌ காணப்படாத எல்லாவற்றிற்கும்‌ மேலானவன்‌. எனினும்‌, தன்‌ ஐம்பொறிகளை ஒடுக்க, கருணையாளனாக உயிர்க்குயிராய்‌ காதலித்து சிவபெருமானைப்‌ புகழ்ந்து வழிபடும்‌ நமிநந்தி அடிகளுக்கு, விருப்பத்தோடு அருள்‌ செய்த பெருமானாகிய சிவபெருமான்‌ எழுந்தருளிய இடம்‌ திருக்கோளிலி ஆகும்‌.

7

கன்னவிலு மால்வரையான் கார்திகழு மாமிடற்றான்சொன்னவிலும் மாமறையான் தோத்திரஞ்செய்2 வாயினுளான்மின்னவிலுஞ் செஞ்சடையான் வெண்பொடியான் அங்கையினில்கொன்னவிலும் சூலத்தான் கோளிலியெம் பெருமானே.பாடம் : 2தோத்திரஞ்சேர், தோத்திரஞ்சொல்

சொற்பிரிப்பு

கல் நவிலும் மால்வரையான், கார் திகழும் மாமிடற்றான்,சொல் நவிலும் மாமறையான், தோத்திரம்செய் வாயின் உளான்,மின்நவிலும் செஞ்சடையான் வெண்பொடியான், அம்கையினில்கொல் நவிலும் சூலத்தான் கோளிலி எம்பெருமானே.

உரை

கற்கள்‌ செறிந்த பெரிய கயிலாய மலையில்‌ எழுந்தருளி இருப்பவன்‌ சிவபெருமான்‌. கருமை விளங்கும்‌ பெரிய மிடற்றை உடையவன்‌. புகழ்‌ பொருந்திய வேதங்களை அருளிச்‌ செய்தவன்‌. தன்னைத்‌ தோத்திரிப்பாரின்‌ வாயின்கண்‌ உள்ளவன்‌. மின்னல்‌ போன்ற சிவந்த சடையினை உடையவன்‌. திருவெண்ணீறு அணிந்தவன்‌. அழகிய கையில்‌ கொல்லும்‌ தொழிலில்‌ பழகிய சூலப்படையை ஏந்தியவன்‌. இத்தகையோனாகி விளங்குவோன்‌ திருக்கோளிலியின்கண்‌ விளங்கும்‌ எம்பெருமான்‌ ஆவான்‌.

8

அந்தரத்தில் தேரூரும் அரக்கன்மலை அன்றெடுப்பச்சுந்தரத்தன் திருவிரலால் ஊன்றஅவன் உடல்நெரிந்துமந்திரத்த மறைபாட வாளவனுக் கீந்தானும்கொந்தரத்த மதிச்சென்னிக் கோளிலியெம் பெருமானே.

சொற்பிரிப்பு

அந்தரத்தில் தேர் ஊரும் அரக்கன் மலை அன்று எடுப்ப,சுந்தரத் தன் திருவிரலால் ஊன்ற, அவன் உடல் நெரிந்து,மந்திரத்த மறை பாட, வாள் அவனுக்கு ஈந்தானும்கொந்து அரத்த மதிச் சென்னிக் கோளிலி எம்பெருமானே.

உரை

ஆகாய வெளியிலே தேரில்‌ ஊர்ந்து வந்து, இராவணன்‌ கயிலை மலையைப்‌ பெயர்த்தபோது, சிவபெருமான்‌ தனது அழகிய கால்‌ விரலால்‌ சிறிது ஊன்ற; அவன்‌ உடல்‌ நெரிந்தது. இராவணன்‌ மந்திரமாக விளங்கும்‌ சாமகானத்தைப்‌ பாடிச்‌ திணைப்‌ போற்ற, அவர்‌ சந்திரஹாசம்‌ என்னும்‌ வாளைக்‌ கொடுத்து அருள்‌ செய்தார்‌. இப்பெருமான்‌ பெருமையுடைய, பிறைமதியைச்‌ சூடிய 'சடையினராகத்‌ திருக்கோளிலியில்‌ எழுந்தருளியுள்ளார்‌.

9

நாணமுடை வேதியனும் நாரணனும் நண்ணவொணாத்தாணுஎனை யாளுடையான் தன்னடியார்க் கன்புடைமைபாணன்இசை பத்திமையாற் பாடுதலும் பரிந்தளித்தான்கோணல்இளம் பிறைச்சென்னிக் கோளிலியெம் பெருமானே.

சொற்பிரிப்பு

நாணம் உடை வேதியனும் நாரணனும் நண்ண ஒணாத்தாணு, எனை ஆள் உடையான், தன் அடியார்க்கு அன்புஉடைமைபாணன் இசை பத்திமையால் பாடுதலும் பரிந்து அளித்தான்கோணல் இளம்பிறைச் சென்னிக் கோளிலி எம்பெருமானே.

உரை

அறிய முடியாததால்‌ நாணமுற்ற வேதியனாகிய பிரமனும்‌, திருமாலும்‌ அணுக முடியாத நிலைத்த பொருள்‌ ஆனவன்‌ சிவபெருமான்‌. அவன்‌ என்னை அடிமையாக உடையவன்‌. தன்‌ அடியவர்களுக்கு அன்பு வடிவானவன்‌. பாணபத்திரன்‌ பக்தியோடு பாடப்‌ பரிவோடு அவனுக்கு அருள்புரிந்தவன்‌. வளைந்த பிறைமதியைத்‌ தலைமுடியில்‌ சூடியவன்‌. அந்தச்‌ சிவபிரான்‌, திருக்கோளிலியில்‌ எழுந்தருளும்‌ எம்பெருமான்‌ ஆவான்‌.

10

தடுக்கமருஞ் சமணரொடு தர்க்கசாத் திரத்தவர்சொல்இடுக்கண்வரும் மொழிகேளா தீசனையே ஏத்துமின்கள்நடுக்கமிலா அமருலகந் நண்ணலுமாம் அண்ணல்கழல்கொடுக்ககிலா வரங்கொடுக்குங் கோளிலியெம் பெருமானே.

சொற்பிரிப்பு

தடுக்கு அமரும் சமணரொடு தர்க்க சாத்திரத்தவர் சொல்இடுக்கண் வரும் மொழி கேளாது, ஈசனையே ஏத்துமின்கள்!நடுக்கம் இலா அமருலகம் நண்ணலும் ஆம்; அண்ணல் கழல்கொடுக்ககிலா வரம் கொடுக்கும் கோளிலி எம்பெருமானே.

உரை

தடுக்கையை ஆசனமாக விரும்புகின்ற சமணரும்‌ தர்க்க சாஸ்திரத்தில்‌ வல்ல புத்தர்களும்‌ கூறுகின்ற துன்ப வார்த்தைகளைக்‌ கேளாதீர்கள்‌. ஈசனான சிவபெருமானையே புகழுங்கள்‌. பயம்‌ இல்லாமல்‌ அமரர்‌ வாழும்‌ வானுலகத்தை அடையலாம்‌. அப்பெருமான்‌ திருவடிகள்‌ வேறு யாராலும்‌ தர இயலாத வரங்கள்‌ பலவற்றைத்‌ தரும்‌. அவ்விறைவன்‌ திருக்கோளிலி எம்பெருமானே ஆவான்‌.

11

நம்பனைநல் அடியார்கள் நாமுடைமா டென்றிருக்கும்கொம்பனையாள் பாகனெழிற் கோளிலியெம் பெருமானைவம்பமருந் தண்காழிச் சம்பந்தன் வண்தமிழ்கொண்டின்பமர வல்லார்க ளெய்துவர்கள் ஈசனையே.

சொற்பிரிப்பு

நம்பனை, நல் அடியார்கள் “நாம் உடை மாடு” என்று இருக்கும்கொம்பு அனையாள் பாகன், எழில் கோளிலி எம்பெருமானை,வம்பு அமரும் தண் காழிச் சம்பந்தன் வண் தமிழ் கொண்டுஇன்பு அமர வல்லார்கள் எய்துவர்கள், ஈசனையே.

உரை

பூங்கொம்பு போன்ற அழகிய உமையம்மையின்‌ கணவனாய்‌, அழகிய திருக்கோளிலியில்‌ விளங்கும்‌ எம்பெருமானை; நல்ல அடியவர்கள்‌ ஒவ்வொருவரும்‌ நம்முடைய செல்வம்‌ என நம்பியிருப்பர்‌. இப்பெருமானை மணம்‌ கமழும்‌ குளிர்ச்சியான சீகாழிப்‌ பதியுள்‌ தோன்றிய ஞானசம்பந்தன்‌ போற்றிப்‌ பாடினார்‌. இத்தமிழ்ப்‌ பதிகத்தை இன்பம்‌ பொருந்தப்‌ பாடவல்லவர்கள்‌ அப்பெருமானையே அடைவர்‌.