திருத்தூங்கானைமாடம்

அருளியவர்: திருஞானசம்பந்தர்
பண்: பழந்தக்கராகம்
தலம்: தூங்கானைமாடம்
நாடு: நடுநாடு

1

ஒடுங்கும் பிணிபிறவி கேடென்றிவை யுடைத்தாய வாழ்க்கை யொழியத்தவம்அடங்கும் இடங்கருதி நின்றீ ரெல்லாம் அடிக ளடிநிழற்கீ ழாளாம் வண்ணம்கிடங்கும் மதிலுஞ் சுலாவி யெங்கும் கெழுமனைகள் தோறும் மறையின்னொலிதொடங்குங் கடந்தைத் தடங்கோயில்சேர் தூங்கானை மாடம் தொழுமின்களே.

சொற்பிரிப்பு

ஒடுங்கும் பிணி, பிறவி, கேடு, என்று இவை உடைத்து ஆய வாழ்க்கை ஒழியத் தவம்அடங்கும் இடம் கருதி நின்றீர் எல்லாம், அடிகள் அடி நிழல் கீழ் ஆள் ஆம் வண்ணம்,கிடங்கும் மதிலும் சுலாவி எங்கும் கெழு மனைகள் தோறும் மறையின் ஒலிதொடங்கும் கடந்தைத் தடங்கோயில் சேர் தூங்கானைமாடம் தொழுமின்களே!

உரை

வெளிப்படுவதற்குரிய நேரம்‌ வரும்‌ வரைக்கும்‌ வெளிப்படாமல்‌ மறைந்து இருக்கும்‌ நோய்கள்‌, இனி வரும்‌ பிறப்புகள்‌, துன்பங்கள்‌ ஆகியன இவைகள்தான்‌ நமது வாழ்க்கையில்‌ அடங்கி இருப்பனவாம்‌. இத்துன்ப வாழ்க்கை நீங்கத்‌ தவம்‌ புரிதலுக்கு ஏற்ற இடத்தை நீவிர்‌ விரும்புகின்றீர்‌. அது, அகழியும்‌ மதிலும்‌ சூழ்ந்து, எங்கும்‌ உள்ள வீடுகள்‌ தோறும்‌ வேதங்கள்‌ ஒலிக்கும்‌ இடமான கடந்தைத்‌ தலமாகும்‌. அந்தத்‌ தலத்தின்‌ தலைவனாகிய சிவபெருமானின்‌ திருவடி நிழலின்கீழ்‌, அவருக்கு ஆளாகுமாறு, அவர்‌ கோயிலாகிய திருத்தூங்கானைமாடம்‌ சென்று தொழுது தவம்புரிவீர்களாக.

2

பிணிநீர சாதல் பிறத்தலிவை பிரியப் பிரியாத பேரின்பத்தோடணிநீர மேலுலகம் எய்தலுறில் அறிமின் குறைவில்லை ஆனேறுடைமணிநீல கண்டம் உடையபிரான் மலைமகளுந் தானும் மகிழ்ந்துவாழும்துணிநீர்க் கடந்தைத் தடங்கோயில்சேர் தூங்கானை மாடம் தொழுமின்களே.

சொற்பிரிப்பு

பிணி நீர சாதல், பிறத்தல், இவை பிரியப் பிரியாத பேர் இன்பத்தோடுஅணி நீர மேல் உலகம் எய்தல் உறில், அறிமின்! குறைவு இல்லை; ஆன் ஏறு உடைமணி நீலகண்டம் உடைய பிரான் மலைமகளும் தானும் மகிழ்ந்து வாழும்துணி நீர்க் கடந்தைத் தடங்கோயில் சேர் தூங்கானை மாடம் தொழுமின்களே!

உரை

நோய்த்தன்மையுடைய இறத்தல்‌, பிறத்தல்‌ ஆகியன நீங்கவும்‌, எக்காலத்தும்‌ நீங்காத பேரின்பத்தோடு கூடிய அழகிய தன்மை வாய்ந்த மேலுலகத்தை, நீவீர்‌ அடைய விரும்புகின்றீர்‌. குறைவில்லாமல்‌ இதை அறியுங்கள்‌. இடபத்தை ஊர்தியாகவும்‌ தனது கொடியாகவும்‌, நீலமணி போன்ற கண்டத்தையும்‌ உடைய சிவபெருமான்‌, தெளிந்த நீரை உடைய கடந்தைத்‌ தலத்தில்‌ மலைமகளும்‌ தானுமாக மகிழ்ந்து வாழும்‌ திருத்தூங்கானை மாடம்‌ சென்று, அப்பெருமானைத்‌ தொழுவீர்களாக.

3

சாநாளும் வாழ்நாளுந் தோற்றமிவை சலிப்பாய வாழ்க்கை யொழியத்தவம்ஆமா றறியா தலமந்துநீர்1 அயர்ந்துங் குறைவில்லை ஆனேறுடைப்பூமாண் அலங்கல் இலங்குகொன்றை புனல்பொதிந்த புன்சடையி னான்உறையும்தூமாண் கடந்தைத் தடங்கோயில்சேர் தூங்கானை மாடம் தொழுமின்களே.பாடம் : 1தலம்வந்துநீர்

சொற்பிரிப்பு

சாம் நாளும் வாழ் நாளும் தோற்றம் இவை சலிப்பு ஆய வாழ்க்கை ஒழியத் தவம்ஆம் ஆறு அறியாது, அலமந்து, நீர் அயர்ந்தும் குறைவு இல்லை; ஆன் ஏறு உடைப்பூ மாண் அலங்கல் இலங்கு கொன்றை புனல் பொதிந்த புன்சடையினான் உறையும்தூ மாண் கடந்தைத் தடங்கோயில் சேர் தூங்கானை மாடம் தொழுமின்களே!

உரை

இறப்பு நாளும்‌, வாழும்‌ நாளும்‌, பிறக்கும்‌ நாளும்‌ ஆகிய இவற்றோடு கூடியது நம்‌ சலிப்பான வாழ்க்கை. இவற்றை நீங்கத்‌ தவம்‌ சித்திக்கும்‌ தலம்‌ யாதென அறியாது நீவீர்‌ மறந்ததினால்‌ யாதும்‌ குறைவில்லை. விடையேற்றை ஊர்தியாகவும்‌, மலர்களில்‌ மாட்சிமை பெற்று விளங்கும்‌ கொன்றை மாலையும்‌, கங்கையும்‌ தாங்கிய சிவந்த சடையினை உடையவனுமாகிய சிவபெருமான்‌ உறையும்‌ தலமானது தூய்மையான மாண்புடைய கடம்பை நகரில்‌ விளங்கும்‌ பெரிய கோயிலாக அமைந்த திருத்தூங்கானைமாடம்‌ ஆகும்‌. அங்கு சென்று தொழுவீர்களாக. அது ஒன்றே தவம்‌ சித்திக்கும்‌ தலமாகும்‌.

4

ஊன்றும் பிணிபிறவி கேடென்றிவை யுடைத்தாய வாழ்க்கை யொழியத்தவம்மான்று மனங்கருதி நின்றீரெல்லாம் மனந்திரிந்து மண்ணில் மயங்காதுநீர்மூன்று மதிலெய்த மூவாச்சிலை முதல்வர்க் கிடம்போலும் முகில்தோய்கொடிதோன்றுங் கடந்தைத் தடங்கோயில்சேர் தூங்கானை மாடம் தொழுமின்களே.

சொற்பிரிப்பு

ஊன்றும் பிணி, பிறவி, கேடு, என்று இவை உடைத்து ஆய வாழ்க்கை ஒழியத் தவம்மான்று மனம் கருதி நின்றீர் எல்லாம், மனம் திரிந்து, மண்ணில் மயங்காது, நீர்மூன்று மதில் எய்த மூவாச் சிலை முதல்வர்க்கு இடம்போலும் முகில் தோய் கொடிதோன்றும் கடந்தைத் தடங்கோயில் சேர் தூங்கானை மாடம் தொழுமின்களே!

உரை

நிலைபெற்ற நோய்‌, பிறப்பு, இறப்பு இவற்றை உடைய வாழ்க்கை நீங்கவும்‌, நிலையான வீடுபேற்றைப்‌ பெறவும்‌ தவம்‌ செய்ய மனம்‌ விரும்பி மயங்கி நிற்கிறீர்‌. நீவீர்‌ எல்லோரும்‌ மனம்‌ திரும்புங்கள்‌. உலகில்‌ மயங்காதீர்கள்‌. திரிபுரங்களை எய்த அழியாத வில்லை உடையவரும்‌, உலகின்‌ தலைவருமாகிய சிவபெருமானது இடமாக விளங்குவதும்‌, மேகங்களில்‌ முழுகும்‌ கொடிகள்‌ தோன்றும்‌ கடந்தை நகரில்‌ உன்ன பெரிய கோயிலாக அமைந்த திருத்தூங்கானை மாடம்‌ சென்று தொழுவீர்களாக.

5

மயல்தீர்மை யில்லாத தோற்றம்மிவை மரணத்தொ டொத்தழியு மாறாதலால்வியல்தீர மேலுலக மெய்தலுறின் மிக்கொன்றும் வேண்டா விமலனிடம்உயர்தீர வோங்கிய நாமங்களா லோவாது நாளும் அடிபரவல்செய்துயர்தீர் கடந்தைத் தடங்கோயில்சேர் தூங்கானை மாடம் தொழுமின்களே.

சொற்பிரிப்பு

மயல் தீர்மை இல்லாத தோற்றம் இவை மரணத்தொடு ஒத்து அழியும் ஆறுஆதலால்,வியல் தீர மேல் உலகம் எய்தல் உறின், மிக்கு ஒன்றும் வேண்டா; விமலன் இடம்உயர் தீர ஓங்கிய நாமங்களால், ஓவாது நாளும் அடி பரவல்செய்துயர் தீர் கடந்தைத் தடங்கோயில் சேர் தூங்கானை மாடம் தொழுமின்களே!

உரை

மாறிமாறி வருகின்ற பிறப்பு, இறப்பு என்ற சூழலில்‌ அகப்பட்டு உழன்று கொண்டு இருக்கும்வரை, நமக்கு மெய்யறிவு கிட்டாது. மயக்கமே தலைதூக்கி நிற்கும்‌. முத்தி அடையும்‌ வழியை அறிய முடியாது இந்த மயக்கம்‌ நீங்கி மேலுலகம்‌ எய்த நீவீர்‌ விரும்பினால்‌ பெரிதாக முயற்சி எதுவும்‌ வேண்டாம்‌. எளிய வழியாகச்‌ சிவபெருமானது இடமாக விளங்குவதும்‌, நம்‌ துயர்களைத்‌ தீர்ப்பதும்‌ ஆகிய கடந்தை நகரில்‌ உள்ள பெரிய கோயிலாகிய திருத்தூங்கானைமாடம்‌ செல்லுங்கள்‌. அப்பெருமானுடைய மிக உயர்ந்த திருப்பெயர்களைக்‌ கூறி இடைவிடாது அவன்‌ திருவடிகளைத்‌ தொழுவீர்களாக.

6

பன்னீர்மை குன்றிச் செவிகேட்பிலா படர்நோக்கிற் கண் பவளந்நிறநன்னீர்மை குன்றித் திரைதோலொடு நரைதோன்றுங் காலம் நமக்காதல்முன்பொன்னீர்மை துன்றப் புறந்தோன்றுநற் புனல்பொதிந்த புன்சடையி னான்உறையும்தொன்னீர்க் கடந்தைத் தடங்கோயில்சேர் தூங்கானை மாடம் தொழுமின்களே.

சொற்பிரிப்பு

பல் நீர்மை குன்றி, செவி கேட்பு இலா, படர் நோக்கின் கண் பவளநிறநன்நீர்மை குன்றி, திரைதோலொடு நரை தோன்றும் காலம் நமக்கு ஆதல் முன்,பொன் நீர்மை துன்றப் புறம் தோன்றும் நல் புனல் பொதிந்த புன்சடையினான்உறையும்தொல் நீர்க் கடந்தைத் தடங்கோயில் சேர் தூங்கானை மாடம் தொழுமின்களே!

உரை

மூப்புக்‌ காலத்தில்‌ புலன்நுகர்ச்சிக்குரிய பல தன்மைகளும்‌ குறைந்து விடுகிறது. காதுகள்‌ கேட்பதில்லை. கண்களில்‌ படலம்‌ மூடியதால்‌ பார்வை குறைகிறது. பவளம்‌ ' போன்ற உடல்‌ நிறம்‌ குறைகிறது. தோல்‌ சுருங்கி நரை தோன்றுகிறது. இந்த மூப்புக்‌ காலம்‌ நம்மை வந்து அணுகுவதற்கு முன்பே, பொன்‌ போன்ற நிறம்‌ பொருந்திய, கங்கை தங்கிய செஞ்சடையினை உடைய சிவபெருமான்‌ உறையும்‌ பழமையான புகழை உடைய கடம்பை நகர்த்‌ தடங்கோயிலாகிய திருத்தூங்கானை மாடத்து இறைவனைத்‌ தொழுவீர்களாக.

7

இறையூண் துகளோ டிடுக்கண் எய்தி யிழிப்பாய வாழ்க்கை யொழியத்தவம்நிறையூண் நெறிகருதி நின்றீரெல்லாம் நீள்கழ லேநாளும் நினைமின் சென்னிப்பிறைசூ ழலங்கல் இலங்குகொன்றை பிணையும் பெருமான் பிரியாத நீர்த்துறைசூழ் கடந்தைத் தடங்கோயில்சேர் தூங்கானை மாடம் தொழுமின்களே.

சொற்பிரிப்பு

இறை ஊண் துகளோடு இடுக்கண் எய்தி இழிப்பு ஆய வாழ்க்கை ஒழியத் தவம்நிறை ஊண் நெறி கருதி நின்றீர் எல்லாம், நீள் கழலே நாளும் நினைமின்!சென்னிப்பிறை, சூழ் அலங்கல் இலங்கு கொன்றை, பிணையும் பெருமான் பிரியாத நீர்த்துறை சூழ் கடந்தைத் தடங்கோயில் சேர் தூங்கானை மாடம் தொழுமின்களே!

உரை

குறைந்த உணவோடு பல்வகைத்‌ துன்பங்களும்‌ நிரம்பி, வருந்தும்‌ இழிந்த வாழ்க்கை நீங்க, தவமாகிய நிறைந்த உணவைப்‌ பெறும்‌ வழி யாது என நீவீர்‌ எல்லோரும்‌ மயங்கி நிற்கிறீர்‌. நீண்ட திருப்பாதத்தைத்‌ இனமும்‌ நினையுங்கள்‌. முடியில்‌ பிறை சூடிக்‌ கொன்றை மாலை அணிந்த சிவபெருமான்‌ பிரியாது உறையும்‌ நீர்த்துறைகள்‌ சூழ்ந்த கடந்தை நகரில்‌ உள்ள தடங்கோயிலாகிய தூங்கானை மாடத்தை நாளும்‌ நினைந்து தொழுவீர்களாக.

8

பல்வீழ்ந்து நாத்தளர்ந்து மெய்யில்வாடிப் பழிப்பாய வாழ்க்கை யொழியத்தவம்இல்சூ ழிடங்கருதி நின்றீரெல்லாம் இறையே பிரியா தெழுந்து போதும்கல்சூ ழரக்கன் கதறச்செய்தான் காதலி யுந்தானுங் கருதிவாழும்தொல்சீர்க் கடந்தைத் தடங்கோயில்சேர் தூங்கானை மாடம் தொழுமின்களே.

சொற்பிரிப்பு

பல் வீழ்ந்து, நாத் தளர்ந்து, மெய்யில் வாடி, பழிப்பு ஆய வாழ்க்கை ஒழியத் தவம்இல் சூழ் இடம் கருதி நின்றீர் எல்லாம் இறையே பிரியாது எழுந்து போதும்!கல் சூழ் அரக்கன் கதறச் செய்தான், காதலியும் தானும் கருதி வாழும்,தொல்சீர்க் கடந்தைத் தடங்கோயில் சேர் தூங்கானை மாடம் தொழுமின்களே!

உரை

பல்வீழ்ந்து, பேச்சுத்‌ தளர்ந்து, உடல்‌ வாடிப்‌ பலராலும்‌ பழிக்கப்படும்‌ இவ்வுலக வாழ்க்கை நீங்கத்‌ தவம்‌ புரியும்‌ இடம்‌ யாது எனக்‌ கருதி நிற்கும்‌ நீவீர்‌ அனைவரும்‌ சிறிதும்‌ காலம்‌ தாழ்த்தாது எழுந்து வாருங்கள்‌. கயிலை மலையைப்‌ பெயர்த்த இராவணனைக்‌ கதறுமாறு அடர்த்த சிவபெருமான்‌ மலைமகளும்‌ தானுமாய்க்‌ கருதி வாழும்‌ பழமையான புகழுடைய கடம்பை நகரில்‌ உள்ள பெருங்கோயிலான தூங்கானைமாடம்‌ சென்று அங்கு எழுந்தருளியுள்ள சிவபெருமானைத்‌ தொழுவீர்களாக.

9

நோயும் பிணியும் அருந்துயரமும் நுகருடைய வாழ்க்கை யொழியத்தவம்வாயும் மனங்கருதி நின்றீரெல்லாம் மலர்மிசைய நான்முகனும் மண்ணும்விண்ணும்தாய அடியளந்தான் காணமாட்டாத் தலைவர்க் கிடம்போலுந் தண்சோலைவிண்தோயும் கடந்தைத் தடங்கோயில்சேர் தூங்கானை மாடம் தொழுமின்களே.

சொற்பிரிப்பு

நோயும் பிணியும் அருந்துயரமும் நுகர் உடைய வாழ்க்கை ஒழியத் தவம்வாயும் மனம் கருதி நின்றீர் எல்லாம் மலர்மிசைய நான்முகனும், மண்ணும் விண்ணும்தாய அடி அளந்தான், காணமாட்டாத் தலைவர்க்கு இடம்போலும் தண் சோலை விண்தோயும் கடந்தைத் தடங்கோயில் சேர் தூங்கானை மாடம் தொழுமின்களே!

உரை

உடலை வருத்தும்‌ நோய்களையும்‌ மனத்தை வருத்தும்‌ கவலைகளையும்‌ அவற்றால்‌ வரும்‌ துன்பங்களையும்‌ அனுபவிக்கும்‌ இந்த வாழ்க்கை நீங்குவதற்கு உரிய தவம்‌ புரியும்‌ எண்ணத்துடன்‌ நீவிர்‌ நிற்கின்றீர்‌. நீவீர்‌ அனைவரும்‌ தாமரை மலர்மேல்‌ உறையும்‌ நான்முகனும்‌, மண்ணையும்‌ விண்ணையும்‌ தன்‌ காலால்‌ அளந்த திருமாலும்‌, காணமாட்டாத தலைவனாகிய சிவபெருமானுக்கு உரிய இடமாகிய விண்‌ தோயும்‌ சோலைகளால்‌ சூழப்பட்ட கடந்தை நகரில்‌ உன்ள திருத்தூங்கானை மாடப்பெருங்கோயில்‌ சென்று அங்கு அருள்பாலித்து வரும்‌ சிவபெருமானைத்‌ தொழுவீர்களாக.

10

பகடூர்பசி நலிய நோய்வருதலாற் பழிப்பாய வாழ்க்கை யொழியத்தவம்முகடூர் மயிர்கடிந்த செய்கையாரும் மூடுதுவ ராடையாரும் நாடிச்சொன்னதிகழ்தீர்ந்த பொய்ம்மொழிகள் தேறவேண்டா திருந்திழை யுந்தானும் பொருந்திவாழும்துகள்தீர் கடந்தைத் தடங்கோயில்சேர் தூங்கானை மாடம் தொழுமின்களே.

சொற்பிரிப்பு

பகடு ஊர்பசி நலிய, நோய் வருதலால், பழிப்பு ஆய வாழ்க்கை ஒழிய, தவம்முகடு ஊர் மயிர் கடிந்த செய்கையாரும் மூடு துவர் ஆடையாரும் நாடிச் சொன்னதிகழ் தீர்ந்த பொய்ம்மொழிகள் தேறவேண்டா; திருந்திழையும் தானும் பொருந்தி வாழும்துகள் தீர் கடந்தைத் தடங்கோயில் சேர் தூங்கானை மாடம் தொழுமின்களே!

உரை

பெரும்பசியால்‌ நோய்கள்‌ வந்து வருத்துவதால்‌ பழிக்கத்தக்க இவ்வாழ்க்கை நீங்கத்‌ தவம்‌ செய்ய நீவீர்‌ விரும்புகின்றீர்‌. தலை உச்சி முடியைப்‌ பிடுங்கும்‌ சமணரும்‌, உடலைக்‌ காவி நிற ஆடையால்‌ போர்த்த புத்தர்களின்‌ ஞானமற்ற பொய்மொழிகளை நம்ப வேண்டாம்‌. இறைவன்‌ இறைவியோடு பொருந்தி வாழும்‌ குற்றமற்ற கடந்தை நகர்த்‌ தடங்கோயிலாகிய தூங்கானைமாடம்‌ சென்று, தவம்‌ செய்து, அங்குள்ள சிவபெருமானைத்‌ தொழுவீர்களாக.

11

மண்ணார் முழவதிரும் மாடவீதி வயற்காழி ஞானசம் பந்தன்நல்லபெண்ணா கடத்துப் பெருங்கோயில்சேர் பிறையுரிஞ்சுந் தூங்கானை மாடமேயான்கண்ணார் கழல்பரவு பாடல் பத்துங் கருத்துணரக் கற்றாருங் கேட்டாரும்போய்விண்ணோ ருலகத்து மேவிவாழும் விதியது வேயாகும் வினைமாயுமே.

சொற்பிரிப்பு

மண் ஆர் முழவு அதிரும் மாட வீதி வயல் காழி ஞானசம்பந்தன், நல்லபெண்ணாகடத்துப் பெருங்கோயில் சேர் பிறை உரிஞ்சும் தூங்கானை மாடம் மேயான்கண் ஆர் கழல் பரவு பாடல் பத்தும் கருத்து உணரக் கற்றாரும் கேட்டாரும் போய்,விண்ணோர் உலகத்து மேவி வாழும் விதி அதுவே ஆகும்; வினை மாயுமே.

உரை

கருஞ்சாந்து பூசப்பட்ட முழவு ஒலி செய்யும்‌ மாடவீதிகளைக்‌ கொண்டுள்ள வயல்கள்‌ சூழ்ந்த சீகாழிப்‌ பதியில்‌ தோன்றியவர்‌ ஞானசம்பந்தர்‌. இவர்‌, பெண்ணாகடத்தில்‌ பெருங்கோயிலாக விளங்கும்‌ வானளாவிய திருத்தூங்கானை-மாடத்து இறைவன்‌ சிவபெருமானின்‌ திருவடிகளில்‌ போற்றிப்‌ பாடியுள்ளார்‌. இவர்‌ பாடிய பாடல்கள்‌ பத்தையும்‌ கற்றவரும்‌, கேட்டவரும்‌, விண்ணவர்‌ உலகத்தை அடைந்து வாழ அப்பாடல்களே தவப்பயன்‌ தரும்‌. வினைகள்‌ அழியும்‌.