திருவேற்காடு

மிகவும்‌ உயர்ந்த மெய்ப்பொருளை அன்போடு உள்ளத்தில்‌ எண்ணினால்‌, அது நற்கதிக்கு செல்லும்‌ நுழைவாயிலாக அமைகிறது. அத்தகைய மெய்ப்பொருளாய்‌, வெண்மையான ஒளி வடிவினனாய்‌, சிவபெருமான்‌ திருவேற்காட்டில்‌ எழுந்தருளியுள்ளார்‌. இந்த ஒளிமயமான இறைவனை நினைந்தவர்கள்‌ இவ்வுலகில்‌ உயர்ந்தவர்‌ ஆவர்‌. அந்த ஒளிமயமான இறைவனைக்‌ கண்டு தெளிந்தவர்கள்‌ தேவர்கள்‌ ஆவர்‌.

சிவபெருமான்‌ ஆடுதற்குரிய பாம்பைத்‌ தன்‌ இடையிற்‌ கட்டியுள்ளார்‌. அவர்‌ அளவற்ற பல்வேறு வடிவங்களைக்‌ கொண்டவர்‌. இந்த திருவேற்காடு இறைவனைப்‌ புகழ்ந்து பாடி வணங்குபவர்கள்‌, இவ்வுலகில்‌ பெருமை பொருந்திய செல்வர்கள்‌ ஆவர்‌.

சிவபெருமான்‌ பூதகணங்கள்‌ பாட, சுடுகாட்டில்‌ நடனம்‌ ஆடுபவர்‌. வேதங்களை அருளிய ஞானாசிரியன்‌. இந்த திருவேற்காட்டு நாதரை மலர்களும்‌, சந்தனமும்‌, நறும்புகையும்‌ கொண்டு வழிபட்டவர்களுக்கு துன்பங்கள்‌ வாரா.

சிவபெருமான்‌ ஆழமான கடல்‌ என்று சொல்லத்தக்க கங்கை நதியை மறைக்கும்‌ விழுது போன்ற சடைமுடியை உடையவர்‌. இந்த திருவேற்காட்டு இறைவனைப்‌ பணிவான உள்ளத்தோடு வணங்கித்‌ துதுப்பவர்களின்‌ பாவங்கள்‌ அழிந்து ஓழியும்‌.

மார்கண்டேயர்‌ பூசித்து, சிவபெருமானே முழுமுதற்‌ கடவுள்‌ என்பதைக்‌ காட்டியும்‌, காலன்‌' அதனை உணராமல்‌ மயங்கி அவன்‌ உயிரைக்‌ கவர வந்தான்‌. அந்தக்‌ காலனை அழித்த சிவபிரான்‌ உறையும்‌ இடம்‌ திருவேற்காடு. இந்த இறைவனைப்‌ பாடல்கள்‌ பாடிப்‌ பணிந்து வழிபட வல்லவர்கள்‌ தம்‌ வினைகளை விரைவில்‌ ஓட்டியவர்‌ ஆவார்கள்‌.

திருவேற்காட்டுச்‌ சிவபெருமான்‌ ஒளி பொருந்திய வேலைக்‌ கையில்‌ கொண்டு உள்ளார்‌. தோலினால்‌ அமைந்த உடைகளைக்‌ கட்டியும்‌ போர்த்தும்‌ உள்ளார்‌. ஆகம நூல்களில்‌ விதித்தவாறு வழிபட்டு ஏத்த வல்லவர்க்கு மயங்கச்‌ செய்யும்‌ வினைகள்‌ மாய்ந்து ஒழியும்‌.

திருவேற்காட்டுச்‌ சிவபெருமான்‌ வளமை பொருந்திய முப்புரங்களும்‌ அழிந்து ஒழியுமாறு அம்பை. எய்தவர்‌. ஒப்பற்ற மேரு மலையை வில்லாக ஏந்தியவர்‌. இந்தப்‌ பெருமானைப்‌ புகழ்ந்து சொல்ல வல்லவர்கள்‌ பரந்து விரியும்‌ மனதுடையவர்கள்‌. அத்தலத்தில்‌ சென்று தரிசிக்க வல்லவர்கள்‌ நீண்ட ஆயுள்‌ பெறுவர்‌.

சிவபெருமான்‌ இளமையான வெண்மை நிறங்கொண்ட பிறைமதியைத்‌ தனது திருமுடியில்‌ சூடியவர்‌. அவர்‌ ஒரு வீரனாக திருவேற்காட்டில்‌ எழுந்தருளியுள்ளார்‌. இப்பெருமானை அன்போடு வழிபடுபவர்கள்‌ நிச்சயமாக அவரது சிவந்த திருவடிகளைச்‌ சேர்வர்‌.

சிவபெருமான்‌, பிரமனின்‌ தலை ஓட்டில்‌ பலி ஏற்கின்ற சமர்த்தர்‌. இவர்‌ உறைகின்ற தலம்‌ திருவேற்காடு. இப்பெருமான்‌, அரக்கனாகிய இராவணனின்‌ ஆணவத்தைத்‌ தன்‌ கால்‌ விரலால்‌ அடர்த்து நெருக்கியவர்‌. இப்பெருமானை நினைந்து வழிபாடு செய்யுங்கள்‌.

திருவேற்காட்டில்‌ உறையும்‌ சிவபெருமான்‌, ஒப்பற்ற தாமரை மலர்மேல்‌ உறையும்‌ நான்முகனையும்‌, திருமால்‌ ஆகியவர்களையும்‌ வெற்றி கொள்பவர்‌. இந்த இறைவனைப்‌ பற்றிய மொழியே ஈறிலா மொழியாக அதனை அழகுபெறக்‌ கூறினார்க்குக்‌ குற்றமில்லை.

விரிந்த மலர்களை உடைய மாஞ்சோலைகள்‌ சூழ்ந்த திருவேற்காட்டை அடையுங்கள்‌. அங்கு எழுந்தருளியுள்ள சிவபெருமானின்‌ திருவடியைத்‌ தியானியுங்கள்‌. சீகாழிப்‌ பதியுள்‌ தோன்றிய ஞானசம்பந்தன்‌ உரைத்த செந்தமிழ்‌ பதிகத்தால்‌ பாடிப்‌ போற்றுங்கள்‌. நன்மைகள்‌ விளையும்‌.