திருப்பாற்றுறை

திருப்பாற்றுறையில்‌ உறையும்‌ ஆதி முதல்வனான சிவபெருமான்‌ கார்காலத்தில்‌ மலரும்‌ கொன்றை மலர்‌ மாலை சூடிய திருமுடியினராக விளங்குகின்றார்‌. உலக மக்கள்‌ நாள்தோறும்‌ இங்கு வந்து வழிபடுகின்றனர்‌. இவர்‌, தெவிட்டாத, அன்பு கனிந்த, நிறைவான நம்‌ சிந்தையைத்‌ தம்மிடமே செல்லச்‌ செய்தார்‌.

எல்லாராலும்‌ தொழப்படும்‌ எம்‌ ஈசனாகிய சிவபெருமான்‌ திருப்பாற்றுறையில்‌ உறைகின்றார்‌. அவர்‌ பற்கள்‌ நீங்காதிருந்த வெண்மையான தலை ஓட்டை அணிந்த செல்வந்தர்‌. அவர்‌ நல்லவர்‌. கையில்‌ தீயை ஏந்து இருப்பதால்‌ தீயர்‌ எனவும்‌ போற்றப்படுபவர்‌. நிறைந்த நல்ல மலர்‌ மாலையைச்‌ சூடியவர்‌.

இயற்கையில்‌ பண்ணின்‌ இசை போன்று வண்டினங்கள்‌ முரலிக்‌ கொண்டிருக்கும்‌ திருப்பாற்றுறையில்‌ எக்காலத்திலும்‌ உறைபவர்‌ சிவபெருமான்‌. இவர்‌, தவழும்‌ பிறைச்‌ சந்திரன்‌ விளங்கும்‌ திருமுடியினர்‌ ஆவர்‌. இவர்‌ என்‌ மனதின்‌ எண்ணத்தில்‌ இருந்து என்‌ எழில்‌ நலம்‌ அனைத்தையும்‌ கவர்ந்து கொண்டார்‌.

சிவபெருமான்‌ மலர்களையும்‌ பிறைமதியையும்‌ தரித்த திருமுடியினர்‌. பகைவராய்‌ வந்த அசுரர்களின்‌ முப்புரங்களை தனது ஒரே கணையால்‌ அழித்தவர்‌. பாவங்களைப்‌ போக்கும்‌ தீர்த்தங்கள்‌ நிறைந்த திருப்பாற்றுறை இறைவன்‌ ஒருவரே. என்‌ சிந்தை முழுவதையும்‌ ஆட்கொண்டு இருப்பவர்‌.

சிவபெருமான்‌ தன்னுடைய ஒரு பாதியில்‌ பெண்ணை உடையவர்‌. நாகத்தை அணிகலனாகக்‌ கொண்ட நலமுடையவர்‌. வானகத்தே தோயும்‌ பிறைமதியை முடியிற்சூடி, மகிழ்ந்து வந்து, எனது உடலைப்‌ பொன்னிறமாக்கினார்‌. பசலை பூக்கச்‌ செய்தவராவர்‌.

சிவபிரானது தொண்டர்கள்‌ தம்‌ திருவடிகளைப்‌ போற்றத்‌ திருப்பாற்றுறையுள்‌ வீற்றிருக்கின்றார்‌. அவர்‌ வேதங்களை அருளிய விகிர்தர்‌. அலரும்‌ பருவத்து உள்ள அரும்புகளைக்‌ கொண்ட, பொன்னிறம்‌ திகழும்‌ கொன்றை மலர்களைத்‌ தரித்துள்ள திருமுடியினர்‌. இந்தத்‌ தலைவனான சிவபிரானாரே என்பால்‌ விரும்பி வந்து என்‌ அழகினைக்‌ கவர்ந்தவராவார்‌.

பண்‌ இசை போன்ற பாடல்களை முரலுகின்ற வண்டினங்கள்‌ நிறைந்த திருப்பாற்றுறையில்‌ சிவபெருமான்‌ ஆடுதலில்‌ வல்ல நாகப்பாம்பைத்‌ தன்‌ திருமேனியில்‌ பல இடங்களிலும்‌ கட்டி உள்ளார்‌. உலர்ந்த வெண்மையான தலைஓடுகளை மாலையாகச்‌ சூடியுள்ளார்‌. பெரிய இடபத்தின்‌ மேல்‌ ஏறிவந்து என்‌ அழகைக்‌ கவர்ந்து செல்லும்‌ கொள்கையினை உடையவர்‌ ஆயினார்‌.

திருப்பாற்றுறை இறைவனான சிவபெருமான்‌ கடல்‌ நஞ்சைக்‌ கண்டத்தில்‌ அடக்கியவர்‌. முல்லை மலர்‌ சூடிய மைந்தர்‌. வெம்மையோடு கூடிய மேனியை உடையவர்‌. திருவெண்ணீறு அணிந்தவர்‌. என்‌ எழிலைக்‌ கவர்ந்துப்‌ பின்‌ எனக்குப்‌ பிரிவுத்‌ துன்பத்தைத்‌ தந்தவர்‌ ஆவர்‌.

நீலோற்பவ மலர்கள்‌ நிறைந்த நீர்நிலைகள்‌ உள்ள தலம்‌ திருப்பாற்றுறை. இங்கு வானகத்தே விளங்கும்‌ வெண்மையான பிறைமதியைச்‌ சூடிய மைந்தராகச்‌ சிவபெருமான்‌ எழுந்தருளியுள்ளார்‌. இவர்‌, பன்றியும்‌ அன்னமுமாய்‌ அடிமுடி தேடிய திருமால்‌, பிரமன்‌ ஆகியோருக்கு தீப்பிழம்பாக ஓங்கி நின்ற அண்ணலார்‌ ஆவார்‌.

பசுமையான குருக்கத்திக்‌ கொடிகள்‌ சூழ்ந்துள்ள திருப்பாற்றுறை மைந்தரான சிவபெருமான்‌, முன்னரே மலைமகளை மணந்த மணானர்‌ ஆவார்‌. ஆயினும்‌, அவர்‌ தம்‌ மேனிமீது வெந்த திருநீறு பூசியவராய்‌, கையில்‌ வேலை ஏந்தியவராய்‌, மார்பில்‌ பூணூல்‌ அணிந்தவராய்‌ வந்து என்‌ அழகினைக்‌ கவர்ந்து சென்றார்‌.

பக்தர்கள்‌ நிறைந்துள்ள தலம்‌ திருப்பாற்றுறை. இங்கு, ஆயிரம்‌ திருநாமங்களை உடைய சிவபெருமான்‌ எழுந்தருளியுள்ளார்‌. பக்தனாகிய ஞானசம்பந்தன்‌ பாடிய இனிய இத்தமிழ்‌ பாடல்கள்‌ பத்தையும்‌ பாடிப்‌ போற்றுங்கள்‌.