சிவபெருமான் கடலில் ஊறிவந்த நஞ்சினை உண்டவர் ஆதலால் ஒப்பற்ற நீலமணி போன்ற கண்டத்தை உடையவர். உமையம்மையோடு கூடிய திருநீறு பூசிய திருமேனியை உடையவர். இவர் சேற்று வளம் நிறைந்த வயல்களால் சூழப்பெற்ற அழகிய திருமாற்பேற்றின் இறைவனாவர்.
சிவபெருமானே! நீவீர் வாய்க்கால் மடைகளில் நீர் நிறைந்து விளங்கும் திருமாற்பேற்றை உமது இருப்பிடமாகக் கொண்டிருக்கின்றீர். சிறந்த மாலைகளைத் தொடுத்தும் அதனை ஏந்திய கையினராயும், காலையிலும் மாலையிலும் உம்மைத் தலைவராக எண்ணி நினைந்து தொழுகின்ற அடியார்கள் உம்மை வந்து அடைகின்றனர்.
கருநிறம் பொருந்திய நஞ்சை உண்டு, நீலகண்டராய்த் திருமாற்பேற்றில் வீற்றிருக்கின்ற சிவபெருமானே! உமது அடியார்கள், நீவீர் “படம் பொருந்திய பாம்பை பிடித்து ஆட்டும் கைகளை உடையவர்” என்று சொல்லி வணங்குகின்றனர்.
இத்தலத்தில் திருமால் வழிபாடு செய்து அருள் பெற்றதால் இந்த ஊர் திருமாற்பேறு எனப் பெயர் பெற்றது. இங்கு எழுந்தருளி இருக்கும் நீலநிறம் பொருந்திய கண்டத்தை உடைய சிவபெருமானே! மேன்மைமிக்க சான்றோர்கள், அதிகமான நறுமலர்களைக் கொண்டு விருப்பத்தோடு அருச்சித்து, உம்மையே சரணடைகிறோம் என்று வழிபடுகின்றனர்.
திருமாற்பேற்றுச் சிவபெருமான் உமையம்மையை ஒருபாகமாகக் கொண்டு திருநீறு பூசியவராய் விளங்குகின்றார். தேவர்கள் , இப்பெருமானை, இந்த ஓளியான மாணிக்கமணி எத்தகையோர்க்கும் இன்பமே செய்யும் என எப்போதும் வெகுவாகப் புகழ்ந்து போற்றி வழிபடுகின்றனர்.
அலைகள் பொருந்திய பாலியாற்றின் தென்கரையில் உள்ள இருமாற்பேற்றின் அரசனாக வீற்றிருக்கும் சிவபெருமானே! நாள்தோறும் நினது பெருந்தன்மையை வியந்து உரையாதார் இல்லை. நாள்தோறும் உன் பெருமைகளைப் பரவாதவர் இல்லை. அருள் நல்குவீராக.
இந்தப் பாடல் மூலத்தில் கிடைக்கப்பெறவில்லை. பாடல் வரிகள் இங்கே சேர்க்கப்படவில்லை.
பாடல் கிடைக்கப்பெறவில்லை
எமது திருமாற்பேற்றுச் சிவபெருமான், இலங்கை அரசனான இராவணனின் புகழை மங்கச் செய்தவர். பின்னால், அவன்தன் பிழையை உணர்ந்து மன்னித்தருள வேண்டியபோது, அவனுக்கு வரங்கள் பலவற்றையும் அளித்தருளியவர். இப்பெருமானின் திருவடிகளைப் போற்றிட நம் பாவம் நீங்கும்.
திருமால், பிரமன் ஆகிய இருவரும் அடிமுடியைத் தேடித் திரிந்த போதும், ஒருவராலும் அறிய இயலாத இயல்பினன். இத்தகைய இயல்பினை உடைய திருமாற்பேற்றுச் சிவபெருமானின் விரிந்த திருவடிகளைப் போற்றித் துதுப்பவரின் வினைகள் சிதறி அழியும்.
ஆடையை உடம்பில் போர்த்து அலைபவரும், கைகளில் உணவை ஏற்று உண்ணும் உடம்பில் போர்த்து அலைபவரும், கைகளில் உணவை ஏற்று உண்ணும் இயல்புடைய இழிந்த வர்களான புத்தர் மற்றும் சமணர்களின் சொற்களை உண்மை என்று ஏற்காதீர்கள். ஒளி நிறைந்த அழகிய திருமாற்பேற்றின் ஈசனான சிவபெருமானைப் புகழ்ந்து போற்றுங்கள்.
திருமாலும் சந்திரனும் தங்கியிருந்து பணிசெய்து வழிபடும் நிலைபேறுடைய திருமாற்பேற்றுள் விளங்குபவர் சிவபெருமான். நிலைத்த காழி மாநகரில் தோன்றிய ஞானசம்பந்தன் இப்பெருமானைப் போற்றிப் பாடினார். இத்திருப்பதிகத்தை ஓதினால் வினைகள் தறி அழியும்.