1
போகமார்த்த பூண்முலையாள் தன்னோடும் பொன்னகலம்பாகமார்த்த பைங்கண்வெள் ளேற்றண்ணல் பரமேட்டிஆகமார்த்த தோலுடையன் கோவண ஆடையின்மேல்நாகமார்த்த நம்பெருமான் மேயது நள்ளாறே.
சொற்பிரிப்பு
போகம் ஆர்த்த பூண் முலையாள் தன்னோடும் பொன் அகலம்பாகம் ஆர்த்த பைங்கண் வெள் ஏற்று அண்ணல், பரமேட்டி,ஆகம் ஆர்த்த தோல் உடையன், கோவண ஆடையின் மேல்நாகம் ஆர்த்த நம்பெருமான், மேயது நள்ளாறே.
உரை
நம் பெருமானாகிய சிவபெருமான், இன்பத்திற்கு நிலைக்களனாய் உள்ளனவும், அணிகலன்கள் பொருந்தியதுமான தனங்களை உடைய உமையம்மையை, தம்முடைய அழகிய திருமேனியின் இடப்பாகத்தில் நிறைந்து இருக்கச் செய்தவர். குளிர்ந்த கண்களையும் வெண்மையான நிறத்தையும் உடைய எருதைத் தனது வாகனமாகக் கொண்ட தலைவர். மேலானவர். திருமேனியில் தோல் ஆடையைப் போர்த்தவன். இடுப்பில் உள்ளாடையாகக் கட்டிய கோவண ஆடையின்மேல் நாகத்தைக் கச்சாக இறுக்கிக் கட்டியவர். இந்த நம்பெருமான் எழுந்தருளி இருக்கும் இடம் திருநள்ளாறு.