திருஅதிகைவீரட்டானம்

சிவபெருமானைப்‌ பருத்த குள்ளமான பூதகணங்கள்‌ சூழ்ந்து இருக்கின்றன. அவர்தம்‌ கையில்‌ அனல்‌ ஏந்தியிருக்கின்றார்‌. வண்டுகள்‌ மருளிய இந்தளம்‌ என்னும்‌ பண்ணைப்‌ பாடுகின்றன. அவர்‌ பொன்‌ போன்று விரிந்து மலர்ந்த கொன்றை மலர்‌ மாலையை அணிந்திருக்கின்றார்‌. கெண்டை மீன்கள்‌ துள்ளி விளையாடும்‌ தெளிந்த நீரை உடைய, கெடில நதியின்‌ வடகரையில்‌ உள்ள, திருவதிகை வீரட்டானத்தில்‌ இப்பெருமான்‌ ஆடுகின்றார்‌.

தாமரை அரும்பு, குரும்பை ஆகியவற்றை தன்‌ அழகால்‌ வென்ற மென்மையான தனங்களையும்‌, கரும்பு போன்ற இனிய மொழிகளையும்‌ உடைய உமையம்மையோடு சிவபெருமான்‌ கூடியிருக்கின்றார்‌. கையில்‌ அனல்‌ ஏந்தி ஆடிக்‌ கொண்டிருக்கின்றார்‌. வண்டுகள்‌ தேன்‌ உண்ணும்‌ இதழ்‌ விரிந்த கொன்றை மலர்‌ மாலை அணிந்திருக்கின்றார்‌. இத்தகைய சிவபெருமான்‌ ஒளி மயமான பொன்‌ போன்ற சடைகள்‌ தாழத்‌ தன்னால்‌ பெரிதும்‌ விரும்பப்படும்‌ அதிகை வீரட்டானத்தே ஆடுகிறார்‌.

சிவபெருமான்‌, வெற்றியையும்‌, அழல்போலும்‌ கொடிய தன்மையையும்‌ கொண்ட நாகத்தை தம்‌ இடையில்‌ பொருந்தக்‌ கட்டி அதை ஆடுமாறு செய்கிறார்‌. அவர்‌ வேதங்களில்‌ பாட வல்லவர்‌. படுதம்‌ என்னும்‌ கூத்தினை ஆடிக்கொண்டு பலிதேடித்‌ இரிகறார்‌. இத்தகைய சிவபெருமான்‌, மதி தோய்ந்து செல்லுமாறு உயர்ந்த மாடவீடுகளை உடைய திருவதிகை வீரட்டானத்தில்‌, பல்வேறு வேடங்களில்‌ வல்லவனாக ஆடுகிறார்‌.

சிவபெருமான்‌ பகைவரது திரிபுரங்களை எரித்தருளிய இறைவர்‌; இளம்பிறையை முடியில்‌ சூடியிருக்கிறார்‌.. அத்தகைய இறைவன்‌ கையில்‌ அனல்‌ ஏந்தி கருஞ்சாந்து இடப்பட்ட முழவு முழங்க, பண்ணமைப்புடைய வேதங்களைச்‌ சான்றோர்‌ ஓத, தேவர்கள்‌ போற்ற திருவதிகை வீரட்டானத்தே நின்று ஆடுகின்றார்‌.

கரிந்த புல்லிய ஊர்ப்புறமாகிய இறந்தவர்களை எரிக்கும்‌ சுடுகாட்டில்‌, ஒரு திருக்கரத்தில்‌ எரி ஏந்து சிவபெருமான்‌ ஆடுகிறார்‌. திருமகள்‌ நிலைபெற்ற திருவதிகையில்‌ உள்ள வீரட்டானத்தில்‌ எரிபோன்று சிவந்த தன்‌ சடைகள்‌ தாழ்ந்து விரிய தலையில்‌ கங்கையைச்‌ சூடிக்‌ கொண்டு ஆடுகிறார்‌.

சிவபெருமான்‌ அசைந்து எரியும்‌ அனலை அழகிய கையில்‌ பொருந்தி ஏந்தி விளையாடுகிறார்‌. இளங்கொம்பு போன்ற உமையம்மையோடு இசை பாடுகிறார்‌. வளமை உள்ள புனல்‌ சூழ்ந்த வயல்களை உடைய திருவதிகை வீரட்டானத்தில்‌ முடிமிசை விளங்கும்‌ பிறைசூடிய பெருமான்‌ ஆடுகின்றார்‌.

பரம்பொருளாகிய பரமன்‌ தன்‌ திருவடிகளைப்‌ பலரும்‌ பரவி ஏத்தி வணங்கவும்‌, பூதகணங்கள்‌ புடை சூழவும்‌, புலித்தோலை உடையாகக்‌ கொண்டும்‌ இருக்கிறார்‌. உமையம்மை கதம்‌ பாடக்‌ கெடில நதியின்‌ வடகரையில்‌ வேதமுதல்வனாய்‌ வீரட்டானத்தில்‌ ஆடுகின்றார்‌.

கற்கள்‌ பொருந்திய கயிலை மலையை எடுத்த இராவணனின்‌ பெரிய தோன்களின்‌ அழகு வாடுமாறு அவற்றை நெரித்தவர்‌ சிவபெருமான்‌ பின்னர்‌ அவனுக்கு அருள்பல செய்தவர்‌. முப்புரங்களை வில்லால்‌ எய்து அழித்துத்‌ தனது பெருவீரத்தைப்‌ புலப்படுத்தியவர்‌. இவ்வாறான இறைவர்‌ பற்கள்‌ பொருந்திய பிளந்த வாயை உடைய வெள்ளிய தலை ஓட்டை மாலையாகச்‌ சூடி திருவதிகை வீரட்டானத்தில்‌ ஆடுகின்றார்‌.

தீப்பிழம்பாய்‌ ஓங்கி நிமிர்ந்தவனும்‌, திருநீற்றை அணிந்தவனும்‌, முப்புரிநூலை அணிந்து பேருருக்‌ கொண்ட சிவபெருமானைப்‌ திருமாலும்‌, நான்முகனும்‌ காண முடியவில்லை. மணம்‌ கமழும்‌ நீலப்பூக்கள்‌ திருவதிகையில்‌ மலர்ந்து விளங்குகின்றன. முடை நாற்றமுடைய தலையோட்டைக்‌ கையில்‌ ஏந்திக்‌ கொண்டு திருவீரட்டானத்தில்‌ சிவபெருமான்‌ ஆடுகின்றான்‌.

புத்தர்கள்‌ அரச மரத்தையும்‌, தழைத்த அசோக மரத்தையும்‌ புனித மரமாகக்‌ கொண்டு, குண்டிகையாகச்‌ சுரைக்குடுக்கையை ஏந்தித்‌ திரிகின்றனர்‌. சமணர்கள்‌ ஆடையின்றித்‌ திரிகின்றனர்‌. அவர்களின்‌ பொருந்தாத வார்த்தைகளைக்‌ கேளாதீர்கள்‌. மணம்‌ கமழும்‌ மாலை அணிந்த சிவபிரான்‌ உமையம்மையோடு உடனாய்‌ அதிகை வீரட்டானத்தில்‌ ஆடுகிறான்‌. அவனை வணங்குங்கள்‌.

புலிநகக்‌ கொன்றைச்‌ செடிகளின்‌ மலர்களின்‌ மணம்‌ கமழும்‌ சீகாழிப்‌ பதியில்‌ தோன்றியவர்‌ ஞானசம்பந்தன்‌. நாணல்களால்‌ கரைகள்‌ அரிக்கப்படாமல்‌ காக்கப்படும்‌ தெளிந்த நீர்வளம்‌ உடையது திருவதிகை வீரட்டானம்‌. அங்கே, பாதங்களில்‌ சிலம்பு அணிந்து ஆடும்‌ சிவபெருமானைப்‌ போற்றிப்‌ பாடினார்‌ ஞானசம்பந்தன்‌. இத்தமிழ்‌ மாலையை வாழ்விற்குத்‌ துணையாகக்‌ கொண்டவர்களுக்கு வினை இல்லை.