திருப்பாச்சிலாச்சிராமம்

சிவபெருமான்‌ முழுமதியினது பாகமாக விளங்கும்‌ ஒரு கலைச்சந்திரனை தம்‌ ஒளி பொருந்திய சடையில்‌ விளங்கித்‌ திகழுமாறு சுற்றிக்‌ கட்டியுள்ளார்‌. அவர்‌ பாம்புகளை அணிந்துள்ளார்‌. பூதங்கள்‌ தம்மைச்‌ சூழ்ந்துவர எல்லோரிடமும்‌ சென்று பலியேற்பவராய்‌ இருக்கின்றார்‌. அழகிய தோற்றத்துடன்‌ விளங்கும்‌ திருப்பாச்சிலாச்சிராமத்தில்‌ தங்கியிருக்கின்ற நீலமணி போன்ற கழுத்துடையவரே! கொல்லி மழவன்‌ மகளாகிய இப்பெண்ணை இவ்வாறு மயங்கச்‌ செய்வது உமக்கு மகிமையாகுமோ என்று பாடியருளினார்‌.

மான்தோலை இடையில்‌ ஆடையாக உடுத்தி இருக்கின்றவர்‌, நெருப்பு, சூரியன்‌, சந்திரன்‌ இவைகளைக்‌ கண்களாகக்‌ கொண்டுள்ளார்‌. தலைமாலை அணிந்துள்ளார்‌. மார்பில்‌ மாலை அணிந்துள்ளார்‌. உயிர்களுக்குத்‌ தலைவர்‌ இவர்‌ என்று சொல்லத்‌ தக்கவராய்‌ இருக்கின்றார்‌. நீர்வளம்‌ நிரம்பிய சோலைகள்‌ சூழ்ந்த பாச்சிலாச்சிராமத்தில்‌ எழுந்தருளி, இலை வடிவமான வேலை ஏந்திய சிவபெருமானாகிய இவர்‌, இந்தப்‌ பெண்‌ வாடுமாறு துன்பப்படுத்துவது இவரது பெருமைக்குப்‌ பொருந்துவதாமோ?

சிவபெருமானார்‌ உலகமெல்லாம்‌ அழிந்து ஒழியும்‌ ஊழிக்காலத்து இருளில்‌ கொடிய தீயில்‌ நடனம்‌ ஆடுபவர்‌. தலைமாலை முதலியவற்றை விரும்புவர்.‌ வெண்ணூல்‌ பூணுபவர்‌. நஞ்சை உண்டதால்‌ அவர்‌ கழுத்து நீலநிறமாயிற்று. அன்போடு அவரை விரும்பி நினைத்தவர்கள்‌ நெஞ்சை இடமாகக்‌ கொண்டு எழுந்தருள்பவர்‌. மேகங்கள்‌ தவழ்ந்து வரும்‌ மாளிகைகள்‌ சூழ்ந்த திருப்பாச்சிலாச்சிராமத்தில்‌ எழுந்தருளியவர்‌. செழுமையான தீயின்‌ நிறத்தை உடையவர்‌. இவருடைய புகழுக்கு, தங்க வளையல்‌ அணிந்த மழவன்‌ மகளாகிய இப்பெண்ணை வருத்துவது பொருந்துவதோ?

சிவபெருமானார்‌ கார்காலத்தில்‌ மலரும்‌ கொன்றை மலர்‌ மாலையைத்‌ திருமேனியில்‌ அணிந்தவர்‌. பிரிந்து வாழும்‌ கணவன்‌ / மனைவிகளுக்குத்‌ துன்பந்தரும்‌ தூய பிறைச்‌ சந்திரனைத்‌ தலையில்‌ சூடியவர்‌. அழகாய புனிதர்‌ என்று சொல்லும்‌ படியானவர்‌. எழிலார்ந்த அழகிய சோலைகள்‌ சூழ்ந்த திருப்பாச்சிலாச்சிராமத்து அடியவர்களுக்கு மனநிறைவு தருபவர்‌. இப்பெருமானுக்கு ஒரு பெண்‌ வாடும்படி செய்து மயக்குறுத்துவது மாண்பாகுமோ? பிறைக்கண்ணியை அணிந்து அழகாய புனிதர்‌ இவர்‌ என

சிவபிரான்‌ மண்ணுலகில்‌ அடியார்களால்‌ பால்‌ நறுமணமுள்ள நெய்‌ ஆகியவற்றைக்‌ கொண்டு அபிஷேகம்‌ செய்வதை விரும்புகின்றார்‌. வளர்ந்த சடைமுடியின்‌ மேல்‌ கங்கை நதியைச்‌ சூடியவர்‌. மொந்தை, முழா, குழல்‌, தாளம்‌, வீணை முதலான வாத்தியங்கள்‌ முழங்க வீற்றிருப்பவர்‌. ஆந்தை போன்ற விழிகளை உடைய சிறு பூதகணங்கள்‌ இவரைச்‌ சூழ்ந்து இருக்கின்றன. இவர்‌ சந்தனக்‌ கலவையை அணிந்த மார்பினர்‌. திருப்பாச்சிலாச்சிராமத்தில்‌ உறைகின்றவர்‌ இவர்‌. இந்தப்‌ பெண்ணை வாடச்‌ செய்து தம்‌ வலிமையைக்‌ காட்டுவது ஏற்புடையதோ?

சிவபிரான்‌ திருநீற்றை உடல்‌ முழுவதும்‌ பூசியவர்‌. நிறைந்த சடைகள்‌ தாழ்ந்தவாறு விளங்குபவர்‌. தமது நெற்றிக்‌ கண்ணினால்‌ மறக்கருணை. காட்டி பாவங்களை போக்குபவர்‌. கங்கையைத்‌ தலையில்‌ அணிந்தவர்‌. ஆடுகின்ற பாம்பைக்‌ கையில்‌ எடுத்து ஆட்டிக்‌ கொண்டு இருப்பவர்‌. ஐந்து விரல்‌ அளவுள்ள கோவண ஆடை அணிந்தவர்‌. பால்‌ போன்ற வெள்ளிய மேனி உடையவர்‌. பூதகணங்கள்‌ தம்மைச்‌ சூழ திருப்பாச்சிலாச்சிராமத்தில்‌ விடை ஊர்தியாக உறைகின்றவர்‌. இந்தச்‌ சிவபிரான்‌ இப்பெண்ணை வாடுமாறு செய்து இவளுக்குத்‌ துன்பம்‌ செய்வது அவருக்குப்‌ பெருமை தருவது ஒன்றா?

சிவபெருமான்‌ சினம்‌ பொங்கும்‌ இளநாகத்தைப்‌ பூண்டவர்‌. ஒற்றை மாலை அணிந்தவர்‌. ஆமை ஓட்டையும்‌, வெண்மையான பூணூலையையும்‌ அணிந்தவர்‌. தேன்‌ நிறைந்த புதிய கொன்றை மலர்மாலை அணிந்த அழகிய இளைஞர்‌ இவர்‌. இளநங்கையான உமையம்மையை ஒருபாகமாக உடையவர்‌. திருப்பாச்சிலாச்சிராமத்தில்‌ உறைபவர்‌. சங்கொலி போல திருநீறு அணிந்த திருமேனியை உடைய இறைவர்‌ 'இவர்‌. இவரோ இத்தாழ்குழலாள்‌ வருந்தச்‌ சாமர்த்தியமான செயல்‌ செய்வது! இது இவர்‌ பெருமைக்குப்‌ பொருந்துமோ?

சிவபெருமான்‌ தனது அம்பின்‌ வலிமையால்‌ அருச்சுனனோடு போரிட்டு வென்று அவனுக்கு பாசுபதாஸ்திரம்‌ வழங்கி அருள்‌ செய்தவர்‌. இராவணனின்‌ தற்பெருமையை அழித்தவர்‌. மும்மூர்த்திகளுக்கும்‌ தலைவராம்‌ அவர்கட்கு நடுவே நின்று படைத்தல்‌, காத்தல்‌, அழித்தல்‌ தொழிலைப்‌ புரிய அருள்‌ செய்பவர்‌. எல்லோராலும்‌ துதிக்கப்பெறுபவர்‌. திருப்பாச்சிலாச்சிராமத்தில்‌ உறையும்‌ மகாதேவராகிய சிவபெருமான்‌ திருப்பெயரை-யன்றி வேறு வார்த்தைகள்‌ பேசுவதற்கு இப்பெண்‌ அறியாள்‌. இப்பெண்ணை வாடச்‌ செய்தல்‌ இவருடைய தொடர்புக்கு அழகிய செயல்‌ ஆகுமோ?

சிவபெருமான்‌ தீப்பிழம்பாய்‌ நின்ற பொழுது அவன்‌ திருமுடியை நான்முகன்‌ தேடி அடைந்ததுமில்லை. கீழே உள்ள அவருடைய திருவடியை நீல நிறத்தனாகிய திருமால்‌ அடைந்ததுமில்லை என்று உலகம்‌ புகழுமாறு தீ உருவாக நின்றவர்‌ சிவபெருமான்‌. ஆலமரங்களின்‌ உச்சியில்‌ பெரிய முழுநிலா சென்று தோயும்‌ சோலைகள்‌ சூழ்ந்த திருப்பாச்சிலாச்சிராமத்தில்‌ உறைந்திருக்கின்றார்‌ பால்வண்ணரான சிவபெருமான்‌. இப்பைந்தொடியாள்‌ வாடுமாறு வஞ்சித்தல்‌ இவர்‌ பண்புக்கு ஏற்ற செயல்‌ ஆகுமோ?

சமணர்கள்‌ நாணத்தோடு கூடிய செயல்களை மறந்து ஆடையின்றித்‌ திரிவதோடு எல்லோராலும்‌ பரிகசக்கத்‌ தக்கவர்கள்‌. புத்தர்கள்‌ இருவேளை உண்டு அஞ்சத்தக்க நகையோடு திரிகின்றனர்‌. அவர்களுடைய சொற்களை உண்மை எனக்‌ கொள்ள வேண்டாம்‌. திருப்பாச்சிலாச்சிராமத்தில்‌ சிவபெருமான்‌ ஆணோடு பெண்‌ வடிவினராய்‌, அணிகலன்கள்‌ திருமார்பில்‌ பூண்டவராய்‌ விளங்குகின்றார்‌. இப்பெருமான்‌ இப்பூங்கொடியாளை வாடச்‌ செய்து பழிப்புரை கொள்ளுவது இவரது அழகுக்கு ஏற்ற செயலாகுமோ?

உள்ளம்‌ நிறைந்த அன்போடு தொண்டர்கள்‌ வணங்கும்‌ ஆச்சிராமம்‌ என்னும்‌ ஊரில்‌ உறைகின்றவர்‌ சிவபெருமான்‌. அன்பர்கள்‌ காட்டும்‌ நறுமணப்‌ புகை நிறைந்த மாலைகளைச்‌ சூடியவர்‌. அழகும்‌ தூய்மையும்‌ உடையவருமான சிவபெருமானை, மலர்ந்த குளிர்ச்சியான சோலைகள்‌ சூழ்ந்த சீகாழிப்‌ பதியில்‌ தோன்றிய நற்றமிழ்‌ வல்ல ஞானசம்பந்தன்‌ போற்றிப்‌ பாடினார்‌. இன்றைக்கும்‌ ஓதுவாரது நோய்‌ தீர்க்கும்‌ இந்தத்‌ தமிழ்‌ மாலையை ஏத்திப்‌ பரவி வழிபடுவோரை வினைகள்‌ சாரா.