திருப்பேணுபெருந்துறை

திருப்பேணுபெருந்துறையில்‌ உறையும்‌ சிவபெருமான்‌ படம்‌ பொருந்திய பெரிய நாகம்‌, பல மலர்களோடு இணைந்த கொன்றை மலர்‌, வெண்மையான பன்றிக்‌ கொம்பு ஆகியவற்றை தலையில்‌ அணிந்தவர்‌. அகமலர்ச்சி உடையவர்‌. பலர்‌ இல்லங்களுக்கும்‌ சென்று “ஐயம்‌ இடுக' என்று கேட்பவர்‌. கடமை தவறாதவர்களுக்குச்‌ செல்வத்துட்‌ செல்வமாய்‌ இருக்கின்றவர்‌. அழகிய மான்விழி போன்ற கண்களையும்‌, தளிர்‌ போன்ற மேனியையும்‌ உடைய உமையம்மையை ஒரு பாகமாகக்‌ கொண்ட தலைவர்‌ இவர்‌. நிலைத்த பழமையான புகழை உடையவர்‌.

சிவபெருமான்‌ குற்றமற்ற பேணுபெருந்துறையில்‌ விளங்குபவர்‌. அரி, அயன்‌, அரன்‌ ஆகிய முத்தொழிலைச்‌ செய்யும்‌ மூவரையும்‌ அதிட்டித்து நின்று அவரவர்‌ தொழிலைத்‌ திறம்பட ஆற்றச்‌ செய்பவர்‌. தன்னிடத்து ஒடுங்கிய உலகம்‌ முதலிய யாவற்றையும்‌ மீளவும்‌ தோற்றுவிக்கும்போது, சிவம்‌, சத்தி என்னும்‌ இருவராகி நிற்பவர்‌. இவர்களில்‌ வேறாய்‌ பரசிவமுமாகி நிற்பவர்‌. நம்‌ பாவங்கள்‌ தர, நல்வினைகளை செய்வதற்குத்‌ தனு, கரண, புவன போகங்களைக்‌ கொடுத்துச்‌ சிவபுண்ணியம்‌ அடையச்‌ செய்பவர்‌. பதினெண்கணங்களுக்குத்‌ தலைவராக நின்று அவர்களைத்‌ தமக்குப்‌ பணிய வைப்பவர்‌. மேரு மலையை வில்லாகக்‌ கொண்டு, மும்மதில்களையும்‌ எரித்த தேவதேவர்‌ ஆவார்‌.

யானையின்‌ கைபோன்ற நீண்ட வாழைக்‌ குலையில்‌ பழுத்த பழங்களிலும்‌, காய்த்த குலைகளிலும்‌, கமுக மரங்களின்‌ பூம்பாளைகளிலும்‌ ஒழுகும்‌ தேன்‌ பாய்ந்து பெருகும்‌ பெருந்துறையில்‌ வீற்றிருப்பவர்‌ சிவபெருமான்‌. இவர்‌ கொன்றைப்‌ பூமாலையையும்‌ கூவிள மாலையையும்‌ தம்‌ தலையில்‌ அணிந்திருப்பவர்‌. கங்கையை ஏற்றிருப்பவர்‌. பூமாலை சூடிய உமையைத்‌ தன்‌ உடலின்‌ ஒருபாகமாகக்‌ கொண்ட பெருமை பெற்ற வேடத்தை உடையவர்‌. அதனால்‌ ஒப்பற்ற அம்மையப்பர்‌ என்ற பெருமை உடைய உருவினர்‌ ஆவார்‌.

நிலம்‌, வானம்‌, நீர்‌, தீ, காற்று ஆகிய ஐம்பூதங்களின்‌ வடிவினர்‌. ஐம்புலன்களையும்‌ வென்றவர்‌. பொய்மைகள்‌ இல்லாத புண்ணியராய்‌ வாழுபவர்‌ சிவபெருமான்‌. திருவெண்ணீறு அணிந்திருப்பவர்‌. நன்மையும்‌ தீமையும்‌ சிவனாலின்றி வருவதில்லை என்ற நல்லுள்ளங்கள்‌ கொண்டு ஆணவம்‌, கன்மம்‌, மாயைகள்‌ தீர்ந்தவராய்‌ வாழும்‌ சிவனடியார்கள்‌ நிறைந்த பேணுபெருந்துறையார்‌ ஆவார்‌.

சிவபெருமான்‌ அரிசிலாற்றின்‌ அலைகள்‌ மோதும்‌ கரையில்‌ அமைந்துள்ள பேணுபெருந்துறையில்‌ எழுந்தருளி உள்ளவர்‌. நீலமணி போலும்‌ நிறம்‌ அமைந்த குவளை மலர்களில்‌ இருந்து வெளிப்படும்‌ தேன்‌ இங்கு கமழ்ந்து நிறைகிறது. பணிவுடைய துதிப்பாடல்கள்‌ பாடும்‌ நன்மை தழுவிய நாவினுடைய பக்தர்கள்‌ அன்போடு வழிபட எளியராய்‌ இருப்பவர்‌ இவர்‌. துணிவற்றவர்களாய்த்‌ தங்கள்‌ மனம்‌ பொருந்தாத அறியாமை உடையவர்களாய்‌ உள்ளவர்கள்‌ பகுத்தறிவதற்கு அரியவர்‌. அழகிய நீலநிறம்‌ பொருந்திய கண்டத்தை உடையவர்‌.

சிவபெருமான்‌ திருப்பேணுபெருந்துறை இறைவர்‌ ஆவார்‌. தம்மை மதியாதவர்களான அசுரர்களின்‌ முப்புரங்களை எரித்து அழித்தவர்‌. அவற்றை அழிக்க வில்‌ வன்மை காட்டிய எம்‌ தந்தை ஆவார்‌. தேவர்கள்‌ வழிபட அவர்கட்கு தமது அருளை நல்கிய வித்தகர்‌ ஆவார்‌. வேதங்களின்‌ தலைவர்‌. இசை நலம்‌ நிறைந்த பாடல்களோடு ஆடி மகிழும்‌ பசுபதியாய ஈசனும்‌ ஆவார்‌. ஒரு பாகம்‌ பெண்ணுமாய்‌, ஒருபாகம்‌ ஆணுமாய்‌ விளங்கும்‌ நீண்ட சடைமுடியை உடைய தலைவர்‌ ஆவார்‌.

செழித்த மாமரத்திலிருந்து உதிர்ந்த பழங்களை குளிர்ச்சியுடைய அரிசிலாறு உருட்டிக்‌ கொண்டு வருகிறது. அந்த ஆற்றங்கரையருகே சூழ்ந்து விளங்கும்‌ தளிர்கள்‌ நிறைந்த சோலைகளில்‌ மெல்லிய நடையை உடைய அன்னங்கள்‌ கூடுகின்றன. இங்கு திருப்பேணுபெருந்துறை இறைவராகிய சிவபெருமான்‌ வீற்றிருக்கின்றார்‌. விருப்பம்‌ பொருந்திய உள்ளத்தோடு நன்மை அமைந்த நாவின்௧ண்‌ தம்வினை கெட, நான்கு வேதங்களையும்‌ ஆறு அங்கங்களையும்‌ பிழையின்றி முன்னோர்‌ ஓதி வரும்‌ முறையில்‌ பெரியோர்‌ ஓதி ஏத்தும்‌ பெருமானார்‌ இவர்‌.

ஆண்‌ அன்னம்‌ கன்னிமையுடைய பெண்‌ அன்னத்தோடு ஆடியும்‌ கூடியும்‌ மகிழும்‌ இடத்தில்‌ இருப்பவர்‌ பேணுபெருந்துறை சிவபெருமான்‌ ஆவார்‌. இலங்கை மாநகர்‌ அழகிய கடற்கரைச்‌ சோலைகளை உடையது. வெண்மையான கடல்‌ அலைகளால்‌ சூழ்ந்துள்ளது. நாற்புரங்களிலும்‌ கடலையே வேலியாக உடையது. இந்நகரின்‌ மன்னனாகிய இராவணன்‌ தளர்ச்சி அடையுமாறு பெரிய கயிலை மலையைக்‌ கால்விரலால்‌ ஊன்றி, அவனுடைய சிறந்த வலிமையுடைய மார்பும்‌, தோள்களும்‌ வலிமை குன்றுமாறு செய்தார்‌ சிவபெருமான்‌ பின்னர்‌ அவனது சாமகானம்‌ கேட்டு அவனுக்கு அருள்பல செய்தவர்‌. இவர்‌ மூவிலை வேலையுடைய மூர்த்தியாவார்‌.

முட்களையுடைய தண்டின்மேல்‌ தாமரை மொட்டு இனிய முகம்போல்‌ மலருகிறது. அதன்கண்‌ கயல்மீன்கள்‌ பாய்கின்றன. தேனை உடைய நீலமலர்‌, கண்மலரை ஒத்துள்ளது. 'இந்த இயற்கை அழகு மாதர்களின்‌ மலர்ந்த முகங்களைப்‌ போலத்‌ தோற்றம்‌ தருகின்றன. இவ்வாறு வளம்‌ பெற்ற பேணுபெருந்துறையில்‌ நம்‌ இறைவராகிய சிவபெருமான்‌ வீற்றிருக்கிறார்‌. கொக்கு வடிவங்‌ கொண்ட பகாசுரனின்‌ வாயைப்‌ பிளந்தவரும்‌ நிலவுலகைத்‌ தோண்டிய கடல்‌ வண்ணனும்‌ ஆகிய திருமாலும்‌, தாமரை மலரின்‌ அகஇதழ்கள்‌ மேல்‌ உறையும்‌ நான்முகனும்‌ உணர்ந்து அறிதற்கரியவர்‌; உமையம்மையின்‌ கணவர்‌ ஆவார்‌.

சிவபெருமானை, பருஉடல்‌ கொண்ட சமணர்களும்‌ தேரர்களாகிய புத்தர்களும்‌ அறிகிலர்‌. அவர்கள்‌ தங்களுடைய ஆடைகளைக்‌ களைந்தும்‌, பல்வகை விரதங்களை மேற்கொண்டும்‌, கைகூப்பி வணங்காதவர்கள்‌. திருப்பெயர்களைக்‌ கூறாதவர்கள்‌. வம்பு செய்யும்‌ இயல்பினர்‌. வீண்தவம்‌ புரிகின்றவர்கள்‌. அவர்களின்‌ மாறான செய்கைகளைக்‌ கண்டு அவற்றை மேற்கொள்ளக்‌ கூடாது. சிவநெறியை விரும்புமின்‌. யோகம்‌, தண்டம்‌, பாம்பு, தலைமாலை, சூலம்‌ ஆகியவற்றை ஏந்திய தேவர்‌ தலைவராகிய நம்‌ இறைவர்‌, வண்டுகளும்‌, தேனும்‌ நிறைந்து வாழும்‌ "சோலைகள்‌ நிறைந்த பேணுபெருந்துறையில்‌ உள்ளார்.

வாயில்களை உடைய மாடவீதிகளையும்‌ நன்கமைந்த வீதிகளையும்‌ உடைய கழுமலம்‌ என்னும்‌ ஊரில்‌ தோன்றி, அன்போடு கலந்து இன்சொல்‌ நடையோடு பாடுபவர்‌ ஞானசம்பந்தன்‌. நல்ல பேணுபெருந்துறை மேவிய வலிய சூலப்படையை உடைய இறைவன்‌ திருவடிகளைப்‌ பரவிப்‌ போற்றிய இப்பதிகப்‌ பாடல்கள்‌ பத்தையும்‌ ஓதுபவர்‌. எல்லா நன்மைகளும்‌ உடையவராய்‌ மனம்‌ ஒன்றி உலகில்‌ நிலையான வாழ்வினைப்‌ பெறுவர்‌.