திருப்பாம்புரம்

விண்ணவர்‌ போற்றும்‌ திருப்பாம்புர நன்னகரில்‌ வீற்றிருப்பவர்‌ சிவபெருமான்‌. இவர்‌ சிறந்த அணிகலன்கள்‌ விளங்கும்‌ அழகிய மார்பில்‌ முப்புரிநூல்‌ அணிந்தவர்‌. திரிபுரங்களை எரித்த வீரச்செல்வர்‌. கச்சணிந்த அழகிய தனங்களையுடைய உமையம்மையை ஒரு பாகமாக ப்‌ பொருந்தியவர்‌. மான்குட்டியை கையில்‌ ஏந்தியவர்‌ நீலமணிபோலும்‌ திகழ்கின்ற கண்டத்தையுடைய தலைவர்‌. உலகில்‌ அழகிய புகழோடு விளங்கும்‌ மறைகளை அருளிய நெற்றிக்‌ கண்ணர்‌ இவர்‌ ஆவார்‌.

சிவபெருமான்‌ திருப்பாம்புர நன்னகர்‌ இறைவராவார்‌. இவர்‌ கொக்கிறகு என்னும்‌ மலர்‌, வில்வம்‌, ஊமத்தம்பூ, கொன்றை மலர்‌ எருக்க மலர்‌ ஆகியவைகளைத்‌ தனது சடைமுடியில்‌ அணிந்தவர்‌. எம்‌ தலைவராகிய இவர்‌ சங்கு மணிகளோடு ஆமை ஓட்டைப்‌ பூண்டு அழகாக அனலின்கண்‌ ஆடுபவர்‌. விண்ணோர்கள்‌ மணம்‌ கமழும்‌ மலர்களால்‌ அருச்சிக்கவும்‌ அருகில்‌ பூதங்கள்‌ பல பாடவும்‌ வருவார்‌.

திருப்பாம்புர நன்னகர்‌ இறைவர்‌ கோவண ஆடையை அணிந்திருப்பவர்‌. அதன்மேல்‌ காற்றை உட்கொள்ளும்‌ நல்ல பாம்பு ஒன்றைச்‌ சுற்றி இருப்பவர்‌. பின்னிய நீண்ட சடைகளைத்‌ தாழவிட்டுக்‌ கொண்டு பித்தராய்‌ ஆடித்‌ திரிபவர்‌ எமது பெருமான்‌. அவர்‌ மேல்‌ மணம்‌ நிறைந்த சிறந்த மலர்களைத்‌ தூவி ஒவ்வொரு நாளும்‌ நாம்‌ வழிபட வேண்டும்‌. அப்போது மலையரசன்‌ மகளாகிய பார்வதியும்‌ தாமுமாய்‌, நான்மறைகளை அடியவர்‌"புகழ்ந்து போற்றிப்‌ பாடிக்கொண்டுவர, நம்முன்‌ காட்சி தருவார்‌.

மேகங்கள்‌ தோயும்‌ சோலைகளில்‌ சிறந்த மயில்கள்‌ ஆடுகின்றன. மாடமாளிகைகளில்‌ ஏறி, செம்பஞ்சு தோய்த்த சிவந்த மெல்லிய பாதங்களை உடைய பெண்கள்‌ ஆடுகின்றனர்‌. சிவபெருமான்‌ இவ்வித சிறப்புக்களைக்‌ கொண்ட திருப்பாம்புர நன்னகரின்‌ இறைவர்‌ ஆவார்‌. எம்பெருமான்‌ இறக்கும்‌ நாள்‌ இல்லாதவராய்‌, தோற்றமும்‌ இல்லாதவராய்‌ ஒளி பெற்று விளங்கும்‌ சோதி வடிவினராய்த்‌ திகழ்பவர்‌. இவர்‌ விடம்‌ பொருந்திய கண்டத்தை உடையவர்‌. நள்ளிருளில்‌ நடனம்‌ புரியும்‌ நம்பப்படத்தக்க கடவுளாவார்‌.

விதிமுறை வழுவாமல்‌ வேதியர்கள்‌, வேள்விகள்‌ பல‌ செய்து வருகின்றனர்‌. அதனால்‌ வேத ஒலி நீங்காத பதி அது என விரும்பி உமையம்மையும்‌ தாமுமாய்த்‌ திருப்பாம்புர நன்னகரில்‌ விளங்குகிறார்‌ நம்‌ இறைவர்‌. தம்‌ சடைமுடிமீது கங்கையின்‌ பக்கத்தில்‌ சிரிக்கும்‌ தலைமாலையையும்‌ பிறைமதியையும்‌ அணிந்துள்ளார்‌. இந்த அணிகள்‌ நடனத்திற்குரிய கதி அதுவே என்னும்படி, காளி முன்னே இருந்து காண, இடுகாட்டுக்குள்‌ நடனம்‌ செய்த தலைவர்‌ இவர்‌ ஆவார்‌.

திருப்பாம்புர நன்னகர்‌ இறைவர்‌ கல்வி கற்றுத்‌ தெளிந்த ஞானியர்களால்‌ உணரப்படும்‌ ஒருவராவார்‌. ஒளியாக விளங்கும்‌ சோதி உருவினராவார்‌. உமையம்மையை இடப்பாகமாகக்‌ கொண்டவர்‌ எம்‌ வள்ளல்‌ ஆவார்‌. இளமான்‌ மறியைக்‌ கையில்‌ ஏந்திய மைந்தர்‌ ஆவார்‌. திருப்பாற்கடலைக்‌ கடைந்த பொழுது எழுந்த ஆலகால விடத்திற்கு அஞ்சிய தேவர்கள்‌, “ஆதியாக விளங்கும்‌ தலைவனே, நீ எம்மைக்‌ காத்தருள்க” என வேண்டினர்‌. அந்த வேண்டுகோளுக்கு இணங்கி நஞ்சினை உண்டும்‌, கடலினின்று எழுந்த பிறை மதியைச்‌ சடையிலே வைத்தும்‌ அருள்‌ புரிந்தவர்‌ எம்‌ மேலான தலைவராயெ சிவபிரான்‌ ஆவார்‌.

திருப்பாம்புர நன்னகர்‌ இறைவர்‌ முன்பு திருமாலுக்குச்‌ சக்கராயுதம்‌ அளித்தவர்‌. தாமரை மலர்‌ மேல்‌ உறையும்‌ பிரமனது ஐந்தலைகளில்‌ ஒன்றைக்‌ கொய்தவர்‌. சனகாதி முனிவர்கள்‌ நால்வருக்குக்‌ கல்லாலின்‌ கீழிருந்து அறம்‌ அருளியவர்‌. தீயில்‌ நடனமாடுபவர்‌. தமது கழலணிந்த திருவடியால்‌ காலனைக்‌ காய்ந்தவர்‌. காமனைப்‌ பொடிபட நோக்கியவர்‌. உபமன்யு முனிவருக்குப்‌ பாற்கடல்‌ அளித்து அருள்கள்‌ செய்த தலைவர்‌ ஆவார்‌.

இளங்கொடி போன்ற பெண்கள்‌ அரிசிலாற்றில்‌ நீராட வருகின்றனர்‌. அந்த நத, ஆற்றங்கரைத்‌ தோட்டங்களில்‌, பெரிய மணிகளை அடித்து வந்து சேர்க்கின்றன. திருப்பாம்புர நன்னகர்‌ இறைவர்‌ இங்கு வீற்றிருக்கிறார்‌. செருக்குற்ற வலிய இராவணன்‌ கயிலை மலையைப்‌ பெயர்த்து எடுத்தபோது மெல்லிய திருவடி விரல்‌ ஒன்றை ஊன்றி அவனை நெருக்கினார்‌. பின்னர்‌ இராவணன்‌ தன்‌ பிழையை உணர்ந்து வருந்தி இறைவனைப்‌ போற்றினான்‌. அதன்பின்‌ அவனுக்கு அருள்பல செய்தவர்‌ நம்‌ தலைவர்‌ ஆவார்‌.

முடிசூடிய அமரர்களும்‌ முனிகணத்தவர்களும்‌ முறையாக‌ சிவபெருமான்‌ திருவடிகளைப்‌ பணிந்து ஏத்துதற்கு உரிய தகுதி வாய்ந்த நல்ல இடம்‌ திருப்பாம்புரம்‌. இந்த நன்னகரத்தில்‌ உமையம்மையும்‌ தாமுமாய்‌ எழுந்தருளி இருக்கிறார்‌. மணம்‌ பொருந்திய தாமரை மலர்‌ மேல்‌ விளங்கும்‌ பிரமனும்‌ திருமாலும்‌ அன்போடு அடிமுடி காண முடியாமல்‌ திகைத்து நின்றனர்‌. அப்போது தீவண்ணராய்த்‌ தோன்றிய சிவனார்‌ தூறாக மண்டிக்‌ கடக்கும்‌ வினைகள்‌ பலவற்றையும்‌ தீர்த்து அவர்களுக்கும்‌ அருள்‌ செய்தார்‌. இவர்‌ எம்‌ செல்வர்‌ ஆவார்‌.

பரு உருவம்‌ படைத்த சமணர்களாலும்‌ புத்தர்களாலும்‌, மிகச்‌ சிறிய ஆடையை அணிந்தும்‌ கண்டபடி பேசக்‌ கொண்டும்‌, நின்றபடியே உண்ணும்‌ சமணத்‌ துறவியராலும்‌, உள்ளபடி அறியப்படாதவராகுிய சிவபெருமான்‌ திருப்பாம்புர நன்னகரின்‌ இறைவர்‌ ஆவார்‌. வண்டுகள்‌ மொய்க்கும்‌ கூந்தலை உடைய மலைமகளாகிய பார்வதி தேவி நடுங்க யானையை உரித்துப்‌ போர்த்தவர்‌. நாம்‌ முற்பிறவிகளில்‌ செய்த பாவங்களைத்‌ தீர்ப்பவர்‌.

உலகில்‌ புகழ்‌ நிறைந்து ஓங்கியதும்‌ பெரிய மதில்களால்‌ சூழப்பெற்றதுமான நன்னகரம்‌ திருப்பாம்புரம்‌. இங்கு வீற்றிருக்கும்‌ இறைவனை, மழை வளத்தால்‌ சிறந்து அழகியதாய்‌ விளங்கும்‌ வயல்கள்‌ சூழப்பெற்றதும்‌, மாடவீடுகள்‌ உடையதும்‌, கழுமலம்‌ என்னும்‌ பெயர்‌ பெற்ற பழம்பதியில்‌, கவுணியர்‌ கோத்திரத்தில்‌ அன்பிற்‌ சிறந்தவனாகவும்‌, புகழால்‌ ஓங்கி விளங்கும்‌ நான்மறை வல்ல ஞானசம்பந்தன்‌ போற்றிப்‌ பாடினார்‌. இந்த செந்தமிழ்ப்‌ பதிகத்தை ஓதவல்லவர்‌ புகழும்‌ அழகும்‌ மிகுந்தவராய்ச்‌ செல்வத்தால்‌ சிறந்து வாழ்ந்து, முடிவில்‌ சிவனடியை அடைவார்‌.