திருவாழ்கொளிபுத்தூர்

சிவபிரான்‌ திருநீறு அணிந்த மார்பினன்‌. அவர்‌ வீரம்‌ மிக்க விடைமீது ஏறி வருவார்‌. பூத கணங்கள்‌ அவரைப்‌ புடை சூழ்ந்து வரும்‌. கொடிகள்‌ கட்டிய ஊர்களில்‌ திரிந்து பற்பல வாசகங்களைக்‌ கூறிப்‌ பலியேற்பது அவர்‌ வழக்கம்‌. அவர்‌ அழகிய வாள்‌ போன்ற நெடிய கண்களை உடைய உமையம்மையைத்‌ தனது இடப்பாகத்தில்‌ கொண்டுள்ளார்‌. அவர்‌ வாழ்கொளிபுத்தூரில்‌ எழுந்தருளி அருள்‌ ஆட்சி செய்து வருகிறார்‌. அவ்வூர்‌ சென்று மணம்‌ கமழும்‌ சிறந்த மலர்களால்‌ அவரை அருச்சித்து அக்கறைமிடற்று அண்ணலைக்‌ காண்போமாக.

சிவபெருமான்‌ தனது இடையில்‌ கட்டிய கோவண ஆடையின்‌ மேல்‌ ஆடுகின்ற அரவம்‌ (பாம்பு) ஒன்றைக்‌ கட்டிக்‌ கொண்டுள்ளார்‌. அவர்‌ துளை பொருந்திய வெண்மையான தலைஓட்டைக்‌ கையில்‌ ஏந்திப்‌ பலியேற்கிறார்‌. அவர்‌ சினம்‌ பொருந்திய விடைமேல்‌ ஏறிப்‌ பலரும்‌ புகழ வருகிறார்‌. இமவான்‌ மகளாகிய உமையம்மையை ஒரு பாகமாகக்‌ கொண்டுள்ளார்‌. சிவபிரான்‌ எழுந்தருளிய திருவாழ்கொளிபுத்தூர்‌ செல்வோம்‌. அங்கு மணம்‌ கமழும்‌ சிறந்த மலர்களைத்‌ தூவி, அவ்விரி சடையானின்‌ திருவடிகளைச்‌ சேர்வோம்‌.

சிவபெருமான்‌ நெடிய பாம்பை அணிகலனாகப்‌ பூண்டுள்ளார்‌. அனலைக்‌ கையில்‌ ஏந்தி ஆடிக்கொண்டிருக்கிறார்‌. அவர்‌ பிரம்மாவின்‌ தலையோட்டை தனது அழகிய கைகளில்‌ ஏந்திக்‌ கொண்டுள்ளார்‌. பல ஊர்களில்‌ திரிந்து, பலவாறு கூறிக்கொண்டு மக்கள்‌ உணவாகத்‌ தரும்‌ பிச்சையை தனக்கு உணவாக ஏற்றுக்‌ கொள்ளுகிறார்‌. உமையம்மையைத்‌ தனது ஒரு பாகமாக ஏற்றிருக்கும்‌ சிவபிரான்‌ எழுந்தருளிய திருவாழ்கொளிபுத்தூர்‌ செல்வோம்‌. அங்கு அப்பெருமானின்‌ திருவடிகளில்‌ சிறந்த மலர்களைத்‌ தூவுவோம்‌. நம்‌ தலைவனாக விளங்கும்‌ அவன்‌ திருவடி நிழலில்‌ சேர்வோம்‌.

சிவபெருமான்‌ கொன்றை மாலையையும்‌, வெண்மதியையும்‌, கங்கையையும்‌, தனது தாழ்ந்து தொங்கும்‌ சடைமுடியில்‌ சூடியவன்‌. ஊர்மக்கள்‌ இடும்‌ பிச்சையை ஏற்றுக்‌ கொண்டு அதுவே தனக்கு செல்வம்‌, உணவு என்று பலவாறு கூறிக்கொண்டிருப்பவன்‌. அவன்‌ கச்சணிந்த மென்மையான தனங்களை உடைய உமையம்மையை ஒரு பாகமாகக்‌ கொண்டவன்‌. சிவபிரான்‌ எழுந்தருளிய திருவாழ்கொளிபுத்தூர்‌ செல்வோம்‌. கார்காலத்தே மலரும்‌ சிறந்த கொன்றை மலர்களைத்‌ தூவிக்‌ கறைமிடறனாகிய அப்பெருமானின்‌ திருவடிகளைக்‌ காண்போம்‌.

சிவபெருமான்‌ கார்காலத்து மலராகிய கொன்றை மலர்மாலையை தன்‌ திருமேனியில்‌ அணிந்தவன்‌. ஒரு காதில்‌ வெண்‌ குழை அணிந்தவன்‌. முல்லை நிலத்து மலர்களால்‌ தொடுக்கப்பெற்ற மாலைகளைச்‌ சூடியவன்‌. பல ஊர்களுக்கும்‌ சென்று பற்பல கூறிப்‌ பலியேற்பவன்‌. அழகிய தனங்களை உடைய மலைமகளாகிய பார்வதியைத்‌ தனது ஒரு பாகமாகக்‌ கொண்டவன்‌. அந்த எம்பிரான்‌ எழுந்தருளிய திருவாழ்கொ ளிபுத்தூர்‌ செல்வோம்‌. நமக்குக்‌ இட்டிய இனமான மலர்களைத்‌ தூவி அவனது அடிகளைச்‌ சேர்வோம்‌.

புற்றின்கண்‌ வாழும்‌ பாம்பினை இடையில்‌ கட்டியவனே! சுடுகாட்டில்‌ ஆடுபவனே! தாமரை மலர்மேல்‌ உறையும்‌ பிரமனின்‌ உச்சித்‌ தலையைக்‌ கொய்தவனே! அத்தலை ஓட்டில்‌ பலிகொள்ளும்‌ தலைவனே! நம்‌ உள்ளத்தைக்‌ கொள்ளை கொள்ளும்‌ கள்வனே என்று கூறுவோம்‌. தனது முன்கைகளில்‌ வளையல்கள்‌ ஒலிக்கும்‌ பார்வதி தேவியை ஒரு பாகமாகக்‌ கொண்ட சிவபெருமான்‌ உறையும்‌ திருவாழ்கொளிபுத்தூர்‌ செல்வோம்‌. மொட்டவிழ்ந்த நறுமலர்களைத்‌ தூவி அப்பெருமானின்‌ தாளிணைகளைச்‌ சார்வோம்‌.

சிவபெருமான்‌ பரந்த காதுகளை உடைய யானையைக்‌ கொன்றவன்‌. அதன்‌ உதிரப்‌ பசுமை கெடாத தோலை உரித்துப்‌ போர்த்திருப்பவன்‌. கிள்ளிய பிரமன்‌ தலையோட்டைக்‌ கையில்‌ ஏந்தியிருப்பவன்‌. தாருகா வனத்து முனிவர்‌ மகளிர்‌ தம்‌ கைகளால்‌ இட்ட பிச்சையோடு ஐயம்‌, உண்டி என்று பலகூறப்‌ பலியேற்பவன்‌. மடப்பம்‌ வாய்ந்த நீல மலர்‌ போன்ற கண்களை உடைய உமாதேவியை ஒருபாகமாகக்‌ கொண்டவன்‌. அந்தத்‌ திருவாழ்கொளிபுத்தூர்‌ இறைவனை விரிந்த மலர்கள்‌ பலவற்றால்‌ அருச்சிப்போம்‌. அப்பெருமான்‌ தாள்‌ நிழலைச்‌ சார்வோம்‌.

சிவபெருமான்‌ உறைகின்ற உயர்ந்த கயிலை மலையை அசையுமாறு பெயர்த்தவன்‌ இராவணன்‌. அந்த இராவணனது ஒளி பொருந்திய கடகத்தோடு கூடிய தோள்‌ வலிமைய நெருக்கிய பெருமானே! ஊர்‌ மக்கள்‌ இடும்‌ பிச்சை ஐயம்‌ ஆகியவற்றை உண்ணும்‌ தலைவனே! வயலின்கண்‌ தோன்றி மலர்ந்த நீலமலர்‌ போன்ற நீண்ட கண்களையுடைய உமையம்மையின்‌ பாகனே! திருவாழ்கொளிபுத்தூர்‌ இறைவனே! என்று போற்றுவோம்‌. என்றும்‌ வெற்றியோடு மலர்ந்த சிறந்த மலர்களைத்‌ தூவுவோம்‌! அத்தாழ்‌ சடையன்‌ அடிகளைச்‌ சார்வோம்‌.

சிவபெருமானைத்‌ திருமாலும்‌ நான்முகனும்‌ கைகளால்‌ தொழுதேத்திக்‌ காணவும்‌ சாரவும்‌ இயலாதவனே! எரி உரு ஆகியவனே! பல ஊர்களிலும்‌ திரிந்து ஐயம்‌, பிச்சை ஆகியவற்றை உண்பவனே! என்று போற்றுவோம்‌. பொறிகளோடு கூடிய பாம்பின்‌ படம்‌ போன்ற அல்குலை உடைய உமையம்மையை ஒரு பாகமாக உடையவன்‌ நம்‌ வாழ்கொளிபுத்தூர்‌ இறைவன்‌. அவனை விரிந்த மலர்களைக்‌ கொண்டு தூவி வழிபடுவோம்‌. விகர்தனாகிய அவன்‌ சேவடிகளைச்‌ சேர்வோம்‌.

சிவபெருமானைக்‌ கொழுத்த அமணர்களும்‌, துவராடைகள்‌ போர்த்த புத்தர்களும்‌ புறம்‌ பேசுவர்‌. வெண்மையான தலையோட்டின்கண்‌ பலியேற்றலை விரும்பியவனே என்று அடியவர்கள்‌ புகழ்ந்து போற்றுவார்கள்‌. வண்டுகள்‌ மொய்க்கும்‌ அழகிய கூந்தலை உடைய உமையம்மையை ஒரு பாகமாக உடையவன்‌ அவன்‌. அவன்‌ எழுந்தருளிய வாழ்கொளிபுத்தூர்‌ செல்வோம்‌. அங்கு அடியவர்கள்‌ சிறந்த மலர்களைத்‌ தூவி வழிபட அவர்களுக்குக்‌ காட்சி அளிப்பவனாகிய சிவனடிகளைச்‌ சேர்வோம்‌.

மலைபோல உயர்ந்து வரும்‌ அலைகளை உடைய பெரிய கடல்‌, பெரிய கரையோடு மோதி முழங்குவது காழிப்‌ பழம்பதி. அங்கு தோன்றியவன்‌, உயர்ந்த நான்மறைகள்‌ ஓதும்‌ நாவினை உடைய நற்றமிழ்‌ ஞானசம்பந்தன்‌. வலிதாக உயர்ந்த சூலம்‌, வெண்மையான மழு, வாள்‌ ஆகியவற்றைப்‌ பயன்படுத்துவதில்‌ வல்லவன்‌ சிவபிரான்‌. அந்தச்‌ சிவபிரான்‌ விளங்கும்‌ வாழ்கொளிபுத்தூரைப்‌ போற்றிச்‌ சொல்லிய பாடல்களை ஓத வல்லவர்களுக்கு துயர்கள்‌ எளிதில்‌ கெடும்‌.